Kontinua tene alegria na kuida di algin ku bu ama

1-2. Kuma ku Jeova ta sinti ora ku bu na kuida di un algin di idadi o ku sta duenti? (Ditus 19:17) (Jubi tambi fotos.)

UN ERMON na Koreia comadu Jin-yeol fala sin: “Ami ku ña minjer no kasa pa mas di 32 anu. N ta kuida del pa 5 anu. I tene un duensa gravi comadu Parkinson. I ta sedu difisil pa i muvimenta kurpu. N ama ña minjer ciu, N gosta di kuida del. Kada dia di noti i ta durmi na un kama di ospital na no kau. N ta durmi pertu del i no ta pega n̈utru mon ora ku no na durmi.”

² Talves bu sta na kuida di un membru di familia ku bu gosta del, i pudi sedu bu pape, bu mame, bu omi, bu minjer, bu fiju o bu amigu. Na bardadi, bu ta sedu filis di juda elis, pabia bu ama elis. Tambi bu ta fasil pabia bu ama Jeova. (1 Tim 5:​4, 8; Tiagu 1:27) Ma, i ka tudu ora ki fasil kuida di un algin. Utrora no ta tene purblemas ku utrus ka sibi. Tambi bu pudi sinti di kuma ningin ka ntindi ke ku bu sta na sufri. Jintis pudi ojau na ri, ma e ka sibi di kuma utrora bu ta sta tristi dimas. (Sal 6:6) Utrus pudi ka nota ke ku bu sta na sinti. Ma Jeova sempri ntindi kuma ku bu sta na sinti. I ta oja tudu kusas ku bu ka ta konsigi fasi, pabia bu sta na kuida di kilis ku bu ama. (Komparal ku Saida 3:7.) I ta oja bu tarbaju duru, tambi i ta ojau ora ku bu na cora. I amau ciu pa ke ku bu ta fasi. (Sal 56:8; 126:5) Jeova fala di kuma, ora ku bu ta kuida di kin ku bu ama, bu ta sta na pistal. I purmiti di kuma i na bin pagau tudu ke ku bu ta fasi. — Lei Ditus 19:17.

3. Ke ku manda talves i seduba difisil pa Abraon ku Sara kuida di Tera?

³ Biblia tene manga di isemplu di jintis ku kuida di kilis ku tene idadi o ku sta duenti. Jubi isemplu di Abraon ku Sara. Oca e disa Ur, se pape, Tera, teneba serka di 200 anu. Ma mesmu asin, Tera bai juntu ku elis. E viaẑa serka di 960 kilometru pa Aran. (Kum 11:​31, 32) Na bardadi Abraon ku Sara amaba Tera. Ma, i ka seduba fasil pa e kuida di un algin di idadi oca e staba na fasi bias. Talves e viaẑaba na kamelus o burus. Ma, talves i seduba difisil dimas pa Tera mbarka na un limaria i bai ku el pa manga di tempu. Talves utrora, Abraon ku Sara ta staba kansadu dimas. I ka mporta kal ki seduba situason, Jeova da elis forsa ke pirsisaba del. Suma ku Jeova juda Abraon ku Sara, i na dau tambi forsa ku bu pirsisa del pa kontinua kuida di algin ku bu ama. — Sal 55:22.

4. Ke ku no na fala del nes studu?

⁴ I na sedu mas fasil kontinua kuida di algin ku bu ama, si bu tene alegria. (Dit 15:13) Lembra di kuma bu pudi sedu filis mesmu si vida i difisil dimas. (Tiagu 1:​2, 3) Ke ku bu pudi fasi pa kontinua sedu filis? Un di maneras ku bu pudi fasil, i kontinua ora Jeova pa judau oja motivus pa bu kontinua tene alegria. I ten tambi utrus kusas ku bu pudi fasi pa kontinua sedu filis. Nes studu, no na papia di alguns des kusas. No na oja tambi ke ku utrus pudi fasi pa judau. Purmeru, no na oja pabia ku bu pirsisa di sedu filis, ora ku bu na kuida di algin ku bu ama, i pabia ki pudi sedu difisil fasil.

PABIA KI PUDI SEDU DIFISIL SEDU FILIS ORA KU BU NA KUIDA DI ALGIN KU BU AMA

5. Pabia ku kontinua sedu filis na judau ora ku bu na kuida di algin ku bu ama?

⁵ Si no sta so na pensa na purblemas di kuida di algin ku bu ama, no pudi pirdi forsa ku no pirsisa del pa kontinua judal. (Dit 24:10) Tambi si no sta sin forsa, no pudi ka judal suma ku no mistiba fasi. Ke ku manda i pudi sedu difisil kontinua sedu filis, ora ku no na kuida di utrus?

6. Pabia ku alguns ku ta kuida di kilis ke ama ta kansa mal?

⁶ Bu pudi kansa mal. Un irma comadu Leah fala sin: “I ka fasil kuida di utrus. Mesmu si N tene manga di inerẑia na kumsada di dia, N ta kansa mal na fin di dia. Utrora, te mesmu N ka ta tene forsa di ruspundi mensaẑens.” Utrus ka ta konsigi durmi diritu o tene tempu pa diskansa. Kusa ke pirsisa ciu del. Un irma comadu Inés fala sin: “N ka ta konsigi durmi diritu. Manga di bias N ta korda di noti pa kuida di mame di ña omi. I fasi ja manga di anus ku ami ku ña omi no ka konsigi bai ferias.” I ten kilis ku ka ta konsigi pasa tempu ku se amigus o fasi alguns kusas na sirvisu di Jeova, pabia e pirsisa di kuida di kilis ke ama tudu tempu. Pabia di kila, e ka ta konsigi sta ku utrus i e ta sinti tristi, pabia e ka ta pudi fasi tudu kusas ke gostaba di fasi.

7. Pabia ku alguns ku ta kuida di kilis ke ama pudi sinti kulpadu o tristi dimas?

⁷ Kilis ku ta kuida di algin ke ama pudi sinti kulpadu o tristi dimas. Un irma comadu Jessica fala sin: “Manga di bias N ta sinti di kuma, N dibi di fasi mas pa juda ña pape. Tambi N ta sinti suma si N ta pensa so na ña kabesa, ora ku N toma tempu pa diskansa.” Alguns pudi sta preokupadu, pabia e ta pensa di kuma e ka sta na fasi tudu ke ke pudi pa juda kilis ke ama. O utrora, e pudi sinti di kuma e ka pudi kontinua kuida di ki algin. Talves ora ke sta kansadu e pudi fala o fasi kusa ki ka bon. Tudu es pudi pui elis sinti tristi dimas. (Tiagu 3:2) Alguns tambi pudi fika tristi ora ke oja kin ke ama sta na piora kada bias mas. Un irma comadu Barbara fala sin: “I difisil dimas oja ña amigu na piora kada dia.”

8. Kuma ku alguns ta sinti, ora ku utrus gardisi elis pa se ajuda?

⁸ Talves bu pudi sinti di kuma utrus ka ta gardisi pa ke ku bu ta fasi. Pabia di ke? Pabia manga di jintis ka ta gardisi o ngabau pa tarbaju duru, i pa sakrifisius ku bu ta fasi. Pa kila, ora ku un algin gardisiu pa tudu ke ku bu ta fasi, bu ta kontenti dimas. (1 Tes 5:18) Un irma comadu Melissa fala sin: “N ta cora, pabia N ta kansa mal o sinti disanimadu. Ma, ora ku kilis ku N ta kuida deI falan obrigadu pa tudu ke ku N ta fasi pa relis, N ta sinti mas minjor! Se palabras ta judan tene mas inerẑia i tene animu di kontinua kuida delis.” Un ermon comadu Ahmadu ku si minjer, ta kuida di se subriña ku ta sufri di epilepsia. Ahmadu fala kuma ke ta sinti ora ku se subriña gardisi elis. I fala sin: “No subriña ka ta ntindi tudu ke ku no ta fasi pa kuida del. Ma, no ta kontenti dimas ora ki gardisinu o ora ki falanu di kuma i amanu.”

KUMA KU NO PUDI KONTINUA TENE ALEGRIA

9. Kuma ku kilis ku ta kuida di utrus pudi rikuñisi se limiti?

⁹ Rikuñisi bu limiti. (Dit 11:2) I ka tudu ora ku no tene tempu o forsa di fasi tudu ke ku no misti. Pa kila, bu dibi di disidi ke ku na konsigi fasi. Tambi utrora bu ka pudi fasi ke ku jintis misti pa bu fasi. Ora kes kontisi, bu ka pirsisa di sinti mal. Kila ta mostra di kuma bu rikuñisi bu limiti. Tambi si utrus misti judau, disa elis pa e judau i gardisi elis. Un ermon comadu Jay fala sin: “Kada dia, no pudi fasi so ke ku no tempu ku no inerẑia na pirmitinu fasi. Si no ka pasa no limiti, kila na judanu kontinua tene alegria.”

10. Ke ku bu pirsisa di ntindi ora ku bu na kuida di algin ku bu ama? (Ditus 19:11)

¹⁰ Tenta ntindi motivus ku pui un algin aẑi di un sertu manera. (Lei Ditus 19:11.) Si bu fasil, bu na kontinua kalmu ora ku kilis ku bu ama ku bu ta kuida del, fala o fasi un kusa ki ka bon. Un algin jiru ta tenta ntindi pabia ku un algin aẑi di un sertu manera. I ten duensas ku ta leba un algin fasi kusas ki ka na cigaba di fasi. (Ekl 7:7) Pur isemplu, un algin ku kustuma papia i aẑi ku bondadi, pudi kumsa ku jusia ku bo. O i pudi kumsa ku keŝa ciu o paña raiba. Si bu ta juda un algin ku tene un duensa gravi, i na sedu bon pa bu sibi mas aserka di si duensa. Ntindi si duensa na judau nota di kuma, ke ki papia o fasi i pabia di si duensa, i ka pabia di kuma i misti sedu asin. — Dit 14:29.

11. Kal kusas importanti ku kilis ku ta kuida di utrus dibi di toma tempu pa fasi kada dia? (Salmu 132:​4, 5)

¹¹ Toma tempu pa torna bu amisadi ku Jeova mas forti. Utrora bu pirsisa di pasa menus tempu ku alguns atividadis i tene tempu pa fasi kusas “mas bon”. (Fil 1:10) Un des kusas mas bon, i torna bu amisadi ku Jeova mas forti. Rei Davi ta staba okupadu. Ma adora Jeova seduba kusa mas importanti na si vida. (Lei Salmu 132:​4, 5.) Di mesmu manera, mesmu si bu ta sta okupadu, bu pirsisa di toma tempu kada dia pa lei Biblia i fasi orason. Un irma comadu Elisha fala sin: “Ora ku N ora Jeova, lei Salmus i pensa fundu nel, ki palabras ta animan, N ta sinti kalmu i kontinua tene alegria. Ora Jeova i kusa ku judan ciu. Manga di bias duranti dia, N ta pidi Jeova pa i judan pa N kontinua sta kalmu.”

12. Pabia ki importanti pa kilis ku ta kuida di algin ke ama, kuida di se propi saudi?

¹² Fasi ke ku bu pudi pa kontinua tene bon saudi. Jintis okupadu, suma kilis ku ta kuida di algin ke ama, pudi nota di kuma i difisil ranja tempu pa fasi kusas ku na juda elis tene bon saudi. Ma bu kurpu ku bu kabesa na sta ben, so ora ku bu ta kume bon kumida i fasi sempri izersisiu. Pa kila, mesmu si bu ka tene manga di tempu, i importanti pa bu toma tempu pa kume bon kumida i fasi sempri izersisiu. (Ef 5:​15, 16) Tambi sforsa pa durmi diritu. (Ekl 4:6) Spesialistas ku ta studa no serebru splika di kuma, sonu pudi juda no serebru rekupera. Un artigu mediku fala di kuma ora ku un algin ta durmi diritu, kila ta judal pa i ka preokupa ciu, tambi i ta konsigi manti kalmu na situasons difisil. Alen di kila, bu pirsisa di ranja tempu pa fasi kusas ku bu gosta del. (Ekl 8:15) Un irma ku ta kuida di algin ke ama, splika ke ku judal kontinua tene alegria. I fala asin: “Ora ku tempu sta diritu, N ta sforsa pa sai fora i apruveita di lus di sol. Pelu menus un bias kada mis, N ta fasi tambi programa pa pasa tempu ku un amigu i fasi kusa ku no gosta del.”

13. Pabia ki bon ba ta ri? (Ditus 17:22)

¹³ Ka bu diskisi ba ta ri. (Lei Ditus 17:22; Ekl 3:​1, 4) Ora ku bu ta ri bu preokupason ta rapati. Ora ku bu sta na kuida di un algin ku bu ama, manga di bias kusas pudi ka kontisi suma ku bu speraba. Ma, si bu konsigi ri aserka di ki kusa, bu preokupason na rapati. Si bu ta ri juntu ku algin ku bu ta kuida del, kila pudi pui pa bo amor pa n̈utru torna mas forti.

14. Kuma ku papia ku un amigu di konfiansa pudi judau?

¹⁴ Papia ku un amigu di konfiansa. Mesmu si bu fasi bu minjor pa kontinua sedu filis, utrora bu pudi sta preokupadu dimas. Ora ku kila kontisi, bu pudi papia ku un amigu ku ka na fasiu sinti mal pa ke ku bu fala. (Dit 17:17) En ves di kila, i na sukutau i nkoraẑau. Kila pudi sedu ke propi ku bu pirsisa del pa kontinua tene alegria. — Dit 12:25.

15. Kuma ku papia aserka di paraísu pudi dau alegria?

¹⁵ Imaẑina ke ku bu na fasi na paraísu juntu ku algin ku bu ama. Sforsa pa lembra di kuma, bu ka na kuida di un algin di idadi, o ku sta duenti pa tudu tempu. Jeova ka misti nunka pa pekaduris fasi es tipu di tarbaju. (2 Kor 4:​16-18) En ves di kila, na futuru, no na bin vivi suma ku Jeova misti pa no vivi. (1 Tim 6:19) Ora ku bu ta papia ku algin ku bu ama aserka di ke ku bo misti fasi juntu na paraísu, kila pudi pui pa bo kontenti dimas. (Isa 33:24; 65:21) Un irma comadu Heather fala sin: “Manga di bias, N ta konta kilis ku N na juda di kuma i ka na tarda, no na bin kusi ropa juntu, kuri juntu i kurinti bisikleta juntu. No na bin furna pon, no kusiña kumida pa kilis ku no ama ku lantandadu. Anos tudu, no na gardisi Jeova pa no speransa.”

KUMA KU UTRUS PUDI JUDAU

16. Kuma ku no pudi juda un algin ku ta kuida di algin ke ama na no kongregason? (Jubi tambi foto.)

¹⁶ Bu pudi juda un ermon o irma pa i tene tempu di diskansa. Ermons ku irmas pudi sedu vuluntariu pa pasa tempu ku kin ku sta duenti o ku tene idadi. Es na pirmiti pa algin ku ta kuida del, tene tempu pa diskansa o fasi kusas ki pirsisa di fasi. (Gal 6:2) Alguns ermons ku irmas skirbi un programa pa sibi kin ke na juda kada semana. Un irma comadu Natalya ku si omi ka pudi yanda, fala sin: “Un ermon na kongregason ta bin un o dus bias kada semana pa pasa tempu ku ña omi. E ta prega juntu, papia juntu, i te mesmu e ta jubi filmis juntu. Ña omi gosta des tempu ki ta pasa ku si amigu. Kila ta dan tempu pa N diskansa, o fasi utrus kusas ku N gosta di fasi, suma sai fora pa bai yanda un bokadu.” Alguns na kongregason pudi sedu vuluntariu pa kuida di algin di noti, asin pa ermon o irma ku ta kuida di ki algin pudi durmi diritu.

17. Kuma ku no pudi juda kilis ku ta kuida di algin ke ama, duranti runions di kongregason?

¹⁷ No pudi juda kilis ku ta kuida di algin ke ama, duranti runions di kongregason. Alguns pudi ka pruveita ben di ke ku ta faladu na runions di kongregason, asembleias di sirkuitu ku kongresus reẑional, pabia e ta sta okupadu na kuida di algin ke ama. Ermons ku irmas di kongregason pudi sinta ku algin di idadi, o algin ku sta duenti duranti tudu runion o parti di runion. Si un algin di idadi o duenti ka pudi sai di kasa, no pudi fika ku el, asin pa kin ku ta kuida del pudi bai runion na Salon di Renu.

18. Kal utru kusa ku no pudi fasi pa kilis ku ta kuida di algin ke ama?

¹⁸ No pudi nkoraẑa i ora pa kilis ku ta kuida di algin ke ama. Ansions dibi di sempri ranja tempu pa nkoraẑa kilis ku ta kuida di algin ke ama. (Dit 27:23) Anos tudu no dibi di kontinua konta kilis ku ta kuida di algin ke ama di kuma no ama elis, i tambi no da balur pa tudu ke ke ta fasi. No pudi tambi pidi Jeova pa i kontinua da elis forsa i juda elis pa e kontinua tene alegria. — 2 Kor 1:11.

19. Ke ku no na oja na futuru?

¹⁹ I ka na tarda, Jeova na kaba ku tudu kusas ku ta punu sufri i fika tristi. Duensas ku mortu ka na ten mas. (Apok 21:​3, 4) “Manku na jukuta suma gazela”. (Isa 35:​5, 6) Dipus, no ka na sufri mas pabia di bejisa, o di oja kilis ku no ama beju o duensi. “Kusas ku pasa ka na lembradu”. (Isa 65:17) Nkuantu Jeova ka kumpri inda si purmesas bonitu, no pudi tene sertesa di kuma sempri i na judanu. Si no kontinua konfia nel pa tene forsa, i na judanu ‘nguenta ku pasensa i ku kontentamentu.’ — Kol 1:11.