Mostra interesi na utrus ta tisi bensons ku ka ta kaba

Ña pape seduba ansion di Igreẑa Unidu na Kanada, i kada semana i ta mandanu ami ku ña irma pa skola dominikal, dipus no ta bai kontra ku el 11 ora pa tarbajus di igreẑa. Di tardi no ta baiba Salon di Renu ku ña mame. No pudiba oja di manera klaru diferensa ku ten entri es dus riliẑion.

Ña mame konta nobu kusas ki aprindi na Biblia pa Bob ku Marion Hutcheson, ku sedu si amigus pa manga di tempu. Elis tambi e bin sedu Tustumuñas di Jeova. Na 1958, kasal Hutcheson leba se tris fiju pa Asembleia Internasional di oitu dia, Vontadi di Deus, na sidadi di Nova York. Ora ku N jubi pa tras, N ta nota sforsu garandi ke fasi pa leban. Es asembleia seduba un di kusas ku markan na ña vida.

INTERESI KU UTRUS MOSTRA PA MI JUDAN PA N FASI CIU NA SIRVISU DI JEOVA

Na ña juventudi, no mora nunde ke ta kria limarias, i N gostaba di kuida di limarias. N staba na pensa ciu pa sedu veterenariu. Ña mame konta es pa un ansion na kongregason. Ku bondadi i lembrantan di kuma no sta na vivi na “fin de tempu”. I no kombersa aserka di kuma ku bai pa universidadi pa manga di anus na afeta ña amisadi ku Jeova. (2 Tim 3:1) Pa kila, N disidi ka bai universidadi.

N kontinua punta ña kabesa ke ku N na fasi ora ku N kaba liseu. N ta baiba pregason kada fin di semana, ma nin ku sin, N ka gostaba di pregason. N ka pensaba kuma N pudi sedu pioneru. Na mesmu tempu, ña pape ku ña tiu ki ka Tustumuñas di Jeova nsentivan pa N tarbaja tempu kompletu na un impresa garandi di suguransa na Toronto. Ña tiu purmiti dan kargu garandi na ki impresa, pa kila N seta ki tarbaju.

Na Toronto, N ta pasa manga di tempu na tarbaju i na ndianta ku jintis ku ka Tustumuñas di Jeova, i kila tujin mati runions i prega sempri. Na kumsada, N moraba ku ña dona ki ka Tustumuña di Jeova, ma oca ki muri, N pirsiba di mora na utru kau.

Kasal Hutcheson, ku lebanba pa kongresu di 1958, sedu suma pape ku mame pa mi. E falan pa N bai mora na se kasa i e judan kirsi na sintidu spiritual. Na 1960, ami ku si fiju Jon no batisa. Jon kumsa sirvisu di pioneru, i si isemplu motivan pa N aumenta ña atividadi di pregason. Ermons na kongregason nota di ña progresu spiritual, i ku tempu, N disignadu suma servu di Skola di Ministeriu Teokratiku.a

N OJA UN BON PARSERU I N BIN SEDU PIONERU

Na 1966, N kasa ku Randi Berge, un pionera zelosu ku gostaba ciu di sirbi nunde ki ten mas nesesidadi. No superintendenti viaẑanti mostra interesi na nos, i nkoraẑanu pa juda kongregason na Orilia, Ontariu. Pa kila, no ruma no kusas i no bai pa la.

Oca ku no ciga Orilia, N sedu pioneru regular suma Randi. Si animu dan vontadi di sedu pioneru! Oca ku N kumsa na sirbi di tudu korson suma pioneru, N tene kontentamentu di usa Biblia i oja kuma ku jintis sta na ntindi bardadi. I un benson juda un kasal na Orilia fasi mudansas na se vida i sedu servus di Jeova.

APRINDI NOBU LINGUA I MUDA MANERA DI PENSA

Na un visita na Toronto, N kontra ku Arnold MacNamara, un di ermons ku sedu responsavel na Betel. I puntanu si no misti sedu pioneru spesial. N ruspundi logu: “Sin! Na kualker kau, ma menus Kebek!” N influensiadu pa pensamentu negativu di kilis ku ta papia Inglis na Kanada tene, kontra kilis ku ta papia fransis na Kebek. Na ki tempu, jintis staba na manifesta kontra guvernu, e mistiba pa Kebek sedu indipendenti di utru parti di Kanada.

Arnold falan: “Kebek i uniku lugar nunde ku filial sta na manda pionerus spesial es tempu.” N seta logu bai pa la. N sibiba kuma Randi mistiba sirbi la. Dipus, N nota di kuma es i un di minjor disisons ku no toma na no vida!

Dipus di sinku semana di aulas na fransis, ami ku Randi ku utru kasal no bai pa Rimouski, serka di 540 kilometru na nordesti di Montreal. No tene inda manga di kusas di aprindi. Es notadu na un runion oca ku N lei alguns anunsius. N fala di kuma na kongresu ku na bin, no na tene manga di “delegadus di avestruz” en ves di fala “delegadus di Austria.”

Na Rimouski, anos kuatru no sta juntu ku kuatru irmas solteru ku kasal Huberdeau ku se dus fiju femia. Kasal Huberdeau renda un kasa garandi ku tene seti kuartu, i tudu pionerus ku mora la ta judal paga renda. No ta comal kasa branku pabia pilar ku entrada di kasa seduba branku. Normalmenti entri 12 ku 14 jintis ku mora la. Suma pionerus spesial, ami ku Randi no ta pregaba parmaña, di tardi ku di noti. Pa kila, no gostaba di tene algin sempri dispunivel ku na kumpañanu na pregason, mesmu di noti na tempu di friu.

No pertusi mas des pionerus fiel, i e bin sedu suma un familia pa nos. Utrora no ta sinta no da volta di fugu na matu, o no ta pasa dia na kusña juntu. Un di ermons seduba artista, pa kila, kada sabadu di noti no ta kanta i baja.

Manga di jintis na Rimouski staba interesadu na aprindi aserka di Biblia! Dentru di sinku anu, no tene kontentamentu di oja manga di studantis di Biblia fasi progresu pa batismu. Kongregason aumenta pa serka di 35 publikaduris.

Na Kebek, no risibi bon trenamentu na pregason. No oja kuma ku Jeova judanu na pregason i kuida di no nesesidadis material. Tambi, no aprindi ama kilis ku ta papia fransis, se lingua ku se kultura, i kila lebanu pa no na ama jintis di utru kultura. — 2 Kor 6:13.

Pa no surpresa, filial pidinu pa no bai pa sidadi di Trakadie, na zona lesti di Nobu Brunswick. I seduba difisil, pabia no kumsa sina un kontratu pa mora na un kau, tambi N tene kontratu pa sedu pursor na un skola, pa tarbaja puku oras na semana. Tambi, alguns di no studantis di Biblia kumsa sedu publikaduris, i no staba na kumpu Salon di Renu.

No ora tudu fin di semana aserka di munda pa la i no visita Trakadie, ku seduba diferenti ciu ku Rimouski. Ma no fala no kabesa di kuma, suma Jeova misti pa no bai la, no na bai la. No pui Jeova na proba i no oja kuma ki tira kada kusa difisil. (Mal 3:10) Suma Randi teneba un amisadi forti ku Jeova, i ka ta pensa so na si kabesa, i ta ri sempri, i pui pa i sedu mas fasil pa no munda.

Robert Ross seduba uniku ansion na no nobu kongregason. El ku si minjer Linda e seduba pioneru, i e disidi kontinua la dipus di se purmeru fiju padidu. Mesmu manera ke staba na kuida di se fiju pikininu, e nkoraẑanu ciu manera ke ta risibi jintis diritu i pega tesu na pregason.

BENSONS DI SIRBI NUNDE KI TEN NESESIDADI

Dipus di sirbi dus anu suma pioneru na Trakadie, no risibi utru benson ku no ka spera. No kumbidadu pa sirbi na sirkuitu. No sirbi na sirkuitu inglis pa 7 anu, i no disignadu mas pa sirkuitu fransis na Kebek. No superintendenti di distritu na Kebek, Léonce Crépeault, ta ngabanba pa diskursus ku N ta fasi. Ma dipus i ta puntan sempri: “Kuma ku bu diskursus pudi sedu mas pratiku?”b Es interesi ki mostra na mi judan pa pui ña nsinu sedu klaru i fasil di ntindi.

Un di disignasons ku N mas ta lembra del i di kongresu internasional na Montreal, “Fé Vitoriosa” na 1978. N ta tarbajaba na dipartamentu di kumida. No speraba risibi 80 mil jintis. No dibi di da elis di kume di un manera diferenti ku no kustumaba fasi. Tudu kusas seduba nobu: Materialis, kumida ku no na sirbi ku manera di purparal. No teneba serka di 20 jileras garandi. Utrora e ka ta tarbaja diritu. Antis di purmeru dia kumsa, no ka pudiba yentra na stadiu pa ruma tudu kusa antis di meia noti pabia di jugu ku programadu. Tambi no dibi di liga furnu antis di sol mansi pa purpara mata bicu! No staba kansadu, ma N aprindi ciu ku voluntarius ku ta tarbaja duru, ku tene bon maneras di sedu i ku ta bui utrus ri. No kontinua sedu amigus te aos. I un kontentamentu garandi mati es kongresu ku fika na storia na Kebek, kau nunde ki tenba pirsigison garandi entri 1940 ku 1960!

N aprindi ciu di ña kumpañeris superintendentis duranti kongresus garandi na Montreal. I tenba un anu ku David Splane, ku sta na sirbi gosi suma membru di Korpu Guvernanti sedu superintendenti di kongresu. Anu dipus, oca N pididu pa kuida des disignason, David da tudu apoiu.

Na 2011, dipus di no pasa 36 anu na tarbaju di sirkuitu, N kumbidadu pa sedu instrutor na Skola pa Ansions di Kongregason. Ami ku Randi no durmi na 75 kamas diferenti na dus anu, ma es sakrifisiu bali pena. Na fin di kada semana, ansions ta gardisi, pabia e nota kuma ku Korpu Guvernanti ta preokupa ku se spiritualidadi.

Dipus, N sedu instrutor na Skola pa Ivanjilizaduris di Renu. Manga di bias, studantis ta sta preokupadu i kansadu pabia di manga di kusas di fasi: E ta sinta serka di seti ora di tempu na turma kada dia, e ta fasi tarbajus di kasa tris ora di tempu kada dia di noti i e ta kuida di kuatru o sinku disignason kada semana. Ami ku utru instrutor no ta splika elis di kuma, e ka pudi fasi nada sin ajuda di Jeova. N na lembra sempri kuma ku studantis ta fika dimiradu ora ke konfia na Jeova, e ta konsigi fasi mas di ki kil ke pensaba di kuma e pudi fasi.

MOSTRA INTERESI NA UTRUS TISI BENSONS KU KA TA KABA

Interesi ku ña mame mostra pa utrus juda si studantis di Biblia progredi, te mesmu i juda ña pape pa i muda manera ki ta nkara bardadi. Tris dia antis di ña mame muri, ña pape bin mati diskursu publiku na Salon di Renu. I kontinua mati runions pa 26 anu. Ña pape nunka batisa, ma ansions falan di kuma el i purmeru algin ku ta ciga Salon pa runions kada semana.

Ña mame disa tambi bon isemplu pa mi ku ña irmas. Tudu ña tris irmas ku se omis sta na sirbi Jeova di manera fiel. Dus na sirbi na filial, un di Purtugal utru i di Aiti.

Ami ku Randi no sta na sirbi gosi suma pionerus spesial na Hamilton, Ontariu. Oca ku no staba na tarbaja na sirkuitu, no tene kontentamentu di kumpaña utrus pa se revisitas ku studus di Biblia. Ma gosi no kontenti di oja no propi studantis sta na fasi progresu spiritual. Tambi, suma no sedu amigus ku no ermons ku irmas na no nobu kongregason, no sinti nkoraẑadu di oja kuma ku Jeova juda elis na bon ku mau mumentus.

Si no jubi pa tras, no ta da balur garandi pa interesi ku manga di jintis mostra pa nos. Anos tambi, no tenta “sta pruntu” pa mostra interesi pa utrus, nkoraẑa elis pa e pudi fasi tudu ke ke pudi na sintidu spiritual. (2 Kor 7:6, 7) Pur isemplu, un familia, minjer, fiju macu, fiju femia, elis tudu e sta na sirvisu di tempu kompletu. N punta omi si ciga ja di pensa sedu pioneru. I falan di kuma i sta na apoia tris pioneru. N puntal: “Sera ki bu pudi apoia elis mas minjor di ki Jeova.” N falal pa i tene kontentamentu suma ku ki utrus sta na tene. Seis mis dipus i kumsa sirvisu di pioneru.

Ami ku Randi no kontinua konta “jorson ku na lanta na futuru” aserka di “kusas garandi” ku Jeova fasi, i no na spera di kuma e na tene kontentamentu na si sirvisu suma nos. — Sal 71:17, 18.