Jeova judanu ‘kirsi nunde ku no parantadu’

Kasal Kassholms kursa Skola di Jiliadi na 1979. Duranti ki anus tudu, e “parantadu” o disignadu pa sirbi na Iran, Maurisiu, Myanmar, Tanzania, Uganda ku Zairi. Jack Redford, se instrutor di Skola di Jiliadi, da elis es konsiju ku pudi juda elis ora ke “parantadu,” “rinkadu,” i “torna parantadu mas” manga di bias. No disa elis pa e splikanu.

Di fabur bo kontanu kuma ku bo kunsi bardadi.

Mats: Duranti Sugundu Gera Mundial no moraba na Polonia, i ña pape oja manga di finjimentu na igreẑa katoliku. Ma, i kustuma ta fala: “Bardadi dibi di sta na algun kau!” Ku tempu, N oja di kuma ke ki ta fala i bardadi. N kumpra manga di livrus ku usaduba ja. Un delis seduba un livru azul comadu A Verdade Que Conduz à Vida Eterna. Titulu di ki livru na bardadi coma ña atenson, i N lei ki livru ntidu ki di noti. Oca ku N kaba leil, N sibi logu di kuma N oja riliẑion di bardadi!

Disna di Abril di 1972, N kumsa ku lei manga di publikasons di Tustumuñas di Jeova i N oja respostas di purguntas ku N ta fasi aserka di Biblia. N sinti suma ki komersianti di komparason di Jesus. Dipus di oja un pérola di garandi balur, i bai bindi tudu ki tene pa pudi kumpral. N “bindi” o N disa ña objetivu di bai studa na universidadi pa sedu dutur. N fasi es tudu pa pudi kumpra “pérola” di bardadi ku N oja. (Mat 13:​45, 46) N batisa na dia 10 di Dizembru di 1972.

Nin i ka fasi un anu, ña pape ku un di ña ermonsiñu seta bardadi i e batisa. Na Juliu di 1973, N kumsa sirvisu di tempu kompletu. Na no kongregason, i tenba un pioneru bonita comadu Ann-Catrin, i ama Jeova ciu. No gosta di n̈utru i no kasa na 1975. Duranti kuatru anu no mora na sidadi bonitu di Strömsund, na Suesia, nunde ku manga di jintis misti aprindi aserka di Biblia.

Ann-Catrin: Ña pape aprindi bardadi oca ki staba na studa na universidadi na Stockholm. Na ki tempu, N seduba bebe di tris mis, ma i ta lebanba na runions ku pregason. Ña mame ka gostaba des, i ta tentaba mostra di kuma Tustumuñas di Jeova sta eradu. Ma i ka konsigi, i ku tempu el propi i bin batisa. N batisa ku 13 anu, i N kumsa sirvisu di pioneru ku 16 anu. Dipus di sirbi na Umeå, nunde ki tenba nesesidadi garandi di publikaduris di Renu, N kumsa ku sirbi suma pioneru spesial.

Dipus ku no kasa, no tene alegria di juda manga di jintis kunsi bardadi. Entri elis i tenba un bajuda comadu Maivor, ku bandona si karera di disportu pa pudi sirbi mas Jeova. I bin sirbi suma pioneru juntu ku ña irmasiña. E kursa Skola di Jiliadi na 1984 i e sirbi suma misionarius na Ekuador.

Na tudu disignasons ku bo risibi suma misionarius, kuma ku bo sigi konsiju di “kirsi nunde ku bo parantadu”?

Mats: No pididu manga di bias pa muda pa nobu disignason. Ma un kusa ku judanu adapta ku es mudansas, i sempri tenta fasi no minjor pa kopia isemplu di Jesus, prinsipalmenti si umildadi. (Kol 2:​6, 7) Pur isemplu, en ves di pera pa ermons lokal fasi kusas di no manera, no ta tenta aprindi pabia di ke ku manda e ta fasi kusas di un sertu manera. No misti aprindi kuma ke ta pensa i kunsi se kultura. Mas no kopia isemplu di Jesus, mas no ta sinti suma no “parantadu lungu di korenti di yagu” pa kirsi nunde ku no disignadu nel. — Sal 1:​2, 3.

Ann-Catrin: Ora ku no muda pa nobu disignason, no ta parsi suma un arvuri nobu ku kumsa parantadu ku pirsisa di lus di sol pa pudi kirsi. Jeova sempri sedu ki “sol” pa nos. (Sal 84:11) Jeova bensuanu ciu ku manga di ermons ku irmas ku gosta ciu di nos. Pur isemplu, na no kongregason pikininu na Tehran, Iran, no risibidu diritu. Es fasinu lembra di kuma ku ospris ta risibidu na tempus bibliku. No gostaba di fika na Iran, ma na Juliu di 1980, guvernu tuji tarbaju di Tustumuñas di Jeova la, i no kontadu di kuma no ten ku disa ki pais dentru di 48 ora. No disignadu pa Zairi (gosi i kunsidu pa Kongu Kinŝasa) na Afrika.

Oca ku N sibi di kuma no disignadu pa Afrika, N cora. Ke ku N obi aserka di kobras ku duensas na Afrika pantandanba mal. Ma dus di no amigus ku no gosta ciu del, ku sirbi pa manga di tempu na Afrika falanu asin: “Ka bo medi. Nunka bo ka bai Afrika, ma no sibi di kuma bo na gosta di la.” E ka yaraba! Ermons ku irmas ta mostra amor i e seduba bon dimas. Na bardadi, oca ku no tenba ku disa Zairi seis anu dipus pabia no tarbaju tujidu la, N ri ña kabesa pabia gosi N staba na ora Jeova asin: “Di fabur, judanu pa no kontinua na Afrika.”

Kal bensons bonitu ku bo tene na sirvisu di Jeova?

Mats: Pabia di no disignason no tene bon amisadis ku utrus misionarius ku bin di manga di teras diferentis. Tambi na alguns disignasons, no teneba kontentamentu di diriẑi manga di studus di Biblia, i utrora kada un di nos ta tene te 20 studus! Tambi nunka N ka na diskisi di amor i di kuma ku no ermons ku irmas na Afrika risibinu diritu. No ta durmiba na no karu ora ku no na visita kongregasons na Tanzania, i ermons ta fasi pa no tene tudu ku no pirsisa del, mesmu manera ke seduba koitadi dimas. (2 Kor 8:3) Un kusa muitu importanti pa nos i kil ku no ta coma di tempu di storia. Es ta sedu na fin di kada dia, ora ku ami ku Ann-Catrin no sinta pa papia di kusas ku kontisi duranti ki dia, i no ta gardisi Jeova pa manera ki sta juntu ku nos.

Ann-Catrin: Pa mi, un alegria garandi i di kunsi ermons ku irmas di tudu parti di mundu. No aprindi nobu linguas nkluindu Farsi, Fransis, Luganda ku Suaili i no aprindi manga di kulturas diferenti. No juda na trena nobu ermons ku irmas, no tene bon amigus i no kontenti sirbi Jeova juntu ku elis. — Sof 3:9.

Tambi no jubi diferentis kusas bonitu ku Jeova kumpu. Kada bias ku no seta un nobu disignason na sirvisu di Jeova, no ta sinti suma no sta na yanda juntu ku Jeova, i el i no gia. I nsinanu kusas ku nunka no ka na cigaba di aprindi anos so.

Kal ki alguns purblemas ku bo pasa pa rel, i ke ku juda bos nguenta?

Mats: Ku tempu no bin paña duensas suma paludismu. Tambi Ann-Catrin dibi di fasiba alguns operasons ku no ka speraba. No staba tambi preokupadu dimas, pabia di no papes ku teneba idadi muitu avansadu. Pa kila, no na gardisi no familias ku kuida delis nkuantu no staba na no disignasons. E kuida di no papes ku pasensa, alegria i ku amor. (1 Tim 5:4) Apesar di kuma no fasi no minjor pa juda elis mesmu manera ku no sta lunju, utrora no ta sinti mal pabia no misti juda elis inda mas.

Ann-Catrin: Na 1983, nkuantu no staba na sirbi na Zairi, N duensi risu pabia di kolera. Dutur fala Mats: “Sai ku el fora di pais aos propi!” No sai na dia siginti, ma uniku manera pa ciga Suesia seduba na un avion ku ta leba so kargas.

Mats: No cora pabia no pensa di kuma, no ka na pudi mas sirbi suma misionarius. Diferenti di ke ku dutur pensaba Ann-Catrin rekupera si saudi. Un anu dipus no konsigi riba pa Zairi, ma de bias no disignadu pa un kongregason pikininu di lingua Suaili na Lubumbashi.

Ann-Catrin: Nkuantu no staba na Lubumbashi, bariga dana ku mi. Mesmu manera ku no ka pensaba tene fiju, N sinti tristi dimas oca ku no bebe muri. Ma duranti ki tempu difisil, Jeova danu un prenda ku no ka speraba. No kumsa studus di Biblia mas di ki kilis ku no teneba. Na menus di un anu, no kongregason kirsi ciu, i sai di 35 pa 70 publikaduris, i asistensia di runions sai di 40 pa 220. No staba okupadu dimas na pregason, i Jeova bensua no sforsu i es fasin sinti minjor. Te gosi no ta pensa i no ta papia di no bebe. No ten dipresa di oja kuma ku Jeova na kura no dur di un bias pa sempri na paraísu.

Mats: Na un mumentu, Ann-Catrin kumsa ku sta kansadu dimas. Na mesmu tempu i diskubridu di kuma, N tene kankru ku sta na un stadu muitu avansadu i N pirsisaba di fasi un operason garandi. Ma gosi N sta minjor, i Ann-Catrin sta na fasi si minjor na sirvisu di Jeova.

Dipus di matansa na 1994 na Ruanda, no visita manga di ermons ku irmas na kampus di refuẑiadu. Di la, no nota di kuma, i ka anos so ku tene purblemas. No oja fe di no ermons ku irmas, manera ke nguenta i kuma ke ta risibi utrus diritu. Kila nsinanu di kuma, Jeova tene puder di juda si povu na kualker situason difisil. — Sal 55:22.

Ann-Catrin: Utru situason difisil ku no pasa i oca ku no mati dedikason di filial di Uganda na 2007. Dipus di programa, no staba na viaẑa pa Nairobia na Kenia, ku un grupu di serka di 25 misionarius ku betelitas. Antis di no ciga forontera di Kenia, di repenti un kamion bin pa no ladu i maja no karu. Kondutor juntu ku 5 di no ermons ku irmas muri logu. Un irma muri mas tardi na ospital. No disja ciu bin oja no ermons ku irmas! — Jo 14:​13-15.

Ku tempu N konsigi rekupera nã saudi fisiku. Ma ami ku Mats ku utrus, no kontinua sufri dur emosional pabia di asidenti. Na ña situason, N ta korda di noti, N ta sta suma si N na sufri ataki di korson. Es ta punba tene medu. Ma ke ku judanu manti kalmu, i ora Jeova di tudu korson, lei i pensa na alguns testus di Biblia ku no gosta ciu del. No konsulta tambi medikus ku sibi trata di dur emosional, i kila judanu ciu. Gosi no sta na sinti mas minjor, i no pidi Jeova pa i judanu konsola utrus ku sta na sufri di mesmu purblema.

Sera ki bo pudi konta kuma ku Jeova juda bos na situasons difisil?

Mats: Un ditu na lingua Suaili ta fala sin: “No pegadu suma ovu kru.” Suma ku un algin ta pega ovu kru ku kuidadu pa ka i kebra, ku amor Jeova ta judanu na kada un di no disignasons. No tene sempri ke ku no pirsisa del, te mesmu mas di ki kil ku no pirsisa del. Un di maneras ku no sinti amor ku ajuda di Jeova, i atraves di interesi ku Korpu Guvernanti ta mostra pa nos.

Ann-Catrin: N misti konta un spiriensia di kuma ku Jeova kuida di nos ku amor. Un dia N risibi un ŝamada ku informan di kuma ña pape, na Suesia, staba na risibi tratamentu intensivu. Mats staba inda fraku, pabia i pañaba paludismu. No ka pudi kumpra bilietis di avion pa kila, no pensa bindi no karu. Logu no risibi dus ŝamadas. Un, i di un kasal ku fala di kuma i obi faladu di no situason, i e misti paga un bilieti pa nos. Utru ŝamada, i di un irma di idadi, ku guardaba algun diñeru na un kaiŝa ki skirbi: “Pa algin ku pirsisa.” Dentru di alguns minutus, Jeova judanu kumpra bilietis ku no pirsisaba del! — Eb 13:6.

Kal lisons ku bo aprindi, ora ku bo pensa na bo 50 anu di sirvisu di tempu kompletu?

Ann-Catrin: N aprindi di kuma, no ta tene forsa ora ku no ‘susega, i fiansa na Jeova.’ Ora ku no konfia na Jeova, el i ta luta pa nos. (Isa 30:15; 2 Kron 20:​15, 17) Suma no da Jeova no minjor na kada disignason, no risibi mas bensons di ki kil ku no pudiba risibi, si no staba na fasi utru kusa.

Mats: Lison mas garandi ku N aprindi, i di konfia na Jeova na tudu situasons, i oja kuma ki na aẑi pa judan. (Sal 37:5) Jeova sempri judan suma ki purmitiba. Te aos no kontinua oja kuma ku Jeova sta na judanu na no disignason na Betel di Myanmar.

No spera di kuma manga di jovens ku misti fasi mas pa Jeova, na sinti mesmu amor fiel ku Jeova mostra pa nos. No tene konfiansa di kuma, Jeova na juda elis kirsi nunde ke parantadu.