Jeova pudi judanu tene kontentamentu di bardadi

1-2. (a) Kal situason ku manga di jintis ta pasa aos? (b) Ke ku no na bin fala del nes studu?

JINTIS na mundu ta fasi tudu ke pudi pa tene filisidadi. Ma mesmu manera ke ta sforsa ciu e ka sedu filis. Manga di jintis aos ta sta tristi, i e ta pensa di kuma kusas nunka ka na minjoria. Alguns servus di Jeova pudi tambi pensa asin. Suma no sta na vivi na tempu di fin, no pudi pasa es tipu di situason i tene sentimentus ki difisil lida ku el. — 2 Tim 3:1.

² Nes studu, no na bin fala di kusas ku pudi tiranu kontentamentu i kuma ku no pudi rekuperal mas si no pirdil. Ma purmeru, no jubi kin ku pudi judanu tene kontentamentu di bardadi.

KIN KU PUDI JUDANU TENE KONTENTAMENTU DI BARDADI

3. Ke ku kusas ku Jeova kumpu ta nsinanu aserka del? (Jubi tambi diseñus.)

³ Jeova i un Deus sempri filis. Tambi i misti pa no sedu filis. Pa kila, i fasi manga di kusas ku ta punu sinti filis. Pur isemplu, no ta sinti filis ora ku no oja koris bonitu na Tera, jubi limarias ku na brinka i kontenti di kume kumida ku no gosta del. Na bardadi, Deus amanu i misti pa no sta sabi na vida!

Fiju di elefanti: Image © Romi Gamit/Shutterstock; pinguins: Vladimir Seliverstov/500px via Getty Images; fijus di kabra: Rita Kochmarjova/stock.adobe.com; dus golfiñu: georgeclerk/E+ via Getty Images

4. (a) Kuma ku Jeova kontinua sedu filis mesmu manera ki ta oja sufrimentu na mundu? (b) Kuma ku Jeova ta judanu? (Salmu 16:11)

⁴ Jeova ka ta fica uju pa sufrimentu di jintis. Na bardadi, i ta fika tristi ku sufrimentu ki ta oja. Ma Biblia mostra di kuma el i Deus filis. (1 Tim 1:​11, Tradução do Novo Mundo) Ke ku manda Jeova kontinua sedu filis? Un motivu i di kuma, i disidiba ja kal dia ki na kaba ku tristesa ku sufrimentu pa sempri. Nkuantu ki dia ka ciga, Jeova ta ntindi ke ku no sta na pasa, tambi i misti judanu. Kuma ki ta judanu? Un di kusas ku Jeova ta fasi i judanu tene kontentamentu. (Lei Salmu 16:11.) No jubi pabia ku Jesus sedu filis manera ki kunsi Jeova.

5-6. Pabia ku Jesus sedu filis?

⁵ Na tudu ke ku Jeova kumpu, Jesus i algin mas filis. Pabia di ke? No jubi dus motivu. (1) “Kristu i parsensa di ki Deus ku ka ta ojadu”, tambi i kopia diritu manera di sedu di si Pape na tudu sintidu. (Kol 1:15) (2) Jesus i algin ku mas pasa tempu ku si Pape di ki kualker utru algin.

⁶ Jesus i filis pabia sempri i ta fasi ke ku si Pape misti pa i fasi. (Dit 8:​30, 31; Jon 8:29) E ku manda Jeova kontenti ku el pa manera ki sedu fiel. — Mat 3:17.

7. Kuma ku no pudi tene filisidadi di bardadi?

⁷ Anos tambi no pudi tene filisidadi di bardadi, si no kontinua kunsi Jeova. Si no ta pasa manga di tempu na aprindi aserka di kuma ku Jeova ta pensa i sinti, no na pudi kopial mas minjor, i kila ta aumenta no filisidadi. Tambi no ta sinti filis ora ku no fasi ke ku Deus mandanu pa no fasi, i ora ku no sibi di kuma no tene si fabur.a (Sal 33:12) Ma ke gora si no ta dati no tene falta di kontentamentu, o si tudu ora no ta tene falta di kontentamentu? Sera ki es signifika di kuma Deus ka ta kontenti ku nos? Nau! Jeova ta ntindi di kuma nes mundu, i normal pa utrora no sinti tristi dimas i tene dur. (Sal 103:14) No jubi ke ku pudi tiranu kontentamentu i kuma ku no pudi rekuperal mas.

KA BU DISA PA NADA TIRAU BU KONTENTAMENTU

8. Ke ku pudi kontisi ku nos, ora ku no tene purblemas na vida?

⁸ Ora ku no tene purblemas na vida. Sera ki bu sta na pasa pirsigison, disastri natural, koitadesa o bu tene idadi avansadu? Es purblemas pudi punu sinti tristi dimas, prinsipalmenti ora ku no ka pudi fasi nada pa muda no situason. Biblia fala di kuma, “dur di korson i ta kebranta spiritu.” (Dit 15:13) Un ansion comadu Charalambos sinti di mesmu manera. Dentru di 4 anu, si ermon, si mame ku si pape muri. I fala sin: “N ta dingiba i N ka teneba ningin ku pudi judan. Utrora, N ta sta preokupadu dimas pabia mesmu si N mistiba pasa mas tempu ku ña pape, ña mame i ku ña ermon antis de muri, N ka konsigiba.” Di mesmu manera, utrora no purblemas pudi sedu difisil dimas, tok e ta punu sinti tristi dimas i disanimadu.

9. Ke ku pudi judanu rekupera no kontentamentu? (Jeremias 29:​4-7, 10)

⁹ Ke ku pudi judanu rekupera no kontentamentu? No pudi tene kontentamentu si no para preokupa ku kusas ku no ka pudi muda, i no kontenti ku kusas ku no tene. Mundu ta pui jintis pensa di kuma, no pudi sedu filis so si no tene un vida perfeitu. Ma es i ka bardadi. Pur isemplu, Jeova fala judeus ku lebadu pa Babilonia pa e seta se nobu situason suma katibu na un tera stranjeru, i pa e fasi se minjor na situason difisil ke sta nel. (Lei Jeremias 29:​4-7, 10.) Ke ku no pudi aprindi? Sforsa pa seta bu situason, i gardisi pa bon kusas ku bu tene na vida. Lembra di kuma Jeova na judau, i ka na bandonau. (Sal 63:7; 146:5) Pur isemplu, Effie ku fasi un asidenti i ku ka pudi mas yanda, fala sin: “N risibi manga di ajuda di parti di Jeova, di ña familia ku di ermons ku irmas di kongregason. Pa kila, si N disisti N na sedu ingratu pa relis. Ma N misti mostra ña gardisimentu pa Jeova ku ña amigus manera ke judan ciu.”

10. Pabia ku no pudi tene kontentamentu, mesmu si no tene purblemas?

¹⁰ Mesmu ora ku no tene purblemas, o mau kusas kontisi ku nos o ku no familia, no pudi kontinua tene kontentamentu.b (Sal 126:5) Pabia di ke? Pabia no kontentamentu ka dipindi di no situason. Un pioneru comadu Maria fala sin: “Kontinua kontenti ora ku no tene purblemas, ka signifika di kuma, no ka mporta ku no sentimentus. Ma i signifika di kuma, no ka diskisi di purmesas di Jeova. No Pape pudi judanu kontinua tene kontentamentu, i ka mporta ke ku no sta na pasa.” Lembra di kuma, mesmu si no purblemas sedu difisil aos, i ka na fika pa sempri, i suma sinal di pe na reia ku bentu ta leba. I ka na tarda no purblemas na disparsi i ka na sobra nin un sinal.

11. Kuma ku isemplu di apostolu Paulu pudi nkoraẑau?

¹¹ Utrora no pudi pensa di kuma no tene purblemas pabia no ka tene fabur di Jeova. Si no ta sinti des manera, no pudi pensa na utrus servus fiel di Jeova ku pasa pa situasons difisil dimas. Jubi isemplu di apostolu Paulu. Jesus propi ku kujil pa leba bon noba “dianti di jintius, ku reis, ku pobu di Israel.” (At 9:15) Jesus da Paulu un tarbaju importanti! Ma, Paulu pasa pa manga di purblemas. (2 Kor 11:​23-27) Sera ki purblemas ku Paulu pasa signifika di kuma i pirdi fabur di Jeova? Klaru ki nau! Ma pa kontrariu, manera ku Paulu nguenta si purblemas ta mostra di kuma i tene bensons di Jeova. (Rom 5:​3-5) Gosi pensa na bu situason. Abo tambi, bu pudi kontinua sirbi Jeova ku fidelidadi mesmu ku purblemas ku bu tene. Si bu fasi kila, bu pudi tene sertesa di kuma bu tene fabur di Jeova.

12. Ke ku pudi kontisi si no ka konsigi sirbi Jeova suma ku no misti?

¹² Si no ka konsigi sirbi Jeova suma ku no misti. (Dit 13:12) No ama Jeova i no misti gardisil pa tudu ke ki fasi pa nos. Pa kila, no ta pensa na minjor manera di sirbil. Ma, si no tenta fasi un kusa ku na bardadi no ka pudi fasi, pabia di no situason, no pudi fika disanimadu. (Dit 17:22) Un irma pioneru comadu Holly, fala sin: “N mistiba bai Skola pa Ivanjilizaduris di Renu, prega na utru tera, o tarbaja na projetu di konstruson di Ramapo. Ma ña situason bin muda, N ka pudi ja mas yangasa es objetivus. N fika disanimadu. I difisil dimas, ora ku bu misti fasi alguns kusas, ma bu ka pudi fasi elis.” Manga di servus di Jeova ku ka konsigi fasi ke ke mistiba pa sirbil, sinti des manera.

13. Kal kusas ku no pudi sforsa fasi i ka importa kal situason ku no sta nel?

¹³ Ke ku pudi judanu rekupera no kontentamentu? Lembra kuma Jeova i ka Deus iziẑenti. I ka ta pidinu pa no fasi mas di ke ku no pudi fasi. Jeova danu balur, mesmu si no ka pudi fasi ke ku utrus ta fasi. I misti pa no rukuñisi no limiti i sedu fiel. (Mik 6:8; 1 Kor 4:2) Jeova ta preokupa mas ku ke ku no sedu pa dentru, di ki ke ku no ta fasi. Sera ki i fasi sintidu pa iziẑi no kabesa mas di ki kil ku Jeova ta spera di nos?c Klaru ki nau! Si bu situason limita ke ku bu pudi fasi na sirvisu di Jeova, tenta konsentra na ke ku bu pudi fasi. Pur isemplu, bu pudi trena un joven o nkoraẑa ermons ku irmas di idadi. Talves bu pudi visita un algin, ligal, o mandal mensaẑen pa nkoraẑal. Jeova na bensua bu sforsu nkuantu bu na tarbaja duru pa yangasa objetivus ku sta di akordu ku bu situason! Lembra di kuma, na nobu mundu no na tene manga di oportunidadi di sirbi Jeova di un manera ku nunka no imaẑina! Es i ke ku nkoraẑaba Holly. I fala sin: “Si N kumsa ku sinti disanimadu, N ta para i lembra di kuma, N na bin vivi pa sempri. Ku ajuda di Jeova, N pudi bin yangasa tudu ña objetivus na nobu mundu.”

14. Ke mas ku pudi tiranu kontentamentu?

¹⁴ Konsentra so na kontenta no kabesa. Alguns jintis ta usa redi sosial pa pui jintis pensa di kuma, pa tene kontentamentu di bardadi ku susesu, no dibi di kontenta so no kabesa. No pudi kumsa ku pensa di kuma, si no fasi kusas ku no gosta del o no kumpra kusas ku no misti, o viaẑa pa diferentis kau pudi punu tene kontentamentu di bardadi. I ka mal fasi kusas ku no gosta del. Jeova kumpunu di un manera ku no pudi apresia kusas bonitu. Ma manga di jintis diskubri di kuma, ke ke pensa di kuma i ta da elis kontentamentu, na bardadi i ta tira elis el. Un pioneru comadu Eva, fala sin: “Ora ku bu ta pensa so na sabura di vida, sempri bu na misti tene mas.” Si no konsentra so na kontenta no kabesa, no pudi fika tristi i disanimadu.

15. Kal lisons ku no pudi aprindi di rei Salomon?

¹⁵ No pudi aprindi di mau rusultadu di rei Salomon manera ki tenta kontenta so si kabesa. Pa pudi tene kontentamentu, i buska satisfasi si diseẑus pesual suma kume bon kumida, obi musikas bonitu i tene tudu bon kusas ku diñeru pudiba kumpra na si tempu. Ma es kusas ka dalba kontentamentu. I fala sin: “Uju ka ta farta jubi, nin oreja pa obi.” (Ekl 1:8; 2:​1-11) Ke ku jintis na mundu ta pensa aserka di ke ku ta da kontentamentu i suma diñeru falsu. Ki kusas ta parsi di kuma e tene balur, ma e ka pudi nunka da kontentamentu di bardadi.

16. Kuma ku juda utrus pudi judanu rekupera no kontentamentu? (Jubi tambi fotos.)

¹⁶ Ke ku pudi judanu rekupera no kontentamentu? Jesus nsinanu di kuma ‘i mas minjor da di ki no risibi.’ (At 20:35) Un ansion comadu Alekos fala sin: “N konsentra na fasi kusas simplis pa utrus. Ora ku N juda utrus, N ka ta konsentra na ña kabesa, i kila ta dan kontentamentu.” Ke ku bu pudi fasi pa juda utrus? Pur isemplu, si bu nota di kuma un algin sta tristi, bu pudi nkoraẑal. Talves bu ka pudi resolvi si purblemas, ma bu pudi nkoraẑal. I pudi sinti minjor si bu sukutal diritu i sforsa pa ntindi kuma ki na sinti. Bu pudi falal pa i konta Jeova kuma ki na sinti, pabia i ta mporta ku el. (Sal 55:22; 68:19) Bu pudi tambi judal lembra di kuma Jeova ka bandonal. (Sal 37:28; Isa 59:1) Bu pudi te mesmu judal na ke ki na pirsisa del, suma purparal kumida, o bai pasia ku el. Kumbidal pa bo prega juntu, kila pudi judal pa i sinti ben. Disa Jeova usau pa nkoraẑa utrus. Ora ku no usa no tempu pa juda utrus no na tene kontentamentu di bardadi! — Dit 11:25.

17. Si no misti tene kontentamentu di bardadi, ke ku no dibi di fasi? (Salmu 43:4)

¹⁷ No pudi tene kontentamentu di bardadi, si no kontinua pertusi di no Pape ku sta na seu. Biblia garantinu di kuma Jeova i no “garandi kontentamentu”. (Lei Salmu 43:4.) Mesmu si no tene purblemas, no ka pirsisa di sta preokupadu o ku medu. Si Jeova sedu no minjor amigu, i pudi judanu tene kontentamentu pa sempri! — Sal 144:15.