Bu sta pruntu pa “yarda mundu”?

BU STA PRUNTU PA TORNA TERA NA UN PARAÍSU?

Oca Jeova fala pekaduris pa e ‘inci mundu, e manda riba del,’ i sta na mostra di kuma mundu ntidu na torna un Paraísu. (Kum 1:28) Kilis ku na bin vivi pa sempri ten ku obdisi es mandamentu. Tera ka na sedu Paraísu logu na kumsada, pabia jardin di Eden ka izisti ja. Logu dipus di Armajedon, no na tene manga di kusas pa fasi pa pudi limpa partis di Tera ku danadu. Sin duvida, es na sedu tarbaju garandi!

Es ta lembrantanu tarbaju ku israelitas tenba di fasi oca ke riba di Babilonia. Duranti 70 anu ningin ka moraba na se tera. Ma Isaias kontaba ja kuma, ku ajuda di Jeova e na konsigi kumpu mas se tera. Profesia fala sin: “I na pui si lala pa i sedu suma Eden; i na pui kau ku ka tene nada pa i sedu suma jardin di SIÑOR.” (Isa 51:3) Jeova juda israelitas pa e torna se tera na un lugar bonitu. Di mesmu manera, ku benson di Jeova kilis ku na yarda Tera na konsigi tornal na un paraísu bonitu. I ten kusas ku bu pudi fasi desdi gosi pa mostra kuma bu misti partisipa nes tarbaju.

Un delis i fasi tudu ku bu pudi pa manti bu kau ku pertu di bu kau limpu i ben organizadu. Bu pudi fasi es, mesmu si kontra bu visiñus ka ta fasil. Bu pudi tambi juda na manti Salon di Renu ku Salon di Asembleia limpu. Si bu situason na pirmiti, bu pudi juda tambi suma vuluntariu ora ki ten disastris. Asin bu na mostra kuma bu sta pruntu pa juda ora ki ten nesesidadi. Punta bu kabesa: ‘Sera ki i ten un tarbaju ku N pudi aprindi i ku N pudi bin usa si Jeova pirmitin vivi na paraísu na Tera?’

BU STA PRUNTU PA RISIBI RESUSITADUS?

Logu oca ki kaba resusita fiju di Jairu, Jesus fala pa dal algun kusa pa i kume. (Mar 5:42, 43) I ka seduba un tarbaju difisil pa kuida di ki bajudasiñu di 12 anu. Ma pensa na manga di tarbaju ku no na tene, ora ku Jesus kumpri es purmesa ku fala sin: “Tudu mortus ku nteradu na obi si vos; e na sai na koba.” (Jon 5:28, 29) Apesar di kuma, Biblia ka da manga di informason aserka des, no pudi imaẑina kuma kilis ku na resusitadu na pirsisa di ajuda pa tene kumida, kau di mora ku ropa. Sera ki bu pudi mostra desdi gosi kuma bu sta pruntu pa juda? Ali alguns purguntas pa pensa nel.

Ora ki fasidu anunsiu di kuma superintendenti di sirkuitu na visita bo kongregason, sera ki bu ta kumbidal pa i bin kume na bu kau? Ora ku servus spesial di tempu kompletu sai di Betel pa bin tarbaja na tiritoriu, o ora ku superintendenti di sirkuitu kaba si tarbaju di sirkuitu, sera ki bu pudi juda na buska kau di mora? Si kongresu reẑional o spesial na fasidu na bu zona, sera ki bu pudi ofresi suma vuluntariu pa tarbaja antis, o dipus di kongresu pa risibi kilis ku na bin?

BU STA PRUNTU PA NSINA RESUSITADUS?

Pabia di ke ku sta na Atus 24:15, no spera kuma bilyons di jintis na resusitadu. Manga delis ka kunsiba Jeova antis de muri. Dipus ke resusitadu e na dadu opurtunidadi di kunsil. a Servus fiel di Jeova ku tene spiriensia, na juda na nsina elis. (Isa 11:9) Charlotte ku pregaba na Europa, Amerika di Sul ku Afrika, sta ku presa pa es dia ciga. Ku kontentamentu, i fala sin: “N sta ku presa pa bin nsina kilis ku na resusitadu. Ora ku N lei aserka di un algin ku vivi na pasadu, manga di bias N ta pensa: ‘Si kontra es algin kunsiba Jeova, si vida pudiba sedu diferenti.’ N sta ku presa pa nsina kilis ku na resusitadu aserka di Jeova, i konta elis kuma se vida na sedu minjor si kontra e sirbil.”

Mesmu servus fiel di Jeova ku viviba ja antis di Jesus bin pa tera, na tene manga di kusas pa aprindi. Pensa na kontentamentu ku privileẑiu ku no na tene, di splika Daniel kumprimentu di profesia ki skirbi, ma ki ka ntindiba. (Dan 12:8) O ke gora di juda Ruti ku Noemi aprindi di kuma Mesias bin di se jorson? No na kontenti nsina jintis na tudu parti di mundu, sin kudadi ku distrason ku ten nes mundu mau di aos!

Ke ku bu pudi fasi desdi gosi pa sta pruntu pa juda na nsina kilis ku na resusitadu? Un di kusas ku bu pudi fasi desdi gosi, i di minjoria bu nsinu i partisipa sempri na tarbaju di pregason ku sta na fasidu na mundu ntidu. (Mat 24:14) Mesmu si kontra bu ka pudi prega ciu pabia di idadi o utrus situason, bu pudi mostra di kuma bu sta ku presa di nsina kilis ku na resusitadu, ora ku bu na fasi bu minjor na tarbaju di pregason aos.

Pensa nes purguntas importanti: Sera ki na bardadi bu sta ku presa di bin yarda Tera? Sera ki bu tene diseẑu garandi di bin kuida di Tera, di risibi i nsina kilis ku na resusitadu? Bu pudi mostra kuma bu sta pruntu pa vivi pa sempri na Tera, ora ku bu na partisipa na mesmu tarbaju ku no na bin fasi ora ku no yarda Tera!