Toma disisons ku na kontenta Jeova

1. Kal kusa difisil ku anos tudu no dibi di fasi?

NO PIRSISA di toma disisons tudu dia. Alguns disisons ta sedu fasil di toma, suma ke ku no na kume na matabicu, o kal ora ku no na durmi. Utrus ta sedu mas difisil pa toma. Es disisons pudi afeta no saudi, no alegria, no familia ku no adorason pa Jeova. No misti pa no disisons judanu i juda no familia. Mas importanti, no misti pa no disisons kontenta Jeova. — Rom 12:​1, 2.

2. Ke ku bu pudi fasi pa toma bon disisons?

² Bu na pudi toma bon disison (1) si bu buska tene tudu informasons, (2) si bu pensa na kuma ku Jeova ta oja ki asuntu, i (3) si bu pensa diritu na diferentis pusibilidadi. Nes studu, no na fala des tris kusas ku no dibi di fasi. Tambi i na judanu oja kuma ku no pudi trena no kapasidadi di sibi diferensia ben ku mal. — Dit 2:11.

BUSKA TENE TUDU INFORMASONS

3. Da isemplu di pabia ku bu pirsisa di buska tudu informasons antis di toma un disison.

³ Purmeru kusa ku bu dibi di fasi pa pudi toma un bon disison, i pa buska tene tudu informasons. Pabia kes i importanti? Imaẑina kuma un algin bai konsulta un mediku, pabia i tene un purblema gravi di saudi. Sera ki mediku na pasal reseita sin konsultal purmeru o fasil purguntas? I ka na fasi kila. Abo tambi bu na toma bon disisons si purmeru, bu pensa diritu na tudu informasons ku da ku bu situason. Kuma ku bu pudi fasil?

4. Di akordu ku Ditus 18:​13, ke ku bu pudi fasi pa tene sertesa di kuma, bu tene tudu informasons? (Jubi tambi fotos.)

⁴ Bu pudi tene tudu informasons, ora ku bu fasi purguntas. Imaẑina di kuma bu kumbidadu pa un jumbai. Sera ki bu dibi di bai? Si bu ka sibi kin ku kumbida jintis o kuma ku kusas organizadu, bu na pirsisa di fasi ki algin ku kumbidau es purguntas: “Nunde ku jumbai na fasidu, i kal ora ki na fasidu? Kantu jintis ku na sta la? Kin ku na kuida pa tudu kusas kuri diritu? Kal jintis ku na sta la? Kal kusas ku programadu pa jintis fasi? Sera ki i na ten bibidas alkoliku?” Respostas pa es purguntas na judau toma un bon disison. — Lei Ditus 18:13.

5. Ke ku bu dibi di fasi dipus di tene tudu informasons?

⁵ Dipus di bu tene tudu informasons, pensa diritu na tudu ke ku pudi kontisi. Pur isemplu, ke ku bu na fasi si bu sibi di kuma, kilis ku ka ta obdisi normas di Jeova na sta na jumbai, o i na ten manga di bibidas alkoliku sin kontrolu? Sera ki bu pensa di kuma es jumbai pudi bin torna na un festa sin kontrolu? (1 Ped 4:3) O ke ku bu dibi di fasi, si bai es jumbai, na pui pa bu falta runion di kongregason o ka bai pregason? Ora ku bu pensa na tudu es kusas, i na sedu mas fasil toma un bon disison. Ma i ten tambi utru kusa ku bu dibi di fasi. Gosi, bu sibi ke ku bu pensa di ki situason. Ma kuma gora ku Jeova ta ojal? — Dit 2:6.

PENSA NA KUMA KU JEOVA TA OJA KI ASUNTU

6. Di akordu ku Tiagu 1:​5, pabia ku no dibi di ora Jeova pa pidi ajuda?

⁶ Pidi Jeova pa i judau ntindi ke ki ta pensa di ki asuntu. Jeova purmiti danu jiresa pa sibi si un disison na kontental. I ta da es jiresa “ku vontadi; i ka ta nfastia.” — Lei Tiagu 1:5.

7. Kuma ku bu pudi sibi ke ku Jeova ta pensa aserka di un asuntu? Bu pudi da un isemplu.

⁷ Ora ku bu pidi Jeova orientason, sta atentu ku resposta ki na da. Pur isemplu: Si bu na bai bias i bu pirdi, bu pudi punta un algin ku mora na ki zona. Ma, sera ki bu na bai antis di ruspundiu? Bu ka na fasi kila. Bu na sukuta diritu orientason ki na da. Di mesmu manera, dipus di pidi Jeova jiresa, tenta diskubri si resposta ora ku bu buska leis ku prinsipius di Biblia ku na da ku bu situason. Pur isemplu, ora ku bu na disidi si bu dibi di mati jumbai ku faladuba del, bu pudi jubi ke ku Biblia fala aserka di festas ku ka ta tene kontrolu, mau kumpañerasku ku nesesidadi di konsentra na Renu, en ves di konsentra na ke ku no misti fasi. — Mat 6:33; Rom 13:13; 1 Kor 15:33.

8. Ke ku bu pudi fasi si bu pirsisa di ajuda, pa oja informason ku bu na buska? (Jubi tambi foto.)

⁸ Utrora, bu pudi pirsisa di ajuda, pa oja informason ku bu na buska. Bu pudi risibi konsiju di un ermon o irma maduru. Ma, i na sedu bon tambi pa bu fasi bu propi piskisa. No feramentas di studu, suma Gia di Piskisa pa Tustumuñas di Jeova ku Vida Cristã – Textos Bíblicos Úteis, tene manga di informasons ku pudi judau. Lembra di kuma bu objetivu i di toma un disison ku na kontenta Jeova.

9. Kuma ku no pudi tene sertesa di kuma, disison ku no toma na kontenta Jeova? (Efésius 5:17)

⁹ Kuma ku no pudi tene sertesa di kuma, disison ku no toma na kontenta Jeova? Purmeru, no pirsisa di kunsil diritu. Biblia fala sin: “Si bu kunsi ki Algin Puru, bu ten ntindimentu.” (Dit 9:10) No ta tene ntindimentu di bardadi, ora ku no kunsi maneras di sedu di Jeova, si intenson, ke ki gosta del, o ke ki odia. Punta bu kabesa: ‘Ku tudu ke ku N sibi aserka di Jeova, kal disison ku N pudi toma ku na kontental?’ — Lei Efésius 5:17.

10. Pabia ku prinsipius di Biblia i mas importanti di ki tradison di familia o di kultura di no tera?

¹⁰ Pa kontenta Jeova, no dibi di fasi un kusa ku utrora ka na kontenta no familia o amigus. Alguns papes ku tene bon intenson, pudi nsisti pa se fiju femia kasa ku un omi ku tene diñeru, o ku pudi paga elis un doti garandi, mesmu si ki omi ka sedu forti na sintidu spiritual. I normal pa papes misti pa se fiju femia tene un bon vida. Ma, sera ki es omi na judal tene un amisadi forti ku Jeova? Kuma ku Jeova ta oja es asuntu? No pudi oja resposta na Mateus 6:33. La, Jesus fala kristons pa e kontinua “buska renu” suma kusa mas importanti na se vida. Mesmu manera ku no ta rispita no papes i rispita jintis di zona ku no mora, kusa mas importanti, i pa no kontenta Jeova.

PENSA DIRITU NA DIFERENTIS PUSIBILIDADI

11. Ke ku faladu del na Ebreus 5:14 ku na judau pensa diritu na diferentis pusibilidadi?

¹¹ Ora ku bu oja prinsipius di Biblia ku pudi judau toma un disison, bu pirsisa di pensa diritu na diferentis pusibilidadi ku bu tene. (Lei Ebreus 5:14.) Sibi diferensia ben ku mal, na judau imaẑina ke ku pudi kontisi ku kada pusibilidadi ku bu tene. Utrora, i ten disison ki fasil toma. Ma, i ka tudu disisons ku sedu simplis. Sibi diferensia ben ku mal na judau toma bon disisons, mesmu na situasons difisil dimas.

12-13. Kuma ku sibi diferensia ben ku mal, pudi judau toma bon disison aserka di tarbaju?

¹² Imaẑina es situason: Bu sta na buska un tarbaju pa sustenta bu familia. Bu oca dus tarbaju. Bu pensa na tudu informasons, suma tipu di tarbaju, orariu, tempu ku bu na gasta pa ciga kau di tarbaju, i asin pa dianti. Tudu ki dus tarbaju ka sta kontra prinsipius di Biblia. Talves bu na pirfiri un di ki tarbaju, pabia di tipu di tarbaju ku bu na fasi, o pabia bu mas na pagadu diñeru. Ma, i ten utrus kusas ku bu dibi di pensa nel antis di toma un disison.

¹³ Pur isemplu, sera ki es dus tarbaju na tujiu mati alguns runions di kongregason? Sera ki es dus tarbaju na robau tempu ku bu pirsisa del pa juda bu familia sinti suguru, sedu filis i pertusi di Jeova? Fasi es purguntas na judau “kuji kusa mas bon”, ku sedu, bu adorason ku nesesidadis di bu familia, en ves di buska tene mas diñeru. (Fil 1:10) Dipus, bu pudi toma un disison ku Jeova na bensua.

14. Kuma ku sibi diferensia ben ku mal i mostra amor, ta judanu ivita pui utrus papia mal kontra nos?

¹⁴ Tambi, sibi diferensia ben ku mal na lebanu pensa na kuma ku no disison pudi afeta utrus jintis, asin no pudi ivita pa e ka “kai.” (1 Kor 10:32) Es i importanti ora ku no na toma disisons na asuntus suma, ke ku no na bisti ku no aparensia. Pur isemplu, no pudi pirfiri un sertu stilu di ropa o manera di kumpu-kumpu. Ma ke ku no dibi di fasi, si utrus fora o dentru di kongregason fika mal ku kila? Sibi diferensia ben ku mal na judanu rispita se sentimentus. Amor na lebanu buska interesi “di utru” i bisti di bon manera. (1 Kor 10:​23, 24; 1 Tim 2:​9, 10) Dipus no na toma un disison ku na mostra no amor ku rispitu pa utrus.

15. Ke ku bu dibi di pensa nel antis di toma un disison importanti?

¹⁵ Si bu na toma un disison importanti dimas, pensa na ke ku bu pirsisa di fasi pa pudi toma ki disison. Jesus falanu pa no ‘fasi konta di kil ki no na gasta.’ (Luk 14:28) Pa kila, jubi kuantidadi di tempu, diñeru ku sforsu ku bu pirsisa di fasi pa bu disison sai ben. Na alguns situasons, bu pudi papia ku bu familia pa kada kin sibi ke ki pirsisa di fasi, pa disison ku bu na toma pudi sai ben. Pabia ku es tipu di planu i importanti? Es pudi judau nota di kuma bu disison pirsisa di alguns mudansas o i ten utru pusibilidadi mas minjor. Tambi ora ku bu papia ku bu familia i sukuta se opinion, e na sta mas dispostu di judau pa disison pudi sai ben. — Dit 15:22.

TOMA UN DISISON KU NA SAI BEN

16. Kal kusas ku bu pirsisa di fasi pa un disison sai ben? (Jubi tambi kuadru “Kuma ku bu pudi toma bon disisons.”)

¹⁶ Si bu fasi tudu kusas ku faladu del, bu na sta pruntu pa toma un bon disison. Bu tene ja informasons, tambi bu jubi prinsipius di Biblia ku na judau toma disison ku na kontenta Jeova. Gosi bu pudi pidi Jeova ajuda, pa bu disison sai ben.

17. Kal kusa importanti ku pudi judau toma bon disisons?

¹⁷ Mesmu si bu tomaba manga di bon disisons na pasadu, lembra di kuma kusa mas importanti pa toma bon disisons, i ka pa bu konfia na bu jiresa o spiriensia, ma i pa bu konfia na jiresa di Jeova. I pudi dau kunsimentu di bardadi, ntindimentu ku kapasidadi di sibi diferensia ben ku mal. Esis tudu i partis importanti di jiresa. (Dit 2:​1-5) Jeova pudi judau toma disisons ku na kontental. — Sal 23:​2, 3.