Inimigu di fe diskubridu

MANGA di tempu antis di Jeova kumpu tera, i kumpuba anjus na seu. Ku tempu un di kil anjus kumsa ku sinti diseẑu di adoradu, kusa ki na bardadi pertensi so Deus. Oca i aẑi sugundu es diseẑu, i fasi si kabesa Satanas, ku signifika “Inimigu,” o algin ku sta kontra Deus. Kuma ku Satanas aẑi kontra Deus?

Satanas usa kobra pa ngana Eva pa i disobdisi Deus. Ku malandrisa, i fasi Eva pensa kuma Jeova Deus staba na tuji elis bon kusa. Un de kusa i pa ka kume sertu arvuri ku staba na jardin. Sin tene medu i coma Deus di muntrus i pui Eva ntindi ki i dibi di nega orientason di Deus. Satanas fala Eva: “Pabia Deus sibi kuma, dia ku bo kume ki fruta, bo uju na yabri, bo na sedu suma Deus, bo na kunsi ben ku mal.” (Kumsada 3:5) Sin pensa, Eva fia nes mintida di Satanas. Asin i disobdisi lei di Deus, dipus i pui Adon fasi mesmu kusa. Disna ki ngana Eva, Satanas pasa sedu inimigu di tudu kilis ku tene fe di bardadi. Te na no dias i kontinua na ngana jintis pa adoral. Kuma ki ta fasil?

Fe ku danadu spaja

Satanas usaba adorason di imaẑen ku nsinus di omis pa disvia fijus di Israel. Jesus, ki sedu Mesias, falaba ŝefis di riliẑion di kuma se adorason ka bali nada, pabia e ta nsina “mandamentus di omi.” (Mateus 15:9) Oca nason di Israel nega Mesias, Deus nega elis tambi. Jesus fala elis: “Bo na tiradu renu di Deus; i na bin dadu pa utru nason ku ta da si frutu.” (Mateus 21:43) Disipulus di Jesus bin torna nason ki oca fabur na uju di Deus.

Tambi, Satanas ta fasi tudu pa disvia sigiduris di Jesus. Sera ki i tene rusultadu? Jesus falaba ja di ke ki na bin pasa na un komparason ki fasi. Nes komparason, un omi sumia arus na si lugar. Mas tardi, un inimigu bin sumia paja brabu na metadi di arus. Elis tudu e kirsi juntu te na tempu di kebur. Mas tardi, paja brabu siparadu ku arus dipus i kemadu. Ma, kil bon arus i juntal i guardal na si bemba.

Jesus splika si disipulus ke ki es komparason signifika. I fala el propi i sumiadur. “Bon simentera i kilis ku pertensi renu di Deus. Arus brabu i kilis ku pertensi ki malvadu. Inimigu ku sumia elis i diabu. Kebur i fin di mundu. Kebraduris i anjus.” (Mateus 13:38, 39) Jesus kompara si disipulus suma un bon arus. Ma Satanas sumia falsu disipulus, ku parsi ku arus brabu o paja brabu, na metadi di sigiduris di Jesus. Suma ki Jesus falaba, falsu disipulus bin ojadu manga di anus dipus di si mortu. Es falsu disipulus kumsa ku sina kusas falsu suma Trindadi, ideia di kuma Deus i tris. Tambi es falsu disipulus kumsa ku adora imaẑens i miti na pulitika. So puku jintis ku kontinua na bardadi ki Jesus nsina.

Fe di bardadi proteẑidu

Suma ki Jesus splikaba, mudansa na bin ten. Anjus di Deus na bin sipara kilis ku ka tene fe di bardadi i kaba kelis. I kilis ku tene fe di bardadi na raparadu di manera klaru. Pa ultimu, Satanas ku sedu Diabu, inimigu prinsipal di fe na bin kabadu kel. Asin, fe di bardadi na ngaña!

Ma kuma ki no pudi rapara kilis ku tene fe di bardadi aos? Es purgunta na ruspundidu na lison ku na bin.