Pabia ku nomi di Jeova i importanti pa nos?

1-2. Kuma ku no sibi di kuma nomi di Jeova i importanti pa Jesus?

NOMI di Jeova i kusa mas importanti pa Jesus. El i algin ku mas difindi nomi di si Pape, di ki kualker utru algin. Na studu ku pasa no aprindi di kuma, Jesus staba dispostu pa muri pa mostra di kuma Jeova, i santu i si manera di fasi kusas i sertu. (Mar 14:36; Eb 10:​7-9) Tambi dipus di Renansa di Mil Anu, Jesus na sta dispostu pa ntrega Guvernu pa si Pape, pa pudi santifika si nomi. (1 Kor 15:​26-28) Amor ku Jesus tene pa nomi di Deus ta mostra tambi kal tipu di amisadi ki tene ku si Pape. Es ta mostra di kuma Jesus ama Jeova ciu.

² Jesus bin Tera pa papia na nomi di Jeova. (Jon 5:43; 12:13) I fasi pa si sigiduris kunsi nomi di si Pape. (Jon 17:​6, 26) I nsina na nomi di Jeova, tambi i fasi milagris nes nomi. (Jon 10:25) Jesus tambi pidi pa Jeova jubi si disipulus pabia di ‘puder di si nomi’. (Jon 17:11) Na bardadi, nomi di Deus seduba mas importanti pa Jesus di ki kualker utru kusa. Pa kila, kuma ku un algin pudi fala di kuma i ta sigi Jesus, si i ka kunsi nomi di Jeova o i ka ta usal?

3. Ke ku no na bin fala del nes studu?

³ Suma no sedu kristons di bardadi, no ta kopia isemplu di Jesus pa manera ku no ta mostra amor ku rispitu pa nomi di Jeova. (1 Ped 2:21) Nes studu, no na oja pabia ku Jeova da si nomi pa kilis ku ta konta “Bon Noba di renu”. (Mat 24:14) No na papia tambi di kal ki importansia ku nomi di Jeova dibi di tene pa kada un di nos.

‘UN POBU PA SI NOMI’

4. (a) Ke ku Jesus fala si disipulus antis di riba pa seu? (b) Kal purgunta ku kila ta lebanu fasi?

⁴ Puku tempu antis di Jesus riba pa seu, i fala si disipulus asin: ‘Bo na risibi puder di spiritu santu ku na bin riba di bos. Bo na sedu ña tustumuñas na Jerusalen, ku tudu Judeia, ku Samaria, te na lugar mas lunju di mundu.’ (At 1:8) Pa kila, bon noba na pregadu na tudu ladu, i ka so na Israel. Ku tempu, jintis na mundu ntidu na tene oportunidadi di sedu disipulus di Jesus. (Mat 28:​19, 20) Nota di kuma Jesus fala: ‘Bo na sedu ña tustumuñas.’ Sera ki kilis ku kumsa sedu disipulus pirsisa di kunsi nomi di Jeova o e na sedu so tustumuñas di Jesus? Ke ku faladu na Atus kapitulu 15 pudi judanu oja resposta des purgunta.

5. Kuma ku apostolus ku ansions na Jerusalen mostra di kuma tudu jintis pirsisa di kunsi nomi di Jeova? (Jubi tambi diseñu.)

⁵ Na anu 49 EK, apostolus ku ansions na Jerusalen fasi runion pa jubi si kontra kilis ku ka sedu judeu, pirsisa di botadu fanadu pa e pudi sedu kristons. Na fin di runion, Tiagu, ermon di Jesus na ladu di mame, fala sin: ‘Pedru konta kuma, purmeru, Deus visita jintius pa tira na se metadi un pobu pa si nomi.’ Kal nomi ku Tiagu staba na fala del? I usa palabras di profeta Amos oca i fala sin: ‘Pa jinti di utru nasons buska Siñor, tudu jintius ku N coma ña nomi riba delis. Asin ku Siñor fala.’ (At 15:​14-18) Kilis ku kumsa sedu disipulus ka na aprindi so aserka di Jeova, ma tambi e na ‘comadu pa si nomi.’ Es signifika di kuma, e na pui pa utrus kunsi nomi di Deus, tambi e na kunsidu suma jintis ku ta representa ki nomi.

6-7. (a) Pabia ku Jesus binba pa Tera? (b) Kal ki utru motivu mas importanti ku pui Jesus binba pa Tera?

⁶ Nomi di Jesus signifika “Jeova i Salvason”, i Jeova usa Jesus pa salva tudu jintis ku tene fe nel i na si Fiju. Jesus binba pa Tera pa da si vida pa pekaduris. (Mat 20:28) Manera ki paga resgati, i pui pa pekaduris purdadu se pekadus i tene vida ku ka ta kaba. — Jon 3:16.

⁷ Pabia ku pekaduris pirsisa di salvadu? Pabia di ke ku kontisi na jardin di Eden. Suma ki faladu na studu ku pasa, no purmeru papes, Adon ku Eva, rebela kontra Jeova i asin e pirdi oportunidadi di vivi pa sempri. Pabia di kila no yarda pekadu ku mortu. (Kum 3:​6, 24) Ma, Jesus binba pa Tera pa fasi un kusa ku mas importanti di ki salva pekaduris. Lembra kuma, Satanas difama nomi di Jeova. (Kum 3:​4, 5) Pa kila, salvason di fijus di Adon ku Eva staba ligadu ku un asuntu mas importanti, ku sedu, santifikason di nomi di Jeova. Jesus seduba minjor algin pa santifika nomi di Jeova, pabia i represental, tambi i fasi tudu kusas ku Jeova misti pa i fasi di manera perfeitu.

8. Ke ku tudu kilis ku ta sigi Jesus pirsisa di ntindi?

⁸ Tudu sigiduris di Jesus, judeus ku kilis ku ka sedu judeus pirsisa di ntindi di kuma, se salvason dipindi di Pape di Jesus, ku sedu Jeova Deus. (Jon 17:3) Suma Jesus, e na tene tambi nomi di Jeova. Elis tambi e na pirsisa di ntindi importansia di santifika ki nomi. Se salvason dipindi di kila. (At 2:​21, 22) Pa kila, tudu sigiduris fiel di Jesus, pirsisa di aprindi aserka di Jeova ku Jesus. E ku manda na ultimus palabras di si orason ku sta na Jon 17, Jesus fala sin: ‘Ami N pui elis kunsiu; N na fasi elis kunsiu mas, pa bu amor ku bu aman ku el sta nelis, ami tambi pa N sta nelis.’ — Jon 17:26.

“BO SEDU ÑA TUSTUMUÑAS”

9. Si no misti sigi Jesus, ke ku dibi di sedu mas importanti pa nos?

⁹ Pa ke ku no oja te li, i klaru di kuma pa pudi sigi Jesus, no dibi di santifika nomi di Jeova. (Mat 6:​9, 10) Nomi di Jeova dibi di sedu mas importanti di ki kualker utru nomi. No pirsisa di mostra kila pa ke ku no ta fasi. Ma ke ku no pudi fasi pa santifika nomi di Jeova, i mostra di kuma ke ku Satanas fala aserka di Jeova i mintida?

10. Ke ku Isaias kapitulu 42 te 44 fala? (Isaias 43:9; 44:​7-9) (Jubi tambi diseñus ku fotos.)

¹⁰ Isaias kapitulu 42 te 44 fala di ke ku no pudi fasi pa santifika nomi di Jeova. Nes kapitulus, Jeova fala jintis ku ka ta adoral pa e prova di kuma se deusis i di bardadi. Suma na un tribunal, i pidi si i ten kualker tustumuñu ku pudi prova kila. Ma i ka ten nin un son! — Lei Isaias 43:9; 44:​7-9.

11. Ke ku Jeova fala si povu na Isaias 43:​10-12?

¹¹ Lei Isaias 43:​10-12. Jeova fala asin pa si povu: “Abos bo sedu ña tustumuñas . . . Ami i Deus.” Jeova fala elis pa e ruspundi es purgunta: “Nta i ten utru Deus fora di mi?” (Isa 44:8) Anos tambi no tene privileẑiu di ruspundi es purgunta. Atraves di no palabras ku asons, no ta mostra di kuma Jeova i uniku Deus di bardadi, i di kuma si nomi sta riba di tudu utru nomis. Manera ku no ta leba no vida ta mostra di kuma, no ama Jeova i no sedu fiel pa rel, mesmu manera ku Satanas ta tisinu purblemas. Asin, no ta tene oportunidadi di juda na santifika nomi di Jeova.

12. Kuma ku profesia ku sta na Isaias 40:​3, 5 kumpri?

¹² Isaias fala tambi di kuma, un algin na ‘purpara kamiñu pa Jeova’. (Isa 40:3) Kuma ku es kumpri? Jon Batista purparaba kamiñu pa Jesus, ma na bardadi i seduba kamiñu di Jeova, pabia Jesus binba na nomi di Jeova, tambi i papia na si nomi. (Mat 3:3; Mar 1:​2-4; Luk 3:​3-6) Mesmu profesia fala sin: ‘Gloria di Jeova na bin manifesta.’ (Isa 40:5) Kuma ku kila kumpriba? Oca Jesus binba pa Tera, i representaba Jeova di manera perfeitu, i suma si i propi Jeova ku binba pa Tera. — Jon 12:45.

13. Kuma ku no pudi kopia Jesus?

¹³ Ora ku no difindi nomi di Jeova no ta sta na kopia Jesus Kristu. Suma Jesus, anos tambi i tustumuñas di Jeova. No ta difindi nomi di Jeova, tambi no ta konta tudu jintis ku no kontra ku el kusas bonitu ki ta fasi. Ma pa fasi es tarbaju diritu, no dibi di pui tambi pa jintis sibi tudu kusas ku Jesus fasi pa santifika nomi di Jeova. (At 1:8) I ka ten algin ku da tustumuñu aserka di Jeova mas minjor di ki Jesus, i no ta kopia si isemplu. (Apok 1:5) Ma di kal utru maneras ku no ta mostra di kuma, nomi di Jeova i importanti pa kada un di nos?

UTRU MANERAS KU NO TA MOSTRA DI KUMA, NOMI DI JEOVA I IMPORTANTI PA NOS

14. Suma ki faladu na Salmu 105:​3, kuma ku no ta sinti ku nomi di Jeova?

¹⁴ No kontenti dimas ku nomi di Jeova. (Lei Salmu 105:3.) Jeova ta kontenti dimas ora ku no ka burguñu leba si nomi. (Jer 9:​23, 24; 1 Kor 1:31; 2 Kor 10:17) “Njata” na nomi di Jeova signifika sta kontenti di tenel suma no Deus. No ta kontenti dimas di konta utrus di kuma Jeova i santu, i tudu kusa ki ta fasi i justu. No ka dibi di burguñu konta no kolegas di tarbaju, kolegas di turma, visiñus ku utrus di kuma, anos i Tustumuñas di Jeova! Diabu misti pa no para papia ku utrus aserka di nomi di Jeova. (Jer 11:21; Apok 12:17) Satanas ku kilis ku ta spalia mintida ki ta konta, misti pa jintis diskisi nomi di Jeova. (Jer 23:​26, 27) Ma amor ku no tene pa nomi di Jeova ta pui pa no kontental “tudu dia”. — Sal 5:11; 89:16.

15. Ke ku signifika coma nomi di Jeova?

¹⁵ No kontinua coma nomi di Jeova. (Joel 2:32; Rom 10:​13, 14) Coma nomi di Jeova i mas di ki so kunsi si nomi i usal. I nklui sibi di kuma Jeova i Deus ku tene sentimentus, maneras di sedu, i no pudi tene amisadi ku el. No aprindi konfia nel, buska si ajuda ku si orientason. (Sal 20:7; 99:6; 116:4; 145:18) No ta konta tambi utrus si nomi ku si maneras di sedu, no ta motiva elis pa e ripindi i pa e fasi kusas ku na kontenta Jeova. — Isa 12:4; At 2:​21, 38.

16. Kuma ku no pudi mostra di kuma Satanas i munturus?

¹⁶ No sta dispostu pa sufri pabia di nomi di Jeova. (Tiagu 5:​10, 11) Ora ku no kontinua fiel pa Jeova mesmu ora ku no na sufri, no ta mostra di kuma Satanas i munturus. Na tempu di Jo, Satanas fasi es akusason kontra kilis ku ta sirbi Jeova: “Omi ta da tudu ki tene pa guarda si vida.” (Jo 2:4) Satanas akusa pekaduris di kuma, e ta sirbi Jeova so ora ku kusas na bai ben ku elis. Ma si e pasa purblemas difisil e na bandona Jeova. Jo ku seduba un omi fiel, mostra di kuma ke ku Satanas fala i mintida. Anos tambi, no tene oportunidadi di mostra di kuma i ka mporta ke ku Satanas fasi, nunka no ka na bandona Jeova. No pudi tene sertesa di kuma Jeova na kuida di nos pabia di si nomi. — Jon 17:11.

17. Kal ki utru manera ku no pudi ngaba nomi di Jeova, suma ki faladu na 1 Pedru 2:12?

¹⁷ No fasi tudu ku no pudi pa rispita nomi di Jeova. (Dit 30:9; Jer 7:​8-11) Suma no ta representa Jeova i leba si nomi, no pudi ngaba o tisi borgoña pa si nomi. (Lei 1 Pedru 2:12.) Ma, no misti fasi tudu ku no pudi pa no palabras ku no komportamentu ngaba Jeova. Ora ku no fasi kila, mesmu manera ku no sedu imperfeitu, no na pui pa nomi di Jeova ngabadu.

18. Kal ki utru manera ku no pudi mostra di kuma nomi di Jeova i importanti pa nos? (Jubi tambi nota.)

¹⁸ No ngaba nomi di Jeova i ka mporta ke ku jintis ta pensa di nos. (Sal 138:2) Pabia ku fasi es i importanti dimas? Pabia ora ku no fasi kusas pa kontenta Jeova, manga di bias, jintis pudi ka gosta di kila, i fala mau kusas kontra nos.a Jesus staba pruntu pa muri un mortu di borgoña suma kriminosu, pa pudi ngaba nomi di Jeova. I “dispreza borgoña” pabia i ka staba preokupadu ku ke ku utrus ta pensaba del. (Eb 12:​2-4) I konsentraba na fasi vontadi di Deus. — Mat 26:39.

19. Kuma ku bu ta sinti aserka di nomi di Jeova, i pabia di ke?

¹⁹ No tene orgulyu di nomi di Jeova i no ta sinti di kuma, i un privileẑiu comadu Tustumuñas di Jeova. No sta dispostu pa lida ku kualker purblema ku no pudi pasa pabia di kila. Nomi di Jeova i mas importanti di ki no propi nomi. Pa kila, no sta disididu pa kontinua ngaba nomi di Jeova i ka mporta ke ku Satanas pudi fasi kontra nos. Des manera, no na mostra di kuma nomi di Jeova i mas importanti pa nos di ki kualker kusa, suma ki seduba pa Jesus Kristu.