17 JAEL
Un minjer ku meresi ngabadu
SÍSERA kuri di kobon di Jizreel, nunde ki disa omis ki staba na kumanda pa e muri. Ku sertesa i ka fiaba di kuma, si tropas puderosu ku si 900 karus di gera ku ta miti medu, pirdi gera dianti di tropas israelitas ku teneba puku materialis di gera i nin e ka teneba karus. Gosi, Sísera sta na buska kau ki pudi sukundi nel. I kuri pa tenda di Eber ku sedu keneu.
Normalmenti, keneus teneba bon relason di amisadi ku israelitas. Es kumsa disna di tempu di Moisés, ku si minjer sedu di un familia keneu. Gosi, e povu sta na vivi na tera di Israel. Ma, Eber seduba diferenti di utrus keneus. En ves di sta na ladu di Israel, i junta ku un rei kananeu comadu Jabin. Suma Sísera i ẑeneral di Jabin, i pensa kuma i pudi sukundi ku suguransa na tenda di Eber. Parsi di kuma, i ka pasa na kabesa di Sísera di kuma, Jael minjer di Eber, pudi pensa di manera diferenti di si omi.
Jael staba el so na si tenda, si omi saiba. Oca ki oja Sísera na bin, i tenba ku disidi rapidu ke ki i na fasi. I sibi kin ki Sísera i kuma ki i seduba pirigosu. Talves i ka sibiba di kuma, Debora profeta di Jeova, falaba di kuma Sísera na muri, i ka na mon di un omi, ma na mon di un minjer. Mesmu asin, i pudi sedu di kuma Jael sibi ke ku Jeova misti pa i fasi. Pabia ku no fala kila?
Mas tardi, Jeova nspira Debora pa i kanta un kantiga aserka di kuma ku Baraki ngaña Sísera. Na ki kantiga i fala sin: “Jael, minjer di Eber, keneu, i na sedu sortiadu na metadi di minjeris; i na sedu sortiadu riba di minjeris ku mora na tendas.” Alguns jintis fala di kuma Jael seduba un minjer ku ta konta mintida tambi i mau, ma kila i ka bardadi. En ves di kila, i seduba un minjer disididu i koraẑosu. Suma ku Raabi fasiba, Jael disidi sta na ladu di Jeova en ves di si inimigus. I sibiba di kuma Sísera sedu un inimigu garandi di Jeova, tambi Jeova misti pa Sísera matadu. Jael nota di kuma i tene oportunidadi di fasi ke ku Jeova misti. Ma kuma ki na fasil?
I klaru di kuma, Jael sibiba kuma geria mon ku mon ku Sísera, i ka bon ideia. Sísera i un gereru ku tene spiriensia, tambi i un omi forti. Pa kila, i kumbidal pa i yentra na si tenda i diskansa. Sísera yentra i dita. Jael kubril ku panu. Oca ku kila pidil yagu, i dal liti. Sísera falal pa i firma na porta di tenda, si algin puntal si kontra algin sta la, pa i kontal mintida di kuma ningin ka sta la. Dipus i pasa ku sonu.
Deus kuji un minjer pa i mata un gereru mau dimas.
Jael sibi di kuma i sta ja na mumentu pa i aẑi. I toma un martel pisadu ku un pregu garandi di tenda, talves tudu dus i di madera. I pudi sedu di kuma i kustumaba usa elis. I bai santadu i pertusi des gereru ku staba na durmi. I wun̈i pertu di si kabesa, pruntu pa matal. Na ki mumentu, si kontra i falia so, ku sertesa Sísera na korda, i na matal di manera meduñu. Ma Jael ka falia. Kinti-kinti, i pregal kabesa kontra con, Sísera muri!
Oca ku ŝef Baraki bin pa buska Sísera, Jael sai pa bai dal kontrada. I fala Baraki: “Bin, N na mostrau omi ku bu na buska.” Baraki yentra na tenda, i oja kuma palabras ku profeta Debora falaba kumpri: ‘Jeova na ntrega Sísera na mon di un minjer.’
Baraki ku Debora kanta un kantiga pa selebra vitoria di Israel. Na ki kantiga e ngaba Jael. Dipus di kila, Jael ka faladu del mas na Biblia. Ma mas di 3.200 anu dipus, no sta inda na aprindi di si bon isemplu. Aos, servus di Deus ka sta na un gera ke pudi usa armas o materialis di gera. Ma no sta na un gera spiritual. I aos mas di ki nunka, no pirsisa di koraẑen suma Jael.
Lei es storia na Biblia:
Ŝefis 4:9, 11, 17-22; 5:24-31
Pa kombersa del:
Di kal maneras ku Jael mostra koraẑen?
Fasi piskisa pa ntindi minjor
1. Ke ku gera di tempu di Baraki ku gera di Armajedon parsi nel? I na ke ke diferenti nel? (w19.09-TPO paẑina 8 ku 9 paragrafu 3 te 6)
2. Eber omi di Jael, junta ku kananeus ku sedu inimigus di israelitas. Ma kal lasu ku Eber tene ku israelitas? (it-T “Héber” N.° 2)
3. Kuma ku vitoria di Israel kontra Sísera ku Jabin, fortalisi fe di povu di Deus manga di anus dipus? (w08-T 15/10 paẑina 14 ku 15 paragrafu 12 te 15)
4. Ke ku no pudi aprindi di manera ku Debora ngaba Jael? (w15-T 1/8 paẑina 16 paragrafu 6) A
Diseñu A
Diseñu A
Pensa na kuma di aplika es lisons
Si omi di un irma ka ta adora Jeova, kal mumentu ku talves i na pirsisa di koraẑen suma Jael?
Jael ka seduba profeta suma Debora, nin i ka sedu tropa suma Baraki. Nin ku sin i fasi ke ki i pudi. Ora ki ten kusas ku no ka pudi fasi, kuma ku no pudi kopia si manera di aẑi? B
Foto B
Di kal utru maneras ku bu pudi kopia koraẑen di Jael?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Jael ora ki resusitadu?
Aprindi mas
Nes nsenason, jubi kuma ku isemplu di Jael juda un joven irma pa i prega.
Jael i so un di manga di minjeris ku se vida pudi nsinanu lisons importanti. Lei aserka di alguns delis.
“Minjeris ku faladu del na Biblia — Ke ku no pudi aprindi delis?” (ijwbq-TPO artigu 161)