3 | Mehn Kahlemeng en Paipel kan Kak Seweseiuk

PAIPEL KIN KASALEHDA . . . Ohl oh lih lelepek kan me ahneki “pepehm me duwehte kitail.”—SEIMS 5:17.

Met Wehwehki

Paipel kin audaudki koasoipen ohl oh lih akan me ahneki soangsoangen pepehm kan. Ni atail kin wadek duwen irail, ele kitail kak diarada me emen irail ahneki pepehm me duwehte atail.

Ia Duwen Met Kak Sawas

Kitail koaros men meteikan en wehwehki atail pepehm. Ahpw ni mehlel ni atail kin nannanti en apwalih atail kahpwal en madamadau. Ni atail wadek Paipel, kitail kin sukuhlki duwen meteikan me ahneki madamadau oh pepehm me duwehte atail. Kahrehda kitail wehwehkihda me kaidehn kitail kelehpw ahpw meteikan pil kin lokolok duwehte kitail ni atail kin apwalih pwunod oh pepehm en nsensuwed kan.

Paipel kin kilelehdi pepehm en irail me sohla sawasparail oh koapworopwor. Mie pak me ke ahneki pepehm wet, ‘I solahr kakohng mour wet’? Moses ahneki pepehm wet, oh pil Elaisa oh Depit.—Nempe 11:14; 1 Nanmwarki 19:4; Melkahka 55:4.
Paipel padahkihong kitail duwen lih emen me adaneki Ana me “inenen nsensuwed mehlel” pwehki e sohte kak naineki seri oh lih teio me iang pwoudiki eh pwoudo kin kauwehki ih duwen met.—1 Samuel 1:6, 10.
Paipel mahsanih duwen ohl emen me adaneki Sohp me ahneki pepehm me duwehte atail. Mendahki e ahneki pwoson kehlail, e lokolongki pepehm en nsensuwed laud oh mie pak e nda: “I pwangadahr momour. . . . Solahr katepen ei mour.”—Sohp 7:16.

Sang ni atail sukuhlki duwen aramas pwukat nan Paipel me pweida ni ar powehdi madamadau sapwung kan, kitail pil kak alehdi kehl me kitail anahne, pwehn powehdi atail kahpwal kan.

Ia Duwen Paipel Eh Kin Sewese Kevin

Dahme Soumwahu en Bipolar Kin Wiahiong Ie

“I iangada soumwahu me adaneki bipolar disorder ni ei kereniong sounpar 50. Ekei pak I pehm me I kak powehdi ei kahpwal kan nan ei mour. Ahpw ekei pak, I pehm me solahr katepen ei mour.”

Ia Duwen Paipel Eh Kin Sewese Ie

“Emen aramas nan Paipel me ahneki pepehm me duwehte ahi iei wahnpoaron Piter. E wiahda sapwung kan me kahrehiong ih en pehm me sohte katepe. Piter sohte medemedewehte sapwung pwukat, ahpw e rapahki kompoakepah kan me nsenohki ih. Ni ahnsou me I kin apwalki wia mehkot pwehki ei soumwahu en bipolar, ei soh unsek kan kak poweiehdi oh kahrehiong ie en pehm me sohte katepei. Duwehte Piter, I kin song en mi rehn kompoakepahi kan me men sewese ie en dehr uhdihsang nannanti.

“Pil emen aramas nan Paipel me kin kihong ie nsenamwahu laud iei Nanmwarki Depit. E kin kalapw mworuskihla eh irair oh koluhkihla eh sapwung en mahs kan. I kak wehwehki eh pepehm pwehki ekei pak I kin wia de nda mehkot me I koluhkihla. Dahme Depit mahsanih nan Melkahka 51 kin kansenamwahu. Nan iretikitik 3, Depit mahsanih: ‘I ese duwen ei sapwung kan; dipei kan kin sansal ong ie ahnsou koaros.’ Met uhdahn kasalehda dahme I kin pehm ni ahnsou me I kin uhdahn mworus, pwehki I kin apwalki ahneki madamadau pwung ong pein ngehi. Ahpw I pil wehwehki en Depit mahsen ko nan iretikitik 10: ‘Maing Koht, komw ketin wiahiong ie ehu mohngiong mwakelekel, oh ketikihong nan kapehdiet ehu ngehn [“madamadau,” NW] kapw oh loalopwoat.’ I kin wia soangen pekipekohte ong Koht en ketin sewese ie wekidala dahme I kin medewehki pein ngehi. Oh pil iretikitik 17 kin kansenamwahwih ie. E mahsanih: ‘Maing Koht . . . komw sohte pahn ketin soikala koluhla mehlel.’ Iretikitik wet kamehlelehiong ie me Koht ketin poakohng ie.

“Ni ei kin medemedewe mehn kahlemeng kan nan Paipel oh dahme Koht ketikihongieier ni ahnsou wet, met kin kakehlaka ei koapworopwor ong ahnsou kohkohdo. Inou en Paipel kan wiahla mehkot mehlel ong ie oh met kin uhdahn sewese ie en nannantihte.”