“Nunka N sta ami son”

ISEMPLU DI ÑA PAPES

Ña pape ku ña mame seduba katolikus pratikanti. Ma oca ke aprindi na Biblia di kuma nomi di Deus i Jeova, e pasa sedu Tustumuñas di Jeova ku ta pega tesu. Ña pape para kumpu statuas di Jesus. En ves di kila, i usa ke ki sibi fasi suma karpinteru, pa muda moradia bas di no kasa pa i sedu purmeru Salon di Renu na San Juan del Monte, un bairu di Manila, kapital di Filipinas.

Oca ku N padidu na 1952, ña papes kumsa ku nsinan aserka di Jeova, suma ke nsina ña kuatru ermons ku tris irmas garandi. Oca N na kirsi, ña pape nkoraẑan pa lei un kapitulu di Biblia kada dia, tambi i ta studaba diferentis publikasons ku mi. Utrora, ña papes ta risibi superintendentis viaẑanti ku ermons ku ta tarbaja na Betel pa e durmi na no kau. Spiriensias ku es ermons ta kontanu, da no familia kontentamentu ku nkoraẑamentu, i kila lebanu pui sirvisu di Jeova suma kusa mas importanti na no vida.

N aprindi ciu ku isemplu di ña papes ku teneba fe forti. Oca ku ña mame muri pabia di un duensa, N kumsa sirvisu di pioneru juntu ku ña pape na 1971. Ma dipus, na 1973 oca ku N teneba 20 anu, ña pape muri. Oca ku ña pape ku ña mame muri N sinti suma N ka tene ningin, N staba ami son. Ma speransa sertu i “firmi” ku sta na Biblia, judan kontinua sedu pusitivu i pertusi di Jeova, en ves di fika tristi dimas. (Eb 6:19) Puku tempu dipus ku ña pape muri, N seta disignason di sedu pioneru spesial na un ilia isoladu comadu Koron, na reẑion di Palawan.

N STABA AMI SON NA DISIGNASONS DIFISIL

N teneba 21 anu oca ku N ciga Koron. Suma sempri N vivi na prasa, N fika ku surpresa di sibi di kuma ilia ka tene lus, yagu di bumba, tambi i teneba puku karus o motas. Mesmu manera ki tenba puku ermons, N ka teneba kumpañer di sirvisu di pioneru, i utrora, N ta pregaba ami son. Na purmeru mis, N dijaba ciu ña familia ku ña amigus. Di noti, N ta coraba ora ku N na jubi strelas na seu. N mistiba disa ña disignason i riba kasa.

Nes mumentus, N ta kontaba Jeova tudu ke ku sta na ña korson. N ta lembra di palabras nkoraẑanti ku N leiba na Biblia ku no publikasons. Manga di bias N ta lembra di Salmu 19:14. N nota di kuma Jeova na sedu ‘ña Roca ku ña Libertadur’, si N ta pensa fundu na kusas ku ta kontental, suma kusas ki ta fasi ku si maneras di sedu. Artigu di Sintinela “Nunca está sozinho”a judanba ciu. N leilba manga di bias. Ora ku N sta ami son, N ta sinti suma si N sta ku Jeova. Es seduba mumentu spesial ku N pudiba ora, studa i pensa fundu.

Puku tempu dipus ku N ciga Koron, N disignadu suma ansion. Suma N seduba uniku ansion, N kumsa diriẑi kada semana Skola di Ministeriu Teokratiku, Runion di Sirvisu, Studu di Livru di Kongregason ku Studu di Sintinela. Tambi N ta fasiba diskursu publiku kada semana. Pabia di manga di kusas ku N tene pa fasi, N ka teneba tempu di sinti di kuma N staba ami son!

Pregason na Koron da bon rusultadu, pabia alguns di ña studantis di Biblia bin batisa dipus. Ma i ten tambi difikuldadis. Utrora, N ta yanda disna di parmaña te me-dia pa ciga tiritoriu, sin sibi nunde ku N na durmi ora ku N ciga. I tenba tambi manga di ilias pikininu ku fasi parti di tiritoriu di kongregason. Sempri N ta baiba na kanua di mutur na mar ku teneba maron forti, mesmu manera ku N ka sibiba nada! Na tudu es mumentus difisil, Jeova proteẑin i judan. Dipus N ntindi di kuma, Jeova staba na purparan pa difikuldadis mas garandi na disignason ku N na bin tene dipus.

PAPUA NOVA GINE

Na 1978, N disignadu pa Papua Nova Gine, na norti di Australia. Papua Nova Gine tene manga di montañas, i tene kuas tamañu di Spaña. Oca N sibi di kuma un populason di kuas tris milyon di jintis ta papia serka di 800 lingua, N fika dimiradu. Filismenti, maioria di jints ta papia Pigin Malanesiu, ku kunsidu pa Tok Pisin.

N disignadu pa un tempu na kongregason Inglis na kapital, Portu Moresbi. Dipus, N munda pa kongregason Tok Pisin i N kumsa aulas pa aprindi lingua. N usa ke ku N aprindi na aulas pa prega. Es judan aprindi ki lingua mas rapidu. Na puku tempu N konsigi fasi diskursu publiku na Tok Pisin. N fikaba dimiradu pabia menus di un anu ku N ciga Papua Nova Gine, N disignadu pa sirbi suma superintendenti di sirkuitu pa kongregasons di Tok Pisin ku sta na diferentis reẑions.

Suma kongregasons lunju n̈utru, N tenba ku organiza manga di asembleias di sirkuitu i viaẑa ciu. Na kumsada, N sintiba kuma N sta son na kau ku N ka kunsi, na nobu tera, nunde ku jintis ta papia utru lingua i ku tene utru kultura. N ka pudiba viaẑa di karu, pabia i tenba manga di montañas ku stradas ku ka bali. Pa kila, kuas kada semana N tenba di viaẑa na avion. Utrora N ta seduba uniku pasaẑeru na un avion pikininu ku ka teneba bon kondison. N ta mediba fasi es bias, suma ku N ta mediba mbarka na kanua!

Puku jintis ku teneba telefoni, pa kila, N ta mandaba kongregasons karta. Manga di bias, N ta ciga antis di ña kartas, i N tenba ku punta jintis nunde ku Tustumuñas di Jeova sta. Kada bias ku N oja ermons e ta risibin diritu, i kila ta lembrantan ke ku manda N staba na fasi tudu es sforsu. N oja kuma ku Jeova judan di manga di manera, i ña amisadi ku el torna mas forti.

Na purmeru runion na un ilia comadu Bougainville, un kasal pertusi di mi ku kontentamentu i e puntan: “Sera ki bu lembra di nos?” N lembra di kuma N prega es kasal oca ku N ciga Portu Moresbi pa purmeru bias. N kumsa ku studa Biblia ku elis, dipus N pasa elis pa un ermon lokal. Gosi elis tudu dus e batisa! Es seduba un di manga di bensons ku N risibi na tris anu ku N fasi na Papua Nova Gine.

N STABA OKUPADU KU UN FAMILIA PIKININU

Antis di N sai di Koron na 1978, N kunsi Adel, un irma bonitu ku ta pega tesu. I seduba pioneru regular i na mesmu tempu, i staba na kria si dus fiju, Samuel ku Shirley. Tambi i ta kuidaba di si mame ku tene idadi. N riba Filipinas na Maiu di 1981 pa kasa ku Adel. Dipus di no kasamenti, no sedu pionerus regular i na mesmu tempu no kuida di no familia juntu.

Na 1983, mesmu manera ku N tene familia, N disignadu mas suma pioneru spesial na ilia di Linapakan, na reẑion di Palawan. N bai ku tudu ña familia na ki kau isoladu nunde ki ka tenba nin un Tustumuña di Jeova. Mame di Adel muri serka di un anu dipus. Ma no kontinua sta okupadu na pregason, i kila judanu nguenta no dur. No kumsa manga di studus di Biblia na Linapakan ku jintis ku mistiba mati runions. No pirsisaba di un kau pa runi. Pa kila, no kumpu un kau pa runions. Dipus di tris anu ku no ciga Linapakan, no kontenti di oja 110 jintis ku mati Memorial i manga delis bin batisadu.

Na 1986, N disignadu pa ilia di Kulion, nunde ku manga di jintis tene lepra. Alguns anus dipus, Adel disignadu tambi suma pioneru spesial. Na kumsada, no ta mediba prega jintis ku teneba lepra. Ma publikaduris lokal falanu di kuma kilis ku tene es duensa risibi tratamentu, i tenba puku risku de kambantanu el. Alguns des jintis ta matiba runions na kasa di un irma. No kumsa ku sta avontadi pa prega es jintis. I interesanti fala di speransa di Biblia pa es jintis ku ta pensa di kuma Deus ka ta interesa ku elis, tambi ku ta pensa di kuma utru jintis ka ta interesa ku elis. No ta kontentiba ora ku no oja jintis ku duensiba risu, sta kontenti dimas di sibi di kuma un dia e pudi tene saudi perfeitu. — Luk 5:​12, 13.

Kuma ku no fijus konsigi adapta ku vida na Kulion? Ami ku Adel no kumbida dus irmas jovens di Koron pa e sta juntu ku nos pa no fijus pudi tene bon kumpañerasku. Samuel, Shirley ku ki dus irmas jovens ta kontentiba di juda utrus kunsi bardadi, i e ta studaba ku manga di mininus, nkuantu ami ku Adel no ta studaba ku papes des mininus. I ciga un mumentu nunde ku no staba na studa ku 11 familia. Puku tempu dipus, no staba na diriẑi manga di studus di Biblia ku jintis ku staba na torna se amisadi ku Jeova mas forti, asin no konsigi forma nobu kongregason!

Na kumsada, N seduba uniku ansion na ki zona. Pa kila, filial pidin pa N ba ta diriẑi runions di semana pa oitu publikaduris na Kulion, i fasi mesmu kusa ku novi publikaduris na un tabanka comadu Marili. Pa sai di Kulion pa Marili i pirsis tris ora di tempu na kanua. Dipus di runions, ami ku ña familia no ta yanda na montañas pa manga di oras, pa diriẑi studus di Biblia na un tabanka comadu Halsey.

Ku tempu, manga di jintis staba na bin pa bardadi na Marili ku Halsey, pa kila, no kumpu Salons di Renu nes dus kaus. Suma na Linapakan, ermons ku interesadus ku sta na Marili ku Halsey da manga di materialis di konstruson, tambi e juda na kumpu Salon. Salon di Marili pudiba leba 200 jintis, tambi i pudiba aumentadu, i kila ta pirmitinu fasi asembleias la.

N STABA KU TRISTESA GARANDI, N DINGI I N TORNA TENE MAS KONTENTAMENTU

Oca ku no fijus garandi, ami ku Adel no kumsa sirbi na sirkuitu na Filipinas na 1993. Na 2000, N fasi Skola di Trenamentu Ministerial pa pudi trenadu suma instrutor des skola. N sinti di kuma N ka teneba kapasidadi di nsina, ma Adel sempri ta nkoraẑan. I lembrantan di kuma, Jeova na dan forsa pa N kuida des nobu disignason. (Fil 2:13) Adel sibiba di kuma es i bardadi, pabia i kumpri si disignason oca ki teneba purblemas di saudi.

Na 2006 oca N seduba inda instrutor, i diskubridu di kuma Adel teneba un duensa ku ta afeta sistema nervosu, comadu duensa di Parkinson. No ka fiaba! Oca N falal pa no para no sirvisu pa pudi kuida di si saudi, Adel falan: “Di fabur, buska un mediku ku na pudi judan kuida di ña duensa, N sibi di kuma Jeova na judanu kontinua na sirvisu.” Pa seis anu, Adel kontinua na si sirvisu pa Jeova sin miskiña. Oca ki ka pudi ja mas yanda, i ta usa kareta di roda pa prega. Oca ki seduba difisil pa i papia, i ta da kumentariu di un o dus palabra na runions. Te oca ki muri na 2013, manga di ermons ku irmas ta manda sempri Adel kartas ku mensaẑens na telemovel pa gardisil pa bon isemplu di fe ki mostra. N pasa mas di 30 anu ku ña minjer fiel i amorosu, pa kila, oca ki muri, N kumsa ku sinti tristi dimas i dingi.

Adel na mistiba pa N kontinua na ña disignason, pa kila, N kontinua. Kontinua sta okupadu na sirvisu, judan lida ku ña sentimentu di sta ami son. Di 2014 pa 2017, N disignadu pa visita kongregasons di lingua Tagalog na teras nunde ku no ermons ka teneba liberdadi di adora Jeova. Dipus des, N ta visitaba kongregasons di lingua Tagalog na Taiwan, Stadus Unidu ku Kanada. Na 2019, N seduba instrutor di Skola pa Ivanjilizaduris di Renu na India ku Tailandia na Inglis. N teneba alegria garandi na tudu es disignasons. N ta sta mas kontenti ora ku N sta okupadu na sirvisu di Jeova.

NO TENE SEMPRI AJUDA KU NO PIRSISA DEL

Na kada nobu disignason ku N risibi, N ta kumsa ku ama ermons ku irmas, pa kila, i ta sedu difisil disa elis. N aprindi konfia na Jeova di tudu korson na ki mumentus. N oja sempri kuma ku Jeova judan, i kila judan seta di tudu korson kualker mudansas na ña vida. Gosi N sedu pioneru spesial na Filipinas. N kustuma ku ña nobu kongregason, ku pasa sedu suma un familia ku ta judan i kuida di mi. Tambi N kontenti dimas di oja Samuel ku Shirley na kopia fe di se mame. — 3 Jon 4.

N pasa manga di situasons difisil na ña vida, suma di oja ña minjer duensi risu i muri di un duensa gravi. N tenba tambi ku adapta ku manga di utru situasons. Ma, N oja di kuma Jeova “ka sta lunju di kada un di nos”. (At 17:27) Mon di Jeova “ka kurtu dimas” pa juda i da forsa pa si servus, mesmu na tiritorius isoladu. (Isa 59:1) Jeova i ña Roca, i sta ku mi duranti tudu ña vida, i N na gardisil pa kila. Nunka N sta ami son.