SERA KI BU LEMBRA?
Sera ki bu lei ku kuidadu artigus di Sintinela des anu? Jubi si bu na pudi ruspundi es purguntas:
Kal isemplu ku Jeova disa na manera ki ta trata minjeris?
I ta trata elis sin fasi skuju, i ka mas gosta di omi di ki minjer. I ta sukuta minjeris, i ta sta interesadu na se sentimentu ku se preokupason. Tambi i da elis responsabilidadi di kuida di si tarbaju. — w24.01, paẑina 15 ku 16.
Kuma ku no pudi aplika Efésius 5:7, ku fala: “Ka bo sedu se kumpañeris”?
Apostolu Paulu avisanu pa no ka ndianta ku jintis ku ta pui pa i difisil sigi normas di Jeova. Es konsiju ta aplika tantu pa kilis ku no ta ndianta ku el, ku kilis ku no ta papia ku el na redi sosial. — w24.03, paẑina 22 ku 23.
Kal tipu di mintidas ku no dibi di sta atentu ku el?
No pirsisa di sta atentu ku mintidas ku pudi bin di no ermons ku irmas, o emails ku no ka spera risibi di jintis ku no ka kunsi, ku apostatas ku ta finji mostra interesi pa no mensaẑen. — w24.04, paẑina 12.
Ke ku no sibi ku ke ku no ka sibi, aserka di kuma ku Jeova na julga rei Salomon ku utrus jintis ku muri na Sodoma ku Gomora ku Diluviu?
No ka pudi fala ku tudu sertesa di kuma Jeova disidi pa e kabadu ku el di un bias. Ma no sibi di kuma el i sibi tudu kusas, tambi i tene miserikordia garandi. — w24.05, paẑina 3 ku 4.
Kal garantia ku no tene pa manera ku Deus sedu “Roca”? (Lei 32:4)
No pudi buska proteson na Jeova. El i un algin di fiansa, i ta kumpri sempri si purmesas. Tambi si manera di sedu ku si intenson ka ta muda. — w24.06, paẑina 26 te 28.
Ke ku pudi judau adapta na un nobu kongregason?
Konfia di kuma Jeova na judau, suma ki juda si servus na tempu antigu. Ivita fasi komparasons ku bu antigu kongregason. Partisipa na atividadis di bu nobu kongregason, i sforsa pa tene nobu amigus. — w24.07, paẑina 26 te 28.
Kal lisons ku no pudi aprindi di tris komparason ku sta na Mateus kapitulu 25?
Komparason di karnelis ku kabras ta mostra importansia di sedu fiel. Komparason di virẑens jiru ku tulu, ta mostra di kuma no dibi di sta purpadu i atentu. Komparason di sakus di uru ta mostra importansia di tarbaja duru. — w24.09, paẑina 20 te 24.
Kal ku seduba altura di baranda di templu di Salomon?
Na 2 Kronikas 3:4, alguns manuskritu antigu fala di “120 kovadus”, kila signifika di kuma baranda na tene 53 metru di altura. Ma utrus testus di konfiansa fala “20 kovadus”, kila signifika di kuma baranda na tene 9 metru di altura. I parsi di kuma 20 kovadus kuruspundi ku largura di mura di templu. — w24.10, paẑina 31.
Ke ku signifika pa un servu ministerial sedu “maridu di un minjer son”? (1 Tim 3:12)
I signifika i dibi di kasa so ku un minjer, i ka dibi di fasi pekadu seksual. Tambi i ka dibi di mostra interesi romantiku pa utru minjeris. — w24.11, paẑina 19.
Pabia ku no pudi fala di kuma, ke ku Jesus fala na Jon 6:53 diferenti di ke ki fala na Sia di Siñor?
Jon 6:53 fala di nesesidadi di kume karni di Jesus i bibi si sangi. Jesus papia es palabras na 32 EK na Galileia, pa judeus ku pirsisa di tene fe nel. Ma, Sia di Siñor kumsa fasidu un anu dipus na Jerusalen. La Jesus papia ku kilis ku na rena na seu. — w24.12, paẑina 10 ku 11.