18 JIDION
I sedu koraẑosu tambi i ta toma kuidadu
UN ALGIN koraẑosu pirsisa tambi di toma kuidadu. Si ta toma kuidadu i ka na konfia ciu dimas na si kabesa o fasi un kusa ki ka pirsis. Jidion seduba koraẑosu tambi i ta toma kuidadu. I vivi na un tempu oca ku israelitas torna kumsa mas adora deusis falsu. Pa kila, Jeova para proteẑi elis di se inimigus, i midianitas toma konta di se tera. Midianitas ta atakaba sempri israelitas, pabia di kila e ta medi tarbaja na se lugaris. Ma, Jidion seduba koraẑosu i kontinua tarbaja pa da di kume pa utrus. Ma i tomaba tambi kuidadu. Ora ki na masa trigu, i ta fasil na kau di masa uva, ku talves seduba un koba na con, asin midianitas ka na pudi ojal.
Situason seduba difisil dimas, tok israelitas kaba pa pidi Jeova pa i juda elis. Pa kila, Jeova manda un profeta pa lembranta elis ke ku manda i para proteẑi elis. Mas tardi, i manda un anju pa konta Jidion di kuma, i kujil pa liberta si povu. Jidion pidi anju pa i fasi un kusa spesial ku na mostra di kuma Jeova ku mandal. Pa kila, anju fasi milagri, i pui pa fugu sai na pedra i kema oferta ku Jidion puiba la. Dipus des, anju disparsi. Ki di noti, Jeova papia ku Jidion, i falal pa i bati altar di Baal ku po sagradu ku seduba di si pape, dipus pa i kumpu altar pa Jeova i fasi sakrifisiu pa rel. Jidion obdisi orientason di Jeova ku koraẑen. Ma suma i sedu kautelosu, i fasil di noti, asin si pape ku omis di sidadi ka oja ke ki i fasi.
Puku tempu dipus des, midianitas, amalekitas, ku jintis di ladu di saida di sol forma un grupu garandi di tropas ku bin kontra israelitas, e inci kobon di Jizreel suma multidon di gamfañotis. Spiritu di Jeova bin pa Jidion, i motival pa i manda rekadu pa alguns jorson di Israel i pidi elis pa e bin junta ku el pa geria ku se inimigus. Mas un bias Jidion sedu kautelosu, i pidi Jeova pa i fasi dus milagri ku na mostra di kuma na bardadi i tene si apoiu. Jeova sedu pasienti ku Jidion, i fasi suma ki pidil. Ki di noti Jidion distindi lan na kau di masa trigu, Jeova pui pa serenu moja lan, ma con fika seku. Utru dia di noti, Jeova pui pa serenu moja con, ma lan fika seku.
Jidion ku si tropas seduba puku komparadu ku se inimigus, ma Jeova falal mas inda pa i rapati si tropas.
Es dus milagri, da Jidion koraẑen pa bai ku si tropas ku sedu so 32.000 omis, pa geria kontra tropas inimigu ku teneba 135.000 omis. Oca ku Jidion ku si tropas israelitas kampa pertu di fonti di Arodi, Jeova fala Jidion di kuma tropas ki bai ku el ciu dimas! Pa kila, Jeova falal di kuma, tudu tropa ku sta ku medu pa e riba kasa. So 10.000 omi ku fika. Ma Jeova torna falal di kuma, nin ku sin e ciu inda. I fala Jidion pa i jubi omis ora ke na bibi yagu. Kilis ku finka juju e pui boka na yagu e na bibi, pa i ribanta elis kasa. Ki utrus tropas seduba kautelosu. E finka juju e na kata yagu ku mon e na bibi, asin e na pudiba oja ke ku sta na pasa. Es omis pudi fika pa gera. Gosi Jidion fika so ku 300 omi!
Ku koraẑen Jidion avansa, i sta pruntu pa ataka. Jeova da mas Jidion utru prova di kuma i sta ku el. I fala Jidion pa i bai ketu di noti pa kampamentu di si inimigus. Oca Jidion bai la, i obi un tropa na konta si kumpañer suñu ki suña. Si kumpañer falal di kuma, ki suñu signifika di kuma israelitas na ngaña elis gera. Ku konfiansa garandi ku Jeova dal, Jidion riba nunde si omis i da elis instruson di kuma di ngaña gera. I fala elis: “Bo ba ta jubi na mi; bo na fasi manera ku N fasi.” Di noti Jidion ku si omis da kampamentu di se inimigus volta. E baiba ku putis, ku pos ku tene fugu, ku kornetas. Oca ku Jidion da elis sinal, e supra kornetas e kebra putis. Dipus e grita: ‘Spada di Jeova ku di Jidion!’ Es baruju di repenti ku klaridadi, fasi ki grupu garandi di tropas pensa di kuma e nvadidu i e sta na atakadu pa un grupu di tropas garandi dimas. E panta i e nturumpi! Jeova pui pa e ataka n̈utru i mata n̈utru. So serka di 15.000 delis ku salva i kuri.
Jidion pega se tras. Pa fin, i kaba ku si inimigus, i mata se ŝefis, tambi i kastiga israelitas ku ka sedu fiel ku nega apoial na gera ku Jeova mandal pa i fasi. Dipus povu tenta pui Jidion pa i sedu se rei. Di manera umildi i ka seta, i fala elis: ‘Jeova ku na rena riba di bos.’ Jeova paga es omi koraẑosu i ku ta toma kuidadu. Duranti tudu tempu ku Jidion sedu ŝef na Israel, i ka tenba gera na tera di Israel tambi i vivi un vida kumpridu. Sekulus mas tardi, apostolu Paulu fala aserka del, oca ki na papia di omis ku minjeris ku teneba fe garandi. — Eb 11:32.
Lei es storia na Biblia:
Ŝefis 6:1–7:22; 8:4-23, 28
Pa kombersa del:
Di kal maneras ku Jidion mostra koraẑen?
Fasi piskisa pa ntindi minjor
1. Kuma ku ‘pon redondu di sevada’ ku tropa suña ku el representa ben tropas di Jidion? (Ŝef 7:13; it-T “Cevada” paragrafu 7)
2. Pabia ku baruju di 300 kornetas pantada i nturumpi midianitas? (it-T “Chifre (Buzina)” paragrafu 3) A
Foto A: Cifri di karnel ta usaduba suma un nstrumentu pa da sinal o avisu.
3. Ke ku Jidion ku si tropas tenba ku fasi pa vensi midianitas? (w04-T 15/10 paẑina 16 paragrafu 9 ku 10) B
Foto B: Jidion serka midianitas serka di 80 kilometru te na Jogbeá. (I ka sibidu kamiñu izatu ke bai.)
4. Kal kusas ku faladu del na Biblia, ku ta prova di kuma es storia i bardadi? (w05-T 15/4 paẑina 32)
Pensa na kuma di aplika es lisons
Jidion juda povu di Deus pa e ngaña gera kontra se inimigu. Ma i kontinua sedu umildi, i fasi si minjor pa tene pas ku utrus, pa manera ki papia ku elis ku bondadi. (Ŝef 8:1-3) Kuma ku ŝefis di familia ku ansions pudi kopia Jidion ora ku algin fika mal ku algun kusa ke fasi?
Na kal situasons ku talves no na pirsisa di sedu koraẑosu i toma kuidadu? (Jubi foto C, nunde ku un irma sta na presionadu pa poia diritu di kilis ku sedu omoseksual.) C
Foto C
Kuma ku bu pudi kopia koraẑen di Jidion?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Jidion ora ki resusitadu?
Aprindi mas
Si bu risibi un privileẑiu na sirvisu di Jeova, kuma ku bu pudi kopia Jidion?
“Jintis umildi tene jiresa” (w00-T 1/8 paẑina 16 te 18 paragrafu 11 te 15)
Usa diseñus basiadu na storias di Biblia pa nsina bu fijus pui se konfiansa na Jeova.