13 JOSUÉ
I sigi instrusons strañu
JOSUÉ firma i na jubi Jerikó, sidadi ku Deus fala elis pa e ataka i pa e kaba ku el. I lembra di palabras ku Moisés falal antis di i muri: “Sedu forti, bu ten koraẑen”. (Lei 31:23) I ka muitu tarda, Jeova propi falal tambi: “Sedu forti, bu sedu koraẑosu”. (Jos 1:7) Gosi, Josué na pirsisa di manga di koraẑen. Pabia?
Jerikó ka seduba un sidadi garandi dimas, ma i proteẑiduba ku un mura altu ku dal volta. Tambi i seduba purmeru sidadi ku israelitas na ataka pa pudi konkista Tera di Purmesa. Jintis ku moraba na ki sidadi ta fasiba kusas mau dimas. Manga di anus atras, Jeova falaba Abraon aserka di “pekadu” di amoreus, ku sedu tudu jintis di Kanaan. I fala di kuma un dia, mau kusas ke na fasi na “inci si midida” i dipus i na kaba ku elis. (Kum 15:16) Gosi ki dia ciga. Povu ta pratikaba idolatria, e ta bindiba kurpu na se kaus di adorason, omis ta ten relason seksual ku omis, jintis ta ten relason seksual ku se familias tokadu, e ta ten relason seksual ku limarias, i te mesmu e ta sakrifika se fijus pa deusis falsu. Kaneneus seduba mau dimas tok e ka pudiba pirmitidu fika na tera. I sta suma si tera mistiba ramasa elis! (Sir 18:3, 6, 21-27) Kuma ku kila na sedu?
Jeova da Josué instrusons di kuma ki na ataka Jerikó, ma ŝefis militar pudiba pensa kuma i mau planu.
Jeova kuji Jerikó pa sedu purmeru kau ke na kumsa tira es jintis mau na tera. I na usa Josué ku si tropas pa ataka sidadi. Tropas staba pruntu pa sigi instrusons di Jeova. Mesmu asin, instrusons ku Jeova daba Josué seduba strañu dimas! Jeova ka falal pa i ataka elis logu-logu nin i ka falal pa i purpara pa taja elis pa manga di tempu, ma i falal pa e da volta di sidadi. E na da volta del un bias kada dia, duranti seis dia. Saserdotis tambi tenba di da volta di sidadi, alguns na karga arka di kontratu nkuantu ki utrus na ba ta toka korneta. Na setimu dia, elis tudu e tenba di da volta di sidadi seti bias i dipus e na grita ku forsa.
Josué teneba un bokadu di spiriensia suma tropa. Ma mesmu pa rel, es planu pudiba ka tene sintidu. Ma sera ki i punta si kabesa: ‘Ke gora si Israel pirdi gera’? Sera ki tudu ki utrus sidadis di kananeus ka na pensa kuma e mas elis tene forsa i ataka elis?
Josué ka ciga di pensa es. I sibiba kuma i pudiba konfia na Jeova. Atraves di ki dus spions ku mandaduba Jerikó, i sibi di kuma omis di Jerikó teneba medu di israelitas. I ojaba tambi kuma ku Jeova di manera milagrosu, para yagu di riu Jordon pa israelitas pudi pasa.
Ku sertesa Josué pensa ciu nes kusas ku kontisiba, pa pudi tene fe na Deus. Fe ki tene dal koraẑen di obdisi. Asin el ku si tropas e da volta di Jerikó. Saserdotis toka se kornetas. Ma, sidadi staba ketu, “ficadu diritu” pabia e staba ku medu di israelitas. Na utru dia, Josué torna da volta di sidadi ku si tropas, mas un bias e fasi suma ku Jeova fala elis. E fasi mesmu kusa duranti seis dia.
Na setimu dia, e da volta di Jerikó seti bias. Ma na fin di setimu volta, e fasi un kusa diferenti. Josué fala: ‘Bo grita, pabia Jeova da bos e prasa!’ Dipus di Josué kaba papia: “E grita risu; mura kai.”
Josué ku si omis yentra na sidadi, e mata tudu ku tene vida, suma ku Jeova fala elis. Ku ajuda di Jeova Josué ku si omis kaba ku manga di sidadis ku nasons. Finalmenti, Jeova staba na limpa tera di “pekadu” di amoreus.
Ma i tenba un parti pikininu di mura di Jerikó ku ka kai. Pabia di ke? Pabia na es sidadi i tenba un minjer ku seduba koraẑosu dimas i ku mostra fe garandi na Deus. No na bin fala del na prosimu kapitulu.
Lei es storia na Biblia:
Ripitison di Lei 20:16-18
Josué 2:1, 9-11, 24; 3:14-17; 5:1; 6:1-21, 24
Pa kombersa del:
Di kal maneras ku Josué mostra koraẑen?
Fasi piskisa pa ntindi minjor
1. Kal parti di Palabra di Deus ku staba dispunivel i ku Josué pudiba lei? (w09-T 1/12 paẑina 17 paragrafu 4, nota bas di paẑina.) A
Diseñu A
2. Antis di israelitas da volta di Jerikó ke ku Jeova fala Josué pa i fasi? Pabia ki pudiba parsi di kuma instrusons ku Jeova da ka seduba un bon planu? (Jos 5:2-8; w18.10-TPO paẑina 23 paragrafu 5 te 7)
3. Kal provas ku ta mostra di kuma Jerikó konkistadu so na puku tempu? (w15-T 15/11 paẑina 13) B
Kennedy, Titus (2023). The Bronze Age Destruction of Jericho, Archaeology, and the Book of Joshua. Accessed via researchgate.net. Licensed under CC by 4.0 DEED
Foto B: Jarus ku tene serial kemadu ku diskubridu nunde ku antigu Jerikó staba nel
4. Kuma ku profesia aserka di Jerikó ku sta na Josué 6:26 kumpri? (w98-T 15/9 paẑina 21 paragrafu 8)
Pensa na kuma di aplika es lisons
Ke ku juda Josué tene konfiansa di kuma Jeova na kumpri si purmesas? (Jos 23:14) Kuma ku no pudi tene mesmu konfiansa aos?
Kuma ku isemplu di Josué pudi judanu sigi instrusons ku no ta risibi di organizason di Jeova? C
Foto C
Kuma ku bu pudi kopia koraẑen di Josué?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Josué ora ki resusitadu?
Aprindi mas
Kuma ku isemplu di Josué pudi judanu aprindi ku jintis di idadi, konfia na purmesas di Jeova i kontinua fiel mesmu ora ku no ermon na fe yaranu?
Juda bu fijus aprindi kusas importanti ku kontisi na vida di Josué.