Juda utrus na pui pa bu sedu filis

1-2. Pabia ku Jeova kumpunu pa no sedu filis ora ku no juda utrus?

OCA Jeova kumpu pekaduris, i da elis kapasidadi di tene mas filisidadi ora ke na juda utrus di ki ora ke na judadu. (At 20:35) Sera ki es signifika di kuma no ka ta sedu filis ora ku algin danu un kusa? Nau. Anos tudu no ta kontenti ora ku no patidu un kusa. Ma, no mas ta kontenti ora ku no da utrus. Na bardadi, i bon manera ku Jeova kumpunu asin. Pabia?

² Suma Jeova kumpunu des manera no pudi aumenta no propi filisidadi. No pudi aumenta no filisidadi, ora ku no buska utrus maneras di juda utrus. Sera ki i ka di dimira manera ku no kumpudu asin? — Sal 139:14.

3. Pabia ku Jeova comadu di “Deus filis”?

³ Suma Biblia falanu di kuma kilis ku ta juda utrus ta sedu filis, i mas fasil pa no ntindi pabia ku Jeova comadu di “Deus filis”. (1 Tim 1:11; Traduson di Nobu Mundu) El i purmeru algin ku juda utrus, tambi i ka tene kin ku mas el ta juda. Suma ku apostolu Paulu fala, i pabia del “ku no na vivi, no na bulbuli; nel tambi ku no sedu.” (At 17:28) Na bardadi, “tudu bon pursenti ku tudu kusa diritu ku no patidu” bin di Jeova. — Tiagu 1:17.

4. Ke ku na judanu sedu mas filis?

⁴ Anos tudu no gosta di tene mas filisidadi ku ta bin di juda utrus. No pudi fasil ora ku no kopia bondadi di Jeova. (Ef 5:1) Nes studu, no na oja si isemplu bonitu di juda utrus, tambi no na aprindi ke ku no pudi fasi si no pensa di kuma, utrus ka ta gardisi pa ke ku no fasi pa relis. Es na judanu kontinua juda utrus i te mesmu aumenta no filisidadi.

KOPIA BONDADI DI JEOVA

5. Kal kusas ku Jeova ta danu?

⁵ Kal ki alguns manera ku Jeova ta mostra si bondadi? Jubi alguns isemplu. Jeova ta danu kusas ku no pirsisa del. I ka tudu ora ku Jeova na fasi pa no tene tudu na vida, ma i na fasi pa no tene sempri ke ku no pirsisa del. Pur isemplu, i ta danu kumida, ropa ku kau di mora. (Sal 4:8; Mat 6:​31-33; 1 Tim 6:​6-8) Sera ki Jeova ta danu ke ku no pirsisa del, so pabia di kuma i obrigadu fasil? Nau! Pabia ku Jeova ta fasi kila pa nos?

6. Ke ku no aprindi di Mateus 6:​25, 26?

⁶ Jeova ta danu ke ku no pirsisa del pabia i amanu. Jubi palabras di Jesus ku sta na Mateus 6:​25, 26. (Lei.) Jesus usa isemplus di kusas ku Jeova kumpu. Jesus fala sin oca ki usa isemplu di kacus: “E ka ta sumia, e ka ta kebra, e ka ta junta na bemba”. Ma, nota ke ki fala dipus: “Bo Pape ku sta na seu i ta alimenta elis.” Dipus Jesus punta: “Nta abos bo ka mas bali di ki kacus?” Ke ku no pudi aprindi? Pa Jeova, si servus mas tene balur di ki limarias. Si Jeova ta kuida di nesesidadis di limarias, no pudi tene sertesa di kuma i na kuida di nos! Suma ku un bon pape ta kuida di si familia, Jeova ta kuida tambi di si familia ku amor. — Sal 145:16; Mat 6:32.

7. Di kal manera ku no pudi kopia bondadi di Jeova? (Jubi tambi foto.)

⁷ Suma Jeova, no pudi da utrus ke ke pirsisa del, pabia no ama elis. Pur isemplu, sera ki bu kunsi un ermon o irma ku pirsisa di kumida o ropa? Jeova pudi usau pa dal ke ki na pirsisa del. Povu di Jeova kunsidu suma jintis ku ta mostra bondadi ora ki ten disastri. Pur isemplu, duranti duensa di COVID-19, ermons ku irmas da kumida, ropa ku utrus kusas pa kilis ku na pirsisa. Manga delis da tambi ofertas pa obra mundial. Es pirmitinu juda ermons na mundu ntidu ku sta na nesesidadi pabia di disastri. Es ermons aplika ke ku sta na Ebreus 13:​16, ku fala sin: “Ka bo diskisi di fasi ben, bo rapati ku utrus kil ku bo tene, pabia i e koldadi sakrifisiu ku Deus ta kontenti ku el.”

8. Di kal manera ku no ta benefisia di puder di Jeova? (Filipensis 2:13)

⁸ Jeova ta danu puder. Jeova ta kontenti di da si puder garandi dimas pa si servus fiel. (Lei Filipensis 2:13.) Sera ki bu ciga di ora pa i judau nguenta un tentason o pa i dau forsa di nguenta un situason difisil? Talves bu ciga di ora pa i dau forsa pa bu fasi kusas ku bu pirsisa di fasi na un dia. Ora ki ruspundi orason ku bu fasi, bu pudi konkorda ku profeta Isaias, ku fala sin: “I ta da forsa pa kil ku sta kansadu, i ta fortifika kil ku sta fraku.” — Isa 40:29.

9. Kuma ku no pudi kopia bondadi di Jeova, ora ku no na usa no forsa pa juda utrus? (Jubi tambi foto.)

⁹ Mesmu manera ku no sedu imperfeitu, no pudi kopia bondadi di Jeova, ora ku no na usa no forsa pa juda utrus. No ka pudi tira forsa ku no tene pa da utrus. Ma no pudi usa no forsa pa juda elis. Pur isemplu, no pudi juda no ermons ku irmas di idadi o ku sta duenti, pa kuida di se kasa o fasi kompra pa relis. Si no situason na pirmiti, no pudi juda na limpa i kuida di Salon di Renu. Si no usa no forsa pa fasi es kusas, no pudi juda ciu no ermons ku irmas.

10. Kuma ku no pudi juda utrus ku no palabras?

¹⁰ Ka no diskisi di kuma, no palabras tene forsa. Sera ki bu pensa na un algin ku na sintiba nkoraẑadu, si bu ngabal pa ke ki fasi? Sera ki bu kunsi un algin ku pirsisa di konsolu? Si sedu asin, pabia ku bu ka na toma diantera pa papia ku ki algin? Bu pudi visital, ligal o talves mandal un karta o un email o mensaẑen. Ka bu preokupa ciu ku ke ku bu na fala. Alguns palabra ku bin di korson, pudi sedu ke propi ku bu ermon pirsisa del pa kontinua sedu fiel na dias ku na bin, o sedu mas pusitivu. — Dit 12:25; Ef 4:29.

11. Kuma ku Jeova ta usa si jiresa?

¹¹ Jeova ta danu jiresa. Disipulu Tiagu skirbi es: “Si un di bos ka sibi ke ki dibi di fasi, pa i pidi Deus jiresa; i ta dadu. Deus ta da tudu jinti ku vontadi; i ka ta nfastia.” (Tiagu 1:5) Suma ku es palabras mostra Jeova ka ta guarda jiresa so pa rel. I ta da utrus el ku bondadi. Tiagu fala tambi di kuma, ora ku Jeova na da si jiresa “i ka ta nfastia”. Nunka i ka na misti punu sinti mal ora ku no pidil si orientason. Na bardadi, i misti pa no pidil jiresa. — Dit 2:​1-6.

12. Kal oportunidadis ku no tene di pasa utrus no jiresa?

¹² Anos gora? Sera ki no pudi kopia Jeova, ora ku no pasa utrus no jiresa? (Sal 32:8) Povu di Jeova tene manga di oportunidadi di konta utrus ke ke aprindi. Pur isemplu, manga di bias no ta trena kilis ku kumsa na prega. Ku pasensa, ansions ta juda servus ministerial ku ermons batisadu pa e sibi kuma ke pudi kuida di se disignason na kongregason. Tambi kilis ku tene spiriensia na konstruson ku manutenson, ta juda na trena utrus pa fasi tarbaju na kaus ku ta usadu pa sirbi Jeova.

13. Kuma ku no pudi kopia manera ku Jeova ta da jiresa ora ku no na trena utrus?

¹³ Sforsa pa kopia Jeova ora ku bu na trena utrus. Lembra di kuma Jeova ta da si jiresa ku bondadi. Anos tambi, no misti konta ke ku no sibi pa kilis ku sta na aprindi. No ka ta disa di konta utrus ke ku no sibi, pabia di medu di kuma e pudi bin toma no lugar. Nin no ka dibi di pensa sin: ‘Ningin ka trenan! Ami tambi N ka na trena ningin.’ Povu di Jeova ka dibi di pensa des manera. En ves di kila, no ka ta kontenti so di konta ke ku no sibi, ma tambi di da no “propi vida” pa kilis ku no na trena. (1 Tes 2:8) No misti pa e “sedu kapas tambi di nsina utrus.” (2 Tim 2:​1, 2) Si no ta pasa no jiresa pa utrus, anos tudu no na sedu mas jiru i mas filis.

ORA KI PARSI DI KUMA JINTIS KA DA BALUR PA KE KU NO FASI

14. Kuma ku maioria di jintis ta reaẑi ora ku no mostra elis bondadi?

¹⁴ Ora ku no mostra bondadi, prinsipalmenti pa no ermons ku irmas, manga di bias e ta gardisi. E pudi skirbi un karta di gardisimentu o gardisinu di utru manera. (Kol 3:15) No ta sedu mas filis ora ku no risibi es tipu di gardisimentu.

15. Ke ku no dibi di lembra del ora ku utrus ka gardisinu?

¹⁵ Ma utrora jintis ka ta gardisinu pa ke ku no fasi pa relis. Utrora i ta parsi di kuma utrus ka ta preokupa ku tudu ke ku no fasi pa juda elis, o e ka ta nota di kantu tempu, inerẑia ku diñeru ku no usa pa fasi un kusa pa relis. Si kila kontisi, ke ku no pudi fasi pa ka pirdi no alegria o fika mal? Lembra di palabras di Atus 20:35 nunde ku tema di no studu tiradu nel. Filisidadi ku no ta tene di juda utrus, ka dipindi di kuma ke ta reaẑi. No pudi disidi juda utrus ku kontentamentu mesmu si parsi di kuma e ka gardisinu. Ke ku pudi judanu? No jubi alguns kusa ku pudi judanu.

16. Ke ku no dibi di konsentra nel ora ku no na juda utrus?

¹⁶ Lembra di kuma ora ku bu na juda utrus bu ta sta na kopia Jeova. I ta da bon kusas pa jintis i ka mporta si e gardisil o nau. (Mat 5:​43-48) Jeova purmiti di kuma, si no juda tambi utrus sin ‘pera pagamentu,’ no na “bin risibi garandi premiu”. (Luk 6:35) “Pagamentu” pudi nklui gardisimentu ku no ta risibi. Si e gardisinu o nau, Jeova sempri na paganu pa bon kusas ku no fasi pa juda utrus, pabia no “da ku alegria.” — Dit 19:17; 2 Kor 9:7.

17. Kal ki motivu mas importanti ku pui no misti juda utrus? (Lukas 14:​12-14)

¹⁷ Utru kusa ku no pudi fasi pa kopia Jeova ora ku no na juda utrus, i aplika ke ku Jesus fala na Lukas 14:​12-14. (Lei.) Na bardadi, i ka mal kumbida kilis ku pudi fasi mesmu kusa pa nos pa kume, o mostra elis bondadi di utru manera. Ma ke gora si no nota di kuma, no ta juda utrus pabia no na spera risibi algun kusa delis? Si bu tene es purblema, sforsa pa fasi ke ku Jesus fala. No pudi kumbida un algin ku no sibi di kuma i ka na konsigi fasi mesmu kusa pa nos. No na kontenti pabia no kopia Jeova. Si no ka spera risibi nada, no na sedu sempri filis ora ku no juda utrus, mesmu si e ka gardisinu.

18. Ke ku no ka dibi di fasi i pabia di ke?

¹⁸ Ka bu duvida di motivason di utrus. (1 Kor 13:7) Si utrus ka gardisinu, no pudi punta no kabesa: ‘Sera ki na bardadi e ka da balur pa ke ku no fasi o e diskisi nan gardisi?’ Talves i ten utrus motivu ku pui e ka gardisinu di manera ku no speraba. Alguns pudi fika tokadu dimas, ma i ta difisil pa e falal. E pudi sinti borgoña di risibi ajuda, prinsipalmenti si elis ku kustumaba juda utrus. Ma si na bardadi no ama no ermons ku irmas, no ka na pensa mal delis, i no na kontinua juda utrus ku alegria. — Ef 4:2.

19-20. Pabia ku pasensa na judanu ora ku no na juda utrus? (Jubi tambi foto.)

¹⁹ Sedu pasenseru. Rei Salomon ku sedu jiru, skirbi sin aserka di bondadi: “Ferca bu pon na yagu, pabia dipus di manga di dias, bu na ojal mas.” (Ekl 11:1; Traduson di Nobu Mundu) Suma ku es palabras mostra, alguns pudi gardisi pa no bondadi “dipus di manga di dias.” I kila ku kontisi ku un irma.

²⁰ Manga di anus atras, minjer di superintendenti di sirkuitu manda un karta nkoraẑanti pa un irma ku kumsa batisa, i nkoraẑal pa i kontinua sedu fiel. Serka di 8 anus dipus, irma skirbi un karta i falal: “Bu ka sibi des, ma N misti pa bu sibi di kuma, bu judan ciu nes anus ku pasa. Bu palabras tokan ciu, N ka na diskisi nunka di testu di Biblia ku bu fala del.”a Dipus di splika alguns situasons difisil ki pasa, irma fala sin: “Utrora N ta misti disa tudu i para sirbi Jeova. Ma sempri N ta lembra di ki testu di Biblia . . . i ta judan pa N ka disisti. Na tudu es 8 anu, bu karta ku testu ku bu falan del mas nkoraẑan di ki kualker utru kusa.” Imaẑina so kontentamentu garandi ku minjer di superintendenti tene, oca ki risibi es karta “dipus di manga di dias”! Anos tambi, no pudi gardisidu manga di tempu dipus ku no juda utrus.

21. Pabia ku no dibi di sta disididu pa kontinua kopia bondadi di Jeova?

²¹ Suma ku no falaba, Jeova kumpunu ku un kapasidadi spesial. No pudi gosta di judadu, ma no mas ta tene filisidadi ora ku no juda utrus. No ta sinti ben ora ku no konsigi juda no ermons na fe. Tambi no ta sedu filis ora ke gardisinu. Nin se gardisinu o nau, no pudi kontenti pabia no fasi ke ki sertu. Ka bu diskisi nunka di kuma i ka mporta ke ku bu da, Jeova “tene mas di ki kila pa dau.” (2 Kron 25:9) Bu ka pudi nunka juda utrus mas di ki Jeova! I ka ten kontentamentu mas garandi di ki bu pagadu pa Jeova. Pa kila, no sta disididu pa kontinua kopia bondadi di no Pape ku sta na seu.