Sedu koraẑosu suma Zadoki

1-2. Kin ki Zadoki? (1 Kronikas 12:​22, 26-28)

IMAẐINA es situason: Un multidon di mas di 340.000 omis junta pa fasi Davi rei di tudu Israel. Duranti tris dia, omis staba na montañas pertu di Ebron. E staba na ri, papia i kanta kantigas ku kontentamentu pa ngaba Jeova. (1 Kron 12:39) Na metadi di ki jintis i staba un joven comadu Zadoki. Talves manga di jintis ka notaba del. Ma Jeova notaba del, i misti pa jintis sibi di kuma Zadoki staba la. (Lei 1 Kronikas 12:​22, 26-28.) Kin ki Zadoki?

² Zadoki seduba un saserdoti ku ta tarbajaba juntu ku ŝef di saserdotis, Abiatar. Deus daba Zadoki manga di jiresa ku kapasidadi di ntindi kal si vontadi. (2 Sam 15:27) Jintis ta baiba nunde Zadoki ora ke pirsisa di bon konsiju. Zadoki seduba tambi un omi koraẑosu. Nes studu, no na oja kuma ku Zadoki mostra koraẑen.

3. (a) Pabia ku servus di Jeova pirsisa di sedu koraẑosu? (b) Ke ku no na bin fala del nes studu?

³ Nes tempu di fin, Satanas sta na aumenta si ataki kontra povu di Jeova. (1 Ped 5:8) No pirsisa di sedu koraẑosu nkuantu no sta na pera pa Jeova kaba ku Satanas ku si mundu mau. (Sal 31:24) No jubi tris maneras ku no pudi kopia koraẑen di Zadoki.

APOIA RENU DI DEUS

4. Pabia ku povu di Jeova pirsisa di koraẑen pa apoia Renu di Deus? (Jubi tambi foto.)

⁴ Suma povu di Jeova, no ta apoia Renu di Deus ku tudu korson, ma manga di bias no ta pirsisa di koraẑen pa pudi fasil. (Mat 6:33) Pur isemplu, nes mundu mau, no pirsisa di koraẑen pa vivi di akordu ku normas di Jeova i prega bon noba di Renu. (1 Tes 2:2) Kada bias mas es mundu sta na divididu pabia di asuntus pulitiku. Pa kila, no pirsisa di koraẑen pa ka miti boka nes asuntus. (Jon 18:36) Manga di ermons ku irmas ta sufri di purblemas finanseru, e ta sutadu o e ta pudu na prison, pabia e nega partisipa na atividadis pulitiku o militar.

5. Pabia ku Zadoki pirsisaba di koraẑen pa apoia Davi?

⁵ Zadoki ka baiba Ebron so pa fasi festa di renansa di Davi. I baiba armadu, i staba pruntu pa gera. (1 Kron 12:38) I staba dispostu pa sigi Davi na gera i pa difindi Israel di si inimigus. Es joven seduba koraẑosu dimas.

6. Kuma ku Davi disa un bon isemplu di koraẑen pa Zadoki kopia? (Salmu 138:3)

⁶ Kuma ku un saserdoti suma Zadoki aprindi sedu koraẑosu? I kunsiba manga di omis ku seduba forti i koraẑosu. Sin duvida, i aprindi di se isemplu. Isemplu di koraẑen di Davi “ku ta baiba dianti di Israel pa gera” pui pa tudu israelitas misti apoial di tudu korson. (1 Kron 11:​1, 2) Davi sempri konfia na Jeova pa i judal luta kontra si inimigus. (Sal 28:7; Lei Salmu 138:3.) Zadoki aprindi tambi di isemplu di omis suma Jeoiada, ku si fiju gereru ku comadu Benaia ku 22 ŝefis di utru jorsons ku apoia Davi. (1 Kron 11:​22-25; 12:​26-28) Tudu es omis staba disididu pa apoia renansa di Davi.

7. (a) Ke ku no pudi aprindi di isemplus di koraẑen di no tempu? (b) Ke ku bu aprindi di isemplu di ermon Nsilu, suma ki mostradu na video?

⁷ No pudi tene forsa ku koraẑen ora ku no pensa na isemplu di kilis ku apoia ku koraẑen guvernu di Jeova. No Rei Kristu Jesus, ka seta miti boka na asuntus pulitiku di mundu di Satanas. (Mat 4:​8-11; Jon 6:​14, 15) I konfia sempri na Jeova pa risibi forsa. No tene tambi manga di isemplus di ermons jovens ku nega bai vida militar o partisipa na atividadis pulitiku. Pabia ku bu ka na jubi alguns di se spiriensias na jw.org?a

JUDA BU ERMONS

8. Na kal mumentu ku ansions pirsisa di koraẑen pa juda se ermons ku irmas?

⁸ Povu di Jeova gosta di juda n̈utru. (2 Kor 8:4) Ma utrora i pirsis koraẑen pa fasil. Pur isemplu, ora ki ten gera, ansions ta nota di kuma se ermons ku irmas pirsisa di nkoraẑamentu ku ajuda. Talves e na pirsisa di Biblia ku no publikasons o di kumida, ropa ku kau di sta. Pabia di amor pa ermons ku irmas, ansions ta pui se vida na pirigu pa da elis ajuda ke na pirsisa del. (Jon 15:​12, 13) Asin, e ta kopia isemplu di koraẑen di Zadoki.

9. Suma ki faladu na 2 Samuel 15:​27-29, ke ku Davi fala Zadoki pa i fasi? (Jubi tambi diseñu.)

⁹ Vida di Davi staba na pirigu. Si fiju Absalon, staba disididu pa toma renansa. (2 Sam 15:​12, 13) Davi pirsisa di sai logu-logu di Jerusalen! I coma si servus ku vos altu i fala elis: “Bo lanta, no kuri, pabia si ka asin nin un son di nos ka na kapli dianti di Absalon.” (2 Sam 15:14) Suma tudu si servus na bai, Davi ntindi di kuma un algin pirsisa di fika, pa ba ta kontal planus di Absalon. Pa kila, Davi manda Zadoki ku utrus saserdotis pa e riba pa sidadi pa e ba ta kontal ke ku na pasa. (Lei 2 Samuel 15:​27-29.) E pirsisaba di toma kuidadu garandi. Ke ku Davi fala saserdotis pa fasi, seduba pirigosu dimas i te mesmu pa se vida. Absalon seduba violentu, i ta pensaba so na si kabesa, tambi i seduba traidur. Imaẑina ke ki na fasiba pa Zadoki ku utrus saserdotis si diskubri di kuma, e staba na jubi ke ki staba na fasi pa pudi proteẑi Davi!

10. Kuma ku Zadoki ku kilis ku sta juntu ku el proteẑi Davi?

¹⁰ Davi pidi Zadoki ku Usai, ku sedu si utru amigu fiel, pa i judal fasi un planu. (2 Sam 15:​32-37) Usai finji di kuma i na apoia Absalon, i dal konsiju di kuma ki na ataka Davi, i kila da Davi tempu pa i purpara pa ataki. Dipus Usai konta Zadoki ku Abiatar ke ku kontisi. (2 Sam 17:​8-16) Es dus jintis fasi tudu ke pudi pa konta Davi planus di Absalon. (2 Sam 17:17) Ku ajuda di Jeova, Zadoki ku utrus saserdotis juda na proteẑi vida di Davi. — 2 Sam 17:​21, 22.

11. Kuma ku no pudi kopia koraẑen di Zadoki ora ku no na juda no ermons?

¹¹ Kuma ku no pudi sedu koraẑosu suma Zadoki ora ku no ermons sta na pirigu i e pirsisa di ajuda? (1) Sigi orientason. Duranti es situasons pirigosu, i importanti sedu obdienti pa pudi kontinua unidu. Obdisi orientason ku ta bin di no filial. (Eb 13:17) Ansions dibi di jubi sempri instrusons aserka di kuma ke dibi di purpara pa disastris i ke ke dibi di fasi ora ki ten disastris. (1 Kor 14:​33, 40) (2) Sedu koraẑosu, ma toma kuidadu. (Dit 22:3) Pensa antis di bu aẑi. Ka bu pui bu vida na pirigu si ka pirsis. (3) Konfia na Jeova. Lembra di kuma Jeova misti pa bo sta suguru, abo ku bu ermons. I pudi judau pa bu pudi juda bu ermons sta suguru.

12-13. Ke ku bu aprindi di spiriensias di Viktor ku Vitalii? (Jubi tambi foto.)

¹² Jubi spiriensia di dus ansions, Viktor ku Vitalii, ku tarbaja juntu pa da kumida ku yagu pa se ermons na Ukrania. Viktor fala sin: “No ta buskaba kumida na tudu ladu. Manga di bias no ta obiba tirus pertu di nos. Un ermon patiba kumida ki tira na kau ki ta guarda kusas. Es oferta da publikaduris ke ke pirsisaba del pa vivi pa manga di dias. Oca no staba na pui kusas na no karu, bumba kai serka di 20 metru di nunde ku no staba, ma i ka spludi. Duranti tudu ki dia, N pidi Jeova pa i dan koraẑen ku N pirsisa del pa N kontinua juda publikaduris.”

¹³ Vitalii fala sin: “N pirsisaba di manga di koraẑen. Purmeru bias ku N fasi leba 12 ora. Duranti tudu ki tempu N staba na ora Jeova.” Vitalii seduba koraẑosu, ma tambi i tomaba kuidadu. I fala mas asin: “N kontinua ora Jeova pa i dan jiresa i pa i judan pa N ka pui ña vida na pirigu i kontinua sigi ke ku otridadis fala. N kurintiba karu so na stradas ke pirmiti. Ña fe torna mas forti, oca ku N oja kuma ku ermons ku irmas na tarbaja juntu. E tira kusas ku taja strada, e toma kumida, ropa ku utrus kusas importanti na karu, tambi e pati utrus kusas, e danu kumida ku kau di sta.”

KONTINUA FIEL PA JEOVA

14. Kuma ku bu na sinti si un algin ku bu ama sedu infiel pa Jeova?

¹⁴ Un di situasons mas difisil ku no pudi pasa, i ora ku un membru di no familia o un amigu intimu disa Jeova. (Sal 78:40; Dit 24:10) Mas bu gosta di ki algin, mas i na sedu difisil pa bu nguenta ki situason. Si bu pasa es situason difisil, isemplu di fidelidadi di Zadoki pudi nkoraẑau.

15. Pabia ku Zadoki pirsisa di koraẑen pa kontinua fiel pa Jeova? (1 Re 1:​5-8)

¹⁵ Zadoki kontinua fiel pa Jeova oca ku si amigu intimu disidi sedu infiel. Es kontisi na fin di renansa di Davi. Oca Davi pertu muri, si fiju Adonias tentaba sedu rei mesmu manera ku Jeova falaba di kuma Salomon ku na sedu rei. (1 Kron 22:​9, 10) Abiatar disidi apoia Adonias. (Lei 1 Reis 1:​5-8.) Manera ki fasi kila, Abiatar seduba infiel tantu pa Davi suma pa Jeova! Bu pudiba imaẑina kuma ku Zadoki fikaba mal i tristi? Pa manga di anu, el ku Abiatar e tarbaja juntu suma saserdoti. (2 Sam 8:17) E kuidaba di “arka di Deus” juntu. (2 Sam 15:29) Na kumsada, es dus jintis apoia renansa di Davi, tambi e fasiba manga di utrus kusas na sirvisu di Jeova. — 2 Sam 19:​11-14.

16. Ke talves ku juda Zadoki kontinua fiel?

¹⁶ Zadoki kontinua fiel pa Jeova mesmu manera ku Abiatar disidi sedu infiel. Davi nunka duvida di fidelidadi di Zadoki. Oca planu di Adonias diskubridu, Davi buska ajuda di Zadoki, Natan ku Benaia pa unji Salomon suma rei. (1 Re 1:​32-34) Zadoki dibi di sintiba nkoraẑadu pa isemplu di utrus servus di Jeova suma Natan, ku seduba tambi fiel pa Jeova i apoia Davi. (1 Re 1:​38, 39) Oca Salomon sedu rei, i “pui saserdoti Zadoki na lugar di saserdoti Abiatar.” — 1 Re 2:35.

17. Kuma ku bu pudi kopia Zadoki si un algin ku bu ama sedu infiel pa Jeova?

¹⁷ Kuma ku bu pudi kopia Zadoki? Si algin ku bu ama disidi sedu infiel pa Jeova, mostra Jeova di kuma bu disidi sedu fiel pa rel. (Jos 24:15) Jeova na dau forsa ku koraẑen ku bu pirsisa del. Ora Jeova i kontinua pertusi di bu amigus ku kontinua sedu fiel pa rel. Jeova ta da balur pa bu fidelidadi, tambi i na bin pagau pa kila. — 2 Sam 22:26.

18. Ke ku bu aprindi di spiriensia di Marco ku Sidse?

¹⁸ Jubi isemplu di Marco ku si minjer Sidse, ku se dus fiju femia para sirbi Jeova. Marco fala sin: “Disna di dia ku bu fijus padidu, bu ta gosta ciu delis. Bu na fasi tudu ku bu pudi pa proteẑi elis kontra mal. Pa kila, ora ke disidi disa Jeova, i ta sedu dur garandi. Ma Jeova judanu nguenta. I fasi pa ora ku N sta fraku, ña minjer ta sta forti, ora ku ña minjer sta fraku, ami N ta sta forti.” Sidse fala sin: “No ka na konsigiba nguenta si Jeova ka danuba forsa ku no pirsisa del. N sintiba tristi dimas, N pensaba di kuma N tene kulpa manera ku ña fijus para sirbi Jeova, pa kila, N konta Jeova kuma ku N staba na sinti. Alguns dias dipus, un irma ku N tarda pa oja, bin nunde mi na Salon di Renu, i pun mon na ombru, i jubin na uju i falan: ‘Sidse lembra, i ka bu kulpa!’ Ku ajuda di Jeova, N kontinua manti ña alegria na si sirvisu.”

19. Ke ku bu sta disididu pa fasi?

¹⁹ Jeova misti pa tudu si servus sedu koraẑosu suma Zadoki. (2 Tim 1:7) Ma i ka misti pa no konfia na no propi forsa. I misti pa no konfia nel. Pa kila, ora ku bu sta na un situason ku bu na pirsisa di koraẑen, buska ajuda di Jeova. Bu pudi tene sertesa di kuma Jeova na pou pa bu sedu koraẑosu suma Zadoki! — 1 Ped 5:10.