Ke ku no aprindi di milagri di pon ku Jesus fasi

1. Kal ki importansia di pon na tempus bibliku?

PON seduba un kusa importanti pa manga di jintis ku Biblia fala del. (Kum 14:18; Luk 4:4) Na bardadi, pon i importanti dimas tok utrora Biblia ta usa palabra “pon” pa fala di kumida. (Mat 6:11; At 20:​7, nota di studu) Jesus usa pon pa fasi dus milagris ku kunsidu diritu. (Mat 16:​9, 10) No pudi oja un des milagris na Jon kapitulu 6. Ora ku no na studa es milagri ku Jesus fasi, no na oja lisons ku no pudi aprindi.

2. Na kal mumentu ku manga di jintis pirsisaba di kumida?

² Dipus ku apostolus di Jesus kaba prega di un tabanka pa utru, Jesus leba elis pa utru ladu di Mar di Galileia pa e pudi diskansa. (Mar 6:​7, 30-32; Luk 9:10) E bai pa un zona isoladu pertu di Betsaida. Ma jintis obi di kuma Jesus staba la, i ka tarda manga di jintis bai pa jubil. Jesus ka dispresa elis. Ku bondadi, i toma tempu pa nsina elis aserka di Renu i kura kilis ku sta duenti. Oca ku ora na bai, disipulus punta kuma ku tudu ki jintis na oca di kume. Talves alguns tene un bokadu di kusa di kume, ma maioria pirsisaba di bai pa tabankas pa kumpra kumida. (Mat 14:15; Jon 6:​4, 5) Ke ku Jesus fasi?

JESUS FASI MILAGRI DI PON

3. Ke ku Jesus fala si apostolus pa fasi pa ki manga di jintis? (Jubi tambi diseñu .)

³ Jesus fala si apostolus: “I ka pirsis pa e bai. Bo da elis di kume.” (Mat 14:16) Es seduba un purblema pabia kuas 5 mil omis staba la. Si kontadu minjeris ku mininus, talves i tenba 15 mil jintis pa da di kume. (Mat 14:21) Andre fala: “I sta li un rapas ku tene sinku pon di sevada ku dus pis pikininu, ma ke ku es ciga pa e multidon di jinti?” (Jon 6:9) Pon ku ta fasidu ku sevada, seduba kumida ku koitadis i ku utrus ta kumeba, i talves pis pikininu salgaduba i sekadu. Ma, kil pon ku pis ku ki mininu teneba, ka na ciga pa ki manga di jintis!

4. Ke ku no pudi aprindi di Jon 6:​11-13? (Jubi tambi fotos.)

⁴ Pa pudi mostra bondadi pa ki manga di jintis, Jesus fala elis pa e sinta grupu grupu na paja. (Mar 6:​39, 40; Lei Jon 6:​11-13.) Dipus Jesus gardisi si Pape pa pon ku pis. Oca ki fasi es i mostra di kuma, Jeova i Algin ku ta da kumida. Atraves di si isemplu, Jesus lembrantadu importansia di ora antis di kume, i ka mporta si no sta anos so o si no sta ku jintis. Dipus Jesus da kumida pa ki manga di jintis, e kume i e farta. Te mesmu pon sobra, ma Jesus ka misti pa i botadu. Pa kila, e junta restu ku sobra, pa i pudi bin kumedu dipus. Jesus disanu isemplu na ke ku ta fala di ka gasta kusas. Si abo i pape o mame, pabia ku bu ka na studa es storias ku bu fijus, i bo papia di lisons aserka di orason, sedu algin ku ta risibi utrus, ku ta pati i sedu algin ku ka ta gasta kusas.

5. Ke ku jintis fasi dipus di oja kusas dimiradu ku Jesus fasi, ma ke ku Jesus fasi dipus?

⁵ Jintis fikaba dimiradu ku manera ku Jesus ta nsina, i ku milagris ki ta fasi. E sibiba di kuma Moisés fala di kuma Deus na manda un profeta garandi, pa kila, talves e pensaba di kuma Jesus ku seduba ki profeta. (Lei 18:​15-18) Si Jesus seduba es profeta, i na seduba un bon rei, talves i na pudiba da pon pa tudu jinti na Israel. Pa kila, ki manga di jintis mistiba “pegal pa fasil se rei.” (Jon 6:​14, 15) Si Jesus setaba pa fasil rei, i na mitiba boka na pulitika. Ke ku Jesus fasi? Biblia fala di kuma Jesus disidi “bai pa monti”. Mesmu manera ku utrus tenta obrigal, Jesus ka seta yentra na pulitika. Es i un bon lison pa nos!

6. Kuma ku no pudi mostra di kuma no sta na sigi isemplu di Jesus? (Jubi tambi diseñu.)

⁶ Na bardadi, jintis ka na pidinu pa no fasi milagri pa da elis kumida o pa kura jintis duenti, nin e ka na tenta fasinu rei o punu pa manda riba delis. Ma e pudi falanu pa no vota pa pudi yentra na pulitika, o falanu pa apoia un algin ke pensa di kuma i pudi minjoria kusas. Ma, isemplu ku Jesus disanu i klaru. I nega miti boka na asuntus pulitiku, te mesmu i bin fala sin: “Ña renu i ka di li.” (Jon 17:14; 18:36) Kristons aos ta kopia manera ku Jesus ta pensa i manera ki ta fasi kusas. No ta apoia es Renu, no ta prega aserka del, i no ta ora pa i bin. (Mat 6:10) No riba mas pa ki storia di milagri di pon ku Jesus fasi, pa oja ke mas ku no pudi aprindi.

SIGNIFIKADU DI “MILAGRI DI PON”

7. Ke ku Jesus fasi i kuma ku apostolus reaẑi, ma ke ke ka ntindiba? (Jon 6:​16-20)

⁷ Dipus di Jesus da manga di jintis di kume, i pui pa si apostolus disa ki zona i riba pa Kafarnaum na kanua. Dipus Jesus bai pa montaña pa ka jintis fasil rei. (Lei Jon 6:​16-20.) Oca ku apostolus staba na bai ku kanua, i tenba un turbada ku tisi bentu ku maron forti. Dipus Jesus bai pa relis i na yanda na yagu. I fala apostolu Pedru pa i yanda tambi na yagu. (Mat 14:​22-31) Oca ku Jesus yentraba so na kanua, bentu para. Disipulus fikaba dimiradu i e fala: “Na bardadi abo i Fiju di Deus.”a (Mat 14:33) I interesanti nota di kuma, disipulus fala es palabras dipus di Jesus yanda na yagu i ka dipus di fasi milagri di pon. Markus buri es palabras: ‘Disipulus fika dimiradu, pabia e ka ntindiba ki milagri di pon. Se kabesa staba ficadu.’ (Mar 6:​50-52) Disipulus ka ntindiba di kuma puder ku Jeova da Jesus i garandi dimas, i mas di ki so fasi milagri di pon. Logu dipus, Jesus papia mas di milagri di pon i nsinanu utru lison.

8-9. Pabia ku manga di jintis staba na buska Jesus? (Jon 6:​26, 27)

⁸ Manga di jintis ku Jesus daba di kume, staba so na pensa na fartanda se diseẑus ku nesesidadis fisiku. Pabia ku no pudi fala kila? Dia dipus, e nota di kuma Jesus ku si apostolus baiba ja. Pa kila, manga di jintis mbarka na barkus ku bin di Tiberíadis, e bai pa Kafarnaum pa buska Jesus. (Jon 6:​22-24) Sera ki e fasil so pabia di kuma e misti obi mas aserka di Renu? Nau. Ke ke mas mistiba i pa Jesus da elis di kume. Kuma ku no sibi kila?

⁹ Nota ke ku kontisi oca ku manga di jintis oja Jesus pertu di Kafarnaum. Jesus fala elis di kuma e bin buskal so pabia di kuma e mistiba kumida. Mesmu manera ke ‘kume pon tok e farta’, Jesus fala elis di kuma, e kume “kumida ku ta dana”. I fala elis di kuma e dibi di tarbaja pa kumida “ku ta fika pa vida ku ka ta kaba”. (Lei Jon 6:​26, 27.) Jesus fala elis di kuma si Pape na da es tipu di kumida. Oca jintis obi di kuma i ten kumida ku pudi da elis vida ku ka ta kaba, e fikaba dimiradu dimas! Es i kal kumida ku pudiba da elis vida ku ka ta kaba, i kuma ke pudiba tenel?

10. Ke ku jintis pirsisa di fasi pa pudi tene “vida ku ka ta kaba”?

¹⁰ Parsi di kuma, ki judeus mistiba sibi ke ke pirsisa di fasi pa tene es kumida. Talves e staba na pensa na kusas ku Lei di Moisés fala e dibi di fasi. Ma, Jesus fala elis: ‘Kusa ku Deus misti i pa bo fia na kil ki manda.’ (Jon 6:​28, 29) Pa tene “vida ku ka ta kaba” e pirsisaba di fia na kin ku Deus manda. Na bardadi, Jesus falaba ja des antis. (Jon 3:​16-18) Mas tardi, Jesus fala mas di ke ku no pirsisa di fasi pa pudi tene vida ku ka ta kaba. — Jon 17:3.

11. Kuma ku Judeus mostra di kuma, e staba na pensa so na tene kumida? (Salmu 78:​24, 25)

¹¹ E Judeus ka setaba di kuma e dibi di tene fe na Jesus. E puntal: “Kal sinal ku bu na fasi pa no pudi oja, pa no fia na bo?” (Jon 6:30) E fala di kuma jintis na tempu di Moisés, daduba maná ku seduba se kumida. (Ne 9:15; lei Salmu 78:​24, 25.) I seduba klaru di kuma, e staba na pensa so na kumida. Oca Jesus na papia di “pon di bardadi ku bin di seu” ku seduba diferenti di maná, i ku pudi da elis vida ku ka ta kaba, e ka puntal ke ki misti fala. (Jon 6:32) E staba so na pensa na se nesesidadis fisiku, tok e ka staba na sukuta ke ku Jesus staba na tenta nsina elis aserka di tene vida ku ka ta kaba. Ke ku no pudi aprindi di ke ku Jesus fala elis?

KE KU DIBI DI SEDU KUSA MAS IMPORTANTI PA NOS

12. Kuma ku Jesus mostra kal ki kusa mas importanti?

¹² I ten un lison importanti ku no pudi aprindi di Jon kapitulu 6. Obdisi Jeova i tene un bon amisadi ku el dibi di sedu mas importanti pa nos. Oca ki tentadu pa Satanas, Jesus mostraba di kuma obdisi Jeova i mas importanti di ki kumida. (Mat 4:​3, 4) Na diskursu ku Jesus fasi na montaña i mostra di kuma, i importanti pa no tene un bon amisadi ku Deus. (Mat 5:3) Pa kila, no dibi di punta no kabesa: ‘Sera ki manera ku N ta leba ña vida ta mostra di kuma, N mas ta preokupa ku ña amisadi ku Jeova di ki ña diseẑus fisiku?’

13. (a) Pabia ki ka mal kume? (b) Kal avisu ku Paulu danu? (1 Koríntius 10:​6, 7, 11)

¹³ I ka mal ora pa kusas ku no pirsisa del i tene es kusas. (Luk 11:3) Biblia fala di kuma, i bon pa un algin “kume, i bibi, i goza kusa ki ngaña ku si tarbaju”, kila “bin di mon di Deus”. (Ekl 2:24; 8:15; Tiagu 1:17) Ma, no dibi di toma kuidadu pa ka disa pa kusas material sedu kusas mas importanti na no vida. Apostolu Paulu fala des asuntu oca i skirbi pa kristons. I fala di mau kusas ku israelitas fasiba na disertu, nkluindu ke ke fasi pertu di Monti Sinai. I avisa kristons ‘pa ka e kubisa kusas mau suma israelitas.’ (Lei 1 Koríntius 10:​6, 7, 11.) Jeova fasi milagri pa da israelitas di kume. Ma pabia di se diseẑu forti, i pasa sedu “kubisa” pa relis. (Num 11:​4-6, 31-34) Oca e na adoraba turu nobu di uru, israelitas mostra di kuma e mas misti kume, bibi i pasa un bon tempu di ki obdisi Jeova. (Sai 32:​4-6) Paulu fala des isemplu pa avisa kristons ku staba na vivi pertu di tempu ku Jerusalen ku si templu, staba pa kabadu ku el na 70 EK. Anos tambi, no sta na vivi pertu di tempu ku es mundu na bin kabadu ku el. Pa kila, i importanti dimas pa no obi ke ku Paulu fala.

14. Ke ku Biblia fala aserka di kumida na nobu mundu?

¹⁴ Oca Jesus falanu pa ora pa “kumida ku no pirsisa del”, i nsinanu tambi pa no ora pa vontadi di Deus fasidu “na tera suma na seu.” (Mat 6:​9-11) Kuma ku mundu na bin sedu na ki tempu? Biblia mostra di kuma vontadi di Deus pa Tera nklui tene bon kumida. Isaias 25:​6-8 kontanu di kuma, bas di Guvernu di Jeova, i na ten manga di bon kumida pa jintis. Salmu 72:16 fala sin: “Pa i ten manga di trigu na tera riba di kabesa di montis.” Sera ki bu ka sta ku presa di kusña un pratu ku bu gosta ciu del, o kusña un kusa ku nunka bu ciga di kusña? Bu pudi tambi sta ku presa di sumia bu propi pe di uva i kume si fruta. (Isa 65:​21, 22) Kada algin na tera na tene es bon kusas.

15. Ke ku kilis ku na lantandadu na bin aprindi? (Jon 6:35)

¹⁵ Lei Jon 6:35. Pensa na ki jintis ku kume pon ku pis ku Jesus da elis. Bu pudi oja alguns delis na resureison ku na bin. Mesmu si e ka mostra fe na Jesus, e pudi lantandadu di mortu. (Jon 5:​28, 29) Ma, e ten di aprindi signifikadu des palabras di Jesus: “Kin ku bin pa mi, nunka mas i ka na bin tene fomi”. E pirsisa di tene fe di kuma, Jesus da si vida pa relis. Na ki tempu, kilis ku na bin lantandadu di mortu ku kualker mininu ku pudi bin padidu na nobu mundu, na aprindi bardadi aserka di Jeova ku si intenson. No na kontenti dimas di juda na nsina elis kusas interesanti! Juda utrus tene amisadi ku Jeova na danu manga di kontentamentu, mas di ki tudu bon kumida ku no na bin kume na nobu mundu.

16. Ke ku no na oja na studu ku na bin?

¹⁶ No oja un parti di ke ku faladu na Jon kapitulu 6, ma Jesus tene utru kusas pa nsina aserka di “vida ku ka ta kaba”. Judeus pirsisaba di obi diritu ke ku Jesus staba na fala, i anos tambi no pirsisa di fasi mesmu kusa. No na kontinua fala di Jon kapitulu 6 na studu ku na bin.