Bo ngaba Jeova

1. Ke ku manga di jintis mas ta preokupa ku el aos?

SERA ki bu nota di kuma manga di jintis aos, mas ta preokupa ku se kabesa di ki preokupa ku utrus? Pur isemplu, alguns jintis ta usa redi sosial pa ngaba se kabesa o pa mostra kusas ke fasi. Ma, puku jintis aos ku ta ngaba Jeova Deus. Nes studu, no na oja ke ku da gloria pa Jeova signifika, i pabia ku no dibi di fasil. No na aprindi tambi kuma no pudi da Deus gloria ki mersi, i kuma ki na bin glorifika si nomi na futuru.

KE KU SIGNIFIKA DA JEOVA GLORIA?

2. Kuma ku Jeova mostra si gloria na Monti Sinai? (Jubi tambi diseñu .)

² Ke ki gloria? Na Biblia, palabra “gloria” signifika kualker kusa ku na fasi pa un algin sedu dimiradu pa utrus. Puku dias dipus ku Jeova liberta nason di Israel di Ejitu, i mostra elis kuma i sedu un Deus garandi. Imaẑina es: Milyons di israelitas junta pertu di Monti Sinai pa obi ke ku Deus na fala elis. Un nuven sukuru kubri montaña. Di repenti, fumu toma konta di montaña. Con tirmi ku forsa, i tenba tambi relampagu, turbada ku son altu di korneta. (Sai 19:​16-18; 24:17; Sal 68:8) Oca ku Jeova fasi es kusas, israelitas dibi di fikaba dimiradu ku puder garandi ku Jeova tene.

3. Ke ku signifika da Jeova gloria?

³ Ma ke gora di anos pekaduris? Sera ki no pudi da Jeova gloria? Sin no pudi. Un manera ku no pudi da Jeova gloria, i ora ku no konta utrus aserka di si puder garandi, ku si bon maneras di sedu. No ta glorifika tambi Jeova ora ku no ngabal pa kusas ku no konsigi fasi pabia di si ajuda. (Isa 26:12) Rei Davi seduba bon isemplu di un algin ku ta da gloria pa Jeova. Na un orason ki fasi dianti di kongregason di Israel, i fala sin: “Abo, SIÑOR, i garandi; bu ten puder ku rispitu ku vitoria; abo i Rei gloriosu. Tudu ku sta na seu ku tera i di bo.” Oca Davi kaba fasi orason, tudu povu “ngaba SIÑOR Deus”. — 1 Kron 29:​11, 20.

4. Kuma ku Jesus da gloria pa Jeova?

⁴ Oca Jesus staba na Tera, i da gloria pa Jeova manera ki fasi jintis sibi di kuma, i Jeova ku dal puder di fasi milagris. (Mar 5:​18-20) Jesus da tambi gloria pa Jeova, pabia i ta papiaba ku jintis aserka di si Pape i na manera ki ta trataba jintis. Un bias, Jesus staba na nsina na kasa di juntamentu. Entri elis i staba la un minjer ku dimonius ta kansa duranti 18 anu. Dimonius kansal tok i ta yandaba kurvadu, i ka pudiba distindi kurpu diritu. I seduba difisil pa rel! Jesus sinti pena di minjer, i pertusi del i papia ku el ku bondadi i falal: “Minjer, bu sta libri di bu duensa.” I distindi mon i tokal, i na ki ora si kurpu sta retu i minjer “ngaba Deus”. I kontenti dimas manera ku Jeova judal rekupera si saudi! (Luk 13:​10-13) Ki minjer teneba bon motivu di ngaba Jeova, i anos tambi.

PABIA KU NO DIBI DI DA GLORIA PA JEOVA?

5. Kal motivus ku no tene pa rispita Jeova?

⁵ No ta da Jeova gloria pabia no tene rispitu garandi pa rel. I ten manga di motivus ku pui no rispita Jeova. Jeova ku ten tudu puder, si puder ka tene limiti. (Sal 96:​4-7) Si jiresa garandi ta ojadu na kusas ki kumpu. El ku danu vida ku tudu ke ku no pirsisa del pa kontinua vivi. (Apok 4:11) El i fiel. (2 Sam 22:26) Tudu ke ki fasi ta sai ben, i ta kumpri sempri ke ki purmiti. (Jos 23:14) E ku manda profeta Jeremias fala sin aserka di Jeova: “I ka ten ningin suma bo na metadi di tudu jirus di nasons, o na tudu se renus”! (Jer 10:​6, 7) Na bardadi, no tene manga di motivus di rispita no Pape ku sta na seu. Ma Jeova ka mersi so no rispitu, i mersi tambi pa no amal.

6. Pabia ku no ama Jeova?

⁶ No ta da Jeova gloria pabia no amal ciu. No ama Jeova pabia di si maneras di sedu bonitu. I ta sinti miserikordia ku pena. (Sal 103:13; Isa 49:15) Jeova ta sinti pa nos, ora ku no na sufri. (Zak 2:8) I ta judanu pa no kunsil i pa no sedu si amigu. (Sal 25:14; At 17:27) I sedu tambi umildi, “i ta mpina pa jubi ke ku na pasa na seu ku na tera. I ta lantanda koitadi na con”. (Sal 113:​6, 7) Pabia di tudu es motivus, kin ku ka na misti da gloria pa no Deus garandi? — Sal 86:12.

7. Kal oportunidadi spesial ku no tene?

⁷ No ta da Jeova gloria pabia no misti pa utrus kunsil. Manga di jintis ka kunsi bardadi aserka di Jeova. Pabia? Pabia Satanas konta manga di mintidas aserka di Jeova, i jintis fia na ki mintidas. (2 Kor 4:4) Satanas konvensi jintis di kuma Jeova i Deus ku ta paña raiba, ku ka ta preokupa ku nos i el ku pui mundu na sufrimentu. Ma anos no kunsi bardadi aserka di no Deus! No tene oportunidadi di konta elis kal tipu di Deus ki sedu, i juda elis pa e ngabal tambi. (Isa 43:10) Salmu 96 fala di da gloria pa Jeova. Nes Salmu no na aprindi kuma ku no pudi da Jeova gloria ki mersi.

KUMA KU NO PUDI DA JEOVA GLORIA KI MERSI?

8. Kal ki un di maneras ku no pudi da gloria pa Jeova? (Salmu 96:​1-3)

⁸ Lei Salmu 96:​1-3. No pudi da gloria pa Jeova pa ke ku no ta fala del. Es versikulus fala pa no ‘kanta pa Jeova’ pa no “fala ben di si nomi,” pa no “konta di si salbason” i pa no “diklara si gloria na metadi di nasons.” Es tudu i maneras ku no pudi da gloria pa no Pape ku sta na seu, ku no palabras. Servus di Jeova di tempu antigu ta staba ku vontadi garandi di konta utrus, tudu bon kusas ku Jeova fasi pa relis, tambi e ta difindi si nomi. (Dan 3:​16-18; At 4:29) Kuma ku no pudi fasi mesmu kusa?

9-10. Ke ku bu aprindi di spiriensia di Angelena? (Jubi tambi foto.)

⁹ No jubi spiriensia di un irma comadu Angelenaa ku sta na Stadus Unidu. I difindi nomi di Jeova ku koraẑen na si kau di tarbaju. Suma i kumsa tarbaja na ki nobu kau, Angelena kumbidadu pa un runion juntu ku utrus ku kumsa tambi tarbaja la. Na ki runion, elis tudu e tene oportunidadi di konta kin ke sedu. Angelena purpara alguns fotos ku na mostra filisidadi ki tene di sedu Tustumuña di Jeova. Ma antis di si ora di papia ciga, si kolega di tarbaju fala kuma i kriadu suma Tustumuña di Jeova. I kumsa ku goza kusas ku no fia nel. Angelena fala: “N pantaba mal. Ma N punta ña kabesa: ‘Sera ki N na disa pa un algin konta mintida aserka di Jeova? O N na difindi si nomi?’”

¹⁰ Oca ku si kolega kaba papia, Angelena fasi un orason rapidu na sintidu. Dipus i papia ku si kolega ku bondadi, i falal: “Ami tambi N kriadu suma Tustumuña di Jeova, ma N kontinua sedu el te aos.” Mesmu manera ku situason staba kinti, Angelena kontinua kalmu. I mostra si kolegas fotos ki tira ku si amigus ku sta na sirbi Jeova juntu ku el ku kontentamentu, dipus ku rispitu, i splika elis ke ki fia nel. (1 Ped 3:15) Kal ku sedu rusultadu? Oca Angelena kaba papia, ki omi manti kalmu. Te mesmu i fala di bon lembransas ki tene ocalba joven, i oca i ta staba juntu ku Tustumuñas di Jeova. Angelena fala sin: “Jeova mersi difindidu. I un privileẑiu konta bardadi aserka del.” Anos tambi, no tene oportunidadi garandi di ngaba nomi di Jeova, ora ku utrus mostra falta di rispitu pa rel.

11. Kuma ku adoraduris di bardadi di tempu pasadu, sigi ke ku faladu na Salmu 96:8?

¹¹ Lei Salmu 96:8. No pudi da gloria pa Jeova ku kusas di balur ku no tene. Adoraduris di bardadi sempri ta ngaba Jeova des manera. (Dit 3:9) Pur isemplu, israelitas ta daba diñeru ku kusas di balur pa juda na kumpu templu i kuida del. (2 Re 12:​4, 5; 1 Kron 29:​3-9) Alguns disipulus di Jesus ta judalba ku si apostolus ku kusas ke teneba. (Luk 8:​1-3) Biblia fala di kuma oca alguns kristons sufri pabia di fomi, se ermons ku irmas ku staba na utru lugaris manda elis diñeru. (At 11:​27-29) Aos tambi, no ta da gloria pa Jeova ora ku no fasi ofertas di tudu korson.

12. Kuma ku no ofertas ta da gloria pa Jeova? (Jubi tambi foto.)

¹² No jubi un spiriensia ku na mostra kuma ku no ofertas ta da gloria pa Jeova. Na 2020 Zimbabue sufriba di sekura pa manga di tempu. Mas di 1 milyon di jintis staba na pirigu di muri pabia di fomi garandi, nkluindu un irma di nomi Prisca. Situason seduba difisil dimas, ma Prisca kontinua prega kada kuarta-fera ku sesta-fera, mesmu na tempu di labur. Si visiñus ta gozalba manera ki ta baiba prega, en ves di bai labra. E ta falal sin: “Bu na muri di fomi.” Prisca ta ruspundi ku konfiansa: “Jeova nunka bandona si servus.” Puku tempu dipus, i risibi ajuda umanitariu di no organizason. Prisca risibi es ajuda pabia di ofertas ku no ta da. Visiñus di Prisca fika dimiradu i e falal: “Deus nunka bandonau, no misti sibi mas aserka del.” Seti di si visiñus kumsa ku mati runions di kongregason.

13. Kuma ku no komportamentu pudi da gloria pa Jeova? (Salmu 96:9)

¹³ Lei Salmu 96:9. No pudi da gloria pa Jeova atraves di no komportamentu. Saserdotis ku ta sirbiba Jeova na tabernakulu i mas tardi na templu, pirsisaba di laba pa sta limpu. (Sai 40:​30-32) Anos tambi no pirsisa di sta limpu, i ka so na no kurpu, ma tambi ivita fasi kualker kusa ku Jeova odia. (Sal 24:​3, 4; 1 Ped 1:​15, 16) Biblia fala kuma no dibi di tira “naturesa beju” i bisti “naturesa nobu”. Es signifika di kuma, no dibi di sforsa pa ivita mau pensamentu ku mau komportamentu ku ka ta kontenta Jeova. En ves di kila, no ta aprindi pensa i aẑi di un manera ku na mostra di kuma, no sta na kopia Jeova ku si maneras di sedu bonitu. (Kol 3:​9, 10) Ku ajuda di Jeova, mesmu kilis ku ta fasi kusas mau dimas pudi muda i bisti naturesa nobu.

14. Ke ku no pudi aprindi di spiriensia di Jack? (Jubi tambi foto.)

¹⁴ No jubi spiriensia di Jack ku seduba un algin violentu i pirigosu, tok jintis ta comalba di Dimoniu. Pabia di krimis ki fasi, Jack kondenadu pa mortu. Ma oca i na peraba pa matadu, Jack kumsa studa Biblia ku un ermon ku ta visitaba ki prison. Mesmu manera ku Jack fasi manga di maus kusas, i fasi mudansa garandi i ku tempu i batisa suma Tustumuña di Jeova. Jack muda ciu tok na dia ki na matadu, alguns guardas di prison cora, oca i na dispidi elis. Un tropa ku ta tarbaja na prison fala sin: “Jack seduba pior prisoneru nes kau. Ma gosi, el i un di minjoris prisoneru.” Semana dipus ku Jack matadu, ermons ku riba pa fasi runion di semana na prison, kontra ku un prisoneru ku mati runion pa purmeru bias. Ke ku manda i disidi mati runion? I fika dimiradu manera ku Jack muda di komportamentu, i misti sibi ke ki dibi di fasi pa adora Jeova. Sin duvida, no komportamentu ta da gloria pa no Pape ku sta na seu! — 1 Ped 2:12.

KUMA KU JEOVA NA BIN GLORIFIKA SI NOMI NA FUTURU?

15. Kuma ku Jeova na bin glorifika si nomi di manera kompletu na futuru? (Salmu 96:​10-13)

¹⁵ Lei Salmu 96:​10-13. Ultimus versikulu di Salmu 96 mostra di kuma, Jeova i Juis justu, tambi i sedu Rei. Kuma ku Jeova na bin glorifika si nomi na futuru? I na fasil atraves di si julgamentus. I ka na tarda Jeova na kaba ku Garandi Babilonia, pabia riliẑions falsu ta fasi manga di kusas mau i e ta konta mintida aserka del. (Apok 17:​5, 16; 19:​1, 2) Alguns ku na bin oja Garandi Babilonia kabadu ku el, pudi disidi adora Jeova juntu ku nos. Pa fin, na Armajedon, Jeova na kaba ku mundu di Satanas, i ku tudu kilis ku sta kontra el i ku ta konta mintida aserka del. Ma i na salba tudu kilis ku amal, ku ta obdisil i ku misti ngabal. (Mar 8:38; 2 Tes 1:​6-10) Ora ku Renansa di Mil Anu di Kristu kaba i na bin testi final. Dipus di kila, Jeova na bin limpa si nomi di manera kompletu. (Apok 20:​7-10) Na ki tempu, “mundu na inci ku kunsimentu di gloria di SIÑOR suma yagu ta kubri mar.” — Aba 2:14.

16. Ke ku bu sta disididu pa fasi? (Jubi tambi diseñu.)

¹⁶ I na sedu interesanti dimas oja tempu, nunde ku tudu jintis na bin da Jeova gloria ki mersi! Ma nkuantu ki dia ka ciga, no fasi tudu ku no pudi pa papia aserka di no Deus, i aẑi di un manera ku na kontental. Pa judanu oja importansia di da Jeova gloria, Korpu Guvernanti kuji Salmu 96:8 suma testu di anu pa 2025: Bo ngaba gloria di nomi di Jeova.