Ke ku pudi judau ora ku bu ka tene sertesa di sertus kusas

1-2. (a) Kal kusas ku servus di Jeova pudi preokupa ku el? (b) Ke ku no na fala del nes studu?

ANOS tudu, si no sedu jovens o no tene idadi, utrora no ta punta si no tene balur pa Jeova i si no tomaba bon disisons. Pur isemplu, imaẑina un joven Tustumuña di Jeova ku na punta si na bardadi Jeova ta preokupa ku el. Talves i ka tene sertesa si kontra i dibi di batisa. O pensa na un ermon, ocalba joven i disidi juda si familia progredi na sintidu spiritual, asin i fika na un kongregason, en ves di disa si minjer ku si fijus pa misis, i bai pa utru kau o utru tera pa buska diñeru. Gosi ku mas idadi i tene diñeru so pa nesesidadis di si familia. I pudi kumsa ku punta si kontra i toma bon disison ocalba joven. O pensa na un irma di idadi ku ka tene manga di forsa. I pudi sinti disanimadu pabia i ka pudi fasi suma ki ta fasiba. Sera ki bu ciga ja di fasi bu kabesa es purguntas: ‘Sera ki Jeova ta nota di mi? Sera ki sakrifisius ku N fasi pa Jeova bali pena? Sera ki N pudi inda fasi algun kusa pa Jeova?’

² Si bu ka sforsa pa oja respostas pa es purguntas, e pudi pui pa bu pirdi fe na Jeova, te mesmu para sirbil. Nes studu, no na oja kuma ku Biblia pudi judanu si no pensa di kuma (1) Jeova ka ta preokupa ku nos, (2) disisons ku no tomaba ka sedu bon, o (3) no ka pudi fasi algun kusa pa Jeova.

KE KU PUDI JUDANU ORA KU NO TENE PURGUNTAS

3. Ke ku no pudi fasi si no tene purguntas ku pudi disanimanu?

³ Ora ku no tene purguntas ku pudi disanimanu, i importanti pa no buska respostas na Palabra di Deus. Si no fasil, no fe i no amisadi ku Jeova na torna forti, i no na konsigi “fika firmi na fe”. — 1 Kor 16:13.

4. Kuma ku no pudi “proba tudu” kusa? (1 Tesalonisensis 5:21)

⁴ Lei 1 Tesalonisensis 5:21. Nota kuma Biblia falanu pa no “proba tudu” kusa. Kuma ku no pudi fasil? Si no ka tene sertesa di kuma ke ki no fia nel i bardadi, no dibi di jubi ke ku Biblia fala aserka del. Pur isemplu, pensa na ki joven ku ka tene sertesa di kuma Jeova na bardadi ta preokupa ku el. Sera ki i dibi di pensa di kuma suma i tene es purgunta, kila signifika di kuma Jeova ka ta preokupa ku el? Nau, i dibi di “proba tudu” kusa, ora ki studa Biblia pa sibi ke ku Jeova na bardadi ta pensa aserka del.

5. Kuma ku no ta “obi” respostas di Jeova pa no purguntas?

⁵ Ora ku ta lei Biblia, i ta sta suma si no sta na “obi” Jeova na papia ku nos. Ma, si no misti pa Jeova ruspundi no purguntas, no pirsisa di fasi mas di ki so lei Biblia. No pirsisa di buska i studa testus di Biblia ku na fala di asuntus ku na preokupanu. No pudi fasi piskisas na no publikasons, pa pudi sibi mas aserka des asuntu. (Dit 2:​3-6) No pudi ora Jeova pa i gia piskisa no sta na fasi i pa i judanu oja ke ki ta pensa aserka di no purgunta. Dipus no pudi buska prinsipius di Biblia ku informason ku na judanu na situason ku no sta nel. I na sedu tambi bon lei storia di servus fiel di Jeova ku Biblia fala del ku tene sentimentus ku manera di pensa suma nos.

6. Kuma ku runions pudi judanu ruspundi purguntas ku no tene?

⁶ No pudi tambi “obi” Jeova na papia ku nos na no runions. Si no ta mati runions sempri, no pudi obi un kusa na un diskursu o na un kumentariu ku da resposta pa purgunta ku no tene. (Dit 27:17) Gosi no na fala di ke ku pudi judanu oja respostas pa purguntas ku no tene.

SERA KI JEOVA TA PREOKUPA KU BO?

7. Kal purgunta ku alguns ta fasi?

⁷ Sera ki bu ciga ja di punta: ‘Sera ki Jeova na bardadi ta nota di mi?’ Si bu pensa di kuma bu ka bali nada, bu pudi pensa di kuma, bu ka pudi sedu amigu di kin ku kumpu seu ku Tera. Talves Rei Davi pensaba di mesmu manera. Davi fikaba dimiradu pa manera ku Jeova ta preokupa ku pekaduris. I fala sin: “SIÑOR, ke ki omi pa bu toma kunsimentu del? O ke ki fiju di omi pa bu pui sintidu nel?” (Sal 144:3) Nunde ku bu pudi oja resposta pa es purgunta?

8. Di akordu ku 1 Samuel 16:​6, 7, 10-12, ke ku Jeova ta jubi na jintis?

⁸ Biblia nsinanu di kuma Jeova ta nota di kilis ku parsi di kuma, e ka tene balur dianti di utrus. Pur isemplu, Jeova manda Samuel pa kasa di Jesé pa unji un di si fijus pa i bin sedu rei di Israel. Jesé coma seti di si oitu fijus pa bai nunde Samuel ma i ka comaba Davi, ku seduba mas pikininu.a Ma, i Davi ku Jeova kuji. (Lei 1 Samuel 16:​6, 7, 10-12.) Jeova ojaba ke ku Davi seduba pa dentru. I sibiba di kuma Davi amal ciu.

9. Pabia ku bu pudi tene sertesa di kuma Jeova ta preokupa ku bo? (Jubi tambi foto.)

⁹ Pensa na kuma ku Jeova mostraba ja di kuma i ta preokupa ku bo. I dau bon konsiju ku da ku situason ku bu sta nel. (Sal 32:8) Kuma ki pudi fasil si kontra i ka kunsiu diritu? (Sal 139:1) Ora ku bu aplika konsiju di Jeova i oja kuma ki judau, bu na sta mas konvensidu di kuma, Jeova ta preokupa ku bo. (1 Kron 28:9; At 17:​26, 27) Jeova ta nota di sforsu ku bu ta fasi. I ta oja bon maneras di sedu ku bu tene, tambi i misti sedu bu amigu. (Jer 17:10) I na kontenti dimas si bu misti tambi sedu si amigu. — 1 Jon 4:19.

ORA KU BU KA TENE SERTESA DI KUMA BU TOMABA BON DISISONS

10. Ora ku no pensa na disisons ku no tomaba, kal purguntas ku no pudi fasi?

¹⁰ Utrora, alguns pudi pensa na disisons ke tomaba i ka tene sertesa si kontra e seduba bon disisons. Talves e ka seta un bon tarbaju o oportunidadi di tene un bon tarbaju, pa pudi da mas na sirvisu di Jeova. Ma, talves i pasa ja manga di anus. E pudi pensa na jintis ke kunsi, ku toma disisons diferenti ku elis i gosi i parsi di kuma, e tene manga di diñeru ku bon vida. Pa kila, talves e pudi punta: ‘Sera ki sakrifisius ku N fasi pa Jeova bali pena? O sera ki gosi, N dibi di tarbaja mas pa N pudi tene mas diñeru?’

11. Kal pensamentus negativu ku skirbidur di Salmu 73 teneba?

¹¹ Si bu tene mesmu purguntas, jubi kuma ku skirbidur di Salmu 73 sintiba. I oja jintis ku ka ta sirbi Jeova, ma ku tene bon saudi, e riku i e parsi di kuma e ka tene nin un purblema na vida. (Sal 73:​3-5, 12) Oca ki na jubi elis i parsi di kuma e staba diritu. Kila fasil sinti di kuma si sforsu di sirbi Jeova i suma nada. ‘Kada parmaña i ta kastigadu’ ku si pensamentus negativu. (Sal 73:​13, 14) Kuma ki konsigi lida kes pensamentus negativu?

12. Di akordu ku Salmu 73:​16-18, ke ku juda salmista lida ku si pensamentus negativu?

¹² Lei Salmu 73:​16-18. Salmista bai pa kau sagradu di Jeova. La, i kumsa ku pensa diritu. I pasa ntindi di kuma, mesmu kilis ku parsi di kuma e tene bon vida, ma na bardadi, e ka tene speransa pa futuru. I ka fika mas disanimadu, tambi i teneba sertesa di kuma sirbi Jeova i minjor disison. Pa kila, i staba disididu pa kontinua sirbi Jeova. — Sal 73:​23-28.

13. Ke ku no pudi fasi si no ripindi pa disisons ku no tomaba? (Jubi tambi fotos.)

¹³ Bu pudi tambi lida ku pensamentus negativu ku ajuda di Palabra di Deus. Kuma ku bu pudi fasil? Pensa na bon kusas ku bu tene, suma bensons di Jeova, i lembra di kuma kilis ku ka ta sirbi Jeova, tene so ke ku es mundu ta da. Pa maioria di kilis ku ka ta sirbi Jeova, tene un bon tarbaju i kusa mas importanti, pabia e ka tene speransa pa futuru. Ma, pa bo, Jeova purmiti bensual mas di ke ku bu pudi imaẑina. (Sal 145:16) Pensa tambi nes: Sera ki na bardadi bu sibiba kuma ku bu vida na sedu, si bu tomaba utru disison? Bu pudi tene sertesa di un kusa: Kilis ku toma disison pabia di se amor pa Jeova i pa se kumpañeris, na tene sempri kusas na vida ku na da elis filisidadi.

ORA KU BU PENSA DI KUMA BU KA PUDI FASI ALGUN KUSA PA JEOVA

14. Pabia ku alguns ta tene falta di konfiansa, i kal purgunta ku ta preokupa elis?

¹⁴ Alguns servus di Jeova ka pudi fasi suma antis, pabia di idadi, purblema di saudi o pabia e tene limitason. Es pudi pui elis pensa di kuma e ka tene balur na ujus di Jeova. Talves e pudi punta: ‘Sera ki N pudi fasi algun kusa pa Jeova?’

15. Ke ku salmista staba konvensidu del?

¹⁵ Skirbidur di Salmu 71 teneba tambi mesmu sentimentu. I ora asin: “Ka bu bandonan ora ku ña forsa na kaba.” (Sal 71:​9, 18) Mesmu manera ki ka teneba forsa, salmista staba konvensidu di kuma, si sirbi Jeova ku fidelidadi, i na gial i judal. Anus mas tardi salmista aprindi di kuma, Jeova ta kontenti ku kilis ku ta fasi se minjor pa sirbil, mesmu ku se limitasons. — Sal 37:​23-25.

16. Di kal maneras ku jintis di idadi pudi fasi algun kusa pa Jeova? (Salmu 92:​12-15)

¹⁶ Si abo i algin di idadi, pensa na kuma ku Jeova ta ojau. I pudi judau kontinua sirbil ku fidelidadi, mesmu si bu ka tene forsa fisiku. (Lei Salmu 92:​12-15.) En ves di konsentra na ke ku bu ka pudi fasi gosi, konsentra na ke ku bu pudi fasi. Pur isemplu, bu pudi nkoraẑa utrus atraves di bu isemplu fiel ku interesi ku bu ta mostra pa utrus. Bu pudi konta utrus kuma ku Jeova judau pa manga di anus i kal purmesas di Biblia ku bu na spera bin oja na futuru. Tambi ka bu diskisi di kuma, bu orasons pa utrus, pudi sedu di ajuda garandi pa relis. (1 Ped 3:12) I ka mporta kal ki no situason, anos tudu no tene un kusa ku no pudi da pa Jeova i pa utrus.

17. Pabia ku no ka dibi di kompara no kabesa ku utrus?

¹⁷ Si bu sinti mal pabia bu ka pudi fasi mas na sirvisu di Jeova, tene sertesa di kuma Jeova ta da balur pa kualker kusa ku bu pudi fasi. Talves bu ta kompara ke ku bu ta fasi ku ke ku utrus pudi fasi. Ka bu fasil! Pabia di ke? Pabia Jeova ka ta komparanu ku utrus. (Gal 6:4) Pur isemplu, Maria da Jesus un prenda di oliu purfumadu karu dimas. (Jon 12:​3-5) Diferenti del, viuva koitadi bai pa templu i da dus mueda pikininu ku tene puku balur. (Luk 21:​1-4) Ma, Jesus oja tudu dus prendas suma un manera di mostra fe. Si Pape, Jeova, ta da balur pa kualker kusa ku bu fasi pabia di fe ku amor ku bu mostra pa rel, nin si bu pensa di kuma i pikininu dimas.

18. Ke ku na judanu oja respostas pa purguntas ku no tene? (Jubi tambi kuadru “Palabra di Jeova pudi judau oja respostas pa purguntas ku bu tene.”)

¹⁸ Utrora anos tudu no ta tene purguntas. Ma, suma ku no aprindi, Biblia pudi judanu oja respostas pa es purguntas. Pa kila, sforsa pa buska respostas pa bu purguntas, asin bu na tene konfiansa en ves di sta disanimadu. Jeova sibi kin propi ku bu sedu. I ta da balur pa sakrifisius ku bu fasi. Tambi i na kumpri purmesa ki fasi di pagau. Tene sertesa di kuma Jeova ama i ta preokupa ku kada un di si servus fiel.