Pwuhken Sohp Kak Seweseiuk ni Omw Kin Lelohng Lokolok

1-2. Dahme kahrehda e mwahu kitail en wadek pwuhken Sohp?

KE WADEKEHR pwuhken Sohp? Pwuhk wet ntingdi mpen sounpar 3,500 samwalahro, ahpw aramas tohto kin wiahki pwuhk wet ehu pwuhk me keieu kaselel. Aramas kin kapinga sounnting en pwuhko pwehki e doadoahngki lepin lokaia kan me mengei en wehwehki, kaselel, oh manaman. Moses me ntingihedi pwuhk wet, ahpw Siohwa Koht me ketin padahkihong ih dahme e pahn ntingihedi.—2 Tim. 3:16.

² Pwuhken Sohp wia ehu pwuhk kesempwal nan Paipel. Dahme kahrehda? Pwehki e sewese kitail en wehwehki me tohnleng kan oh aramas akan anahne pilada ma irail pahn papah Siohwa pwehki arail poakohng ih oh pil poakohng mwareo. E pil padahkihong kitail duwen sapwellimen Siohwa irair kaselel kan, duwehte limpoak, erpit, pwung pahrek, oh manaman. Karasepe, pwuhken Sohp kamwarenki Siohwa “Wasa Lapalahpie” pak tohto sang pwuhk teikan nan Paipel. Pwuhken Sohp pil kawehwehda kahrepen Koht eh ketin mweidohng lokolok en wiawi, oh pil sapengala peidek kesempwal teikan me aramas tohto men ese pasapengpe.

3. Dahme kitail kak sukuhlkihsang pwuhken Sohp?

³ Duwehte atail kin kilang mwahu soahng kan ni atail mi pohn nahna ehu, pwuhken Sohp pil kin sewese kitail en kilang mwahu ia sapwellimen Siohwa madamadau ong atail kahpwal kan. Kitail pahn kilang ia duwen pwuhken Sohp eh kak sewese kitail ni atail kin lelohng lokolok. Kitail pahn sukuhlki dahme mehn Israel kan mahso kak sukuhlkihsang koasoipen Sohp, oh dahme kitail rahnwet pil kak sukuhlkihsang met. Kitail pil pahn sukuhlki ia duwen atail kak doadoahngki pwuhken Sohp pwehn sewese meteikan.

KOHT KETIN MWEIDOHNG SOHP EN LOKOLOK

4. Ia duwen Sohp eh uhdahn weksang mehn Israel kan nan Isip?

⁴ Sohp kin kousoan nan sahpw ehu me adaneki Us erein ahnsou me mehn Israel ko wie lidu kei nan Isip. Us ele mi wasa ieu me karanih Arepia. Weksang mehn Israel ko me tepida kaudokiong dikedik kan nan Isip, Sohp kin papah Siohwa ni lelepek. (Sos. 24:14; Esek. 20:8) Siohwa ketin mahsanihki Sohp: “Sohte aramas nin sampah me loalopwoat oh mwahu duwehte ih.”a (Sohp 1:8) Sohp inenen kepwehpwe, oh e pil ndand oh lapalap sang aramas koaros ni Palimese. (Sohp 1:3) Ele Sehdan uhdahn lingeringerki eh kilang ohl ndand oh lapalap menet eh kin papah Siohwa!

5. Dahme kahrehda Siohwa ketin mweidohng Sohp en lokolok? (Sohp 1:​20-22; 2:​9, 10)

⁵ Sehdan nda me ma Sohp lelohng lokolok, e pahn sohla papah Siohwa. (Sohp 1:​7-11; 2:​2-5) Siohwa uhdahn poakepoake Sohp, ahpw e ketin mweidohng Sehdan en kasalehda ma dahme e ndahki Sohp mehlel de likamw. (Sohp 1:​12-19; 2:​6-8) Sehdan kihsang nein Sohp mahn akan, kemehla nah seri ehk ko, oh kalokehki Sohp soumwahu kamedek ehu me kohda wasa koaros ni paliwereo. Ahpw mendahki Sehdan eh kahrehiong Sohp en lokolok laud, Sohp pousehlahte papah Siohwa ni lelepek. (Wadek Sohp 1:​20-22; 2:​9, 10.) Kedekedeo, Siohwa ketin kamwahwihala Sohp, kahrehiong en kepwehpwe sang mwoweo, pwurehng nainekihda seri ehk, oh aramas akan pil pwurehng waunekihla Sohp. Siohwa pil ketin katingiheki Sohp mour werei. Sohp momourki sounpar 140 mwurin mwo, oh kak kilang kadaudoke kan lella dih kapahieu. (Sohp 42:​10-13, 16) Dahme sapwellimen Koht ladu kan mahso kak sukuhlkihsang koasoipen Sohp? Oh dahme kitail rahnwet kak sukuhlkihsang met?

6. Ia duwen koasoipen Sohp eh kak sewese mehn Israel kan? (Pil kilang kilel.)

⁶ Ia duwen mehn Israel ko ar kakete paiekihda. Koasoipen Sohp kakete sewese mehn Israel ko me kin lokolok laud nan Isip. Karasepe, ni Sosua oh Kalep ara pwulopwul, ira wia lidu kei. Mwuhr, ira anahne kousoan nan sapwtehn erein sounpar 40 pwehki mehn Israel teikan sapeikiong Siohwa. Eri, koasoipen Sohp kak kangoange mehn Israel kan me momour mwurin Sohp. Irail pahn wehwehki me Sehdan me kin kahrehda lokolok, a kaidehn Koht. Irail pil pahn wehwehki dahme kahrehda Koht ketin mweidohng aramas akan en lokolok oh me Siohwa kin ketin poakohng irail kan me kin lelepekte ong ih pil ni ahnsou apwal, oh me e kin ketin katingih irail.

7-8. Ia duwen pwuhken Sohp eh kak sewese irail kan me kin lokolok? Menlau kihda ehu karasaras.

⁷ Ia duwen atail kak paiekihda. E kansensuwed me aramas tohto rahnwet sohla kin pwoson Koht pwehki re sohte kak wehwehki dahme kahrehda soahng suwed kan kin wiawihong aramas mwahu kan. Medewehla dahme wiawihong Hazelb me kin mi Rwanda. Ni ahnsou me e pwulopwul, e kin kamehlele Koht. Ahpw mwuhr, soahng suwed tohto wiawihong ih. Eh pahpa nohnou mweipeseng. Eh nohnou pwoudikihda emen ohl tohrohr, oh ohlo kin wiakauwe ih. Ni ahnsou me e sounpar eisek samwa, ohl emen angkehlailih. Hazel kohla ni eh wasahn sarawio, ahpw sohte me kansenamwahwihala ih. Mwuhr, Hazel ntingihada kisinlikou ehu ong Koht me koasoia: “Maing Koht, I kapakap ong uhk, I kin song en wia me mwahu. Ahpw ke kin kahrehiong ie en lokolok. I sohla pahn kaudokiong uhk, oh I koasoanedier ien wia sohte lipilipil dahme I men wia pwe ien peren.” Kitail kin uhdahn poakehla aramas akan, duwehte Hazel, me kin kamehlele me Koht me ketin kahrehiong irail en lokolok!

⁸ Ahpw kitail sukuhlkihsang nan pwuhken Sohp me kaidehn Koht me kin ketin kahrehda lokolok, ahpw Sehdan! Kitail pil sukuhlki en dehr medewe me irail kan me kin lokolok kin dolung wahn arail wiewia kan. Paipel padahkihong kitail me “paisuwed” kak lelohng emen ni ahnsou sohte lipilipil. (Ekl. 9:11; Sohp 4:​1, 8) Oh kitail pil sukuhlki me ni atail kin dadaurete pahn kahpwal kan ni lelepek, kitail kin patohwanohng Siohwa pasapengpen ahn Sehdan karaun likamw kan. Kitail kin sewese pere mwareo me sarawi. (Sohp 2:3; Lep. Pad. 27:11) Kitail kin kalahnganki atail sukuhlki soahng pwukat sang nan Paipel pwehki met kitail eseier dahme kahrehda kitail oh pil irail kan me kitail poakohng kin lokolok. Mwuhr, Hazel tepida onop Paipel rehn Sounkadehdehn Siohwa kan oh wehwehkihda me Koht sohte ketin kahrehiong en lokolok. E koasoia: “I pwurehng kapakap ong Koht oh uhdahn padahkihong audepen ei mohngiong. I padahkihong Siohwa me mendahki I ndaiong me I sohla pahn kaudokiong ih, I sohte uhdahn men wia met. Ni mehlel, I sohte uhdahn ese ih. Ahpw met I wehwehkihda me Siohwa ketin poakohng ie. Ahnsou wet I uhdahn peren oh nsenamwahu.” Ia uwen atail kalahnganki me kitail eseier dahme kahrehda Koht kin ketin mweidohng lokolok en mie! Met kitail pahn koasoiapene ia duwen koasoipen Sohp eh kak sewese pein kitail ni atail kin lelohng lokolok.

IA DUWEN KOASOIPEN SOHP EH SEWESE KITAIL EN DADAUR

9. Dahme Sohp wia ni ahnsou me e wie lokolok? (Seims 5:11)

⁹ Medewehla lokolok me Sohp ahneki. E mwomwohd nan pehs. Paliwereo diren kens, kahrehda e kin weirek laud. Kilio uhdahn ohla oh e pil tihtihla. Solahr ahn Sohp kehl pwehn kak wia mehkot. E kin mwomwohd oh korokorehdki eh kens kan kisin diper en dahl ohla ieu. E kin kalapw kaulimki eh weiweirek. Ahpw Sohp wie momourte oh kin dadaurete pahn eh kahpwalo. (Wadek Seims 5:11.) Dahme sewese Sohp en dadaurete?

10. Dahme kasalehda me Sohp kak kasalehiong Siohwa eh pepehm ni saledek? Menlau kawehwehda.

¹⁰ Sohp padahkihong Siohwa eh pepehm kan. (Sohp 10:​1, 2; 16:20) Karasepe, irelaud 3 padahkihong kitail me Sohp kaulimkihla apwal me wiawihong ih. E pil medewe me Siohwa me ketin kahrehiong ih nan kahpwal ko koaros. Mwuhr, kompoakepah silimeno kin pwurupwurehng ndaiong me Koht ketin kalokalohkehki dipe kan. Ahpw Sohp ngihtehtehki me e kin lelepekte. Ekei ahn Sohp koasoi ko kasalehda me erein ahnsou kis, e medewe me e pwung sang Koht. (Sohp 10:​1-3; 32:​1, 2; 35:​1, 2) Ahpw Sohp pil nda me ekei pak e kin wia “pato mwahl akan” pwehki e nantihong en kadehdehda me e lelepekte. (Sohp 6:​3, 26) Mwuhr nan irelaud 31, Sohp men Koht en ketin sapeng ih oh mahsanihong me e sohte konehng ale kalokolok. (Sohp 31:35) Ahpw e sohte konehng Sohp en ngihtehtehkiong Koht en ketin padahkihong ih kahrepen eh lokolok.

11. Dahme Siohwa ketin wia ni Sohp eh koasoia me e kin lelepekte?

¹¹ Met kitail wehwehki me sang ni mwomwen Sohp eh koasoiong Siohwa, eh nanpwungmwahu rehn Siohwa uhdahn kehlail oh e uhdahn likih me Siohwa pahn ketin kadeikada ih ni pahrek. Mwuhr, Siohwa ketin mahsen sang nan melimel ehu oh sapeng Sohp. Ahpw Siohwa sohte ketin kawehwehiong Sohp dahme kahrehda e lokolok. E pil sohte ketin kalokehki Sohp eh koasoiahda eh pepehm oh nda me sohte mehkot sapwung e wiahda. Ahpw duwehte pahpa mwahu men, Siohwa ketin kaweid Sohp. Ih ahl me keieu mwahu en kaweid Sohp. Pwehki met, Sohp pohnese ni aktikitik me e sohte ese soahng koaros oh koluhkihla soahng kan me e nda ni eh sohte medewe mahs. (Sohp 31:6; 40:​4, 5; 42:​1-6) Ia duwen aramas en mahs ako ar kak paiekihda koasoipen Sohp, oh ia duwen atail kak paiekihda rahnwet?

12. Ia duwen mehn Israel ko ar kakete paiekihda koasoipen Sohp?

¹² Ia duwen mehn Israel kan kakete paiekihda. Mehn Israel ko kak sukuhlkihsang dahme wiawihong Sohp. Medewehla mehn kahlemeng en Moses. E sohte mengei ong Moses en kahluwa mehn Israel ko. Pak tohto irail kin sapeikiong Siohwa oh kansensuwedihada Moses. Mehn Israel ko kin kalapw kaulimih Siohwa ni ahnsou me apwal, ahpw Moses kin kalapw padahkihong Siohwa eh kapwunod kan. (Eks. 16:​6-8; Nemp. 11:​10-14; 14:​1-4, 11; 16:​41, 49; 17:5) Moses pil anahne dadaurete ni ahnsou me pein ih ale peneu sang rehn Siohwa. Karasepe, mwohnte mehn Israel ko pedolong nan Sapwen Inowo, Moses lingeringerda pahrail oh koasoi ni eh sohte medewe dahme e koasoia. E sohte patohwanohng Siohwa kaping me e ketin warohng. (Mel. 106:​32, 33) Pwehki met, Siohwa sohte ketin mweidohng Moses en pedolong nan Sapwen Inowo. (Deud. 32:​50-52) Ele Moses medengkihla peneu wet, ahpw ni aktikitik e peikiong. Koasoipen Sohp kakete sewese dih en Israel kan mwuhr pwe ren kak dadaur pahn kahpwal kan me re lelohng. Ni me lelepek kan ar kin doudouloale koasoipen Sohp, re kak sukuhlki en kasalehiong Siohwa arail pepehm oh ia duwen arail en dehr kin ngihtehtehki me irail pwung mwohn silangi. Irail pil kak sukuhlki en peikiong sapwellimen Siohwa kaweid ni aktikitik.

13. Ia duwen koasoipen Sohp eh kak sewese kitail en dadaur? (Ipru 10:36)

¹³ Ia duwen atail kak paiekihda. Nin duwen Kristian kei, kitail pil anahne dadaurete. (Wadek Ipru 10:36.) Mwein kitail kin soumwahu de nsensuwed laud, mie kahpwal nan peneinei, emen me kitail poakohng mehla, de pil ahneki kahpwal laud teikan. Ekei pak, dahme meteikan nda de wia kakete kahpwalihala atail kin dadaur. (Lep. Pad. 12:18) Ahpw pwuhken Sohp kasalehda me kitail kak padahkihong Siohwa dahme mi loalatail oh likih me e pahn ketin karonge kitail. (1 Sohn 5:14) Siohwa sohte pahn ketin engiengda pahtail ma kitail wia met, mehnda ma ekei pak atail koasoi kan “pato mwahl” kei. Ahpw Koht pahn ketikihong kitail kehl oh erpit me kitail anahne pwehn dadaurete. (2 Kron. 16:9; Seims 1:5) E pil kak ketin kapwungkitailla ma anahn, duwehte me e ketin wiahiong Sohp. Pwuhken Sohp pil padahkihong kitail ia duwen atail kak dadaur ma kitail alehdi kaweid de peneu sang sapwellimen Siohwa Mahsen, sapwellime pwihn, de sang kompoakepatail koahiek kan. (Ipru 12:​5-7) Duwehte Sohp eh paiekihda eh rong ni aktikitik peneu me e alehdi, kitail pil kak paiekihda ni atail rong kaweid me kitail alehdi. (2 Kor. 13:11) Mehn kasukuhl pwukat sang pwuhken Sohp uhdahn kesempwal. Met kitail pahn koasoiapene ia duwen atail kak doadoahngki koasoipen Sohp pwehn sewese meteikan.

DOADOAHNGKI PWUHKEN SOHP PWEHN SEWESE METEIKAN

14. Ia ehu ahl en kawehwehda dahme kahrehda lokolok miehki?

¹⁴ Me tohto kin idek dahme kahrehda aramas mwahu kin lelohng lokolok. Ia duwen omw kin sapengala peideko? Mwein ke kin kasalehiong irail dahme Paipel mahsanih me wiawi nan mwetuwel en Ihden. Ele ke tepte koasoia me ngehn suwed men, Sehdan, padahkihong tepin pwopwoudo likamw pwoat me kahrehda ira en uhwongada Koht. (Sen. 3:​1-6) Mwurin mwo, ke padahkihong me mwurin Adam oh Ihp uhwongada Koht, sampah tepida dirkihla lokolok oh mehla. (Rom 5:12) Kowe eri kawehwehda me Koht ketin mweidohng ahnsou me itar ong koaros en kilang me Sehdan likamw oh me Koht ketin doadoahngki ahnsowo pwehn padahkihong aramas akan me e pahn ketikihsang lokolok koaros oh me re pahn kak mour kohkohlahte. (Kaud. 21:​3, 4) Met wia ahl mwahu ehu en sapengala peideko, oh e sewesehier aramas tohto en wehwehki dahme kahrehda aramas kin lokolok.

15. Ia duwen atail kak doadoahngki pwuhken Sohp pwehn sewese emen me idek dahme kahrehda lokolok miehki? (Pil kilang kilel kan.)

¹⁵ Pil ehu ahl me kitail kak kawehwehiong aramas akan dahme kahrehda kitail kin lelohng lokolok iei sang ni atail padahkihong irail duwen Sohp. Kitail kak tepte nda me peidek kesempwal ehu me re idekda. Eri, kitail kak ndaiong me ohl mwahu men me adaneki Sohp pil idek dahme kahrehda e lelohng lokolok. Sohp pil kamehlele me Koht me ketin kahrehiong eh lokolok. (Sohp 7:​17-21) Aramas me kitail koasoiongo kakete pwuriamweikihla me aramas akan mahsie pil men ese dahme kahrehda aramas kin lelohng lokolok. Mwurin mwo, kitail kak nda me sang nan pwuhken Sohp, kitail esehda me Sehdan iei me kahrehda soahng suwed kan en wiawihong Sohp, a kaidehn Koht. Sehdan kose me dene aramas akan kin papahte Koht pwehki dahme irail kin alehsang Reh, ahpw ma re lelohng lokolok, irail pahn uhdihsang papah Koht. Kitail pil kak kawehwehda me Koht ketin likih me miehte aramas pwoson kan oh me sohte kin roporop. E ketin kupwurki mweidohng irail en kadehdehda me Sehdan sounlikamw men. Kitail eri kak kawehwehda me kedekedeo Koht uhdahn ketin kapaiahda Sohp pwehki eh lelepek. Eri kitail kak sewese kamehlelehiong irail me kaidehn Siohwa me kin ketin kahrehiong aramas en lokolok.

16. Menlau kihda ehu karasaras me kasalehda ia duwen pwuhken Sohp eh kak sewese emen me lelohng lokolok.

¹⁶ Medewehla ia duwen pwuhken Sohp eh sewese Mario. Ehu rahno nan pahr 2021, sister men kalohk nan delepwohn. Aramas me e tepin koasoiongo iei Mario. Sistero wadekohng iren Paipel ehu me kasalehda me Koht ketin inoukihda soahng mwahu kan ong ahnsou kohkohdo, oh me Koht kin pil ketin karonge atail kapakap kan ahnsou wet. Ni sistero eh idek dahme Mario medewehki met, Mario padahkihong me ahnsou me e call, e ntingtingih kisinlikou ehu pwehn padahkihong eh peneineio me e poakohng irail, oh e pahn kemehla pein ih. E koasoia, “I kamehlele me mie Koht, ahpw I medewe e solahr ketin nsenohkin ie.” Keriaun pak me sistero call, e koasoiaiong Mario duwen Sohp oh lokolok me lelohng. Mario eri koasoanehdi en wadekala pwuhken Sohp. Sistero eri kadaralahng link en New World Translation of the Holy Scriptures. Ia imwilahn met? Mario pwungki en onop Paipel oh uhdahn kasikasik en kalaudehla eh sukuhlki duwen Koht limpoako me kin ketin nsenohkin ih.

17. Dahme kahrehda kitail kalahnganki me Siohwa ketin kapatahiong pwuhken Sohp nan sapwellime Mahsen, Paipel? (Sohp 34:12)

¹⁷ Paipel ahneki manaman en wekidala atail mour oh pil kansenamwahwihala irail kan me kin lokolok. (Ipru 4:12) Ia uwen atail kalahnganki me Siohwa ketin kapatahiong pwuhken Sohp nan sapwellime Mahsen, Paipel! (Sohp 19:​23, 24) Pwuhken Sohp kamehlelehiong kitail me “Koht Wasa Lapalahpie sohte kin ketin wia me suwed.” (Wadek Sohp 34:12.) E pil padahkihong kitail dahme kahrehda Koht ketin mweidohng lokolok en wiawi oh ia duwen atail kak dadaur pah. Oh e sewese kitail en kansenamwahwih irail kan me kin lokolok. Nan iren onop en mwuhr, kitail pahn koasoiapene ia duwen pwuhken Sohp eh kak sewese kitail ni atail kin kihda kaweid.