Kuma ku no pudi tene pas na tempu di krisi

1. Ke ki “pas di Deus” i kuma ki ta judanu ora ku no tenel? (Filipensis 4:6, 7)

I TEN un tipu di pas ku jintis nes mundu ka sibi nada aserka del. I “pas di Deus”, ku sedu, un kalma ku no ta sinti di tene amisadi spesial ku no Pape ku sta na seu. Ora ku no tene pas di Deus, no ta sinti suguru. (Lei Filipensis 4:6, 7.) No ta tene amisadi forti ku utrus jintis ku amal. No ta tene un amisadi intimu ku ‘Deus ku ta da pas’. (1 Tes 5:23) Ora ku no kunsi, konfia i obdisi no Pape, pas di Deus pudi kalma no preokupason ora ku no sta na pasa un situason difisil.

2. Pabia ku no pudi tene sertesa di kuma no pudi tene pas di Deus?

² Sera ki i pusivel tene pas di Deus ora ku no sta na pasa pa un krisi, suma duensa ku laga, disastri, manifestason sivil o pirsigison? Kualker un des krisi pudi punu tene medu. Ma, Jesus da si sigiduris es konsiju: “Bo diskansa bo korson tarpajadu; ka bo medi.” (Jon 14:27) Filismenti, ermons ku irmas sigi es konsiju di Jesus. Ku ajuda di Jeova, e konsigi tene pas oca ke na lida ku purblemas difisil.

KUMA KU NO PUDI TENE PAS NA TEMPU DI DUENSA KU LAGA

3. Kuma ku duensa ku laga pudi kaba ku no pas?

³ Un duensa ku laga pudi kuas muda tudu no vida. Pensa na kuma ku COVID-19 afeta manga di jintis. Na un studu, mas di metadi di jintis fala di kuma, e tene purblema di sonu na tempu di duensa ku laga. Na tempu des duensa ku laga i ten aumentu garandi di preokupason, depreson, abusu di alkol ku di droga, violensia na kasa ku kilis ku ta tenta mata kabesa. Si ten duensa ku laga nunde ku bu mora, kuma ku bu pudi rapati preokupasons i tene pas di Deus?

4. Pabia ku sibi di profesia di Jesus aserka di fin de tempu pudi danu pas?

⁴ Jesus falaba ja di kuma na fin de tempu, i na ten duensas ku na laga “na manga di lugar”. (Luk 21:11) Kuma ku sibi es ta danu pas? No ka ta fika ku surpresa di oja duensas ku laga. No nota di kuma es kusas sta na kontisi suma ku Jesus falaba ja. Pa kila, no tene motivu di sigi konsiju ku Jesus da pa kilis ku na vivi na tempu di fin: “Ka bo panta”. — Mat 24:6.

5. (a) Di akordu ku Filipensis 4:8, 9, ke ku no pudi ora pa rel ora ku no afetadu pa un duensa ku laga? (b) Kuma ku obi gravason di Biblia pudi judau?

⁵ Duensa ku laga pudi lebanu na tene duvida i te mesmu punu tene medu. Es kontisi ku un irma comadu Desi.b Dipus ku si tiu, si primu ku si mediku muri di COVID-19, i mediba di kuma i na paña virus i kambantal pa si mame ku tene idadi. Pabia di duensa i staba preokupadu di kuma i na pirdi si tarbaju, i staba na punta si i na konsigi paga kumida ku kau di mora. I staba preokupadu dimas kes kusas, tok i ka ta konsigi durmi di noti. Ma Desi konsigi tene mas pas. Kuma ki konsigil? I ora aserka di ki asuntu, i pidi pa Jeova judal tene kalma i tene pensamentus pusitivu. (Lei Filipensis 4:8, 9.) I sukuta Jeova na “papia” kel atraves di gravasons di Biblia. I fala sin: “Vos kalmu di kilis ku ta lei, kalma ña preokupasons, i lembrantan di kuma Jeova ta preokupa ku mi.” — Sal 94:19.

6. Kuma ku studu pesual ku runions di kongregason judau?

⁶ Na tempu di duensa ku laga, i ka tudu ora ki pusivel fasi tudu kusas ku no ta fasiba antis. Ma, ka bu disa pa es tujiu fasi studu pesual o mati runions. Spriensias ku sta na no publikasons ku videos na lembrantau di kuma, bu ermons ku irmas sta na sirbi Jeova di manera fiel mesmu kes tipu di situasons. (1 Ped 5:9) Runions na judau pensa na kusas interesanti ku sta na Biblia. E na dau tambi oportunidadis di nkoraẑa utrus i sedu nkoraẑadu. (Rom 1:11, 12) Ora ku bu pensa na kuma ku Jeova juda si servus oca e staba duenti, oca e staba ku medu o e sintiba kuma e sta elis so, bu fe na torna mas forti i bu na sta konvensidu di kuma Jeova na judau tambi.

7. Kal lison ku bu pudi aprindi di apostolu Jon?

⁷ Fasi sforsu pa kombersa ku bu ermons ku irmas. Un duensa ku laga pudi punu manti distansia fisiku, te mesmu ku no ermons na fe. Na situason suma es, no pudi sinti suma ku apostolu Jon sinti. I mistiba oja si amigu Gaiu uju ku uju. (3 Jon 13, 14) Ma mesmu asin, Jon rikuñisi di kuma i ka pudiba oja Gaiu. Pa kila, Jon fasi ke ki pudiba; i skirbi Gaiu un karta. Si bu ka pudi visita bu ermons ku irmas na prison, tenta kontakta elis atraves di telefoni, video ŝamada, o manda elis mensaẑens. Ora ku bu manti kontaktu ku bu ermons na fe, bu na sinti mas suguru i sinti mas kalmu. Kontakta ansions si bu sta preokupadu dimas, i seta nkoraẑamentu ke na dau ku amor. — Isa 32:1, 2.

KUMA KU NO PUDI TENE PAS ORA KI TEN DISASTRI

8. Kuma ku un disastri pudi kaba ku bu pas?

⁸ Si bu ciga di pasa pa un inŝenti, tirmidura di con o un kemansa, bu pudi sinti preokupadu pa manga di tempu dipus di krisis. Si kilis ku bu ama muri, o bu kasa ku kusas ku bu tene dana, talves bu sinti dur, falta di speransa o te mesmu ku raiba. Kila ka signifika kuma bu ama kusas material o bu tene falta di fe. Bu pasa pa un situason difisil, i alguns pudi spera pa bu reaẑi di un manera negativu. (Jo 1:11) Ma, mesmu kes situasons difisil, bu pudi inda tene pas. Kuma ku bu pudi tenel?

9. Ke ku Jesus fala pa purparanu pa disastris?

⁹ Lembra di profesia ku Jesus fasi. I ten jintis ku ta pensa di kuma e ka na ciga di sufri un disastri. Ma, no sibi di kuma i na ten manga di disastris na no tempu, i alguns delis pudi afetanu. Jesus fala si sigiduris di kuma, “con na tirmi ku forsa” i utrus disastris na kontisi antis di fin ciga. (Luk 21:11) I falaba ja tambi di kuma, “pekadu na kirsi,” kusa ku no sta na oja aos. Pur isemplu, no ta oja krimi, violensia ku atakis di teroristas. (Mat 24:12) Jesus ka fala nunka di kuma, si no pasa es tipu di situasons i pabia Jeova bandonanu. Na bardadi, manga di servus fiel di Jeova sedu vitimas di disastris. (Isa 57:1; 2 Kor 11:25) Talves Jeova ka na fasi milagri pa proteẑinu di tudu disastris, ma i danu tudu ku no pirsisa del pa manti kalmu i tene pas.

10. Ke ku manda purpara pa disastris ta mostra di kuma no tene fe? (Ditus 22:3)

¹⁰ I na sedu mas fasil manti kalmu na un emerẑensia, si no purpara pa rel. Ma, sera ki purpara ta mostra di kuma no tene falta di fe na Jeova? Nau. Na bardadi, purpara ta mostra di kuma no tene fe na si kapasidadi di kuida di nos. Di kal manera? Palabra di Deus avisanu pa no purpara pa disastris ku pudi bin. (Lei Ditus 22:3.) Atraves di artigus di rivistas, runions di kongregason ku anunsius, manga di bias, organizason di Jeova ta nsentivanu purpara pa un emerẑensia.c Sera ki no konfia na Jeova? Si no konfia nel, no na sigi es konsiju gosi, antis di un disastri kontisi.

11. Ke ku bu aprindi di isemplu di Margaret?

¹¹ Jubi isemplu di un irma comadu Margaret. Otridadis dalba ordi pa i sai di si kasa pabia matu staba na kema na zona ki mora. Suma manga di jintis na tentaba sai na mesmu tempu, i tenba manga di karus na strada, i ningin ka pudiba avansa. I tenba manga di fumu pretu na ar, i Margaret ka konsigi sai di si karu. Ma, i konsigi salva pabia i staba purparadu. Na si bolsa i teneba un mapa ki pudiba usa pa oja utru kamiñu fora di ki zona. Te mesmu i ciga mas sedu, pabia i sibiba nunde ki na bai ora ki ten emerẑensia. Ku ajuda di si purparason, Margaret salva di ki situason.

12. Pabia ku no dibi di sigi instrusons ku ta dadu pa no suguransa?

¹² Pa proteẑinu i pa proteẑi utrus, otridadis pudi pidinu pa obdisi ordi di rekolier obrigatoriu, sai di kau ku no sta, o sigi utrus instrusons. I ten kilis ku ka ta misti sigi es instrusons, pabia e ka ta misti bandona kusas ke tene. Kuma ku kristons ta reaẑi? Biblia falanu: “Pa amor di Siñor bo baŝa pa tudu otridadi di omi, suma rei ku sta riba di tudu, o gubernaduris ku rei manda”. (1 Ped 2:13, 14) Organizason di Jeova ta danu tambi orientason pa no pudi sta suguru. Sempri no ta lembrantadu pa da ansions no numeru di telefoni ku no tene gosi i konta elis nunde ku no mora, asin e na pudi kontaktanu na ora di emerẑensia. Sera ki bu fasil ja? No pudi tambi risibi orientason di fika na kasa o di sai, di kuma ku no pudi risibi ajuda umanitariu, o kuma ku no pudi juda utrus, i na kal mumentu. Si no ka obdisi, no pudi pui no vida ku vida di ansions na pirigu. Lembra di kuma es omis fiel ka ta kansa jubi pa nos. (Eb 13:17) Margaret fala sin: “N sta konvensidu di kuma, sigi orientasons di ansions ku di organizason salva ña vida.”

13. Ke ku juda manga di kristons ku sai nunde ke mora pa e tene kontentamentu ku pas?

¹³ Manga di ermons ku irmas ku sai nunde ke mora, pabia di un disastri o pabia di gera o pabia di manifestason sivil, fasi se minjor pa adapta pa se nobu situason i nvolvi logu na atividadis teokratiku. Suma kristons di purmeru sekulu ku pajiga pabia di pirsigison, e kontinua “na konta palabra.” (At 8:4) Pregason juda elis konsentra na Renu, en ves di konsentra na situasons difisil. Suma rusultadu, e kontinua tene kontentamentu ku pas.

KUMA KU NO PUDI TENE PAS ORA KU NO PIRSIGIDU

14. Kuma ku pirsigison pudi kaba ku no pas?

¹⁴ Ora ku no pirsigidu no pudi pirdi manga di kusas ku ta judanu tene pas. No ta kontenti ora ku no junta di manera livri, prega avontadi i fasi kusas ku no kustuma fasi sin medu di kuma no na prindidu. Si no ka pudi fasi es kusas, no pudi sta preokupadu i ku medu di ke ku na kontisi dipus. I normal tene es sentimentus. Ma, no dibi di toma kuidadu. Jesus mostra di kuma es tipu di pirsigison pudi pui pa si sigiduris fraksi na fe. (Jon 16:1, 2) Pa kila, kuma ku no pudi kontinua tene pas ora ku no pirsigidu?

15. Ke ku manda no ka dibi di medi pirsigison? (Jon 15:20; 16:33)

¹⁵ Palabra di Deus falanu sin: “Tudu kil ku misti vivi un vida puru na Kristu Jesus i ten ku sufri pirsigison.” (Anos ku pui letra karegadu ku italiku, 2 Tim 3:12) I seduba difisil pa un ermon comadu Andrei fia di kuma, tudu servus di Jeova na pirsigidu dipus ku no atividadis proibidu na si tera. I fala sin: ‘I ten manga di Tustumuñas di Jeova li. Kuma ku otridadis pudi prindinu tudu?’ Ma, en ves des manera di pensa da Andrei pas, i pul pa i sta sempri preokupadu. Utrus ermons konfia na Jeova i e ka pensa kuma e ka na prindidu. E sibiba kuma e pudi prindidu, ma e ka staba preokupadu dimas suma Andrei. Pa kila, Andrei disidi tene mesmu manera di pensa i konfia na Jeova. I ka tarda i kumsa ku sinti pas, i gosi i tene kontentamentu mesmu si kontinua inda tene manga di purblemas. Mesmu kusa pudi kontisi ku nos. Jesus falanuba ja di kuma no pudi spera di kuma no na pirsigidu, ma i danu tambi garantia di kuma no pudi kontinua sedu fiel. — Lei Jon 15:20; 16:33.

16. Kal orientason ku no pirsisa di obdisi ora ku no na pirsigidu?

¹⁶ Ora ku no atividadis proibidu o no tujidu fasi manga di kusas ku no kustumaba fasi, no pudi risibi instrusons di filial ku di ansions. Es instrusons i pa proteẑinu, pa punu kontinua risibi kumida spiritual i judanu kontinua prega sugundu no pusibilidadi. Fasi bu minjor pa obdisi orientason ku bu risibi, mesmu si bu ka ntindi tudu ke ku faladu. (Tiagu 3:17) Tambi, nunka ka bu konta informason ku na pui na pirigu no ermons ku irmas, o no atividadis di kongregason pa kilis ku ka tene diritu di risibil. — Ekl 3:7.

17. Suma apostolus di purmeru sekulu, ke ku no dibi di sta disididu pa fasi?

¹⁷ Un di motivus prinsipal ku pui Satanas sta na geria kontra povu di Deus, i pabia e “fika firmi na se tustumuñu di Jesus.” (Apok 12:17) Ka bu disa pa Satanas ku si mundu pui pa bu medi. Prega ku nsina mesmu ku pirsigison, ta danu kontentamentu ku pas. Na purmeru sekulu, oca otridadis judeu manda pa apostolus para prega, es omis fiel disidi obdisi Deus. E kontinua prega, i ki tarbaju fasi elis sinti filis. (At 5:27-29, 41, 42) Na bardadi, ora ku no atividadis proibidu, no dibi di toma kuidadu ora ku no na prega. (Mat 10:16) Ma, si no fasi no minjor, no na tene pas ku ta bin di kontenta Jeova i di konta utrus mensaẑen ku ta salva vida.

“DEUS KU TA DA PAS TA STA KU BOS”

18. Na mon di kin ku no pudi tene pas di bardadi?

¹⁸ Tene sertesa di kuma, mesmu na tempu mas difisil, no pudi tene pas. Na ki mumentus, no dibi di lembra di kuma, pas ku no pirsisa del i pas di Deus, ku sedu, pas ku so Jeova pudi da. Bo konfia nel ora ku bo sta na pasa pa un duensa ku laga, un disastri o pirsigison. Bo fika pertu di si organizason. Bo jubi pa futuru bonitu ku na pera bos. Si bo fasil, “Deus ku ta da pas ta sta ku bos.” (Fil 4:9) Na studu ku na bin, no na fala di kuma ku no pudi juda no ermons na fe, ku sta na pasa situasons difisil pa e tene pas di Deus.