Kontinua yanda na fe

1. Pabia ku apostolu Paulu kontenti pa manera ki usa si vida?

APOSTOLU Paulu sibiba di kuma i pertu matadu, ma i kontentiba dimas oca i pensa na kuma ki usa si vida. I fala sin: “N kaba ña kurida, N guarda fe.” (2 Tim 4:​6-8) Paulu tomaba bon disison di usa si vida pa sirbi Jeova, tambi i teneba sertesa di kuma Jeova kontentiba ku el. Anos tambi no misti toma bon disisons i kontenta Deus. Kuma ku no pudi fasil?

2. Ke ku signifika yanda na fe?

² Paulu fala sin aserka di si kabesa ku utrus kristons fiel: “No na yanda na fe, i ka na kil ku no na oja.” (2 Kor 5:7) Ke ku Paulu misti fala? Na Biblia, palabra “yanda” utrora ta signifika manera ku un algin ta disidi leba si vida. Jintis ku ka tene fe na Jeova ta toma disisons basiadu so na ke ke ta oja, obi i sinti. Ma un algin ku tene fe na Jeova ta pensa na ke ku Jeova misti, ora ki na toma disisons. Si asons ta mostra di kuma i tene sertesa di kuma, ora ki sigi konsijus di Jeova ku sta na Biblia, i ta tene vida minjor gosi, i na futuru Jeova na bin pagal inda mas. — Sal 119:66; Eb 11:6.

3. Ke ku no na tene si no ta yanda na fe? (2 Koríntius 4:18)

³ Na bardadi, anos tudu no ta toma sertus disisons basiadu na ke ku no ta oja, obi i sinti. Ma si no konfia so na ke ku no ta oja, ke ku no ta obi i ke ku no ta sinti, ora ku no na toma disisons importanti, no pudi bin tene purblema. Pabia di ke? Pabia ke ku no ta oja i obi pudi ngananu utrora. Si no toma disisons basiadu so na ke ku no ta oja, obi o sinti, no pudi bin fasi un kusa ku ka na kontenta Jeova. (Ekl 11:9; Mat 24:​37-39) Ma, ora ku no na yanda na fe, no na toma disisons ku “Deus ta kontenti ku el.” (Ef 5:10) Ora ku no sigi konsiju di Deus, no ta tene sintidu susegadu ku filisidadi di bardadi. (Sal 16:​8, 9; Isa 48:​17, 18) Tambi si no kontinua yanda na fe, no na bin vivi pa sempri. — Lei 2 Koríntius 4:18.

4. Kuma ku un algin pudi sibi si kontra i sta na yanda na fe o na kil ki ta oja?

⁴ Kuma ku no pudi sibi si kontra no sta na yanda na fe o na kil ku no ta oja? Anos tudu no pirsisa di punta no kabesa: Ke ku ta gia no disisons? Sera ki no ta giadu so pa kusas ku no pudi oja? O sera ki no ta giadu pa konfiansa ku no tene na Jeova ku konsijus ki ta da? No na fala di kuma ku no pudi kontinua yanda na fe na tris arias importanti: Ora ku no na kuji un tarbaju, ora ku no na kuji kin ku no na kasa ku el i ora ku no risibi orientason di organizason. Na kada situason, no na fala di kal kusas ku no dibi di pensa nel pa pudi toma bon disisons.

ORA KU NO NA KUJI UN TARBAJU

5. Ke ku no dibi di pensa nel ora ku no na kuji un tarbaju?

⁵ Anos tudu no misti konsigi kuida di no propri nesesidadis ku nesesidadis di no familia. (Ekl 7:12; 1 Tim 5:8) I ten kaus di tarbaju ku mas ta paga ben di ki utrus. Alguns tarbajus ta pirmiti pa un algin ngaña diñeru pa kuida di nesesidadis di si familia i te mesmu guarda utru pa futuru. Ma utrus tarbajus ta pirmiti so pa ngaña diñeru pa kusas mas importanti ku familia na pirsisa del, suma kumida, kau di mora ku ropa. Ora ku no na kuji kal tipu di tarbaju ku no na fasi, ku sertesa no na pensa na kantu ku no na ngaña. Ma si es i uniku kusa ku no ta pensa nel, nton no sta na yanda na ke ku no ta oja.

6. Kuma ku no pudi yanda na fe ora ku no na kuji tarbaju? (Ebreus 13:5)

⁶ Si no ta yanda na fe, no na jubi tambi kuma ku kil tarbaju na afeta no amisadi ku Jeova. No pudi punta no kabesa: ‘Sera ki es tipu di tarbaju na leban fasi kusas ku Jeova nuju?’ (Dit 6:​16-19) ‘Sera ki i na leban lunjusi di ña familia pa manga di tempu, falta runions, tene puku tempu pa prega, i pa studa Biblia?’ (Fil 1:10) Si bu ruspundi sin pa un des purguntas, i na sedu bon pa bu ka seta es tarbaju, mesmu si difisil oca tarbaju. Suma no ta yanda na fe, no na toma disisons ku na mostra di kuma no sta konvensidu di kuma, Jeova na kuida di no nesesidadis. — Mat 6:33; lei Ebreus 13:5.

7-8. Kuma ku un ermon comadu Javier yanda na fe? (Jubi tambi foto.)

⁷ Nota kuma ku Javier,a un ermon na Amerika di Sul oja importansia di yanda na fe. I fala sin: “N fasi pididu pa un kargu ku ta paga dobru di kil ku N ta risibiba i ku N na gostaba ciu del.” Ma, Javier teneba diseẑu forti di sedu pioneru. I kontinua fala sin: “N kujidu pa ntrivista di ki tarbaju. Antis di ntrivista, N pidi Jeova pa i judan, pabia N teneba sertesa di kuma i sibiba ke ki minjor pa mi. N mistiba tene mas responsabilidadi na kau di tarbaju i pa ba ta risibi mas diñeru. Ma, N ka na seta es tarbaju si kontra i ka na judan fasi mas pa Jeova.”

⁸ Javier fala sin: “Na mumentu di ntrivista, ẑerenti falan di kuma N na ba ta tene sempri oras estra. N splikal ku rispitu di kuma N ka na pudi fasil, pabia di adorason ku N ta fasi pa Deus.” Pa kila, Javier ka seta ki tarbaju. Dus semana dipus, i kumsa sirvisu di pioneru. Alguns misis dipus, i oca utru tarbaju di me-piriudu. I fala sin: “Jeova obi ña orasons, i judan oca un tarbaju ku na pirmitin sedu pioneru. N kontenti dimas di tene un tarbaju ku ta pirmitin tene mas tempu pa sirbi Jeova ku ña ermons.”

9. Ke ku bu aprindi di spiriensia di Trésor?

⁹ Ke ku no na fasi, si no nota di kuma tarbaju ku no tene ka ta pirmitinu yanda na fe? Jubi spiriensia di Trésor di Republika di Kongu. I fala sin: “N gostaba ciu di ña nobu tarbaju. N ta ngañaba tris bias mas di kil ku N ta risibiba, i jintis rispitanba.” Ma, Trésor ta faltaba sempri runions pabia i ta tarbajaba oras estra. Tambi si kolegas di tarbaju ta presionalba pa ka sedu onestu. Trésor mistiba disa ki tarbaju, ma i staba preokupadu di ka tene tarbaju. Ke ku judal? I fala sin: “Abakuk 3:​17-19 judan ntindi di kuma nin si N pirdi ki tarbaju i pasa ngaña puku diñeru, Jeova na kuida di mi. Pa kila, N disa ki tarbaju.” Trésor kontinua fala sin: “Manga di patrons ta pensa di kuma pa un tarbaju ku ta paga ben, un algin na fasi kualker kusa, te mesmu da tempu ki ta pasa ku si familia i ki ta pasa na si adorason pa Deus. N kontenti pa manera ku N proteẑi ña amisadi ku Jeova. Un anu dipus, Jeova judan oca un bon tarbaju ku ta judan kuida di ña nesesidadis i tene mas tempu pa sirbil. Ora ku no pui Jeova na purmeru lugar, utrora no pudi tene purblema di diñeru, ma Jeova ta kuida di nos.” Si no konfia na konsijus di Jeova ku si purmesas, no na kontinua yanda na fe i risibi si bensons.

ORA KU NO NA KUJI KIN KU NO NA KASA KU EL

10. Ke ku pudi lebanu na yanda na kil ku no ta oja, ora ku no na kuji kin ku no na kasa ku el?

¹⁰ Kasamenti i un prenda ku bin di Jeova, tambi i normal pa un algin misti kasa. Ora ku un irma sta na pensa kasa ku un ermon, i pudi pensa na si maneras di sedu, si aparensia fisiku, kuma ku utrus ta ojal, kuma ki ta kuida di diñeru, si kontra si familia na kontinua dipindi del, i si kil ermon na fasil sinti ben.b Tudu es kusas i importanti. Ma, si i konsentra so nes kusas, i na mostra di kuma i sta na yanda na kil ki ta oja.

11. Kuma ku no pudi yanda na fe, ora ku no na kuji kin ku no na kasa ku el? (1 Koríntius 7:39)

¹¹ Jeova ta kontenti dimas ku no ermons ku irmas ku ta sigi si konsiju, ora ke na kuji kin ke na kasa ku el! Pur isemplu, e ta aplika konsiju di Biblia di pera te ora ke “tene idade djá adulto”, antis di pensa kasa. (1 Kor 7:​36, NOBO TESTAMENTO NA CRIOL) E ta jubi diritu si kontra kin ke pudi bin kasa ku el, tene maneras di sedu ku Jeova fala un bon omi o un bon minjer dibi di tene. (Dit 31:​10-13, 26-28; Ef 5:33; 1 Tim 5:8) E ka ta mostra interesi romantiku pa un algin ku ka ta sirbi Jeova. En ves di kila, e ta obdisi konsiju di kasa so na Siñor ku sta na 1 Koríntius 7:39 (lei). E ta kontinua yanda na fe, pabia e sibi di kuma Jeova pudi kuida di se nesesidadi emosional minjor di ki kualker algin. — Sal 55:22.

12. Ke ku bu aprindi di isemplu di Rosa?

¹² Jubi isemplu di Rosa, un pioneru ku sta na Kolombia. Si kolega di tarbaju ku ka sedu Tustumuña di Jeova kumsa ku mostra interesi nel. Rosa gostaba del. I fala sin: “I parsiba sedu un bon omi. I ta juda jintis di si zona, i ka ta fuma nin bibi ciu. N gostaba di kuma ki ta tratan. I teneba tudu maneras di sedu ku N mistiba na un omi, ma so ki i ka seduba Tustumuña di Jeova.” Rosa kontinua fala sin: “I seduba difisil pa N fala di kuma N ka misti namora ku el. Utrora N ta dingi, i N mistiba kasa, ma N ka ojaba un ermon ku N misti namora ku el.” Ma, Rosa ka konsentraba so na ke ki pudiba oja. I pensaba na ke ku na kontisi ku si amisadi ku Jeova, si kontra i disidi namora ku ki omi. Pa kila, i korta tudu kontaktu ku ki omi, i kontinua sta okupadu na si sirvisu pa Jeova. Puku tempu dipus, i kumbidadu pa mati Skola pa Ivanjelizaduris di Renu, i gosi i sta na sirbi suma pioneru spesial. Rosa fala sin: “Jeova dan manga di bensons ku pui pa N tene filisidadi garandi.” Utrora i ta difisil yanda na fe, prinsipalmenti ora ku no tene sentimentu forti na un kusa. Ma sempri no ta sai ben, ora ku no sedu giadu pa manera di pensa di Jeova.

ORA KU NO RISIBI ORIENTAON DI ORGANIZASON

13. Ke ku pudi lebanu na yanda na kil ku no ta oja, ora ku no risibi orientason di organizason?

¹³ Manga di bias, ansions, superintendentis di sirkuitu, skritoriu di filial ku Korpu Guvernanti, ta danu orientasons ku ta judanu sirbi Jeova. Ma, ke ku pudi kontisi si no ka ntindi motivu ku pui no dadu un orientason? No pudi tene duvida si kontra i un bon orientason. No pudi te mesmu kumsa ku konsentra na falias di ermons ku da orientason. Ma si no fasi es, no ta sta na yanda pa kil ku no ta oja.

14. Ke ku na judanu yanda na fe, ora ku no risibi orientason di organizason? (Ebreus 13:17)

¹⁴ Ora ku no na yanda na fe, no ta konfia di kuma i Jeova ku sta na gia si organizason, tambi i sibi ke ki minjor pa nos. Asin, no na obdisi rapidu, i no na fasil di tudu korson. (Lei Ebreus 13:17.) No sibi di kuma ora ku no ta sigi orientasons, no ta juda pa i ten union na kongregason. (Ef 4:​2, 3) No konfia di kuma Jeova na bensuanu, ora ku no obdisi ermons ku ta toma diantera mesmu si e ta fasi erus. (1 Sam 15:22) Tambi no tene konfiansa di kuma, si un orientason pirsisa di mudadu, Jeova na fasi pa i mudadu na tempu sertu. — Mik 7:7.

15-16. Ke ku juda un ermon pa i yanda na fe, mesmu kontra i teneba duvida aserka di orientason ki risibiba? (Jubi tambi foto.)

¹⁵ Jubi spiriensia ku ta mostra benefisiu di yanda na fe. Na Peru, mesmu manera ku jintis ta papia Spañol, manga delis ta papia linguas lokal. Un di ki linguas i Keŝua. Pa manga di anus, ermons ku irmas ku ta papia Keŝua ta buskaba kilis ku ta papia Keŝua na tiritoriu. Ma, pa pudi sigi leis di guvernu, i fasidu mudansas na manera di kontakta jintis. (Rom 13:1) Pa kila, alguns pensaba di kuma i pudi atrasa tarbaju na tiritoriu. Suma ermons sigi orientasons ku dadu, Jeova bensua se sforsu di buska manga di jintis ku ta papia Keŝua.

¹⁶ Kevin, un ansion di kongregason di lingua Keŝua, fasiba parti di ermons ku staba preokupadu ku mudansa na manera di kontakta jintis. I fala sin: “N punta ña kabesa: ‘Gosi, kuma ku no na oja jintis ku ta papia Keŝua?’” Ke ku Kevin fasi? I fala sin: “N lembra di Ditus 3:5. N pensa tambi na Moisés. Jeova dalba orientason ku parsiba di kuma i ka tene sintidu. I fala Moisés pa i leba israelitas pa mar burmeju nunde ki parsiba di kuma, e ka na kapli di Ejipsius ku na serkaba elis. Ma mesmu asin, i obdisi, i Jeova bensua elis pa manera ki fasi un milagri garandi pa salva elis.” (Sai 14:​1, 2, 9-11, 21, 22) Kevin staba dispostu pa muda si manera di prega. Kal ku sedu rusultadu? I fala sin: “N fikaba dimiradu di oja kuma ku Jeova bensuanu. Antis, no ta yandaba ciu na pregason, i utrora no ta ojaba so un o dus jintis ku ta papia Keŝua. Gosi no ta bai nunde ki ten manga di jintis ku ta papia Keŝua. Pabia di kila, no ta papia ku manga di jintis, no tene manga di rivisitas ku studus di Biblia. Tambi jintis ku ta mati no runions aumenta.” Ora ku no ta yanda na fe, no ta bensuadu sempri pa Jeova.

17. Ke ku no aprindi nes studu?

¹⁷ No oja kuma ku no pudi kontinua yanda na fe na tris arias importanti. Ma, no dibi di kontinua yanda na fe na tudu arias di no vida, suma ora ku no na kuji divirtimentu, ora ku no na disidi kal nivel di skola ku no na tene, o kuma ku no na kria no fijus. I ka mporta kal disisons ku no dibi di toma, no ka dibi di sedu giadu so pa ke ku no pudi oja, ma tambi pa no amisadi ku Jeova, pa si konsijus ku purmesa ki fasi di kuma, i na kuida di nos. Si no fasil, no na konsigi ‘yanda na nomi di Jeova no Deus, pa tudu sempri.’ — Mik 4:5.