Jeova ta “kura kebrantadus di korson”

1. Kal sentimentu ku Jeova ta tene pa si servus?

KE KU Jeova ta oja ora ki jubi si servus na Tera? I ta oja ora ku no sta kontenti i ora ku no sta tristi. (Sal 37:18) I ta kontenti, ora ki oja di kuma no sta na fasi no minjor pa sirbil, mesmu si no sta tristi! Fora di kila, i ta sta pruntu pa judanu i pa konsolanu.

2. Ke ku Jeova ta fasi pa kilis ku tene korson kebrantadu, i kuma ku no pudi benefisia pa manera ki ta kuida di nos?

² Salmu 147:3 fala di kuma, Jeova ta kuida di kilis ku tene korson kebrantadu suma ku un bon mediku ta kuida di un algin ku molostra. Es versikulu mostra kuma ku Jeova ta kuida di kilis ku sta ku dur garandi. Ke ku no dibi di fasi pa benefisia di manera ku Jeova ta kuida di nos? No jubi un isemplu. Un bon mediku pudi juda ciu pa kura un algin ku molostra. Ma pa benefisia di ajuda, ki algin ku molostra dibi di sigi diritu orientason ku mediku dal. Di mesmu manera, no pirsisa di sigi orientason di Jeova pa pudi kuradu na sintidu emosional. Nes studu, no na oja ke ku Jeova fala na si Palabra pa kilis ku sta ku dur na korson, i no na oja kuma ku no pudi aplika konsijus ki ta da ku amor.

JEOVA LEMBRANTANU DI KUMA NO TENE BALUR GARANDI PA REL

3. Pabia ku alguns ta sinti di kuma e ka tene balur?

³ Infilismenti, manga di jintis na mundu ka ama utrus. Pa kila, e pudi trata utrus mal i fasi elis sinti di kuma e ka tene balur. Un irma comadu Helena fala sin: “N kirsi na un familia ku ka ta mostra amor. Ña pape seduba violentu i kada dia i ta falan ami ku ña ermons di kuma no ka bali nada.” Talves suma Helen, bu tratadu mal, bu ta kritikadu sempri o bu ta fasidu sinti di kuma bu ka bali nada. Si kila kontisi, talves i pudi sedu difisil fia di kuma un algin ta preokupa ciu ku bo.

4. Di akordu ku Salmu 34:​18, kal garantia ku Jeova danu?

⁴ Mesmu si utrus tratau mal, bu pudi tene sertesa di kuma Jeova amau, tambi i dau balur. I “sta pertu di kilis ku tene korson kebrantadu”. (Lei Salmu 34:18.) Mesmu si bu sinti di kuma bu “tene spiritu kalkadu” lembra di kuma, Jeova oja bon kusas na bu korson, i el propi ku tisiu pa rel. (Jon 6:44) I sta sempri pruntu pa judau pabia bu tene balur pa rel.

5. Ke ku no pudi aprindi di manera ku Jesus ta trata kilis ku utrus ta dispresa?

⁵ No pudi sibi kuma ku Jeova ta sinti, ora ku no jubi isemplu di Jesus. Oca Jesus staba na Tera, i ta notaba di kilis ku ta dispresadu pa utrus, i ta trata elis ku bondadi. (Mat 9:​9-12) Oca ku un minjer ku teneba speransa di kuma i na kuradu di un duensa gravi toka na ponta di ropa di Jesus, i konsolal i ngabal pa si fe. (Mar 5:​25-34) Jesus kopia diritu maneras di sedu di si Pape. (Jon 14:9) Pa kila, bu pudi tene sertesa di kuma Jeova dau balur, tambi i ta nota di bu bon maneras di sedu, nkluindu fe ku amor ku bu mostra pa rel.

6. Si bu pensa di kuma bu ka tene balur, ke ku bu pudi fasi?

⁶ Ke ku bu pudi fasi si sempri bu ta pensa di kuma bu ka tene balur? Lei versikulus di Biblia ku na mostrau di kuma Jeova dau balur, i dipus pensa fundu nelis.b (Sal 94:19) Si bu ka konsigi yangasa un objetivu o bu sta disanimadu pabia bu ka pudi fasi suma utrus, ka bu sedu duru ku bu kabesa. (Sal 103:​13, 14) Si bu sufriba di abusu fisiku, emosional o seksual, ka bu kulpa bu kabesa pa ke ku ki algin fasi. Lembra di kuma Jeova na julga kilis ku trata utrus mal, ma i na juda kilis ku maltratadu. (1 Ped 3:12) Sandra ku maltrataduba pa si papes ocal pikininu, fala sin: “Sempri N ta pidi Jeova pa i judan oja ña kabesa di un bon manera, suma ku el i ta ojan.”

7. Kuma ku spiriensia ku no pasa pudi judanu na no sirvisu pa Jeova?

⁷ Nunka ka bu divida di kuma Jeova pudi usau pa juda utrus. I dau oportunidadi di sedu si kumpañer di tarbaju na pregason. (1 Kor 3:9) Situasons ku bu pasa na vida pudi judau ntindi ku fasilidadi, kuma ku utrus sta na sinti. Bu pudi juda elis ciu. Helen ku faladuba del risibi ajuda di Jeova ku di ermons, i gosi i pudi juda utrus tambi. I fala sin: “N ta sintiba di kuma N ka bali nada. Ma Jeova fasi pa N sinti di kuma N amadu, tambi i ta usan pa juda utrus.” Helen sta kontenti di sirbi suma pioneru regular.

JEOVA MISTI PA NO SETA SI PURDON

8. Ke ku Jeova falanu na Isaias 1:18?

⁸ Alguns servus di Jeova ta sinti tristi dimas pa pekadus ke fasiba na pasadu, i pudi sedu antis o te mesmu dipus di batismu. Ma i bon pa no lembra di kuma, Jeova da resgati pabia i amanu ciu. Na bardadi, i misti pa no seta si prenda. Jeova falanu di kuma, dipus ku “no ruma”c asuntu ku el, i na purda tudu no pekadus. (Lei Isaias 1:18.) No ta kontenti pa manera ku no Pape ku amanu ka ta lembra di pekadus ku no fasiba! Na mesmu tempu, nunka i ka na diskisi di bon kusas ku no fasi. — Sal 103:​9, 12; Eb 6:10.

9. Pabia ku no dibi di konsentra na ke ku no na fasi gosi pa dianti, en ves di konsentra na pasadu?

⁹ Si bu ripindi pa ke ku bu fasi na pasadu, fasi bu minjor pa konsentra na ke ku bu na fasi gosi pa dianti, en ves di konsentra na pasadu. Jubi isemplu di apostolu Paulu. I ripindi pa manera ki pirsigi kristons mal, ma i sibiba di kuma Jeova purdal. (1 Tim 1:​12-15) Sera ki i kontinua konsentra na pekadus ki fasi na pasadu? I ka fasi kila, suma manera ki ka seta pirdi tempu na pensa na kusas ki fasiba, pa sedu un Fariseu rispitadu. (Fil 3:​4-8, 13-15) En ves di kila, Paulu kontinua fasi si minjor na pregason, i konsentra na futuru. Suma Paulu, bu ka pudi muda bu pasadu. Ma bu pudi ngaba Jeova gosi, i pensa na futuru bonitu ki purmiti dau.

10. Ke ku no pudi fasi, si kontra kusas ku no fasiba pui utrus sufri?

¹⁰ Bu pudi fika mal, si alguns kusas ku bu fasiba pui utrus sufri. Ke ku pudi judau? Fasi ke ku bu pudi pa minjoria kusas, tambi pidi elis diskulpa di korson. (2 Kor 7:11) Pidi Jeova pa i juda kilis ku sta na sufri pa ke ku bu fasiba. I pudi judau i juda kilis ku bu yara pa bo kontinua sirbil i tene sintidu susegadu.

11. Ke ku no pudi aprindi di isemplu di profeta Jonas? (Jubi tambi diseñu .)

¹¹ Aprindi di bu erus di pasadu, i sta dispostu pa disa Jeova usau di manera ki misti. Jubi isemplu di profeta Jonas. En ves di bai pa Ninive suma ku Deus mandal, i bai pa utru ladu. Jeova kuriẑi Jonas, i Jonas aprindi di si eru. (Jona 1:​1-4, 15-17; 2:​7-10) Jeova ka para usa Jonas suma si profeta. Deus da Jonas utru oportunidadi pa i bai pa Ninive, es bias Jonas obdisi logu-logu. Jonas ripindi pa ke ki fasiba. Ma i ka disa pa si eru tujil fasi ke ku Jeova falal pa i fasi. — Jona 3:​1-3.

JEOVA TA KONSOLANU ATRAVES DI SI SPIRITU SANTU

12. Kuma ku Jeova ta danu pas ora ku un kusa mau dimas kontisi ku nos? (Filipensis 4:​6, 7)

¹² Atraves di si spiritu santu, Jeova ta konsolanu ora ku un kusa mau dimas kontisi ku nos. Jubi isemplu di Ron ku Carol. Infilismenti se fiju mata kabesa. E fala sin: “No ciga di pasa situasons difisil antis, ma es i pior di tudu. No ora na manga di notis ku no ka ta konsigi durmi, i no sinti pas ku faladu del na Filipensis 4:​6, 7.” (Lei.) Si bu sta ku dur na korson, bu pudi konta Jeova kuma ku bu sta na sinti. Bu pudi fasil manga di bias, i pa tempu ku bu misti. (Sal 86:3; 88:1) Pidi Jeova si spiritu santu manga di bias. El nunka i ka na nega bu pididu. — Luk 11:​9-13.

13. Kuma ku spiritu santu pudi judanu kontinua adora Jeova di manera fiel? (Efésius 3:16)

¹³ Sera ki bu ciga di pasa un situason difisil, i gosi bu sinti di kuma bu ka tene manga di forsa di fasi kualker kusa? Spiritu santu pudi dau forsa pa bu kontinua adora Jeova di manera fiel. (Lei Efésius 3:16.) Jubi isemplu di un irma comadu Flora. El ku si omi e staba na sirbi juntu suma misionarius, oca ku si omi kai cai i e kaba kasamenti. Flora fala sin: “N staba ku dur garandi pabia di si traison, i N ka pudiba pensa na utru kusa. N ora Jeova pa i dan si spiritu santu pa pudi nguenta. Jeova dan ke ku N pirsisa del pa N tene forsa, pa lida ku situason ku na kumsada parsiba impusivel.” Flora sinti di kuma Deus judal aumenta si konfiansa nel, tambi i tene sertesa di kuma i na judal na tudu situasons difisil ki sta na pasa. I fala di kuma palabras di Salmu 119:32 fala ben di kuma ku Jeova judal. Es versikulu fala sin: “N na kuri na kamiñu di bu mandamentus ora ku bu burin ntindimentu.”

14. Kuma ku no pudi disa pa spiritu di Deus judanu?

¹⁴ Kuma ku bu pudi aẑi di akordu ku pididu ku bu fasi pa tene spiritu santu? Partisipa na atividadis ku na judau risibi mas spiritu di Deus. Es nklui mati runions i prega utrus. Lei Palabra di Deus kada dia na judau pensa fundu na manera ku Jeova ta pensa. (Fil 4:​8, 9) Ora ku bu na lei Biblia, toma nota di jintis ku pasa pa situasons difisil, i pensa fundu na kuma ku Jeova juda elis nguenta. Sandra ku faladuba del, sufri pabia di manga di purblemas ki teneba na si vida. I fala sin: “Storia di José tokan ciu. I ka disa pa situasons difisil ku injustisa ki pasa, torna si amisadi ku Jeova fraku.” — Kum 39:​21-23.

JEOVA TA USA NO ERMONS KU IRMAS PA KONSOLANU

15. Ba kin ku pudi konsolanu, i kuma ke pudi judanu? (Jubi tambi foto.)

¹⁵ Ora ku no na sufri, no ermons ku irmas pudi animanu ciu. (Kol 4:8) No ermons ku irmas i un meiu ku Jeova ta usa pa mostra si amor pa nos. E pudi konsolanu ora ke sta juntu ku nos o sukutanu ora ku no na papia di no sentimentu. E pudi nkoraẑanu ku un versikulu di Biblia o ora juntu ku nos.d (Rom 15:4) Utrora un ermon o irma pudi lembrantanu manera di pensa di Jeova, i kila pudi judanu kontinua nguenta. No ermons ku irmas pudi judanu di utru manera, suma danu kumida ora ku no na pasa mumentus difisil.

16. Ke ku no pirsisa di fasi pa risibi ajuda di utrus?

¹⁶ Pa risibi ajuda di utrus, no pirsisa di pidil. No ermons ku irmas gosta di nos, i e misti judanu. (Dit 17:17) Ma e ka pudi sibi kuma ku no na sinti o ke ku no pirsisa del. (Dit 14:10) Si bu sta ku dur na korson, bu pudi konta bu amigus maduru kuma ku bu sta na sinti. Konta elis ke ku pudi judau. Bu pudi papia ku un o dus ansion ku bu ta sta avontadi ku el. Alguns irmas ta oca konsolu ora ke papia ku un irma maduru.

17. Kal ki alguns difikuldadis ku pudi tujinu risibi nkoraẑamentu, i kuma no pudi vensi elis?

¹⁷ Ka bu pasa manga di tempu abo so. Pabia di dur ku bu sta na sinti, talves bu ka na misti pasa tempu ku utrus. Utrora bu ermons ku irmas pudi ka ntindiu o e pudi papia un kusa ku na pui pa bu sinti mal. (Tiagu 3:2) Ka bu disa pa es kusas tujiu risibi nkoraẑamentu ku bu na pirsisa del. Gavin, un ansion ku sta na sufri di depreson, fala sin: “Manga di bias N ka ta misti papia ku ña amigus o pasa tempu ku elis.” Ma Gavin ka disa pa es sentimentu tujil pasa tempu ku si amigus. Manga di bias i ta sinti minjor ora ki fasil. Un irma comadu Amy fala sin: “Pabia di ke ku N pasa, i ta difisil konfia na jintis. Ma N aprindi ama i konfia na ña ermons ku irmas, suma ku Jeova ta fasi. N sibi di kuma es ta fasi pa Jeova kontenti, i ta fasin tambi pa N kontenti.”

PURMESAS DI JEOVA TA KONSOLANU

18. Ke ku no pudi spera di futuru, i ke ku no pudi fasi gosi?

¹⁸ No pudi oja futuru ku konfiansa, pabia no sibi di kuma i ka na tarda, Jeova na bin kaba ku tudu tipu di sufrimentu ku dur na korson. (Apok 21:​3, 4) Na ki tempu, tudu kusas mau ku no pasa ka na ‘bin na no kabesa.’ (Isa 65:17) Suma ku no oja, Jeova ta kuida di nos ora ku no sta na sufri. Apruveita di manga di kusas ku Jeova ta usa pa konsolanu i judanu. Nunka ka bu duvida di kuma Jeova ‘ta toma konta di bo.’ — 1 Ped 5:7.