Bu lagrimas tene balur pa Jeova

1-2. Kal kusas ku pudi punu cora?

ANOS tudu no ciga ja di cora. Utrora no ta cora ora ku no kontenti dimas. Pur isemplu, bu pudi cora ora ku un kusa spesial kontisi, suma ora ku bu padi un fiju. O talves bu cora ora ku bu lembra di un kusa bonitu ku fasiu sinti ben, o bu oja un amigu ku bu ka oja pa manga di anus.

² Ma, manga di bias no ta cora pabia no sta tristi i no sta na sufri. Pur isemplu, no pudi cora ora ku algin ku no konfia nel fasi un kusa ku denu. No pudi cora ora ku no sta duenti, sta ku dur garandi pa manga di tempu, o ora ku un algin ku no ama muri. Utrora no pudi sinti suma profeta Jeremias, oca ku Babilonius kaba ku Jerusalen. Jeremias fala asin: “Ña uju darma korenti di yagu . . . Ña uju na cora, sin para, sin diskansu”. — Mis 3:​48, 49.

3. Kuma ku Jeova ta sinti ora ki oja si servus na sufri? (Isaias 63:9)

³ Jeova sibi kantu bias ku no cora, pabia di situasons difisil. Biblia danu garantia di kuma Jeova sibi kada ora ku no sta na sufri, tambi i ta obinu ora ku no pidil ajuda. (Sal 34:15) Ma Jeova ta fasi mas di ki so oja sufrimentu ku no ta pasa i obinu. Jeova i no Pape ku amanu ciu. Pa kila, ora ki ojanu na cora, i ta bin rapidu pa judanu. — Lei Isaias 63:9.

4. Kal isemplus di Biblia ku no na fala del, i ke ke ta nsinanu aserka di kuma ku Jeova ta sinti?

⁴ Jeova kontanu na si Palabra, kuma ki ta sinti ora ku si servus na cora i kuma ki ta juda elis. Pur isemplu no pudi aprindi di ke ku kontisi ku Ana, Davi i ku Rei Ezekias. Ke ku pui elis cora? Ke ku Jeova fasi pa juda elis? Dipus no na oja kuma ku se isemplu pudi animanu ora ku no sta tristi dimas, ora ku no traidu o ora ku no sinti di kuma no ka tene speransa?

JEOVA TA OJA BU LAGRIMAS, ORA KU ALGIN KU BU AMA MURI

5. Kuma ku situason di Ana fasil sinti?

⁵ Ana pasaba manga di purblemas ku fasil sinti tristi dimas i ku pul cora ciu. Un di purblema ku Ana teneba, i di kuma si omi tene utru minjer, comadu Penina, i kila odialba. Tambi Ana ka teneba fiju, ma Penina teneba manga di fijus. (1 Sam 1:​1, 2) Penina kontinua goza Ana pabia i ka teneba fijus. Kuma ku bu na sintiba si bu sta nes situason? Ana staba tristi dimas, “i ta cora, i ta nega kume”, tok i ta tene “kasabi” na si korson. — 1 Sam 1:​6, 7, 10.

6. Ke ku Ana fasi pa pudi sinti animadu?

⁶ Ke ku Ana fasi pa pudi sinti animadu? Un di kusas ku judal i di kuma, i ta baiba adora Jeova na tabernakulu. La, talves pertu di entrada di kintal di tabernakulu, ‘i ora pa Jeova, i cora ciu.’ I pidi Jeova: “Jubi pa ña kasabi, bu lembra di mi”. (1 Sam 1:10b, 11) Ana konta Jeova na orason ke ki staba na pensa i sinti. Oca Jeova oja Ana na cora risu, i sinti tambi dur. Ana i si fiju femia ku tene balur pa rel, pa kila, i misti konsolal!

7. Kuma ku Ana sinti dipus ki konta Jeova si purblemas?

⁷ Oca Ana konta Jeova tudu ke ki staba na sinti, Ŝef di Saserdotis comadu Eli garantil di kuma, Jeova na ruspundi si orason. Kuma ki sinti dipus di kila? Biblia fala sin: “I bai si kamiñu, i kume; si rostu ka fika mas tristi.” (1 Sam 1:​17, 18) Mesmu manera ku si situason ka muda, Ana sinti mas minjor. I konfiaba di kuma Jeova ntindi si sintimentu ku si purblema, i na judal. I kila propi ku Jeova fasi. I ntindi si sintimentu, i sukuta si orason, i mas tardi i judal pa i tene fijus. — 1 Sam 1:​19, 20; 2:21.

8-9. Di akordu ku Ebreus 10:​24, 25, pabia ki importanti pa anos tudu no ba ta mati runions? (Jubi tambi foto.)

⁸ Lison pa nos. Sera ki nes mumentu bu tene un purblema ku ta fasiu sinti tristi dimas? Talves un di bu familia o amigu muri. Ora kes kusas kontisi i normal pa bu misti fika abo so. Ma lembra di isemplu di Ana. I baiba pa tabernakulu, i Jeova konsolal la. Di mesmu manera, Jeova na konsolau i nkoraẑau ora ku bu bai mati runions, mesmu si bu sta kansadu o tristi dimas. (Lei Ebreus 10:​24, 25.) Na runions, no ta obi leitura di testus di Biblia ku ta nkoraẑanu. Asin, Jeova ta judanu para pensa na kusas ku ta punu fika tristi. Es pudi judanu sinti ben, mesmu si no situason ka minjoria logu.

⁹ Na no runions, no ermons ku irmas ta nkoraẑanu, i mostranu di kuma e amanu ciu. No ta sinti ben ora ku no sta ku elis. (1 Tes 5:​11, 14) Jubi isemplu di un pioneru spesial, ku si minjer muri. I fala sin: “Utrora, N ta dija ña minjer mal, i N ka ta konsigi para cora. Ma ora ku N bai mati runion, N ta risibi nkoraẑamentu ku N pirsisa del. Bon palabras ku ña ermons ku irmas ta falan, ku se kumentarius na runions ta nkoraẑan ciu. I ka mporta kal tristesa o preokupason ku N tene antis di ciga na runion, sempri N ta sinti ben ora ku N sta la.” Ora ku no sta na no runions, Jeova pudi usa no ermons ku irmas pa judanu.

10. Kuma ku no pudi sigi isemplu di Ana, ora ku no sta tristi dimas?

¹⁰ Ana risibi konsolu dipus ki ora Jeova, i kontal kuma ki staba na sinti. Abo tambi bu pudi ‘pui tudu bo kudadi riba di Jeova,’ ku konfiansa di kuma i na obi bu orason i judau. (1 Ped 5:7) Un irma ku si omi matadu pa ladrons armadu fala sin: “N staba tristi dimas, tok N pensa di kuma nunka N ka na ciga di sinti ben mas. Ma sempri ku N ora ña Pape Jeova ku aman ciu, N ta sinti animadu. Utrora N ka ta sibi kuma ku N na splikal ña sentimentu, ma i ta ntindin. Ora ku N sta tristi dimas, N ta ora pa i kalman. Logu dipus N ta sinti kalmu, i N ta konsigi fasi ke ku N pirsisa di fasi na ki dia.” Ora ku bu cora dianti di Jeova, i kontal ke ku ta pou bu fika tristi, Jeova ta sinti tristi tambi, i ta ntindi diritu kuma ku bu ta sinti. Mesmu si bu purblema ka kaba, Jeova pudi konsolau i judau sinti kalmu. (Sal 94:19; Fil 4:​6, 7) I ta nota tudu ke ku bu ta fasi pa kontinua sedu fiel, tambi i na bin pagau. — Eb 11:6.

JEOVA TA OJA BU LAGRIMAS, ORA KU ALGIN KU BU KONFIA NEL TRAIU

11. Kuma ku Davi sinti oca ku utrus tratal mal?

¹¹ Duranti si vida, Davi pasaba pa manga di situasons difisil ku pul cora. I tenba manga di jintis ku odial, te mesmu i traidu pa kilis ki konfiaba nel. (1 Sam 19:​10, 11; 2 Sam 15:​10-14, 30) Duranti un mumentu difisil di si vida, i fala sin: “N kansa ja ku jimi! Tudu noti N ta cora, tok kama na lagua ku ña larmas.” Pabia ku Davi sinti des manera? I fala sin: “Pabia di tudu ña inimigus.” (Sal 6:​6, 7) Ke ku utrus fasil, pul pa i sinti dur i cora ciu.

12. Suma ki mostradu na Salmu 56:​8, kal konfiansa ku Davi teneba?

¹² Mesmu manera ku Davi teneba manga di purblemas, i teneba konfiansa di kuma Jeova amal. I fala sin: “SIÑOR obi vos di ña miskiñu.” (Sal 6:8) Na utru situason, Davi skirbi palabras bonitu ku no pudi oja na Salmu 56:8. (Lei.) Es palabras mostra di manera klaru di kuma, Jeova amanu ciu, tambi i ta preokupa ku no sentimentu. Davi fala di kuma, i suma si Jeova sta na pui si lagrimas na un garafa o skirbil na un livru. Davi teneba sertesa di kuma, Jeova ojal tambi i lembra di si dur. Davi staba konvensidu di kuma, si Pape ku sta na seu i ku amal, ntindiba kal ki si purblemas i kuma ku ki purblema ta fasilba sinti.

13. Kal kusas ku pudi konsolanu, ora ku utrus trainu? (Jubi tambi foto ku diseñu.)

¹³ Lison pa nos. Sera ki bu sta ku dur na korson, pabia algin ku bu konfia nel fasiu mal o traiu? Talves bu sta na sufri ciu, pabia algin ku bu sta pa kasa ku el bandonau, o bu kasamenti kaba di repenti, o algin ku bu ama para sirbi Jeova. Un ermon ku si minjer kai cai i ku bandonal, fala sin: “N ka fiaba na ke ku pasa ku mi. N ta sintiba tristi, ku raiba, suma algin ku ka tene balur.” Si un algin traiu o i fasiu sinti mal, sibi di kuma Jeova nunka ka na bandonau pudi konsolau. Es ermon fala sin: “N nota di kuma, i ka tudu ora ku pekaduris ta sedu fiel pa nos, ma no pudi sempri konfia na Jeova. I ka mporta ke ku kontisi, Jeova sempri i sta la pa judanu. Nunka i ka na bandona si servus fiel.” (Sal 37:28) Lembra tambi di kuma, amor di Jeova i mas garandi di ki amor di un pekadur. Ora ku bu traidu pa un algin ku bu ama, i ta fasiu sinti dur garandi. Ma Jeova ka ta muda manera ki ta ojau. Bu tene balur garandi pa rel. (Rom 8:​38, 39) Lison i es: I ka mporta kuma ku un algin tratau, bu Pape ku sta na seu amau.

14. Kal garantia ku Salmu 34:18 danu?

¹⁴ Si bu traidu, palabras di Davi ku sta na Salmu 34:18 pudi konsolau. (Lei.) Un livru fala di kuma, palabras “kilis ku tene spiritu kalkadu” pudi signifika “kilis ku ka ta spera nada di bon pa relis”. Kuma ku Jeova ta juda kilis ku ta sinti mal pabia e traidu? Suma ku un pape o mame ta pega si fiju i konsolal ora ki na cora, asin tambi ku Jeova ta “sta pertu di” nos. I ta sinti pena i sta pruntu pa judanu, ora ku un algin trainu o bandonanu. Jeova sta pruntu pa konsolanu ora ku no sta ku dur na korson, i ora ku no pensa di kuma no ka bali nada. Tambi i ta danu manga di kusas ku pudi judanu nguenta situasons difisil ku no sta na pasa. — Isa 65:17.

JEOVA TA OJA BU LAGRIMAS, ORA KU BU KA TENE SPERANSA

15. Kal situason ku Ezekias pasa ku pul cora?

¹⁵ Oca ki teneba 39 anu, rei Ezekias di Judá teneba un duensa ku na lebal pa mortu. Profeta Isaias leba mensaẑen di Jeova pa Ezekias di kuma, i na muri pabia di ki duensa. (2 Re 20:1) I parsiba di kuma, i ka ten speransa pa Ezekias. Ezekias fika tristi dimas, i cora ciu. I ora Jeova ku tudu korson. — 2 Re 20:​2, 3.

16. Ke ku Jeova fasi pa Ezekias?

¹⁶ Oca Jeova obi orason di Ezekias ku si lagrimas i sinti pena del, i falal: “N obi bu orason, N oja bu larmas. N na kurau”. Atraves di Isaias, Jeova purmiti aumenta dias di vida di Ezekias, tambi i salba Jerusalen na mon di Asirius. — 2 Re 20:​4-6.

17. Kuma ku Jeova ta judanu, ora ku no tene purblemas di saudi gravi? (Salmu 41:3) (Jubi tambi foto ku diseñu.)

¹⁷ Lison pa nos. Sera ki bu tene un purblema di saudi ku parsi di kuma i ka tene kura? Ora Jeova, mesmu ku lagrimas. Biblia garantinu di kuma, “Pape ku ta ten pena di nos, Deus ku tudu koraẑen bin del”, na konsolanu na tudu no purblemas. (2 Kor 1:​3, 4) Aos, no ka na spera di kuma, Jeova na kaba ku tudu no purblemas, ma sempri i na judanu. (Lei Salmu 41:3.) Atraves di si spiritu santu, Jeova ta danu forsa, jiresa ku kalma pa lida ku es purblema. (Dit 18:14; Fil 4:13) Tambi i ta konsolanu ku speransa ki danu di kuma na futuru, ningin ka na duensi. — Isa 33:24.

18. Kal testu di Biblia ku ta konsolau, ora ku bu sta na pasa un situason difisil dimas? (Jubi kuadru “Palabras ku pudi konsolanu ora ku no na cora.”)

¹⁸ Ezekias konsoladu ku palabras di Jeova. Anos tambi no pudi risibi konsolu na Palabra di Deus. Ora ku no sta disanimadu, palabras di Jeova ku sta na Biblia pudi konsolanu i kalmanu. (Rom 15:4) Oca ku un irma na Afrika Osidental, sibi di kuma i tene kankru, i cora manga di bias. I fala sin: “Un di testus ku nkoraẑan ciu i Isaias 26:3. Mesmu si no ka pudi muda no situason, es versikulu purmiti di kuma Jeova pudi kalmanu i judanu nguenta kualker purblema.” Sera ki i ten un testu di Biblia ku ta nkoraẑau, ora ku bu sta na pasa situasons ku parsi di kuma e ka tene suluson?

19. Ke ku no pudi spera tene na futuru?

¹⁹ Fin des mundu pertu, i no na spera di kuma i na ten mas purblemas, ku ta punu sinti dur i cora ciu. Ma suma ku no oja na isemplus di Ana, Davi ku Rei Ezekias, Jeova ta ojanu ora ku no na cora tambi i ta sinti tristi. Na bardadi, no lagrimas tene balur pa rel. Pa kila, ora ku no sta na pasa situasons difisil, no misti ora Jeova ku tudu no korson. Pa no ka lunjusi nunka di no ermons ku irmas ku amanu. No kontinua lei Biblia pa pudi risibi konsolu di Jeova. No pudi tene sertesa di kuma, si no kontinua sedu fiel, Jeova na paganu. Es nklui purmesa bonitu di kuma un dia, Jeova na limpa tudu lagrimas ku no ta tene pabia di dur di algin ku muri, ora ku no traidu, i ora ku no sta sin speransa. (Apok 21:4) No na bin cora so pabia di kontentamentu.