Ke ku bu pirsisa di fasi pa tene vida ku ka ta kaba?

1. Pabia ku manga di jintis ta pensa di kuma i ka pusivel vivi pa sempri?

MANGA di jintis ta kuida ku ke ke ta kume, e ta fasi ẑinastika sempri, pa pudi tene un bon saudi. Ma, e ka sibi di kuma fasi es kusas ka na tuji elis beju i muri. Talves e pensa di kuma i ka pusivel vivi pa sempri. Ma, Jesus fala di kuma pekaduris pudi tene “vida ku ka ta kaba”, suma ki sta na Jon 3:16 ku 5:24.

2. Ke ku Jon kapitulu 6 fala aserka di vida ku ka ta kaba? (Jon 6:​39, 40)

² Jesus fasiba milagri pa da pon ku pis pa manga di jintis.a E fika dimiradu ku kila, ma ke ku Jesus fala dia dipus, mas dimira elis inda. Manga di jintis bai si tras pa Kafarnaun, pertu di mar di Galileia, nunde ku Jesus fala elis di kuma, i na lantanda jintis ku muri i e na tene vida ku ka ta kaba. (Lei Jon 6:​39, 40.) Pensa na ke ku kila signifika pa bu amigus ku jintis di bu familia ku muri. Palabras di Jesus mostra di kuma, manga di kilis ku muri pudi lantandadu, i abo juntu ku kilis ku bu ama, bo pudi vivi pa sempri! Ma, ke ku Jesus fala na versikulus ku sta dianti na Jon kapitulu 6 sedu difisil pa manga di jintis ntindi. Ke ku Jesus fala?

3. Di akordu ku Jon 6:​51, ke ku Jesus fala aserka del?

³ Oca Jesus fasi milagri di pon pa alimenta manga di jintis, e pensa logu na maná ku Jeova da israelitas na disertu. Na bardadi, Biblia coma maná di kumida, o pon “di seu.” (Sal 105:40; Jon 6:31) Jesus fala di alguns kusas ku ki jintis sibi aserka di maná pa nsina elis un kusa importanti. Mesmu manera ku maná seduba un milagri ku bin di Deus, kilis ku kumel bin kaba pa muri. (Jon 6:49) Ma Jesus coma si kabesa di “pon di bardadi ku bin di seu”, “pon di Deus” ku “pon ku ta da vida”. (Jon 6:​32, 33, 35) Jesus fala di diferensa garandi ku ten entri el ku maná. I fala sin: ‘Ami i ki pon bibu ku ria na seu; si algin kume de pon li, i ta vivi pa sempri.’ (Lei Jon 6:51.) Ki judeus fikaba ŝokadu. Kuma ku Jesus pudiba fala di kuma i bin di seu suma “pon” ku mas minjor di ki maná ku Deus daba se papes? Jesus fala elis: ‘Pon ku N na da bos i ña karni’. Ke ki misti fala ku kila? I importanti pa no ntindi es, pabia resposta des purgunta na mostra di kuma, anos ku kilis ku no ama pudi tene vida ku ka ta kaba. No jubi ke ku Jesus misti fala.

PON DI VIDA KU SI KARNI

4. Pabia ku alguns fika ŝokadu ku ke ku Jesus fala?

⁴ Alguns ku staba na obi Jesus fikaba ŝokadu oca i fala elis di kuma, pon ke dibi di kume i si karni ki na da pa “jinti di mundu pudi tene vida.” Sera ki e staba na pensa di kuma i na da elis si karni propi pa e kume? (Jon 6:52) Ma ke ku Jesus fala elis dipus, ŝoka inda elis mas. I fala sin: ‘Si bo ka kume karni di Fiju di omi, bo ka bibi si sangi, bo ka ta tene vida na bos propi.’ — Jon 6:53.

5. Pabia ku no pudi tene sertesa di kuma, Jesus ka staba na fala pa jintis bibi si propi sangi?

⁵ Na tempu di Noe, Deus tujiba pekaduris pa e kume sangi. (Kum 9:​3, 4) Jeova ripiti es mesmu mandamentu oca i da si Lei pa nason di Israel. Kualker algin ku kume sangi “na tiradu na metadi di si pobu.” (Sir 7:27) Jesus nsina judeus pa e obdisi es Lei. (Mat 5:​17-19) Pa kila, i ka na ciga nunka di pidi judeus pa e kume si propi karni o bibi si propi sangi. Ku es palabras ku jintis ka kustuma obi, Jesus mistiba nsina jintis kuma ke pudi tene “vida ku ka ta kaba.” — Jon 6:54.

6. Kuma ku no sibi di kuma Jesus staba na usa un komparason, oca i na fala di kume si karni i bibi si sangi?

⁶ Ke ku Jesus mistiba fala? Na bardadi Jesus staba na usa un komparason, suma ki fasiba oca i fala minjer samaritanu asin: “Kin ku bibi yagu ku ami N na dal i ka ta torna tene sedi mas, pabia yagu ku N na dal i ta fasi nel fonti di yagu bibu ku ta darma pa vida ku ka ta kaba.” (Jon 4:​7, 14)b Jesus ka staba na fala minjer samaritanu di kuma, i na tene vida ku ka ta kaba si bibi so yagu. Di mesmu manera, Jesus ka staba na fala ki manga di jintis na Kafarnaun di kuma, e na vivi pa sempri si e kume si propi karni i bibi si propi sangi.

UTRU MUMENTU KU JESUS USA MESMU KOMPARASON

7. Ke ku alguns fala aserka di palabras di Jesus ku sta na Jon 6:53?

⁷ Alguns fala di kuma na Jon 6:​53, Jesus staba na splika ke ku jintis pirsisa di fasi na Sia di Siñor, pabia na ki mumentu Jesus usa mesmu palabras. (Mat 26:​26-28) E ta fala di kuma tudu kilis ku mati Sia di Siñor dibi di kume pon i bibi biñu ku ta pasadu na metadi di jintis. Sera ki i asin ki dibi di fasidu? I importanti pa no diskubri resposta des purgunta, pabia milyons di jintis na mundu ntidu ta junta ku nos nes dia spesial. No na nota di kuma ke ku Jesus fala na Jon 6:​53, diferenti ciu ku ke ki fala na Sia di Siñor.

8. Kal ki alguns diferensa ku ten entri es dus mumentus? (Jubi tambi diseñus.)

⁸ No na jubi dus diferensa ku ten entri es mumentus. Purmeru, kal mumentu i nunde ku Jesus fala palabras ku sta na Jon 6:​53-56? I fala es palabras na anu 32 EK na Galileia. Es seduba serka di un anu antis di i kumsa Sia di Siñor na Jerusalen. Sugundu, pa ba kin ku Jesus fala es palabras? I fala es palabras pa jintis ku staba mas interesadu na tene kumida, di ki aprindi aserka di Jeova o di Renu di Deus. (Jon 6:26) Na bardadi, oca Jesus fala un kusa ku seduba difisil pa e ntindi, e para logu fia nel. Te mesmu alguns di si disipulus para sigil. (Jon 6:​14, 36, 42, 60, 64, 66) Es jintis diferenti ciu ku 11 apostolus fiel ku staba ku Jesus serka di un anu mas tardi na 33 EK na Sia di Siñor. Nes mumentu, 11 apostolus fiel di Jesus ku staba ku el ka ntindi diritu ke ki i staba na nsina elis. Ma, diferenti di maioria di kilis ku staba na Galileia, si apostolus fiel staba konvensidu di kuma, Jesus sedu Fiju di Deus ku bin di seu. (Mat 16:16) I ngaba elis asin: “Abos i kilis ku fika sempri juntu ku mi na tudu ña probason.” (Luk 22:28) Es dus diferensas ta mostra di kuma, na Jon 6:53 Jesus ka staba na splika ke ku na kontisi na Sia di Siñor. Ma i ten inda manga di diferensa entri es dus mumentus.

KE KU PALABRAS DI JESUS SIGNIFIKA PA BO

9. Ke ku Jesus fala na Sia di Siñor ta aplika pa ba kin?

⁹ Na Sia di Siñor, Jesus da si apostolus pon sin fermentu i fala elis di kuma, i na representa si kurpu. Dipus, i da elis biñu i fala kila na representa ‘sangi di kontratu’. (Mar 14:​22-25; Luk 22:20; 1 Kor 11:24) Ke ki fala aserka di kontratu i importanti dimas. Es nobu kontratu i entri Jeova ku ‘pobu di Israel spiritual’, ku sedu, so kilis ku na rena ku Jesus “na renu di Deus”. (Eb 8:​6, 10; 9:15) Na ki tempu apostolus ka ntindi tudu aserka des kontratu, ma i ka na tarda e na unjidu ku spiritu santu i fasi parti di nobu kontratu pa sta juntu ku Jesus na seu. — Jon 14:​2, 3.

10. Kal ki utru diferensa ku ten entri ke ku Jesus fala na Sia di Siñor ku ke ki fala na Galileia? (Jubi tambi foto.)

¹⁰ Ke ku Jesus fala na Sia di Siñor, i pa “karnelsiñus”. Purmeru jintis ku fasi parti des grupusiñu i si apostolus fiel ku staba na ki sala. (Luk 12:32) Elis ku utrus ku na bin fasi parti di ki grupu, ku dibi di kume pon i bibi biñu. I elis ku na sta juntu ku Jesus na seu. Es i utru diferensa ku ten entri ke ku Jesus fala si apostolus na Sia di Siñor ku ke ki falaba na Galileia. Ke ku Jesus fala na Sia di Siñor i so pa un grupusiñu di jintis. Ma ke ki fala na Galileia i pa manga di jintis.

11. Ke ku Jesus fala na Galileia ku ta mostra di kuma i ka staba na fala di un grupusiñu di jintis?

¹¹ Maioria di jintis ku Jesus staba na papia kel na Galileia, mistiba so pa i da elis di kume. Ma, Jesus tenta splika elis di kuma, i ten kusa mas importanti di ki kumida. Es kusa pudi juda elis tene vida ku ka ta kaba. Te mesmu Jesus fala di kuma, kilis ku muri pudi bin lantandadu na ultimu dia i tene vida ku ka ta kaba. Na Jon kapitulu 6 i ka staba na fala di bensons ku un grupusiñu di jintis na bin tene, suma ku mas tardi i fasi na Sia di Siñor. Ma, na Galileia Jesus papia di benson di vida ku ka ta kaba ku tudu jintis pudi tene. E ku manda i fala sin: ‘Si algin kume de pon li, i ta vivi pa sempri. Pon ku N na da bos i ña karni ku N na da pa jinti di mundu pudi tene vida.’ — Jon 6:51.c

12. Ke ku no pirsisa di fasi pa pudi tene bensons ku Jesus fala del?

¹² Sera ki Jesus misti fala di kuma kualker algin ku ciga di vivi o ku na bin padidu na tene vida ku ka ta kaba? Nau. So kilis ku ‘kume es pon’, ku sedu, kilis ku tene fe na Jesus ku na tene vida ku ka ta kaba. Manga di kilis ku ta fala kuma e sedu kriston ta pensa di kuma e na sedu salvu si e “fia na [Jesus]”, i ojal suma se salbadur. (Jon 6:29) Ma, i pirsis mas di ki es. Na kumsada manga di kilis ku staba na Galileia fiaba na Jesus, ma dipus e bin bandonal. Pabia?

13. Ke ku na bardadi signifika mostra fe?

¹³ Maioria di jintis ta sigiba Jesus, so pabia i da elis ke ke misti. E mistiba sedu kuradu di manera milagrosu, kume sin paga nada, o obi nsinus ke mistiba obi. Ma, Jesus mostra elis kuma na bardadi pa sedu si disipulu i pirsis fasi mas. I ka bin pa Tera so pa da jintis ke ke misti. Ma i bin pa nsina elis ke ke pirsisa di fasi pa sedu si sigiduris di bardadi. E pirsisa di ‘bai’ pa rel ora ke sukuta i obdisi tudu si nsinus. — Jon 5:40; 6:44.

14. Ke ku no pirsisa di fasi pa benefisia di kurpu ku sangi di Jesus?

¹⁴ Jesus splika elis di kuma manera ki da si kurpu ku si sangi, i na torna pusivel pa e tene vida ku ka ta kaba. E pirsisa di mostra fe nes bardadi. I importanti pa Judeus teneba es fe, asin tambi ki importanti aos pa no tenel. (Jon 6:40) Pa kila, ke ku Jesus fala na Jon 6:​53, signifika di kuma no pirsisa di mostra fe na resgati pa pudi tene vida ku ka ta kaba. Es bensons sta dispunivel pa tudu kilis ku misti tenel. — Ef 1:7.

15-16. Kal kusas importanti ku no aprindi na Jon kapitulu 6?

¹⁵ Na Jon kapitulu 6 no aprindi manga di kusas importanti i ku sedu nkoraẑanti pa nos tudu. No aprindi di kuma Jesus ta preokupa ciu ku jintis. Oca ki staba na Galileia i kura duentis, i nsina jintis aserka di Renu di Deus, tambi i da elis kumida oca ke pirsisa del. (Luk 9:11; Jon 6:​2, 11, 12) Mas importanti, i nsina elis aserka di “pon ku ta da vida.” — Jon 6:​35, 48.

¹⁶ Kilis ku Jesus coma di “utru karnel” ka ta kume pon i bibi biñu na Sia di Siñor ku ta fasidu kada anu, i nin e ka dibi di fasil. (Jon 10:16) Ma, e ta benefisia di kurpu ku sangi di Jesus Kristu. E ta fasi es ora ke mostra fe na sakrifisiu di Jesus, i na manga di bon kusas ku no pudi tene pabia di resgati. (Jon 6:53) Ma, kilis ku ta kume pon i bibi biñu ta mostra di kuma e fasi parti di nobu kontratu, i e tene speransa di rena na Renu di Deus. Pa kila, ke ku faladu na Jon kapitulu 6 i importanti dimas pa unjidus i pa utrus karnelis. I ta nsinanu di kuma anos tudu no dibi di tene fe forti na resgati, pa pudi tene vida ku ka ta kaba.