Kuma ku bu ta benefisia di purdon di Jeova?

1. Ke ku pudi kontisi ora ku un amigu falau, “N purdau”?

IMAẐINA kuma bu papia o fasi un kusa ku pui bu amigu sinti mal. Ma dipus, bu pidil pa i purdau. El i falau: “N purdau”. Kuma ku bu na sinti ora ku bu obi es palabras? Bu na sinti ben, suma si un kargu pisadu tiradu di bu kosta. Ma sera ki bo amisadi na sedu suma antis? O gosi, i na sedu diferenti?

2. Kuma ku purdon di Jeova faladu del na Biblia? (Jubi tambi nota bas di paẑina.)

² Manera ku Jeova ta purdanu, diferenti ciu di kuma ku no ta purda n̈utru. Ningin ka pudi purda suma Jeova. Salmista fala sin aserka di Jeova: “Purdon di bardadi sta ku bo, pa bu pudi rispitadu.”a (Sal 130:​4, Tradução do Novo Mundo da Bíblia Sagrada.) Purdon di Jeova i “purdon di bardadi.” El i algin ku ta mostranu ke na bardadi ku signifika purda. Na alguns versikulus di Skrituras Ebraiku, skirbiduris di Biblia usa un palabra pa fala di purdon di Jeova, ku nunka e usa pa fala di purdon di pekaduris.

3. Kuma ku purdon di Jeova i diferenti ku di nos? (Isaias 55:​6, 7)

³ Ora ku Jeova purda un algin, pekadu di kil algin ta pagadu di manera kompletu. Si dunu pudi tene mas un bon amisadi ku Jeova. No ta kontenti dimas, manera ku Jeova ta purdanu di manera kompletu i manga di bias. — Lei Isaias 55:​6, 7.

4. Kuma ku Jeova ta judanu ntindi ke ku signifika purdon di bardadi?

⁴ Suma purdon di Jeova diferenti ku di nos, kuma ku anos pekaduris no pudi ntindi ke ku signifika purdon di bardadi? Jeova usa komparasons bonitu pa judanu ntindi kuma ki ta purdanu. Nes studu, no na bin fala di alguns des komparasons. I na judanu oja di kuma ora ku no ripindi, Jeova ta paga no pekadus i asin pirmitinu sedu mas si amigus intimu. Ora ku no na jubi es komparasons, no na aumenta no amor pa no bon Pape, ku ta purdanu di manga di maneras.

JEOVA TA LEBA NO PEKADUS

5. Ke ku ta kontisi ora ku Jeova purda no pekadus?

⁵ Manga di bias, Biblia kompara pekadus ku kargus pisadu. Rei Davi fala sin aserka di si pekadus: “Ña kulpa kai riba di ña kebesa suma kargu pisadu dimas pa N pudi nguental.” (Sal 38:4) Ma Jeova ta purda pekadus di kilis ku ripindi. (Sal 25:18; 32:5) Palabra ebraiku ku traduzidu pa “purda” nes versikulus, signifika “lantanda” o “leba.” No pudi kompara Jeova suma un omi forti ku tira kargu di pekadus di no ombras i lebal.

6. Te nunde ku Jeova ta leba no pekadus?

⁶ Biblia usa utru komparason pa mostra di kuma Jeova ta leba no pekadus lunju. Salmu 103:12 fala sin: ‘Suma ku saida di sol ku si kaida sta lunju di n̈utru, asin ku SIÑOR ta lunjusinu no pekadus.’ Saida di sol ku si kaida lunju n̈utru ciu. Nunka e ka ta kontra na mesmu kau. Na utru palabras, Jeova ta leba no pekadus lunju di un manera ku no ka pudi imaẑina. Es i un garantia di kuma Jeova ta purdanu di manera kompletu!

7. Di akordu ku Biblia, ke ku Jeova ta fasi ku no pekadus? (Mikeias 7:​18, 19)

⁷ Na sintidu simboliku, Jeova ta leba no pekadus lunju di nos. Ma, sera ki i ta kontinua pega elis? Nau. Rei Ezekias skirbi asin aserka di Jeova: “Bu bota tudu ña pekadus tras di bu kostas.” (Isa 38:17) Es signifika di kuma Jeova ta bota pekadus di kilis ku ripindi, i ka ta jubi mas pa relis. Es palabras pudi tambi traduzidu asin: ‘Bu fasi suma si kontra N ka ciga di fasi pekadus.’ Biblia usa utru komparason pa fala di mesmu asuntu, na Mikeias 7:​18, 19. (Lei.) Es versikulus fala di kuma, Jeova ta bota no pekadus na fundu di mar. Na tempus antigu, si un kusa kai na fundu di mar, un algin nunka ka pudi tiral di la.

8. Ke ku no aprindi te li?

⁸ Biblia mostra di manera klaru di kuma ora ku Jeova purdanu, i ta leba tudu no pekadus, asin no ka pirsisa di sinti mas kulpa. Na bardadi, suma ku Davi fala, ‘sortiadu i kilis ku se maldadi sta purdadu, se pekadu kubridu. Sortiadu i ki algin ku Siñor ka pui si pekadu riba di si kabesa.’ (Rom 4:​6-8) Es i purdon di bardadi!

JEOVA TA PAGA NO PEKADU

9. Kal komparasons ku Biblia usa pa judanu ntindi di kuma Jeova ta purdanu di manera kompletu?

⁹ Jeova usa utrus komparasons pa judanu ntindi kuma ki ta paga pekadus di kilis ku ripindi, atraves di sakrifisiu di resgati. Biblia fala di kuma Jeova ta laba i limpa es pekadus. Asin, algin ku fasi pekadu ta torna limpu. (Sal 51:7; Isa 4:4; Jer 33:8) Jeova propi fala asin aserka di rusultadu des tarbaju: “Mesmu ku bo pekadu i suma nodu kargadu na bos, i na torna branku fandan; nin si i burmeju wak, i na torna suma algadon.” (Isa 1:18) I difisil dimas tira un nodu burmeju wak na un ropa. Jeova usa es komparason pa danu garantia di kuma, no pekadus pudi labadu limpu pus, tok e ka ta ojadu mas.

10. Kal utru komparason ku Jeova usa pa fala di garandesa di si purdon?

¹⁰ Suma ki faladu na studu ku pasa, pekadus tambi komparadu ku dibida. (Mat 18:​32-35) Asin, kada bias ku no peka kontra Jeova, i ta sta suma no ta aumenta no dibida. No tene un dibida garandi ku el! Ma, ora ku Jeova purdanu, i ta sta suma i nula dibida ku no tene. I ka ta iziẑi pa no paga pekadus ki purdanuba ja. Suma ku un algin ta kontenti ora ku si dibidas nuladu, asin tambi ku no ta kontenti ora ku Jeova purdanu!

11. Ora ku Biblia fala di kuma no pekadus “limpadu”, ke ku kila signifika? (Atus 3:19)

¹¹ Jeova ka ta nula so no dibidas o pekadus, ma i ta limpa elis. (Lei Atus 3:19.) Ora ku un dibida nuladu, i suma ora ki pudu un X garandi riba di montanti ku bu dibi. Ma, ki numerus ku sta bas di X ta kontinua ojadu. Limpa un kusa i diferenti. Pa ntindi es komparason, no pirsisa di lembra di kuma, tinta ku jintis ta usaba na tempus antigu, pudiba ku fasilidadi limpadu ku yagu. Un algin pudi toma spuma ku moja i limpa ke ku skirbidu. Asin, ora ku un dibida “limpadu,” i ta disparsi di un bias. Jintis ka ta oja ke ku skirbiduba antis. I ta sta suma si algin ka ciga di tene dibida. No ta kontenti di sibi di kuma Jeova ka ta nula so no pekadus, ma tambi i ta limpa elis tudu! — Sal 51:9.

12. Ke ku no aprindi di komparason aserka di nuven sukuru?

¹² Jeova usa utru komparason pa mostra kuma ki ta purda no pekadus. I fala sin: ‘N na pirdinti bu pekadus ku malis ku bu fasi, suma nuven.’ (Isa 44:22) Ora ku Jeova purda no pekadus, i ta sta suma si i usa nuven sukuru pa tapa no pekadus, asin no ka ta oja elis, i el tambi i ka ta oja elis.

13. Kuma ku no ta sinti, ora ku Jeova purda no pekadus?

¹³ Ke ku es diferenti komparasons ta nsinanu? Ora ku Jeova purda no pekadus, no ka dibi di kontinua sinti kulpadu duranti tudu no vida. Sakrifisiu di Jesus paga tudu no pekadus. Ora ku Jeova purda no pekadu, i ta sta suma no ka ciga di fasil. I asin ku Jeova ta purdanu, ora ku no ripindi di no pekadus.

JEOVA TA SETANU PA NO SEDU MAS SI AMIGUS INTIMU

14. Pabia ku no pudi konfia di kuma Jeova na purdanu di manera kompletu? (Jubi tambi fotos.)

¹⁴ Purdon di bardadi ku bin di Jeova ta pirmitinu tene amisadi intimu ku el. Es ta judanu ivita tene sentimentus di kulpa. No ka pirsisa di tene medu di kuma Jeova kontinua paña raiba di nos, i sta na buska manera di kastiganu. Nunka i ka na fasi kila. Pabia ku no pudi konfia na Jeova ora ki fala di kuma i purdanu? Jeova fala sin pa profeta Jeremias: ‘N na purda se maldadi; nunka mas N ka na lembra di se pekadus.’ (Jer 31:34) Apostolu Paulu usa mesmu palabras oca i fala sin: ‘Di se pekadu N ka na lembra mas.’ (Eb 8:12) Ma, ke ku es palabras signifika?

15. Na kal sintidu ku Jeova ka ta lembra mas di no pekadus?

¹⁵ Na Biblia, i ka tudu ora ku palabra “lembra” signifika pensa na un kusa ku kontisi na pasadu. Ma, i pudi signifika un algin ku sta na fasi un kusa. Kriminosu ku pindradu na staka pertu di Jesus, fasil es pididu: “Jesus, lembra di mi ora ku bu yentra na bu renu.” (Luk 23:​42, 43) I staba na pidi Jesus pa i fasi un kusa pa rel na ki tempu. Jesus fala ki omi di kuma i na bin lantandal. Pa kila, ora ku Jeova fala di kuma i ka lembra mas di no pekadus, kila signifika di kuma i ka na fasi nada kontra nos. I ka na kastiganu na futuru pa pekadus ki purdaba ja.

16. Ke ku Biblia komparanu ku el?

¹⁶ Ora ku Jeova purdanu, no ta sta livri. Biblia usa utru komparason pa judanu ntindi kila. I fala di kuma, suma no sedu imperfeitu, no sedu ‘katibus di pekadu.’ Ma, ora ku Jeova purdanu, no ta sedu suma katibus ku ‘libradu di pekadu.’ (Rom 6:​17, 18; Apok 1:5) Ora ku no sibi di kuma Jeova purdanu, no ta kontenti suma un katibu ku libertadu.

17. Kuma ku purdon ta tisi saudi? (Isaias 53:5)

¹⁷ Lei Isaias 53:5. Biblia fala di kuma, suma no sedu pekaduris, no komparadu ku jintis ku tene un duensa ku ta mata. Pabia di sakrifisiu di resgati ku Jeova da atraves di si Fiju, no kuradu o no pasa tene saudi. (1 Ped 2:24) Ora ku no fasi pekadu, no ta dana no amisadi ku Jeova. Ma, pabia di resgati, no pudi purdadu i tene mas un amisadi intimu ku el. Ora ku un algin kuradu di un duensa gravi i ta kontenti dimas. Anos tambi, pabia di purdon ku no risibi, no ta kontenti dimas ora ku no kuradu na sintidu spiritual i torna tene fabur di Jeova.

KUMA KU PURDON DI JEOVA TA AFETA NO VIDA

18. Ke ku no aprindi di komparasons aserka di purdon di Jeova? (Jubi tambi kuadru “Kuma ku Jeova ta purdanu.”)

¹⁸ Ke ku no aprindi di komparasons aserka di purdon di Jeova? Ora ku Jeova purda no pekadus i ta sta suma nunka no ka ciga di fasi elis. Tambi no pudi tene sertesa di kuma i ka na bin kastiganu pabia di ki pekadus. Asin, no pudi tene un amisadi intimu ku no Pape ku sta na seu. Na mesmu tempu, no ta lembra di kuma es purdon di bardadi i un prenda. I pabia di amor ku bondadi di Jeova ku pui no risibi es purdon, i ka pabia di kuma no mersil. — Rom 3:24.

19. (a) Pa ke ku no dibi di gardisi pa rel? (Romanus 4:8) (b) Ke ku no na fala del na studu ku na bin?

¹⁹ Lei Romanus 4:8. No ta gardisi ciu pa manera ku Jeova ta purdanu! (Sal 130:4) Ma, purdon di no pekadus dipindi di un kusa importanti. Jesus fala sin: “Si bo ka purda jintis ku yara bos, asin tambi ku bo Pape ka na bin purda bos ki mal ku bo fasi.” (Mat 6:​14, 15) Pa kila, no dibi di kopia Jeova i purda utrus. Studu ku na bin na mostranu kuma ku no pudi fasi kila.