“Kolokol Ehupene me Kumwail Alehsang Sapwellimen Koht Manaman”
Wahnpoaron Pohl kangoangehki Kristian kan nan Episos, kumwail pousehlahte “kanengamahiong emenemen ni limpoak, . . . oh kumwail ahneki popohl nanpwungamwail oh nantihong kolokol ehupene me kumwail alehsang sapwellimen Koht manaman.”—Ep. 4:2, 3.
“Ehupene,” de minimin me kitail ahneki kin kohsang “sapwellimen Koht manaman.” Minimin kin wia kisehn sapwellimen Koht manaman. Ahpw, duwehte me Pohl koasoia, kitail anahne kolokol minimin. Ihs me anahne wia met? Emenemen Kristian anahne sewese ‘kolokol ehupene me re alehsang sapwellimen Koht manaman.’
Pwehn karasahda met, medewehla ma emen kihong uhk sidohsa kapw pwoat. Ihs me pwukoahki apwalih sidohsao? Kowe me pahn apwalih. Ma ke sohte apwalih mwahu, ke sohte kak kapwukoahki aramas me kihong uhk kisakiso ma sidohsao ohla.
Duwehte met, atail minimin wia kisakis ehu sang Siohwa ahpw emenemen kitail anahne wia uwen atail kak en kolokolete. Ma kitail sohte ahneki popohl rehn riatail Kristian men, kitail kak pein idek rehtail, ‘I kin wia uwen ei kak pwehn mie minimin nan mwomwohdiso?’
“NANTIHONG KOLOKOL” MINIMIN
Duwehte me Pohl ntingihedi, kitail kak kilang me mwein ekei pak e sohte pahn mengei en kolokol popohl rehn riatail Kristian kan, ahpw mehlel ma emen irail kansensuwedihkitailda. Ia duwe, en kolokol minimin kin wehwehki me ahnsou koaros ke anahne kohla rehn aramaso oh koasoia duwen kahpwalo? Soh. Pein idek rehmw, ‘Ma I kohla rehn aramaso, met pahn kamwahwihala de kalaudehla kahpwalo?’ Ekei pak e pahn mwahu en mahkohng aramaso de manokehla dahme wiawi.—Lep. Pad. 19:11; Mark 11:25.
Pein idek rehmw, ‘Ma I kohla rehn aramaso, met pahn kamwahwihala de kalaudehla kahpwalo?’
Duwehte me wahnpoaron Pohl ntingihedi, kitail en pousehlahte “kanengamahiong emenemen ni limpoak.” (Ep. 4:2) Ehu pwuhk koasoia me met kak wehwehki “ehuiong irail.” Met wehwehki me kitail kin pohnese me riatail Kristian kan kin wiahda sapwung duwehte kitail. Kitail koaros kin nannanti en “pwuhriong nan mour kapw.” (Ep. 4:23, 24) Ahpw sohte emen kitail kak wia met ni unsek. (Rom 3:23) Ma kitail kin pohnese met, e pahn mengeiong kitail en kin kanengamah, mahkpene oh ‘kolokol ehupene me kitail alehsang sapwellimen Koht manaman.’
Kitail pahn “ahneki popohl” nan mwomwohdiso ma kitail kin mahkpene oh manokehla dahme meteikan kin wia me kansensuwedih kitail. Lepin lokaiahn Krihs me kawehwehdi “ehupene” nan Episos 4:3 pil kak wehwehki selin kohpw kan (ligaments) me kehlail oh kin kolpene tih kan. Duwehte met, popohl oh poakohng riatail Kristian kan pahn sewese kitail en kolokolete atail nanpwungmwahupene mehnda ma ekei pak kitail sohte kin pwungki dahme re wia.
Ma riomw Kristian men kansensuwedihiukada de kalingeringerihiukada, song en wehwehki kahrepen eh wia mwo, a ieremen tetehkte soahng suwed kan me e wia. (Kol. 3:12) Kitail koaros sohte unsek oh ekei pak kitail kin kamedekihala meteikan. Ma kitail tamataman met, e pahn sewese kitail en wia atail pwukoa, en ‘kolokol ehupene me kitail alehsang sapwellimen Koht manaman.’