Ermons joven, bo sedu kristons maduru

1. Ke ku un ermon joven dibi di fasi pa tudu kuri diritu ku el?

REI Davi fala Salomon: “Fasi forsa, bu mostra kuma abo i omi”. (1 Re 2:​1-3) Aos tambi, es konsiju i importanti pa tudu omis kriston. Pa tudu kuri diritu ku elis, e dibi di obdisi leis di Deus i aplika si prinsipius na tudu arias di se vida. (Luk 2:52) Pabia ki importanti dimas pa ermons joven sedu kristons maduru?

2-3. Pabia ki importanti pa ermons joven sedu kristons maduru?

² Un omi kriston tene responsabilidadis garandi na familia ku kongregason. Sin duvida, ermons joven dibi di pensa na responsabilidadis ke na bin tene na futuru. Talves bu tene objetivu di sedu pioneru, servu ministerial i dipus sirbi suma ansion. Talves bu misti tambi kasa i tene fijus. (Ef 6:4; 1 Tim 3:1) Pa yangasa es objetivus i pa tudu kuriu diritu, bu pirsisa di sedu kriston maduru.b

³ Ke ku pudi judau sedu kriston maduru? I ten kusas importanti ku bu pirsisa di sibi fasi. Ke ku pudi judau pa purpara gosi i pa kumpri diritu responsabilidadis ku bu pudi bin tene na futuru?

PASUS PA SEDU KRISTON MADURU

4. Nunde ku bu pudi oja bon isemplus pa kopia? (Jubi tambi foto ku diseñus.)

⁴ Kuji bon isemplus ku bu na kopia. Biblia tene manga di bon isemplus ku ermons joven pudi kopia. Es omis di tempu antigu amaba Deus i e ta fasiba diferenti kusas pa kuida di povu di Deus. Bu pudi tambi oja bon isemplus entri kristons maduru na bu familia i na bu kongregason. (Eb 13:7) Bu tene tambi isemplu perfeitu di Jesus Kristu. (1 Ped 2:21) Nkuantu bu na studa diritu es isemplus, jubi se maneras di sedu ku ta dimirau. (Eb 12:​1, 2) Dipus disidi kuma ku bu na kopia elis.

5. Kuma ku bu pudi tene bon juisu i pabia ki importanti? (Salmu 119:9)

⁵ Tene i “guarda . . . bon juisu”. (Anos ku pui letras karegadu ku italiku; Dit 3:21) Un omi ku tene bon juisu ta jubi diferentis opsons antis di aẑi. Pa kila, sforsa ciu pa tene i kontinua tene bon juisu. Pabia? Es mundu tene manga di jovens ku ta kontroladu pa se ideias o e ta disa pa se emosons kontrola ke ke na fasi. (Dit 7:7; 29:11) Tambi televison, filmis, internet ku redi sosial pudi afeta manera ku bu ta pensa i aẑi. Ma kuma ku bu pudi tene bon juisu? Purmeru, kunsi prinsipius di Biblia i pensa na kuma ke pudi judau. Dipus usa es prinsipius ku na judau toma bon disisons ku na kontenta Jeova. (Lei Salmu 119:9.) Si bu aprindi pensa des manera, i na judau ciu pa bu sedu kriston maduru. (Dit 2:​11, 12; Eb 5:14) Jubi kuma ku bon juisu na judau na dus situasons: (1) kuma ku bu ta trata irmas i (2) disisons ku bu ta toma aserka di ke ku bu na bisti ku bu aparensia.

6. Kuma ku bon juisu na juda un ermon joven trata irmas ku rispitu?

⁶ Bon juisu na judau mostra rispitu pa minjeris. Pur isemplu, un ermon pudi misti kunsi un irma diritu, i ka ten nada di mal na kila. Ma un ermon joven ku tene bon juisu ka na fala, skirbi o fasi kualker kusa ku na pui pa un irma pensa di kuma i misti namora ku el, si kontra i ka misti kasa ku el. (1 Tim 5:​1, 2) Si i sta na namora ku un irma, i na proteẑi bon nomi di ki irma ora ki ivita sta elis so sin un algin sta pertu. — 1 Kor 6:18.

7. Kuma ku bon juisu pudi juda un ermon ora ki sta na toma disison aserka di si manera di bisti ku si aparensia?

⁷ Un utru manera ku un ermon joven ta mostra di kuma i tene bon juisu i ora ki toma bon disison na si manera di bisti ku si aparensia. Maioria di kilis ku ta fasi nobu stilus di ropa, i fasi se publisidadi ka ta rispita Jeova. Tambi e ta leba un vida susu. Pa kila, ropas ke ta fasi pudi perta dimas o pui pa omis parsi ku minjeris. Ora ku un ermon joven ku sta na kirsi pa sedu kriston maduru na kuji ke ki na bisti, i ta disa pa prinsipius di Biblia ku bon isemplus ku ten na kongregason oriental. I pudi punta si kabesa: ‘Sera ki ña skolia ta mostra di kuma N tene juisu i N rispita utrus? Sera ki ña manera di bisti ta pui pa i fasil pa utrus fia di kuma N ta sirbi Deus?’ (1 Kor 10:​31-33; Titu 2:6) Un ermon joven ku tene bon juisu ka na ngaña so rispitu di ermons ku irmas, ma tambi di si Pape ku sta na seu.

8. Kuma ku un ermon joven pudi aprindi sedu algin ku utrus pudi konfia nel?

⁸ Sedu algin ku utrus pudi konfia nel. Un ermon joven ku sedu di konfiansa ta kuida diritu di tudu si responsabilidadis. (Luk 16:10) Jubi isemplu perfeitu di Jesus. Nunka i sedu disinteresadu o iresponsavel. I fasi tudu ke ku Jeova falal pa i fasi, mesmu oca i seduba difisil pa i fasil. I ama jintis, prinsipalmenti si disipulus, i di livri vontadi i da si vida pa relis. (Jon 13:1) Suma Jesus, sforsa ciu pa kumpri kualker disignason ku bu dadu. Si bu ka sibi kuma di fasil, sedu umildi i pidi ajuda di ermons maduru. Ka bu kontenti so na fasi un bokadiñu. (Rom 12:11) En ves di kila, fasi un tarbaju diritu i kabal, fasil ‘pa Jeova i ka pa omi.’ (Kol 3:23) Na bardadi, abo i ka perfeitu, pa kila, rikuñisi bu limiti ku erus ku bu fasi. — Dit 11:2.

APRINDI KUSAS KU PUDI JUDAU NA VIDA DI KADA DIA

9. Pabia ku un ermon joven dibi di aprindi kusas ku na judal na si vida di kada dia?

⁹ Pa sedu un kriston maduru, bu na pirsisa di aprindi kusas ku na judau na bu vida di kada dia. Es na judau seta responsabilidadis na kongregason, judau oca tarbaju ku na sustenta bu kabesa o sustenta bu familia, i tene bon amisadi ku utrus. Jubi alguns kusas ku bu pudi aprindi.

10-11. Kuma ku bu pudi benefisia bu kabesa ku kongregason si bu ta lei i skirbi diritu? (Salmu 1:​1-3) (Jubi tambi foto.)

¹⁰ Aprindi lei ku skirbi diritu. Biblia fala di kuma un omi filis ku ta sai ben, ta ranja tempu pa lei Palabra di Deus i pensa fundu nel. (Lei Salmu 1:​1-3.) Si i ta lei Biblia kada dia, i na kunsi manera di pensa di Jeova, kila na judal pensa diritu i aplika ke ki aprindi na Biblia. (Dit 1:​3, 4) Es tipu di omis pirsisadu del na kongregason. Pabia di ke?

¹¹ No ermons ku irmas pirsisa di omis ku tene kapasidadi di nsina i di da konsijus ku basia na Biblia. (Titu 1:9) Si bu sibi lei ku skirbi diritu, bu na pudi purpara diskursus ku komentarius ku na juda utrus i torna se fe forti. Bu na pudi tambi toma bon notas ora ku bu na studa i ora ku bu na obi diskursus na runions, asembleias ku kongresus. Es notas na judau torna bu fe mas forti i nkoraẑa utrus.

12. Ke ku na judau sedu un algin ku ta sukuta diritu i papia ku bondadi?

¹² Aprindi sukuta diritu i papia ku bondadi. Un omi kriston dibi di aprindi sukuta diritu i papia ku bondadi. Es signifika di kuma i pirsisa di sukuta i ntindi pensamentus ku sentimentus di utrus. (Dit 20:5) I pudi aprindi sibi ke ku algin misti fala na si ton di vos, na si rostu ku si ẑestu. Bu ka pudi sibi fasi es kusas si bu ka ta pasa tempu ku jintis. Si bu ta usa sempri aparelius eletroniku pa kumunika, suma manda email o mensaẑen, kila pudi rapati kapasidadi di kumunika ku jintis kara ku kara. Pa kila, tenta buska manera di sukuta utrus diritu i papia ku bondadi. — 2 Jon 12.

13. Kal utru kusa ku un ermon joven dibi di aprindi? (1 Timótiu 5:8) (Jubi tambi foto.)

¹³ Aprindi kuida di bu kabesa. Un kriston maduru dibi di sibi kuida di si kabesa ku si familia. (Lei 1 Timótiu 5:8.) Na alguns teras, ermons joven pudi aprindi fasi tarbaju ku se pape o ku utru algin na familia. Na utrus teras, jovens pudi aprindi fasi nogos o utru tipu di tarbaju ora ke sta inda na studa na liseu. Sempri i bon aprindi un kusa ku na judau oca tarbaju. (At 18:​2, 3; 20:34; Ef 4:28) I bon pa bu kunsidu suma un algin ku ta tarbaja risu i ku ta kaba ke ki kumsa. Si bu ta fasi kila, bu pudi tene mas pusibilidadi di oca tarbaju i kontinua nel. Maneras di sedu ku kusas ku bu aprindi ku no fala del, i kusas importanti tambi pa un omi kriston kumpri responsabilidadis ki na bin tene na futuru. Gosi no jubi alguns des responsabilidadis.

PURPARA PA FUTURU

14. Kuma ku ermons joven pudi purpara pa sedu servu di tempu kompletu?

¹⁴ Servu di tempu kompletu. Manga di kristons maduru sedu servu di tempu kompletu oca ke sedu inda joven. Sedu pioneru ta juda un ermon joven aprindi kuma ki pudi tarbaja diritu ku diferentis jinti. Tambi i ta judal sibi usa diritu diñeru ki ngaña i ka gasta mas di ki kil ki tene. (Fil 4:​11-13) Un bon manera di kumsa sirvisu di tempu kompletu i sedu pioneru ausiliar. Manga delis ta sirbi suma pioneru ausiliar pa un tempu, i kila ta juda elis purpara pa kumsa sirvisu di pioneru regular. Sirvisu di pioneru pudi yabri porta pa utru tipu di sirvisu di tempu kompletu, suma sedu servu di konstruson o betelita.

15-16. Ke ku pudi juda un ermon joven pa sirbi na kongregason?

¹⁵ Servu ministerial o ansion. Tudu ermons dibi di tene objetivu di kualifika pa sirbi se ermons ku irmas suma ansions na kongregason. Biblia fala di kuma omis ku sta na fasi sforsu pa yangasa es responsabilidadi ta “dija bon tarbaju.” (1 Tim 3:1) Antis di sirbi suma ansion un ermon dibi di kualifika pa sirbi suma servu ministerial. Servus ministerial ta juda ansions kuida di ermons ku irmas na kongregason. Tantu ansions suma servus ministerial ta sirbi ku umildadi se ermons ku irmas i e ta pega tesu na pregason. Ermons joven pudi kualifika pa sirbi suma servus ministerial mesmu si e tene inda entri 17 ku 19 anu. Un servu ministerial ku kualifika pudi disignadu suma ansion ora ki tene serka di 20 anu.

¹⁶ Kuma ku bu pudi kualifika pa es responsabilidadis? Biblia da so un lista di kusas ku bu dibi di fasi. Ma lembra di kuma es kusas basia na Biblia, na amor pa Jeova, pa bu familia i pa kongregason. (1 Tim 3:​1-13; Titu 1:​6-9; 1 Ped 5:​2, 3) Sforsa pa ntindi kada un des kusas ku bu pirsisa di fasi. Ora Jeova pa i judau kumpri ku kusas ku faladu del.c

17. Kuma ku un ermon joven pudi purpara pa kasa i sedu ŝef di familia? (Jubi tambi foto.)

¹⁷ Kasa i sedu ŝef di familia. Suma ku Jesus fala, alguns kristons maduru na kontinua sedu solteru. (Mat 19:12) Ma si bu disidi kasa bu na tene utru responsabilidadis suma omi i ŝef di familia. (1 Kor 11:3) Jeova ta spera pa omi ama si minjer i kuida del na sintidu fisiku, emosional i spiritual. (Ef 5:​28, 29) Maneras di sedu ku kusas ku bu aprindi ku no fala del nes studu, suma tene bon juisu, rispita minjeris, sedu algin di konfiansa, na judau sedu un bon omi. Bu na sta ben purparadu pa kumpri ku bu responsabilidadis suma omi i ŝef di familia.

18. Kuma ku un ermon joven pudi purpara pa sedu pape?

¹⁸ Pape. Ora ku bu kasa bu pudi sedu pape. Ke ku bu pudi aprindi di Jeova aserka di sedu un bon pape? No pudi aprindi manga di kusas. (Ef 6:4) Jeova fala Jesus si Fiju, di manera klaru di kuma i amal, tambi i tene si fabur. (Mat 3:17) Si bu sedu pape, sertifika sempri di kuma bu fijus ta sinti di kuma bu ama elis. Ngaba elis sempri pa bon kusas ke fasi. Papes ku ta kopia isemplu di Jeova ta juda se fijus sedu omis ku minjeris maduru. Bu pudi purpara desdi gosi pa es responsabilidadi ora ku bu kuida diritu di utrus na bu familia, na kongregason i aprindi fala elis di kuma bu ama elis i e tene balur pa bo. (Jon 15:9) Es na judau pa bu sedu un bon omi i bon pape na futuru. Nkuantu ki tempu ka ciga inda, bu na tene balur pa Jeova i sedu di ajuda garandi pa bu familia i pa kongregason.

KE KU BU PUDI FASI DESDI GOSI?

19-20. Ke ku pudi juda ermons joven sedu kristons maduru? (Jubi foto ku sta na kapa.)

¹⁹ Ermons joven, bo ka pudi dati so bo sedu kristons maduru. Bo pirsisa di kuji kin ku bo na kopia, tene bon juisu, sedu jintis ku utrus pudi konfia nel, aprindi kusas ku pudi juda bos na vida di kada dia i purpara pa futuru.

²⁰ Ora ku bo pensa na tudu kusas ku bo pirsisa di fasi, bo pudi pensa di kuma i difisil dimas pa bo fasil. Ma bo pudi fasil. Lembra di kuma Jeova tene vontadi garandi di juda bos. (Isa 41:​10, 13) Sin duvida, bo ermons ku irmas na kongregason na juda bos tambi. Ora ku bo sedu kristons maduru, bo na tene un vida filis i ku kontentamentu. Ermons joven no ama bos! Pa Jeova bensua bos ciu nkuantu bo na sforsa pa sedu kristons maduru. — Dit 22:4.