STUDU 2
KANTIKU 132 Nós Somos Um
Kuma ku omis pudi mostra amor ku rispitu pa se minjer
“Abos omis, . . . bo rispita elis.” — 1 PED 3:7.
KE KU NO NA BIN APRINDI
Kuma ku un omi ta mostra amor ku rispitu pa si minjer pa ke ki ta papia i fasi.
1. Kal ki un di motivus ku pui Jeova danu prenda di kasamenti?
JEOVA i ‘Deus filis’, tambi i misti pa no sedu filis. (1 Tim 1:11) I danu manga di prendas pa judanu sedu filis na vida. (Tiagu 1:17) Un des prendas i kasamenti. Ora ku un omi ku un minjer kasa, e ta purmiti ama i rispita n̈utru. Ora ku un omi ku si minjer manti se amor forti pa n̈utru, e ta tene filisidadi di bardadi. — Dit 5:18.
2. Kuma ku manga di omis ta trata se minjeris aos?
2 Infilismenti, manga di omis ku minjeris ka kontinua ama i rispita n̈utru, suma ke purmitiba na dia di se kasamenti. Pabia di kila, e ka ta sedu filis. Un relatoriu ku ka tarda, ku fasidu pa Organizason Mundial di Saudi fala di kuma, manga di omis ta suta se minjeris, e ta koba elis mal o maltrata elis di utru manera. Un omi ku ta fasi es, pudi trata si minjer ku rispitu dianti di utrus, ma i ta maltratal ora ke sta elis dus. Manga di omis ta jubi pornografia.a Kila ta pui pa minjer sinti di kuma i ka amadu, tambi i ta pul pa i fika tristi.
3. Pabia ku alguns omis ta maltrata se minjeris?
3 Pabia ku alguns omis ta maltrata se minjeris? Talves se pape ta maltrata se mame, pa kila, e pudi pensa di kuma i ka mal pa e maltrata se minjeris. Utru omis ta maltrata se minjeris, pabia i kila ku maioria di omis ta fasi na se kultura. Es omis ta pensa di kuma “omi di bardadi” dibi di usa forsa, pa mostra si minjer di kuma i el ku na manda. Utru omis ka nsinadu kontrola se emosons, suma pur isemplu, kontrola se raiba. I ten omis ku ta jubi sempri pornografia, i kila ta leba elis pensa di kuma, minjeris ta sta la so pa satisfasi se diseẑus seksual. Tambi, manga di spesialistas diskubri di kuma, duranti duensa di COVID-19, manga di omis kumsa ku maltrata se minjeris. Ma, nin un des kusas ka dibi di leba un omi na maltrata si minjer.
4. Ke ku omis dibi di toma kuidadu ku el, i pabia di ke?
4 Omis ku ta sirbi Jeova, dibi di kuida pa ka disa pa mau manera ku mundu ta trata minjeris, leba elis na trata minjeris mal.b Pabia? Un motivu i di kuma, manera ku un algin ta pensa, ta lebal na aẑi di un sertu manera. Apostolu Paulu avisa kristons unjidu di Roma pa e para “fasi suma ku mundu na fasi”. (Rom 12:1, 2) Oca ku Paulu skirbi pa relis, kilis ku staba na kongregason, seduba kristons pa manga di anus. Ma, palabras di Paulu mostra di kuma alguns na kongregason kontinua inda na sedu influensiadu, pa kustumis ku pensamentus di mundu. E ku manda i konsija elis pa e muda se manera di pensa ku se komportamentu. Sin duvida, es konsiju ta aplika pa omis ku ta sirbi Jeova aos. Infilismenti, alguns delis disa sedu influensiadu pa pensamentu di mundu, i te mesmu e ta maltrata se minjeris.c Kuma ku Jeova misti pa un omi trata si minjer? No pudi oja resposta na testu di nunde ku tema des studu tiradu.
5. Di akordu ku 1 Pedru 3:7, kuma ku un omi dibi di trata si minjer?
5 Lei 1 Pedru 3:7. Jeova fala pa omis rispita se minjeris. Un omi ku rispita si minjer ta tratal ku bondadi i ku amor. Nes studu, no na oja kuma un omi pudi mostra rispitu pa si minjer. Ma purmeru, no na fala di komportamentu ku ta mostra falta di amor ku falta di rispitu pa minjeris.
KA BU FASI NADA KU NA MOSTRA FALTA DI RISPITU PA BU MINJER
6. Kuma ku Jeova ta oja un omi ku ta suta si minjer? (Kolosensis 3:19)
6 Un omi ka dibi di suta si minjer. Jeova odia tudu algin ku sedu violentu. (Sal 11:5) Jeova odia prinsipalmenti omis ku ta maltrata se minjeris. (Mal 2:16; lei Kolosensis 3:19.) Di akordu ku testu nunde ku tema di no studu tiradu, ku sedu, 1 Pedru 3:7, si un omi ka ta trata si minjer diritu, kila na dana si amisadi ku Deus. Te mesmu Jeova pudi ka sukuta si orasons.
7. Di akordu ku Efésius 4:31, 32, kal tipu di kombersa ku omis dibi di ivita? (Jubi tambi “Palabra ku Splikadu.”)
7 Un omi ka dibi di koba si minjer mal. I ten omis ku ta papia ku raiba kontra se minjeris i papia kusas ku ta de elis mal. Ma Jeova odia “brabesa, ku raiba, ku gritaria, ku koba”.d (Lei Efésius 4:31, 32.) Jeova ta obi tudu kusas. I ta preokupa ku manera ku un omi ta papia ku si minjer, mesmu si e sta elis so. Un omi ku ta papia duru ku si minjer ka ta dana so si kasamenti, ma tambi i ta dana si amisadi ku Deus. — Tiagu 1:26.
8. Kuma ku Jeova ta nkara pornografia, i pabia di ke?
8 Un omi ka dibi di jubi pornografia. Kuma ku Jeova ta nkara pornografia? I odial. Pa kila, un omi ku ta jubi fotos ku ta mostra partis intimu di un algin, i ta dana si amisadi ku Jeova i mostra falta di rispitu pa si minjer.e Jeova misti pa un omi kontinua sedu fiel pa si minjer. Un omi fiel ka na fasi nunka pekadu seksual ku utru minjer. Nunka i ka na ciga di pensa fasil! Jesus fala di kuma, un omi ku ta jubi pa un minjer ku mau pensamentu, i kai ja cai ku el “na si korson.”f — Mat 5:28, 29.
9. Pabia ku Jeova odia, ora ku un omi ta forsija si minjer fasi un kusa ku na nkomoda si konsiensia, ora ke na tene relason seksual?
9 Omi ka dibi di forsija si minjer fasi un kusa ku na nkomoda si konsiensia, ora ke na tene relason seksual. I ten omis ku ta forsija se minjeris pa e fasi seksu di un manera ku na fasil sinti di kuma i abusadu del, o ku na nkomoda se konsiensia. Jeova odia es tipu di komportamentu iguista i sin sentimentu. Jeova misti pa un omi ama si minjer, pa i tratal ku bondadi i pa i rispita si konsiensia. (Ef 5:28, 29) Ke gora si un omi ku ta sirbi Jeova, ta fasi un kusa ku ta nkomoda konsiensia di si minjer, o i ta jubi pornografia? Kuma ki pudi muda si manera di pensa ku si komportamentu?
KUMA KU UN OMI PUDI KABA KU MAU KOMPORTAMENTU
10. Kuma ku isemplu di Jesus pudi juda omis?
10 Ke ku pudi juda un omi pa i para maltrata si minjer, i ivita komportamentu ku na nkomoda si konsiensia? I pudi sforsa pa kopia isemplu di Jesus. Mesmu ku Jesus ka ciga di kasa, manera ki ta trata si disipulus i un bon isemplu di kuma ku un omi dibi di trata si minjer. (Ef 5:25) Pur isemplu, jubi ke ku omis pudi aprindi di manera ku Jesus ta trata si apostolus i papia ku elis.
11. Kuma ku Jesus ta trata si apostolus?
11 Jesus ta trata si apostolus ku bondadi i ku rispitu. Nunka i sedu duru ku elis. Mesmu manera ki sedu se Siñor i Mestri, i ka ta usa si puder pa fasi elis sinti di kuma, i mas elis o pa e tene medu del. Ma, i ta sirbi elis ku umildadi. (Jon 13:12-17) I fala si disipulus: “Bo nsina di mi, pabia ami i mansu, umildi di korson; bo ta bin oca diskansu pa bo alma”. (Mat 11:28-30) Nota di kuma Jesus seduba mansu. Un algin mansu i ka un algin fraku. Ma, i un algin ku tene forsa pa pudi kontrola si kabesa. Ora ki provokadu, i ta kontinua sta kalmu i kontrola si sentimentus.
12. Kuma ku Jesus ta papia ku utrus?
12 Jesus ta usa palabras ku ta anima i nkoraẑa utrus. I ka ta papiaba duru ku si sigiduris. (Luk 8:47, 48) Mesmu oca si inimigus kobal, “i ka torna”. (1 Ped 2:21-23) Te mesmu utrora, Jesus ta disidi kala, en ves di ruspundi di manera duru. (Mat 27:12-14) Es i un bon isemplu pa omis ku ta sirbi Jeova!
13. Suma ki faladu na Mateus 19:4-6, kuma ku omi ta “junta ku si minjer”? (Jubi tambi foto.)
13 Jesus fala pa omis kontinua sedu fiel pa se minjer. I ripiti ke ku si Pape fala, kuma un omi dibi di “junta ku si minjer.” (Lei Mateus 19:4-6.) Verbu Gregu ku usadu nes versikulu pa “junta ku” signifika “kola.” Asin, amor entri un omi ku un minjer dibi di sedu forti dimas, suma si e kola juntu. Si un delis fasi un kusa ku na dana se kasamenti, elis tudu dus e ta sufri. Un omi ku tene es tipu di amor forti pa si minjer, ka na jubi nin un tipu di pornografia. I na vira si rostu rapidu, pa ka “jubi-jubi kusa ku ka bali”. (Sal 119:37) Suma Jo, i na sta disididu pa ka jubi nin un minjer ku mau diseẑu. — Jo 31:1.
Un omi fiel ta nega jubi pornografia. (Jubi paragrafu 13)h
14. Kal kusas ku un omi ku ta maltrata si minjer dibi di fasi, pa torna tene amisadi ku Jeova i ku si minjer?
14 Un omi ku ta suta i ku ta koba si minjer mal, pirsisa di fasi utru kusas pa torna tene amisadi ku Jeova i ku si minjer. Ke ki i dibi di fasi? Purmeru: I dibi di rikuñisi di kuma ke ki sta na fasi i mal. Jeova ta oja tudu ke ki ta fasi, tambi i ta obi tudu ke ki ta papia. (Sal 44:21; Ekl 12:14; Eb 4:13) Sugundu: I dibi di para maltrata si minjer i muda si komportamentu. (Dit 28:13) Terseru: I dibi di mostra si minjer ku Jeova di kuma i ripindi pa ke ki fasi, i pidi pa e purdal. (At 3:19) Tambi i dibi di pidi Jeova pa i judal tene vontadi di muda i pa i konsigi pensa, papia i aẑi di un manera ku na kontental. (Sal 51:10-12; 2 Kor 10:5; Fil 2:13) Kuartu: I dibi di aẑi di akordu ku si orasons i fasi tudu ki pudi, pa odia tudu tipu di violensia ku koba mal. (Sal 97:10) Kintu: I dibi di buska logu ajuda di ansions na kongregason. (Tiagu 5:14-16) Sestu: I dibi di fasi un planu ku na judal pa ka ripiti fasi es mau kusas. Un omi ku ta jubi pornografia, dibi di fasi tambi es seis kusas ku faladu del. Jeova na dal ajuda ki pirsisa del, pa muda si komportamentu. (Sal 37:5) Ma es i ka sufisienti pa un omi para fasi kusas ku na pui pa si minjer fika mal. I pirsisa tambi di aprindi mostra rispitu pa si minjer. Kuma ki pudi fasil?
KUMA KU BU PUDI MOSTRA AMOR KU RISPITU PA BU MINJER
15. Kuma ku un omi pudi mostra amor pa si minjer?
15 Mostra amor. Alguns ermons ku tene kasamenti filis kustuma fasi un kusa kada dia, pa mostra se minjeris di kuma e ama elis ciu. (1 Jon 3:18) Un omi pudi mostra amor pa si minjer na kusas pikininu, suma pegal mon o barsal. I pudi mandal mensaẑen i falal, “N na sinti bu falta” o puntal, “kuma ku bu sta?” Di un tempu pa utru, i pudi patil floris o un prenda pa mostra di kuma i amal. Ora ku un omi ta fasi es kusas, i ta mostra amor pa si minjer i torna se kasamenti forti.
16. Pabia ku un omi dibi di ngaba si minjer?
16 Falal di kuma i tene balur pa bo. Un omi ku ama i rispita si minjer, ta fasil sinti ben, tambi i ta nkoraẑal. Un manera di fasil, i ora ki ta gardisil pa tudu ke ki ta fasi pa judal. (Kol 3:15) Ora ku un omi ta ngaba si minjer, kila ta toka si korson. I ta sinti suguru, amadu i rispitadu. — Dit 31:28.
17. Kuma ku un omi ta mostra di kuma i rispita si minjer?
17 Mostra bondadi ku rispitu. Un omi ku ama si minjer ta dal balur i rispital. I ta ojal suma un prenda bonitu ku bin di Jeova. (Dit 18:22; 31:10) Pa kila, i ta tratal ku bondadi i ku rispitu, te mesmu ora ki na tene relason seksual ku el. I ka na forsijal fasi kualker kusa ku na pul pa i fika nkomodadu, i sinti di kuma i abusadu o ku na nkomoda si konsiensia, ora ke na tene relason seksual.g Omi tambi dibi di sforsa pa kontinua tene un konsiensia limpu dianti di Jeova. — At 24:16.
18. Ke ku omis dibi di sta disididu pa fasi? (Jubi tambi kuadru “Kuatru maneras ku un omi ta mostra rispitu.”)
18 Jeova ta kontenti ora ki oja bu na sforsa ciu, pa ama i rispita bu minjer na tudu ke ku bu ta papia i fasi. Sta disididu pa mostra amor ku rispitu pa rel, ora ku bu ivita fasi kualker kusa ku na pul pa i sinti mal, tambi ora ku bu ta mostral bondadi. Si bu fasil, bu ta mostra di kuma bu amal i bu dal balur. Mostra amor ku rispitu pa bu minjer, asin bu na proteẑi amisadi mas importanti, ku sedu, bu amisadi ku Jeova. — Sal 25:14.
KANTIKU 131 O Que Jeová Uniu
a Palabra “pornografia” ta trata di videos ku ta mostra seksu, fotos, testus ku audios ku fasidu pa aumenta diseẑu seksual na jintis.
b I na sedu bon si omis lei artigu, “Sera ki bu ta trata minjeris suma ku Jeova ta trata elis?” na Sintinela di Janeru di 2024.
c Si bu ta maltratadu pa bu parseru, i na sedu di ajuda si bu lei artigu, “Ajuda para vítimas de violência doméstica”. Na jw.org skirbi “violência doméstica” na kau di piskisa. Na aplikativu JW Library® toka na parti “Biblioteca” dipus toka na “Séries de artigos” i pa fin bai pa “Mais Assuntos”.
d PALABRA KU SPLIKADU: “Koba” nklui coma algin nomi di gozu i ku na fasil sinti mal. Tambi i nklui sempri nfati un algin. Pa kila, kualker kusa ku un omi fala pa firi o nsulta si minjer, i koba.
e Jubi artigu, “A pornografia pode destruir o seu casamento” na jw.org ku JW Library® na parti, Ajuda Para a Família.
f Artigu “Ke ku bu pudi fasi ora ku bu parseru ta jubi pornografia?” na Sintinela di Agustu di 2023, pudi juda un minjer ku si omi ta jubi pornografia.
g Biblia ka fala di manera izatu kal tipu di relason seksual entri un omi ku minjer, ku dibi di ojadu suma bon o mau. Un kasal ku ta sirbi Jeova, dibi di toma se propi disison ku na mostra di kuma, e misti kontenta Jeova, kontenta n̈utru i kontinua tene un konsiensia limpu. Normalmenti, un kasal ka na papia ku utrus aserka des asuntu intimu di se kasamenti.
h SPLIKASON DI FOTO: Un ermon sta na si kau di tarbaju, i si kolegas di tarbaju ku ka sedu Tustumuñas di Jeova, sta na tenta pul pa i jubi rivista ku tene pornografia.