Nunka N para Aprindi

N padidu na 1927 na un sidadi pikininu pertu di Chicago, Illinois, na Stadus Unidu di Amerika. Anos i 5 na no ermondadi — Jetha, Don, ami, Karl ku Joy. No staba tudu disididu pa sirbi Jeova di tudu no korson. Jetha fasi skola di Jiliadi na 1943, i seduba di sugundu turma. Don bai pa Betel di Brooklyn, Nova York na 1944, Karl bai na 1947, i Joy na 1951. Na bardadi, se bon isemplu juntu ku isemplu di ña pape ku ña mame, markan ciu.

KUMA KU NO FAMILIA KUNSI BARDADI

Ña pape ku ña mame seduba jintis ku gosta di lei Biblia, i ku tene amor pa Deus, i e nsinanu tambi fasi mesmu kusa. Ma, ña pape pirdi rispitu ki teneba pa igreẑas dipus ki i sirbi suma tropa na Europa duranti Purmeru Gera Mundial. Ña mame kontentiba manera ku ña pape riba bibu di gera, i falal: “Karl, no bai igreẑa suma ku no kustuma ta baiba.” Ña pape ruspundil: “N na kumpañau, ma ami N ka na yentra la.” Ña mame puntal: “Pabia?” I ruspundil: “Duranti gera, lideris riliẑiosu di mesmu riliẑion ku ka junta ladu na gera, bensua tropas di se ladu ku se armas! Sera ki Deus apoia tudu dus ladu?”

Na utru dia, oca ña mame staba inda na igreẑa, dus Tustumuñas di Jeova bin no kau. E pati ña pape dus livru comadu Luz (vulumi 1 ku 2). Es livrus ta papia di livru di Apokalipsi. Ña pape staba interesadu, i toma ki dus livru. Oca ku ña mame oja ki livrus, i kumsa ku lei elis. Un dia, i lei un notisia na un jornal lokal ku na kumbidaba interesadus pa e bai studa Biblia atraves di livrus Luz. I disidi bai. Oca ki ciga kau di studu, un minjer garandi yabril porta. Ku un di ki livrus na mon, ña mame puntal: “I li ku bo na studa e livru?” Kila ruspundil: “I li ña fiju, yentra.” Semana dipus, ña mame leban ku ña ermons tudu, dipus no kontinua ta bai sempri.

Na un runion, kin ku staba na diriẑi, pidin pa N lei Salmu 144:​15, ku mostra di kuma kilis ku ta adora Jeova, i jintis filis. Es versikulu tokan ciu, suma tambi utru dus versikulu, ku sedu, 1 Timótiu 1:11 ku fala di kuma Jeova i Deus filis, ku Efésius 5:1 ku fala pa no “fasi forsa pa parsil.” Asin, N nota di kuma N dibi di sedu filis na sirbi ña Kriadur i gardisil pa privileẑiu ku N tene di sirbil. Es dus kusas ku N tenta fasi duranti tudu ña vida.

Kongregason mas pertu di nos staba na Chicago, un distansia di 32 kilometru. Nin ku sin, no ta baiba runions, i ña kuñisimentu di Biblia aumenta. N lembra un bias, kin ku staba na diriẑi runion coma Jetha pa i kumenta. Oca ku Jetha na kumenta, N fala na ña sintidu: ‘N sibi e resposta. N pudiba yalsa mon N kumenta.’ Apartir di la, N kumsa ku purpara i fasi ña propi kumentarius. Mas importanti, N kirsi na sintidu spiritual juntu ku ña ermons. I N batisa na 1941.

N APRINDI DI JEOVA NA KONGRESUS

Kongresu ku mas markan i kil di 1942 na Cleveland, Ohio. No familia staba na tendas juntu ku utrus familias pertu di lokal di kongresu. Tambi ermons ku irmas di mas di 50 sidadis na Stadus Unidu, staba na kumpaña programa atraves di telefoni. Sugundu Gera Mundial staba na geriadu ku forsa, i opusison kontra Tustumuñas di Jeova staba na aumenta. Oca ku sol kumsa ku noti, N oja un grupu di ermons para se karus ku lusis di karu viradu pa kamiñu di tendas. E kombinaba di kuma, na kada karu un algin na sta la pa guarda duranti tudu noti. Si i ten kualker sinal di pirigu, ermons na sindi lus di karu pa fungulinti uju di kilis ku bin ataka elis, i e na pita karu. Logu utrus na bin rapidu pa bin juda. N fala ña kabesa: ‘Povu di Jeova sta ben purparadu pa tudu kusa!’ Es fasin sinti suguru, N durmi diritu. Ma nin un pirigu ka bin ten.

Anus mas tardi, oca ku N na lembra di ki kongresu, N nota di kuma ña mame nunka fika preokupadu o fika ku medu. Ma i pui tudu si konfiansa na Jeova i na si organizason. N ka na diskisi nunka di si bon isemplu.

Puku antis di ki kongresu, ña mame kumsaba ja sirvisu di pioneru regular. E ku manda i toma nota diritu di diskursus ku na fala di sirvisu di tempu kompletu. Un dia oca ku no na riba pa kasa, i falanu: “N misti kontinua sirvisu di pioneru, ma N ka na pudi fasil i na mesmu tempu kuida diritu di kasa.” Dipus i puntanu si no na pudi judal. No falal no na pudi. Pa kila, i dividinu kada kin un o dus kuartu pa ba ta limpa kada parmaña antis di mata-bica. Ora ku no bai pa skola, i ta fika i jubi si kontra kau sta limpu, dipus i ta bai pregason. I seduba un minjer okupadu, ma nunka i disa di kuida di si fijus. Ora ku no sai intervalu no bai pa kasa o ora ku no sai di skola, i ta staba sempri ku nos. Alguns dias dipus di aulas, no ta kumpañalba pregason di tardi, kila judanu ntindi ke ku signifika sedu pioneru.

N KUMSA SIRVISU DI PIONERU

N kumsa sirvisu di pioneru ku 16 anu. Apesar di kuma ña pape ka seduba inda Tustumuña di Jeova na ki tempu, i staba interesadu na sibi kuma ku ña sirvisu na bai. Un dia di noti, N falal di kuma, N tenta manga di bias, ma N ka oja ningin ku misti studa Biblia. N kala inda te, dipus N puntal: “Bu ka misti pa N ba ta studa Biblia ku bo?” I pensa un bokadu, dipus i falan: “I ka ten purblema. N ka oja ke ku na tujin studa ku bo.” Ña purmeru studanti di Biblia i ña pape. Es i un privileẑiu garandi!

No studa livru “A Verdade Vos Tornará Livres”! Konformi no studu na avansa, N nota di kuma ña pape staba na judan sedu un bon studanti i un bon instrutor. Pur isemplu, un dia di noti dipus di no lei un paragrafu, i falan: “N oja ke ku livru fala. Ma kuma ku bu sibi kuma es i bardadi?” Suma N ka staba purparadu, N falal: “N ka pudi splikau el gosi, ma na no prosimu studu, N na dau resposta.” I kila ku N bin fasi. N oja versikulus ku na apoia asuntu ku no na falaba del. Dipus di kila, N pasa N ta purpara mas diritu pa no studu, i N aprindi fasi piskisa. Kila judan kirsi na sintidu spiritual, tambi i juda ña pape. Ña pape pui na pratika ke ki i staba na aprindi, i na 1952 i batisa.

N KONTINUA APRINDI NA BETEL

N sai di kasa ocan ku 17 anu. Kuas na ki mesmu tempu Jethaa sedu misionariu, i Don seduba Betelita. Elis tudu dus e gostaba di se disignason, i es nkoraẑanba ciu. Asin, N prenŝi pitison pa Betel i pa Jiliadi, dipus N disa tudu na mon di Jeova. Pa fin, N kumbidadu pa Betel na 1946.

Duranti anus, N fasi diferentis tarbaju na Betel, kila pirmitin aprindi manga di kusas ku N ka sibiba. Na bardadi, na ña 75 anu na Betel, N nsinadu kuma di juda na mprimi livrus ku kontabilidadi. N aprindi tambi kuma di kumpra kusas ku no pirsisa del na Betel i kuma di manda kusas importanti pa utrus kau. Mas importanti di tudu, N benefisia di tudu nsinamentu bibliku ku no ta risibi na Betel duranti programa spiritual di parmaña ku utrus programas.

N aprindi tambi ku ña ermonsiñu Karl, ku bin pa Betel na 1947. I seduba un bon studanti i un bon instrutor di Biblia. Un bias, i judan ku un diskursu ku N teneba. N falal di kuma N oja manga di informason tok N ka sibi kal ku N na usa. I judan oja suluson atraves di un purgunta. I puntan: “Joel, kal ki tema di bu diskursu?” N ntindi logu ke ki i misti falan. N dibi di usa so informason ku na judan splika tema, i disa ki utrus. N ka diskisi nunka des lison.

Pa tene kontentamentu na sirvisu di Betel, no pirsisa di fasi no minjor na pregason. Si no fasi kila, no pudi tene spiriensias nkoraẑanti. Un spiriensia ku N ta lembra ben del, kontisi un dia di tardiñu na Bronx na sidadi di Nova York. Ami ku un ermon no visita un minjer ku risibiba ja rivista Sintinela ku No korda! No kumsa kombersa des manera: “Es di tardi, no sta na juda jintis aprindi kusas interesanti ku sta na Biblia.” I ruspundi i fala: “Si aserka di Biblia, bo pudi yentra.” No lei i no papia di manga di versikulus aserka di Renu di Deus ku nobu mundu. Minjer fika dimiradu, tok i kumbida manga di si amigus pa e bin mati no kombersa na prosimu visita. Mas tardi, el ku si omi e bin sedu servus fiel di Jeova.

N APRINDI KU ÑA MINJER

N fasi serka di 10 anu na buska kin ku N na kasa kel. Ke ku judan oca un bon minjer? N ora Jeova i N pensa aserka des purgunta: ‘Ke ku N misti fasi juntu ku ña minjer dipus ku no kasa?’

Dipus di kongresu di 1953 na stadiu Yankee, N kunsi un irma comadu Mary Aniol. El ku ña irma Jetha e fasi skola di Jiliadi juntu, i seduba si kumpañer di sirvisu misionariu. Ku alegria garandi, Mary dan pasada di si sirvisu misionariu na Karibi ku diferentis studus bibliku ki diriẑi duranti anus. Konformi no na kunsi n̈utru, no nota di kuma no tene mesmu objetivus spiritual. Amor ku no tene pa n̈utru kirsi, i no kasa na Abril di 1955. Di manga di maneras, N oja di kuma Mary sedu un prenda ku bin di Jeova, tambi un bon isemplu pa kopia. I ta kontentiba ku kualker disignason ki dadu. I algin ku ta tarbaja risu, i gosta di juda utrus, i sempri i pui Renu na purmeru lugar. (Mat 6:33) No sirbi tris anu na sirkuitu, i na 1958, no kumbidadu pa Betel.

N aprindi ciu ku Mary. Pur isemplu, oca ku no kumsa kasa, no disidi ba ta lei Biblia juntu, i no ta lei serka di 15 versikulu kada dia. Dipus di un di nos lei, no ta papia di ki versikulus i di kuma ku no pudi aplika elis na no vida. Manga di bias, Mary ta kontan kusas ki aprindi na Jiliadi o na si sirvisu misionariu. Es kombersas judan kunsi mas Biblia, i judan minjoria ña diskursus, tambi i judan sibi kuma ku N pudi nkoraẑa irmas. — Dit 25:11.

Mary, minjer ku N ama ciu muri na 2013. Ma N tene speransa di bin ojal na nobu mundu! Nkuantu N na pera ki dia, N sta disididu pa kontinua aprindi, i konfia na Jeova di tudu ña korson. (Dit 3:​5, 6) Ora ku N pensa na ke ku povu di Jeova na bin fasi na nobu mundu, N ta sinti kosoladu i alegri. Ku sertesa kusas ku no na bin fasi, na nklui aprindi nobus kusas aserka di no Nsinadur mas Garandi! Na bardadi, palabras ta faltan pa gardisil pa tudu ki fasi pa mi te li, i pa manga di maneras ki mostran si bondadi.