Papes, bo juda bo fijus tene fe forti na Deus i na Biblia

1-2. Kuma ku papes dibi di reaẑi ora ku se fijus fasi elis purguntas aserka di Deus ku Biblia?

MANGA di jintis na konkorda di kuma kria fiju ta da manga di tarbaju. Si bu sedu pape ku na kria un fiju, no na dau parabens pa sforsu garandi ku bu ta fasi pa torna si fe forti. (Lei 6:​6, 7) Ora ku bu fiju na kirsi, i pudi kumsa ku fasi purguntas aserka di ke ku no fia nel, suma ke ku manda Jeova ka misti pa no fasi sertus kusas.

² Na kumsada, bu pudi sta preokupadu ku purguntas di bu fiju. Bu pudi te mesmu oja es purguntas suma sinal di kuma i sta na pirdi fe na Deus i na Biblia. Ma, ora ku mininus na kirsi, e pirsisa di fasi purguntas pa pudi torna se fe forti. (1 Kor 13:11) Pa kila, bu ka pirsisa di medi. Ora ke fasi purguntas, bu pudi usa ki mumentu pa juda elis aprindi pensa mas fundu, pa e pudi torna se fe mas forti.

3. Ke ku no na bin fala del nes studu?

³ Nes studu, no na fala di kuma ku papes pudi juda se fijus (1) tene fe forti na Deus i na Biblia, (2) ntindi pabia ku obdisi normas di Biblia aserka di ke ki bon o mal i bon pa relis i (3) aprindi kuma ke pudi splika ke ke fia nel pa utrus. No na fala tambi di pabia ki bon pa mininus fasi purguntas. Fora di kila, no na fala di alguns atividadis ku bo pudi fasi ku bo fijus, ku na pirmiti bos papia di kusas ku no fia nel.

BO JUDA BO FIJUS PA E TENE FE FORTI NA DEUS I NA BIBLIA

4. Kal purguntas ku un mininu pudi fasi, i pabia di ke?

⁴ Bo fijus ka na tene fe na Deus, so pabia di kuma bo tene fe. Bo ka padidu ku fe na Jeova. Nin bo fijus ka padidu tambi ku fe na Jeova. Pa kila, bo fiju pudi kumsa ku fasi bos purguntas suma esis: ‘Kuma ku N pudi sibi di kuma Deus ten? Sera ki na bardadi N pudi fia na ke ku Biblia ta fala?’ Biblia fala i bon pa no usa no kapasidadi di pensa i “proba tudu”. (Rom 12:1; 1 Tes 5:21) Kuma ku bo pudi juda bo fiju pa i torna si fe forti?

5. Ke ku papes pudi fasi pa juda se fijus tene fe na Biblia? (Romanus 12:2)

⁵ Bo nkoraẑa bo fijus pa e buska prova di kuma, ke ku Biblia ta fala i bardadi. (Lei Romanus 12:2.) Ora ku bo fijus fasi purguntas, bo apruveita es oportunidadi pa mostral kuma ke pudi oja respostas na no feramentas di piskisa, suma Índice das Publicações da Torre de Vigia ku Gia di Piskisa pa Tustumuñas di Jeova. Na Gia di Piskisa di Purtugis, bas di entrada “A Bíblia”, i pudi jubi “Inspirada por Deus” pa oja prova di kuma, Biblia i ka so un bon livru ku skirbidu pa omis. Ma, i “palabra di Deus”. (1 Tes 2:13) Pur isemplu, i pudi piskisa na no publikasons pa aprindi mas aserka di Ninive, antigu sidadi di Asirius. Na pasadu alguns ku ta studa kusas antigu di Biblia, fala di kuma sidadi di Ninive ka ciga nunka di ten. Ma, serka di 1850, i ojadu sidadi di Ninive bas di con. Es ta mostra di kuma ke ku Biblia fala i bardadi. (Sof 2:​13-15) Pa diskubri kuma ku distruison di Ninive kumpri profesia di Biblia, i pudi jubi artigu “Já Sabia?” na Sintinela di Novembru di 2021. Bo nkoraẑa bo fijus pa e kompara ke ku no publikasons ta fala, ku ke ku utrus livrus di konfiansa ta fala. Es na juda elis aumenta se fe di kuma, ke ku Biblia ta fala i bardadi.

6. Kuma ku papes pudi juda se fijus trena se kapasidadi di pensa? Bu pudi da un isemplu. (Jubi tambi foto.)

⁶ Bo juda bo fijus trena se kapasidadi di pensa. Papes tene manga di oportunidadi di papia ku se fijus aserka di Biblia o di fe na Deus. E pudi tene es oportunidadi ora ke na visita un kau ku tene kusas antigu, jardin o filial di Tustumuñas di Jeova. Pur isemplu, ora ku bo na bai visita kaus ku tene kusas antigu, o fasil pa internet, bo pudi mostra bo fijus kuma ku un kusa o ke ku pasa na tempu antigu, sta ligadu ku ke ku Biblia fala. Es pudi juda bo fijus pa e oja di kuma ke ku Biblia ta fala i bardadi. Sera ki bo fijus sibi di kuma, nomi di Deus sta na un pedra ku kunsidu pa Pedra Moabita ku tene 3 mil anu? Ki Pedra Moabita sta na museu di Fransa. Tambi kopia di Pedra Moabita sta na parti, “Biblia ku nomi di Deus” na Sedi Mundial di Tustumuñas di Jeova na Warwick, Nova York. Pedra Moabita mostra di kuma, Rei Mesa di Moabi rebela kontra Israel. Es sta di akordu ku ke ku Biblia fala. (2 Re 3:​4, 5) Ora ku bo fijus oja di kuma ke ku Biblia fala i bardadi, se fe na torna mas forti. — Komparal ku 2 Kronikas 9:6.

7-8. (a) Ke ku no pudi aprindi di kusas bonitu ku Jeova kumpu? Bu pudi da un isemplu. (Jubi tambi foto.) (b) Kal purguntas ku pudi juda bo fijus aumenta se fe na kin ku kumpu tudu kusas?

⁷ Bo nkoraẑa bo fijus pa e pensa na kusas bonitu ku Jeova kumpu. Ora ku bo na yanda ku bo fijus na matu o na jardin, bo juda elis pa e oja formas interesanti na kusas ku Jeova kumpu ku ta ripitidu manga di bias. Pabia? Pabia es na juda bo fijus pa e ntindi di kuma i ten un algin jiru dimas ku kumpu elis. Pur isemplu, manga di kusas ku Deus kumpu suma grupus di strelas, kaska di karakol, fojas di planta ku ẑirasol, tene mesmu forma, ku sedu, un kurva ku ta kumsa na un pontu i ku ta da volta di ki mesmu pontu. Es tipu di forma ta comadu forma spiral. Sientistas studa es forma pa manga di anus. Nicola Fameli ku ta studa Bioloẑia ku Fisika splika di kuma, ora ku bu konta numerus di alguns spiral na un kusa ku sta na naturesa, bu ta nota di kuma e ta sigi mesmu mudelu di numerus. Es numerus ta comadu di ordi di Fibonacci.a

⁸ Na skola, bo fijus pudi aprindi utrus formas ku kustuma ojadu na kusas ku Deus kumpu. Pur isemplu, maioria di arvuris tene formas ku ta ripiti. Tronku ta dividi na ramus, es ramus ta dividi na ramusiñus, dipus es ramusiñus ta dividi na ramus mas pikininu. Es forma ta comadu fractal na purtugis. Ma, kin ku kumpu es formas bonitu? Ora ku bo fijus ta pensa fundu nes kusas bonitu ku Jeova kumpu, es pudi juda elis tene fe forti di kuma, Deus ku kumpu tudu kusas. (Eb 3:4) Ora ku bo fiju na kirsi, bo pirsisa tambi di judal ntindi ke ku manda i importanti obdisi leis di Deus. Pa fasil, bo pudi puntal: “Si Deus ku kumpunu, bu ka pensa di kuma i mas sibi kuma ku no dibi di komporta pa pudi sedu filis?” Dipus bo pudi splika di kuma Deus danu Biblia, pa mostranu kuma ku no pudi sedu filis.

NASA, ESA ku Hubble Heritage (STScl/AURA)-ESA/Hubble Collaboration

BO JUDA BO FIJU PA I NTINDI PABIA KU OBDISI NORMAS DI BIBLIA ASERKA DI KE KI BON O MAL I BON PA REL

9. Ke ku pudi leba bo fiju fasi purguntas aserka di normas di Biblia?

⁹ Si bo fiju fasi purguntas aserka di normas di Biblia, tenta diskubri pabia ki fasi es purguntas. Sera ki i pabia di kuma, i ka fia di kuma ke ku Biblia fala i bardadi? O i ka sibi splika utrus ke ki fia nel? Na kualker un des situason, bo pudi juda bo fiju ntindi pabia ki bon pa no obdisi leis di Jeova. Pa fasil, bo pudi studa ku el livru Bu Pudi Tene un Vida Filis pa Sempri!b

10. Kuma ku bo pudi juda bo fiju pa i pensa na kuma ki pudi tene amisadi intimu ku Jeova?

¹⁰ Bo nkoraẑa bo fiju pa i misti tene amisadi intimu ku Jeova. Ora ku bo na studa Biblia ku bo fiju, bo usa purguntas ku komparasons ku sta na livru Bu Pudi Tene un Vida Filis pa Sempri!, pa judal ntindi kuma ku Jeova ta sinti aserka di diferentis kusas. (Dit 20:5) Pur isemplu, lison 8 kompara Jeova ku un bon amigu ku ta lembrantanu kusas ku pudi proteẑinu i judanu. Dipus di papia di 1 Jon 5:​3, bo pudi puntal: “Kuma ku no dibi di sinti ku ke Jeova falanu pa fasi, si no sibi di kuma el i suma es bon amigu?” Es pudi sedu un simplis purgunta, ma fasi es purgunta pudi juda bo fiju pa i ntindi di kuma, Jeova ta danu leis pabia i amanu. — Isa 48:​17, 18.

11. Kuma ku bo pudi juda bo fiju pa i ntindi pabia ki bon obdisi ke ku Biblia ta nsina? (Ditus 2:​10, 11)

¹¹ Bo fala di kuma ku obdisi ke ku Biblia ta nsina ta judanu. Ora ku bo na lei Biblia o lei testu di dia juntu, bo papia di kuma ku obdisi ke ku Biblia ta nsina juda bo familia. Pur isemplu, sera ki bo fiju ntindi kal ki balur di tarbaja risu i konta bardadi sempri? (Eb 13:18) Bo pudi tambi splika kuma ku sigi konsiju di Biblia ta judanu tene saudi i sedu mas filis. (Dit 14:​29, 30) Si bo fiju ntindi di kuma i bon obdisi ke ku Biblia ta nsina, i pudi inda mas misti obdisil. — Lei Ditus 2:​10, 11.

12. Kuma ku Steve ku si minjer juda se fiju ntindi benefisiu di sigi ke ku Biblia ta nsina?

¹² Steve ku si minjer, tene un fiju di 16 anu comadu Ethan. Steve splika kuma ke juda Ethan ntindi di kuma Jeova ta fasi leis pabia i amanu. Steve fala sin: “No puntal: ‘Ke ku manda Jeova misti pa no obdisi si leis? Kuma kes ta mostra di kuma i amanu? Ke ku na kontisi si bu ka obdisi es leis?’” Es kombersas juda Ethan tene fe forti di kuma, ke ku Jeova ta fala i bon. Steve fala mas: “No objetivu i di juda Ethan oja di kuma, jiresa ku Biblia tene i mas di pekaduris.”

13. Kuma ku papes pudi trena se fijus pa e obdisi ke ku Biblia ta nsina? Bu pudi da un isemplu.

¹³ Bo trena bo fijus pa e obdisi ke ku Biblia ta nsina. Un oportunidadi di fasil i ora ku bo fiju dadu un parti di livru pa lei na skola. Jintis ku faladu nes livru pudi sta na fasi kusas ku Jeova fala i mau. Suma pur isemplu, e pudi sta na fasi pekadu seksual o sedu violentu. Tambi livru pudi skirbidu di un manera ku na pui pa kilis ku na leil, misti sedu suma kil jintis. Bo pudi punta bo fiju pa i pensa na kuma ku Jeova ta sinti, ora ku jintis ta fasi o fala es kusas. (Dit 22:​24, 25; 1 Kor 15:33; Fil 4:8) Es pudi judal pa i papia di ke ki fia nel pa si pursor ku kolegas di turma, ora ku es asuntu na papiadu del na turma.

BO NSINA BO FIJUS KUMA KE PUDI SPLIKA KE KE FIA NEL PA UTRUS

14. Kal asuntu ku pudi sedu difisil pa un joven papia del ku utrus, i pabia di ke?

¹⁴ Utrora, jovens pudi tene medu di papia ku utrus aserka di ke ke fia nel. Pur isemplu, e pudi tene medu ora ke dibi di splika ke ku manda e ka fia na tioria di evuluson. Pabia di ke? Se pursoris pudi fala di kuma, evuluson i bardadi i ka tioria. Si abo i pape, kuma ku bu pudi juda bu fiju pa i sta konvensidu di kuma, ke ki fia nel i bardadi?

15. Ke ku pudi juda un joven pa i sta inda mas konvensidu di kuma, ke ki fia nel i bardadi?

¹⁵ Bo juda bo fiju pa i sta inda mas konvensidu di kuma, ke ki fia nel i bardadi. Bo fiju ka pirsisa di burguñu pabia i fia di kuma, i ten kin ku kumpu tudu kusas. (2 Tim 1:8) Pabia ki ka dibi di burguñu? Te mesmu manga di sientistas fia di kuma, kusas bibu ka dati so e parsi. Es sientistas oja prova di kuma, i ten un algin jiru ku dibi di kumpu tudu kusas bibu ku ta dimira ciu. Pa kila, e ka ta fia na tioria di evuluson ku ta nsinadu na manga di skolas na mundu ntidu. Utru kusa ku pudi juda bo fiju pa i aumenta si fe ku koraẑen, i pa i tenta sibi ke ku konvensi utrus ermons ku irmas, pa e fia di kuma vida kumpudu.c

16. Kuma ku papes pudi juda se fiju sibi splika utrus pabia ke fia di kuma, i ten kin ku kumpu tudu kusas? (1 Pedru 3:15) (Jubi tambi foto.)

¹⁶ Bo juda bo fiju pa i sibi splika utrus pabia ki fia di kuma, i ten kin ku kumpu tudu kusas. (Lei 1 Pedru 3:15.) I pudi sedu interesanti jubi juntu artigus na jw.org, na parti “Os Jovens Perguntam — Criação ou evolução?” Dipus, bo fiju pudi kuji splikason ki pensa i pudi juda utrus ntindi di kuma, i ten kin ku kumpu tudu kusas. Bo nsaia ki splikason juntu ku bo fiju. Bo lembrantal di kuma, i ka pirsisa di diskuti ku si kolegas di turma. Bo nkoraẑal pa i usa splikason simplis i ku fasi sintidu, si kontra i ten un algin ku misti papia di ki asuntu. Pur isemplu, un kolega di turma pudi fala: “N ta fia so na ke ku N ta oja, i nunka N ciga di oja Deus.” Un kriston joven pudi ruspundi asin: “Imaẑina bu sta na yanda na un matu seradu i bu oja un kasa bonitu. Ke ku bu na pensa? Un algin dibi di kumpu ki kasa. I mesmu kusa ku no planeta i ku tudu kusas bibu. Un algin dibi di kumpu elis.”

17. Kuma ku papes pudi juda se fijus buska oportunidadis di papia ku utrus aserka di Biblia? Bu pudi da un isemplu.

¹⁷ Bo juda bo fiju pa i buska oportunidadis di papia ku utrus aserka di Biblia. (Rom 10:10) Papes, bo pudi kompara sforsu ku bo fiju ta fasi di nsina utrus aserka di Biblia, ku sforsu ku un mininu ta fasi pa aprindi yanda. Na kumsada, mininu pudi aprindi firma, dipus i pudi kumsa ku da alguns pasusiñus. Di mesmu manera, un kriston joven pudi kumsa prega di un manera simplis. Pur isemplu, i pudi punta si kolega di turma: “Sera ki bu sibi di kuma, manga di bias sientistas ta kopia ke ke oja na naturesa? Pera N mostrau un video bonitu.” Dipus di mostra video ku sta na parti Sera ki i Kumpudu? i pudi falal: “Si un sientista ngabadu pa un kusa ki kopia na naturesa, kin gora ku mersi ngabadu pa ke ku no oja na naturesa?” Es kombersa simplis pudi pui pa un kolega di turma misti aprindi mas aserka di Jeova.

BO KONTINUA JUDA BO FIJUS PA E TORNA SE FE FORTI

18. Kuma ku papes pudi kontinua juda se fijus torna se fe na Deus mas forti?

¹⁸ No sta na vivi na un mundu ku tene manga di jintis ku ka tene fe na Jeova. (2 Ped 3:3) Pa kila, papes, ora ku bo na studa Biblia ku bo fijus, bo nkoraẑa elis pa e studa asuntus ku na aumenta se rispitu pa Palabra di Deus ku si normas. Bo papia di kusas ku Jeova kumpu, pa juda elis pensa fundu i aumenta se fe na Jeova. Bo juda elis ntindi profesias interesanti di Biblia ku kumpri ja. Mas importanti, bo ora ku bo fijus, tambi bo ora pa relis. Si bo fasil, bo pudi tene sertesa di kuma Jeova na bensua bo sforsu di juda bo fijus aumenta se fe nel. — 2 Kron 15:7.