No ta kontenti dimas manera ku Jeova ta purdanu

1-2. Di kal manera ku situason di pekaduris parsi ku di joven ku faladu del na paragrafu 1?

IMAẐINA un joven ku si papes tene manga di kasas, terenus ku diñeru. Un dia, i kontadu di kuma si papes muri. I diskubri tambi di kuma si papes pirdi dukumentus di kasas ku terenus. E tene manga di dibida pabia di se mau komportamentu. Gosi, imaẑina di kuma en ves di yarda manga di kasas, terenus ku diñeru, i yarda dibidas garandi ku nunka i ka na konsigi paga, tambi i ka tene kau di mora.

² Di mesmu manera, no situason i suma des joven. No purmeru papes, ku sedu Adon ku Eva, seduba perfeitu i e moraba na un paraísu bonitu. (Kum 1:27; 2:​7-9) E pudiba tene un vida filis pa sempri. Ma dipus tudu kusa muda. E pirdi oportunidadi di vivi na paraísu ku speransa di vivi pa sempri. Kal yardansa ke pudiba da se fijus? Biblia fala sin: “Pekadu yentra na mundu pabia di un omi [ku sedu Adon]; i tisi mortu. Asin tambi mortu pasa pa tudu jintis pabia tudu peka.” (Rom 5:12) No yarda pekadu di Adon, i kila ku pui no ta muri. Pekadu ku no yarda i un dibida garandi ku nin un di nos ka pudi paga. — Sal 49:8.

3. Pabia ku no pekadus pudi komparadu ku “dibida”?

³ Na Biblia, pekadu komparadu ku dibida. (Mat 18:​32-35) Ora ku no peka i suma si no dibi Jeova. No ka pudi paga es dibida sin ajuda. I ta nuladu so ora ku no muri. — Rom 6:​7, 23.

4. (a) Si pekaduris ka judadu, ke ku na kontisi ku elis tudu? (Sal 49:​7-9) (b) Na Biblia ke ku palabra “pekadu” signifika? (Jubi kuadru “Pekadu.”)

⁴ Sera ki no pudi tene mas, tudu ke ku Adon ku Eva pirdi? Anos so no ka pudi. (Lei Salmu 49:​7-9.) Si no ka judadu, no ka na tene speransa di vivi mas o lantandadu. Na bardadi, no na muri suma ora ku limarias muri, sin speransa di vivi mas. — Ekl 3:19; 2 Ped 2:12.

5. Kuma ku no Pape ku amanu judanu paga no pekadus? (Jubi diseñus.)

⁵ Pensa na joven ku faladu del na kumsada. Kuma ki na sinti si un omi riku disidi paga tudu si dibidas? Sin duvida, es joven na kontenti ciu i seta es oferta ku dadu ku tudu bondadi. Di mesmu manera, Jeova no Pape ku amanu ciu, danu un prenda pa paga pekadu ku no yarda di Adon. Jesus fala del des manera: “Deus ama jinti di mundu dimas, tok i da si uniku Fiju, pa tudu kil ku setal ka ta pirdi, ma i ta tene vida ku ka ta kaba.” (Jon 3:16) Alen di kila, es prenda danu pusibilidadi di tene amisadi forti ku Jeova.

6. Ke ku no na bin fala del nes studu, i pabia di ke?

⁶ Kuma ku no pudi benefisia des prenda garandi, ku ta pui pa no pekadus purdadu? Pa ruspundi es purgunta no fala di diferentis palabras di Biblia ku se signifikadu. Ora ku no pensa fundu na ke ku Jeova fasi pa purdanu, no mas na da balur pa si purdon.

JEOVA MISTI PA NO SEDU SI AMIGUS

7. (a) Ke mas ku Adon ku Eva pirdi? (b) Suma fijus di Adon ku Eva, di ke ku no pirsisa ciu del? (Romanus 5:​10, 11)

⁷ Alen di pirdi speransa di vivi pa sempri, Adon ku Eva pirdi tambi amisadi garandi ku se Pape Jeova. Antis de fasi pekadu, Adon ku Eva fasiba parti di familia di Deus. (Luk 3:38) Ma oca e disobdisi Jeova, e tiradu di familia di Jeova antis de kumsa ku tene fijus. (Kum 3:​23, 24; 4:1) Nin un di se fijus, nkluindu anos, ka pudi fasi parti di familia di Jeova. Pa kila, no pirsisa di ajuda pa tene amisadi ku el. (Lei Romanus 5:​10, 11.) No pirsisa di disa sedu inimigus di Deus i sedu si amigus. I interesanti nota di kuma, i Jeova ku toma diantera pa no pudi sedu si amigus. Kuma ki fasi kila?

DEUS YABRI KAMIÑU PA NO PUDI SEDU SI AMIGUS

8. Ke ku Jeova fasi?

⁸ Jeova yabri kamiñu pa pekaduris pudi sedu si amigus. I fasi pa no torna tene ke ku Adon pirdi, manera ki da un kusa ku tene mesmu balur. Tambi Skrituras Gregu ta fala di manera ku Jeova pui pa un algin sedu si amigu. — Rom 3:25.

9. Ke ku Jeova fasiba pa pekadus di israelitas purdadu?

⁹ Jeova yabri kamiñu pa pekadus di israelitas purdadu i pa e tene amisadi ku el. Na Israel, i tenba un dia di sakrifisiu pa purdon di pekadu, ku ta fasidu kada anu. Na ki dia, ŝef di saserdotis ta fasi sakrifisiu di limarias pa povu. Na bardadi, sakrifisiu di limarias ka pudi kubri pekadus di israelitas, pabia pekaduris mas limarias. Ma ora ku israelitas ku ripindi fasi sakrifisius ku Jeova ta iziẑi, i ta sta dispostu pa purda se pekadus. (Eb 10:​1-4) Sakrifisius ke ta fasi na kil dia i na utru dias, ta juda israelitas ntindi di kuma e sedu pekaduris, tambi e pirsisaba di un kusa ku na kubri se pekadus di un manera kompletu.

10. Ke ku Jeova fasi pa purda no pekadus di un bias?

¹⁰ Jeova pensaba ja na un kusa ku na pui pa no pekadus purdadu di un bias. I da si Fiju ki ama pa i “da si vida un bias pa tira pekadu di manga di jinti.” (Eb 9:28) Jesus “da si vida pa libra manga di jinti.” (Mat 20:28) Ke ki resgati?

PRES KU PAGADU PA NO PUDI SEDU AMIGUS DI DEUS

11. (a) Di akordu ku Biblia, ke ki resgati? (b) Kin so ku pudi paga resgati?

¹¹ Di akordu ku Biblia, resgati i un pres ku pagadu pa no pekadus pudi purdadu, i pa no pudi sedu amigus di Jeova.a Kal ki pres di resgati ku dibi di pagadu pa pekaduris pudi tene mas ke ku Adon pirdi? Lembra di kuma, Adon ku Eva pirdi vida perfeitu ku speransa di vivi pa sempri. Pa kila, resgati pirsisa di sedu un pres ku tene mesmu balur ku kil ku pirdidu. (1 Tim 2:6) I pudiba pagadu so pa un omi (1) ku seduba perfeitu, (2) ku pudiba vivi pa sempri na Tera i (3) ku staba dispostu pa sakrifika si vida pa nos. So asin, ku vida di kil algin pudi paga kil ku pirdidu.

12. Pabia ku Jesus konsigi paga pres di resgati ki pirsis?

¹² Jubi tris motivu ku pui Jesus konsigi paga pres di resgati. (1) I seduba perfeitu, tambi “i ka fasi pekadu”. (1 Ped 2:22) (2) Pabia di kila, i pudiba vivi pa sempri na Tera. (3) I staba dispostu pa muri i da si vida perfeitu pa nos. (Eb 10:​9, 10) Jesus seduba omi perfeitu suma purmeru omi, Adon, antis di fasi pekadu. (1 Kor 15:45) Suma Jesus muri pa nos, i konsigi paga pres propi ki pirsis, pa paga ke ku Adon pirdi. (Rom 5:19) Asin, Jesus pasa sedu “sugundu Adon”. I ka pirsis pa utru algin perfeitu bin i paga ke ku Adon pirdi. Jesus muri di “un bias.” — Eb 7:27; 10:12.

13. Ke ku manda no pudi tene amisadi ku Jeova?

¹³ Ke ku manda no pudi tene amisadi ku Jeova? Jeova yabri kamiñu pa no pekadus pudi purdadu. Jesus sakrifika si vida perfeitu pa paga pres izatu di no pekadus. — Ef 1:7; Eb 9:14.

JEOVA LIBERTANU DI PEKADU KU MORTU, I COMANU DI JUSTUS

14. Ke ku no na bin fala del gosi i pabia di ke?

¹⁴ Kuma ku no ta benefisia di ke ku Jeova fasi pa nos? Pa ruspundi es purgunta, no na fala di signifikadu di dus palabras ku Biblia usa, pa judanu ntindi kuma ku no ta benefisia di purdon di Jeova.

15-16. (a) Na Biblia, ke ku palabra “liberta” signifika? (b) Kuma ku sedu libertadu di pekadu ku mortu ta fasinu sinti?

¹⁵ Na Biblia, liberta signifika kaplinti, pabia resgati pagadu. Apostolu Pedru fala del des manera: “Bo sibi kuma i ka kusa ku ta dana, suma prata o uru, ku pagadu pa liberta bos di bo manera di yanda ku ka bali, ku bo yarda di bo papes di antigu, ma i sangi di Kristu ku ten balur, el ki suma un karnel ku ka tene manca nin difeitu.” — 1 Ped 1:​18, 19.

¹⁶ Pabia di sakrifisiu di resgati, no pudi libertadu di pekadu ku mortu ku ta punu sufri ciu. (Rom 5:21) Na bardadi, no tene bon motivu di sinti di kuma, no tene dibida ku Jeova i ku Jesus, pa manera ku no libertadu, pabia di sangi di Jesus ku tene balur. — 1 Kor 15:22.

17-18. (a) Ke ku comadu justu signifika? (b) Kuma ku no ta benefisia pa manera ku Jeova comanu di justu?

¹⁷ Biblia fala di kuma servus di Jeova comadu di justus. Es signifika di kuma i ka ta iziẑi pa no paga pekadus ku no fasi. Mesmu manera ku Jeova ta fasi es, i ta kontinua sigi si normas di justisa. I ka ta comanu di justus pabia no mersi. Tambi, Jeova ka ta kontenti ku no pekadus. Ma Jeova ta sta dispostu pa purda no pekadus, pabia no ta mostra fe na ke ki fasi juntu ku Jesus pa da resgati. — Rom 3:24; Gal 2:16.

¹⁸ Kuma ku no ta benefisia ora ku Jeova comanu di justu? Alguns ku comadu di justus kujidu pa rena ku Kristu na seu, tambi e sedu fijus di Deus. (Titu 3:7; 1 Jon 3:1) Se pekadus purdadu. I suma si kontra e ka ciga di fasi ki pekadus, pa kila, e na konsigi sta na Renu. (Rom 8:​1, 2, 30) Kilis ku tene speransa di vivi na Tera comadu di justus, pabia e sedu amigus di Deus, tambi se pekadus purdadu. (Tiagu 2:​21-23) Garandi multidon ku na salba na armajedon, tene speransa di nunka muri. (Jon 11:26) “Bons” ku “maus” ku muri, na bin lantandadu. (At 24:15; Jon 5:​28, 29) Ku tempu, tudu servus di Jeova obdienti na Tera na bin “risibi liberdadi gloriosu di fijus di Deus.” (Rom 8:21) No sta ku presa di oja tempu nunde ku no pudi tene es amisadi ku no Pape, Jeova!

19. Kuma ku no situason muda pa minjor? (Jubi tambi kuadru “Purdon di Jeova.”)

¹⁹ Na bardadi, no situason i suma di ki joven ku faladu del na kumsada ku pirdi tudu i ku yarda un dibida garandi ku nunka i ka na pudiba paga. Ma, Jeova judanu. No situason muda pabia Jeova yabri kamiñu pa no pekadus pudi purdadu, tambi Jesus paga resgati. No fe na Jesus Kristu libertanu di pekadu ku mortu. Ora ku Jeova purda no pekadus, i suma si nunka no ka ciga di fasi elis. Mas importanti di tudu, gosi no pudi tene un amisadi forti ku no Pape ku sta na seu i ku amanu, ku sedu, Jeova.

20. Ke ku no bin fala del na studu ku na bin?

²⁰ No ta gardisi ciu Jeova ku Jesus, ora ku no pensa fundu na tudu ke ke fasi pa nos. (2 Kor 5:15) Sin se ajuda, no ka na teneba nin un speransa! Ma, ke ku purdon di Jeova signifika pa kada un di nos? No na fala des na studu ku na bin.