Purguntas di kilis ku ta lei no publikasons

Ba kin ki “anjus ku kujidu” ku faladu del na 1 Timótiu 5:21?

Apostolu Paulu skirbi es palabras pa Timótiu si kumpañer ansion: “Dianti di Deus ku Kristu Jesus ku anjus ku kujidu, N na mandau ku tudu seredadi pa bu obdisi e ordi. Ka bu julga sin ntindi kusa diritu; ka bu mostra fabur pa ningin.” — 1 Tim 5:21.

Purmeru, no na fala di kal anjus ku ka fasi parti des grupu di anjus. I klaru ki, i ka pudi sedu kilis ku fasi parti di 144.000. Oca ku Paulu na skirbi pa Timótiu, kristons unjidu ka kumsaba inda resusitadu pa vivi na seu. Apostolus ku utrus unjidus ka seduba inda kriaturas spiritual, pa kila “anjus ku kujidu” ka na rifiri elis. — 1 Kor 15:​50-54; 1 Tes 4:​13-17; 1 Jon 3:2.

Tambi, “anjus ku kujidu” ka pudi rifiri anjus disobdienti na tempu di diluviu. Es anjus bai pa ladu di Satanas i e pasa sedu dimonius, Jesus staba kontra elis. (Kum 6:2; Luk 8:​30, 31; 2 Ped 2:4) Na futuru, e na ficadu na abismu pa 1.000 anu, i dipus e na kabadu kel juntu ku Diabu. — Jud 6; Apok 20:​1-3, 10.

“Anjus ku kujidu” ku Paulu fala del, dibi di sedu anjus ku sta na seu i ku ta tarbaja juntu ku “Deus ku Kristu Jesus”.

I ten milyaris i milyaris di anjus fiel. (Eb 12:​22, 23) Parsi di kuma, Jeova ka da elis tudu mesmu tarbaju. (Apok 14:​17, 18) Lembra di kuma, un bias, un anju so risibi tarbaju di kaba ku 185.000 tropas di Asiria. (2 Re 19:35) I pudi sedu ki, un numeru garandi di anjus dadu tarbaju di ‘junta na renansa di Jesus tudu kilis ku na pui utrus pa e kai, ku kilis ku ta fasi pekadu.’ (Mat 13:​39-41) Utrus anjus pudi “junta jintis ki kuji” pa bai seu. (Mat 24:31) I utrus risibi ordi di ‘guardanu na tudu kau ku no na bai.’ — Sal 91:11; Mat 18:10; komparal ku Mateus 4:11; Luk 22:43.

Parsi di kuma, “anjus ku kujidu” ku faladu del na 1 Timótiu 5:21 i anjus ku dadu tarbajus spesial ligadu ku povu di Deus. Paulu staba na konsiju aserka di kuma ku ansions dibi di kuida di se responsabilidadis, i tambi di kuma, membrus di kongregason dibi di mostra rispitu pa ansions. Paulu fala di kuma ansions ka dibi di “mostra fabur pa ningin” ora ke na fasi julgamentu i nin e ka dibi di toma disison sin toma tempu pa ntindi kusas diritu. Dipus, Paulu da un motivu importanti di sigi si konsiju, ku sedu di kuma e sta na aẑi “dianti di Deus ku Kristu Jesus ku anjus ku kujidu.” Asin, i klaru di kuma, alguns anjus dadu tarbaju di juda kongregason, suma proteẑi servus di Deus, juda elis na pregason, i da Jeova konta di rekadu. — Mat 18:10; Apok 14:6.