LISON 30
Bu familia ku bu amigus pudi vivi mas!
Mortu ta pui pa no sinti dur garandi ku tristesa. E ku manda Biblia coma mortu di inimigu. (1 Koríntius 15:26) Na lison 27, bu aprindiba kuma Jeova na bin kaba ku es inimigu. Ma, ke ku na bin akontisi ku kilis ku muri ja? Nes lison, bu na bin aprindi mas aserka di utru promesa bonitu di Jeova, i na bin lantanda bilions di jintis pa bin vivi pa sempri. I na bin resusita elis! Sera ki es na sedu? E na bin lantandadu pa vivi na seu o na Tera?
1. Ke ku Jeova misti fasi pa no familia ku amigus ku muri?
Jeova tene diseẑu di lantanda kilis ku muri. Un omi di fe comadu Jo tene konfiansa di kuma Deus ka na diskisil si muri. I fala Deus: “Asin bu ta coman, N ta ruspundiu [na koba]”. — Lei Jo 14:13-15.
2. Kuma ku no sibi di kuma mortus pudi lantandadu?
Oca Jesus staba na Tera, Deus dal puder di lantanda kilis ku muri. Jesus lantanda un bajuda di 12 anu ku fiju di un viuva. (Markus 5:41, 42; Lukas 7:12-15) Mas tardi, amigu di Jesus Lazaru muri. Apesar di kuma Lazaru muri i fasi kuatru dia ki nteradu, Jesus lantandal di mortu. Jesus bai pa koba, dipus di ora Deus i yalsa vos i fala: “Lazaru, sai pa fora!” I “difuntu sai” — Lazaru sai bibu! (Jon 11:43, 44) Imaẑina alegria ku familia ku amigus di Lazaru tene!
3. Kal speransa ku ten pa no familia ku amigus ku muri?
Biblia purmiti: “I ten ku ten un resureison.” (Atus 24:15) Kilis ku Jesus lantanda oca ki staba na Tera ka bai pa seu. (Jon 3:13) E kontenti oca ke lantandadu pa vivi mas na Tera. Di mesmu manera, i ka na tarda Jesus na bin lantanda bilions di jintis pa bin vivi pa sempri na paraísu li na Tera. Jesus fala: “Tudu kilis ku Deus lembra del na lantandadu”, mesmu si ningin ka lembraba di kuma e ciga di vivi. — Jon 5:28, 29.
APRINDI MAS
Jubi provas na Biblia di kuma kilis ku muri pudi lantandadu i e na bin lantandadu. Aprindi kuma ku resureison pudi konsolau i dau speransa.
4. Jesus mostra di kuma i pudi lantanda kilis ku muri
Aprindi mas aserka di ke ku Jesus fasi pa si amigu Lazaru. Lei Jon 11:14, 38-44, dipus bo kombersa aserka des purguntas:
Kuma ku no sibi di kuma Lazaru na bardadi muri? — Jubi versikulu 39.
Si Lazaru bai pa seu, bu pensa kuma Jesus na ribantal mas pa i bin vivi na Tera?
5. Manga di jinti na bin lantandadu!
Lei Salmu 37:29, dipus bo kombersa aserka des purgunta:
Nunde ku bilions di jintis ku na bin lantandadu na vivi?
Jesus na lantanda manga di jinti, i ka so kilis ku adora Jeova. Lei Atus 24:15, dipus bo kombersa aserka des purgunta:
Kal algin ku bu na gostaba di oja pa i lantandadu?
Pensa nes: Jesus pudi lantanda un algin fasil suma un pape ku pudi korda si fiju ku na durmi.
6. Resureison pudi dau konsolu ku speransa
Relatu di resureison ku sta na Biblia di fiju femia di Jairu konsola i nkoraẑa manga di jinti ku tene dur. Lei es storia di bardadi ku sta na Lukas 8:40-42, 49-56.
Antis di lantanda fiju di Jairu, Jesus fala si pape: “Ka bu panta; fia son.” (Jubi versikulu 50.) Kuma ku speransa di resureison pudi judau . . .
Ora ku bu familia ku amigu muri?
Ora ku bu vida sta na pirigu?
Mostra VIDEO, dipus bo kombersa aserka des purgunta:
Kuma ku speransa di resureison konsola i da koraẑen pa pape ku mame di Phelicity?
ALGUNS JINTIS TA FALA: “Kilis ku muri na lantandadu pa vivi na seu i ka na Tera.”
Ke ku bu pensa?
Kal testu ku bu na usa pa mostral di kuma manga di jinti na lantandadu pa vivi na Tera?
RUSUMU
Biblia purmiti kuma bilions di jintis ku muri na bin lantandadu. Jeova misti pa e vivi mas, i da Jesus puder pa i lantanda elis.
Rekapitulason
Kuma ku no sibi di kuma Jeova ku Jesus tene diseẑu di lantanda kilis ku muri?
Bilions di jintis ku na bin resusitadu, nunde ke na vivi nel, na seu o na Tera? Pabia ku bu fala kila?
Ke ku konvensiu di kuma bu familia ku amigus na bin lantandadu pa vivi mas?
TENE MAS INFORMASON
Aprindi kusas pratiku ku bu pudi fasi ora ku bu tene cur.
Kuma ku mininus pudi lida ku mortu di se familia ku amigu?
Sera ki tudu jinti na resusitadu pa vivi na seu? Ba kin ku ka na resusitadu?