Juda bu studanti di Biblia pa i disidi sirbi Jeova

1-2. (a) Pabia ku alguns studantis di Biblia ta medi toma disison di sirbi Jeova? (b) Ke ku no na bin fala del nes studu?

SERA ki i ten kusas ku ta pui pa bu mediba sedu Tustumuña di Jeova? Talves bu teneba medu di kuma, bu kolegas di tarbaju, amigus o familia na paña raiba kontra bo, si bu sedu Tustumuña di Jeova. O talves bu pensaba di kuma nunka bu ka na konsigi obdisi normas di Jeova. Si i sedu asin, bu pudi ntindi kuma ku alguns studantis di Biblia ta pensa, i pabia ki pudi sedu difisil pa e toma disison di sedu Tustumuña di Jeova.

² Jesus sibiba di kuma, kusas suma esis pudi pui pa un algin para sirbi Jeova. (Mat 13:​20-22) Ma i kontinua juda kilis ku tene duvida si kontra e dibi di sigil. En ves di kila, atraves di ke ki fasi, i disanu un isemplu di kuma ku no pudi juda es jintis. (1) Juda elis pa e sibi ke ku manda i difisil pa e sirbi Jeova, (2) pa e aumenta se amor pa Jeova, (3) pa e pui Jeova na purmeru lugar na se vida, i (4) nsina elis ke ke dibi di fasi, ora ku utrus sta kontra elis. Kuma ku no pudi kopia manera ku Jesus ta nsina, ora ku no na usa livru Bu Pudi Tene un Vida Filis pa Sempri!, pa juda un studanti di Biblia disidi sirbi Jeova?

JUDA BU STUDANTI PA I SIBI KE KU MANDA I DIFISIL PA I SIRBI JEOVA

3. Ke ku pui pa i difisil pa Nikodemus sigi Jesus?

³ Nikodemus seduba un ŝef importanti di judeus. Ma, un kusa pui pa i difisil pa i disidi sigi Jesus. Jesus prega serka di seis mis, i Nikodemus sibiba ja di kuma Deus ku manda Jesus. (Jon 3:​1, 2) Ma, Nikodemus bai papia ku Jesus oca kau sukuru, pabia i “tenba medu di judeus.” (Jon 7:13; 12:42) Talves i pensaba di kuma, i na pirdi si kargu ku algun parti si rikesa, si i sedu disipulu di Jesus.a

4. Kuma ku Jesus juda Nikodemus ntindi ke ku Deus misti pa i fasi?

⁴ Nikodemus kunsiba Lei di Moisés, ma i pirsisaba di ajuda pa ntindi ke ku Jeova misti pa i fasi. Kuma ku Jesus judal? Jesus staba dispostu pa pasa tempu ku Nikodemus i papia ku el, te mesmu di noti. Tambi Jesus konta di manera klaru ke ku Nikodemus dibi di fasi pa sedu si disipulu: I dibi di ripindi di si pekadus, batisadu na yagu i mostra fe na Fiju di Deus. — Jon 3:​5, 14-21.

5. Kuma ku no pudi juda un studanti di Biblia pa i sibi ke ku sta na tujil sirbi Jeova?

⁵ Mesmu si un studanti kunsi Biblia diritu, talves no na pirsisa di judal pa i sibi ke ku sta na tujil sirbi Jeova. Pur isemplu, i pudi sedu di kuma, si tarbaju ta tomal manga di tempu, o talves si familia ka misti pa i sedu Tustumuña di Jeova. Suma Jesus, toma tempu pa juda bu studanti. Bu pudi kumbidal pa un jumbai o paseiu. Ora ku bo na fasi juntu kusas suma esis, talves i na kontau utrus kusas na si vida, i bu na pudi sibi kal purblemas ki sta na pasa. Nkoraẑa bu studanti pa i fasi kualker mudansas ki pirsis, i ka pa kontentau, ma pa i mostra si amor pa Jeova.

6. Kuma ku no pudi juda un studanti pa i tene koraẑen di sirbi Jeova? (1 Koríntius 16:13)

⁶ Ora ku bu studanti di Biblia tene sertesa di kuma, Jeova na judal fasi ke ki sertu, i na tene koraẑen di aplika ke ki sta na aprindi. (Lei 1 Koríntius 16:13.) Bu funson pudi komparadu ku funson di un pursor. Kal pursor ku bu mas gosta del oca ku bu ta baiba skola? Talves i seduba pursor ku judau ku pasensa tene konfiansa di kuma, bu pudi fasi ke ku bu pirsisa di fasi. Di mesmu manera, un bon instrutor di Biblia ka ta nsina so si studanti ke ku Deus misti pa i fasi, ma tambi i ta judal pa i tene sertesa di kuma i na pudi fasil, pabia Jeova na judal. Kuma ku bu pudi fasil?

JUDA BU STUDANTI PA I AUMENTA SI AMOR PA JEOVA

7. Kuma ku Jesus juda jintis aumenta se amor pa Jeova?

⁷ Jesus sibiba di kuma amor pa Deus na pui pa si disipulus aplika ke ke aprindi. Manga di bias i nsina si disipulus kusas ku na juda elis aumenta se amor pa se Pape ku sta na seu. Pur isemplu, i kompara Jeova ku un pape ku ta da bon kusas pa si fijus. (Mat 7:​9-11) Talves alguns ku staba na sukuta Jesus ka teneba un pape ku ta mostra amor. Imaẑina kuma ke dibi di sinti, oca Jesus konta storia di un bon pape ku risibi mas si fiju ku fasiba manga di kusas mau. Jesus juda es jintis oja di kuma Jeova ama elis ciu, tambi i misti juda elis. — Luk 15:​20-24.

8. Kuma ku bu pudi juda un studanti di Biblia pa i aumenta si amor pa Jeova?

⁸ Bu pudi tambi juda un studanti di Biblia aumenta si amor pa Jeova, ora ku bu na papia sempri di maneras di sedu bonitu di Jeova. Kada bias ku bo na studa, juda bu studanti ntindi kuma ku kusas ki i aprindi ta mostra di kuma Jeova amanu. Ora ku bo na papia aserka di kuma ku Jeova da si Fiju, juda bu studanti pa i ntindi di kuma, Jeova ka fasil so pabia di kuma i ama tudu jintis, ma tambi i fasil pabia i amal. (Rom 5:8; 1 Jon 4:10) Ora ku un studanti di Biblia ntindi kuma ku Jeova amal, kila pudi judal ama Jeova inda mas. — Gal 2:20.

9. Ke ku juda un omi comadu Michael pa i kumsa sirbi Jeova?

⁹ Jubi isemplu di un omi comadu Michael, di Indonesia. I kirsi na bardadi, ma i ka batisadu. Oca i teneba 18 anu, i disa Indonesia pa tarbaja suma kondutor di kamion. Mas tardi, i riba pa Indonesia pa kasa, ma i disa Indonesia utru bias sin si familia, pabia di si tarbaju. Na ki mesmu tempu, si minjer ku si fiju femia kumsa studa Biblia i aplika ke ke aprindi. Dipus ku si mame muri, Michael disidi riba kasa pa kuida di si pape, tambi i seta un studu di Biblia. Kontra e na studa parti “Aprindi mas” na lison 27 di livru Bu Pudi Tene un Vida Filis pa Sempri!, Michael fikaba tokadu dimas. Oca i pensa na kuma ku Jeova fikaba tristi di oja si Fiju na sufri, Michael kumsa ku cora. Tambi oca i ntindi kuma ku Jeova ku Jesus amal ciu dimas, kila tokal ciu, i lebal na muda si vida i batisa.

JUDA BU STUDANTI PA I PUI JEOVA NA PURMERU LUGAR NA SI VIDA

10. Ke ku Jesus fasi pa juda si disipulus pa e pui Jeova na purmeru lugar na se vida? (Lukas 5:​5-11) (Jubi tambi diseñu.)

¹⁰ Purmeru disipulus di Jesus rikuñisiba logu di kuma, Jesus i Mesias ku purmitidu, ma e pirsisaba di ajuda pa pudi pui Jeova na purmeru lugar na se vida. Pedru ku André seduba ja disipulus pa algun tempu, oca Jesus kumbida elis pa e sigil pa tempu kompletu. (Mat 4:​18, 19) E ta tarbajaba juntu ku Tiagu ku Jon, i se nogos staba na bai ben. (Mar 1:​16-20) Ma Pedru ku André para se tarbaju di piska, pa pudi sigi Jesus pa tempu kompletu. Oca e tomaba es disison, talves e fasiba tambi planu pa pudi kontinua sustenta se familia, ora ke na sigi Jesus. Ke ku juda elis pa e pui pregason suma kusa mas importanti di ki ngaña mas diñeru? Jesus fasi un milagri pa mostra elis di kuma, Jeova pudi kuida delis i ka mporta ke ku pudi kontisi. Es juda elis pa e tene sertesa di kuma, Jeova sempri na da elis ke ke pirsisa del, si kontra e pul na purmeru lugar na se vida. — Lei Lukas 5:​5-11.

11. Kuma ku bu pudi usa bu propi spiriensia pa torna fe di bu studanti mas forti?

¹¹ No ka pudi fasi milagris suma ku Jesus fasi, ma no pudi konta spiriensias di kuma ku Jeova juda kilis ku pul na purmeru lugar na se vida. Pur isemplu, sera ki bu lembra di kuma ku Jeova judau, oca ku bu kumsa mati runions? Talves bu pirsisaba di papia ku bu patron i splikal ke ku manda bu pirsisa di para tarbaju mas sedu, pa pudi bai runions. Splika bu studanti kuma ku bu fe torna mas forti, kontra bu oja kuma ku Jeova judau, oca bu disidi pul na purmeru lugar na bu vida.

12. (a) Ke ku manda i bon kumbida diferenti publikaduris pa un studu di Biblia? (b) Kuma ku bu pudi usa videos pa juda bu studanti pa i pui Jeova na purmeru lugar na si vida? Bu pudi da un isemplu.

¹² Tambi i bon ora ku utrus ermons ku irmas konta bu studanti kuma ke fasi mudansas na se vida, pa pudi pui Jeova na purmeru lugar. Pa kila, kumbida diferentis ermons ku irmas pa e kumpañau na un studu di Biblia. Pidi elis pa e splika kuma ke kunsi bardadi, i ke ke fasi pa pui sirvisu di Jeova na purmeru lugar na se vida. Tambi, toma tempu ku bu studanti pa jubi videos ku sta na parti “Aprindi mas”, i ora ki pirsis bo pudi jubi kilis ku sta na parti “Tene mas informason” di livru Bu Pudi Tene un Vida Filis pa Sempri! Pur isemplu, ora ku bo na studa lison 37, bo pudi papia di ke ku faladu na video Jeova na Danu Kil ku No Pirsisa Del, i juda bu studanti oja kuma ku Jeova na judal, ora ki pul na purmeru lugar na si vida.

NSINA BU STUDANTI KE KI I DIBI DI FASI, ORA KU UTRUS STA KONTRA EL

13. Kuma ku Jesus purpara si disipulus pa lida ku pirsigison?

¹³ Manga di bias, Jesus konta si disipulus di kuma e na pirsigidu pa utrus, te mesmu pa se familia. (Mat 5:11; 10:​22, 36) Puku antis di Jesus muri, i konta si disipulus di kuma e pudi matadu, pabia e staba na adora Jeova. (Mat 24:9; Jon 15:20; 16:2) I fala elis pa e toma kuidadu na pregason. Pur isemplu, i fala elis pa e ka diskuti ku kualker algin ku sta na papia kontra ke ke fia nel, i pa e kuida ku ke na papia i fasi, pa e pudi kontinua prega.

14. Kuma ku no pudi juda un studanti di Biblia pa i purpara pa pirsigison? (2 Timótiu 3:12)

¹⁴ Suma Jesus, no pudi splika un studanti ke ku si kolegas di tarbaju, amigus o familia pudi papia o fasi, manera ki sta na studa Biblia. (Lei 2 Timótiu 3:12.) Alguns kolegas di tarbaju pudi gozal, pabia i sta na sforsa pa vivi di akordu ku ke ku Biblia ta nsina. I bon papia aserka di pirsigison mas sedu ku no pudi. Asin, no studanti ka na fika ku surpresa ora ku pirsigison kumsa, tambi i pudi sibi ke ki na fala o fasi, ora ku utrus sta kontra el.

15. Ke ku pudi juda un studanti di Biblia lida ku pirsigison di familia?

¹⁵ Si bu studanti sta na pirsigidu pa si familia, bu pudi falal di kuma i normal, pabia te mesmu alguns di familia di Jesus ka kontentiba ku ke ki staba na fasi. (Mar 3:21; Jon 7:5) Juda bu studanti pa i pensa na pabia ku alguns membrus di si familia paña raiba. Talves si familia pudi pensa di kuma, Tustumuñas di Jeova ta nsina mintida o e sedu mau jintis. Pa kila, nsina bu studanti pa i sedu pasenseru i papia ku bondadi ku si familia i ku utrus.

16. Kuma ku no pudi juda un studanti di Biblia pa i konta ke ki i fia nel ku bondadi i ku rispitu?

¹⁶ Mesmu ora ku membrus di familia di un studanti misti sibi mas aserka di Biblia, i bon pa studanti ka tenta splika elis manga di kusas di un bias. Si i fasil, si familia pudi kansa, i talves e ka na misti obil utru bias. Pa kila, nkoraẑa bu studanti pa i papia di ke ki fia nel di un manera simplis. Asin, si familia na misti sukuta mas utru bias. (Kol 4:6) Talves i pudi kumbida si familia pa e visita site jw.org. Asin, e na pudi aprindi mas aserka di Tustumuñas di Jeova ora ke misti, tambi e na pudi disidi kuantidadi di informason ke misti lei.

17. Kuma ku bu pudi forma un studanti di Biblia, pa i sibi ruspundi purguntas aserka di Tustumuñas di Jeova? (Jubi tambi foto.)

¹⁷ Bu pudi usa parti “Perguntas Frequentes sobre as Testemunhas de Jeová” na jw.org, pa juda bu studanti purpara respostas simplis, pa purguntas ku se familia o kolegas di tarbaju pudi fasi. (2 Tim 2:​24, 25) Na fin di kada lison, usa parti “Alguns jintis ta fala” o “Algin pudi punta” di livru, Bu Pudi Tene un Vida Filis pa Sempri!. Nkoraẑa bu studanti pa i nsaia kuma ki pudi ruspundi na si propi palabras. Si i pirsis, judal pa i sibi kuma ki pudi splika ke ki fia nel di minjor manera. Si bo toma tempu pa nsaia un kombersa, kila na judal pa i pudi difindi si fe ku koraẑen.

18. Kuma ku bu pudi nkoraẑa un studanti di Biblia pa i prega juntu ku kongregason? (Mateus 10:27)

¹⁸ Jesus manda si disipulus pa e bai konta bon noba pa jintis. (Lei Mateus 10:27.) Ora ku un studanti kumsa prega ku kongregason, i na sinti ajuda di Jeova, tambi i na aprindi konfia mas nel. Kuma ku bu pudi juda un studanti pa i tene es objetivu? Ora ku un kampaña di pregason anunsiadu na bu kongregason, nkoraẑa bu studanti pa i pensa na ke ki pirsisa di fasi pa sedu publikadur. Splikal di kuma, i mas fasil prega na mumentu di kampaña. Utru objetivu pudi sedu tambi di kumsa fasi partis na runion di semana. Ora ki sta na sforsa pa yangasa es objetivu, i na aprindi kuma ki pudi splika mas minjor ke ki i fia nel.

MOSTRA KONFIANSA DI KUMA BU STUDANTI MISTI KONTENTA JEOVA

19. Kuma ku Jesus mostra konfiansa na si disipulus, i kuma ku no pudi kopial?

¹⁹ Antis di Jesus muri i antis di i bai pa seu, i konta si disipulus di kuma, e na bin sta juntu. E ka ntindiba di kuma, Jesus staba na fala di kuma e na bai pa seu. Ma, Jesus konsentraba na se fidelidadi, i ka na se duvidas. (Jon 14:​1-5, 8) I sibiba di kuma e pirsisaba di tempu pa ntindi sertus kusas, suma pur isemplu, di bai vivi na seu. (Jon 16:12) Suma Jesus, no pudi mostra no konfiansa di kuma no studantis misti kontenta Jeova.

20. Kuma un irma na Malaui mostra konfiansa na si studanti di Biblia?

²⁰ Tene konfiansa di kuma, bu studanti misti fasi ke ki sertu. Jubi isemplu di un irma na Malaui comadu Chifundo. I kumsa studa Biblia ku un bajuda katoliku comadu Alinafe, na livru Bu Pudi Tene un Vida Filis pa Sempri!. Oca ke kaba studa lison 14, Chifundo punta si studanti ke ki pensa aserka di usa imaẑens na adorason. Alinafe fikaba mal, i falal: “Es i ña propi disison!” Chifundo pensaba di kuma Alinafe na para studa Biblia. Ma, ku pasensa i kontinua studa Biblia ku Alinafe, ku konfiansa di kuma ku tempu, Alinafe na ntindi di kuma i mal usa imaẑens na adorason. Puku misis dipus, Chifundo fasil purgunta ku sta na lison 34: “Disna ku bu kumsa studa Biblia i kunsi bardadi aserka di Jeova Deus, kuma ku kila judau te nes mumentu?” Chifundo konta kuma ku Alinafe ruspundi. I fala sin: “I fala di manga di bon kusas. Un delis i di kuma, Tustumuñas di Jeova ka ta fasi nin un kusa ku Biblia kondena.” I ka tarda, Alinafe para usa imaẑens i staba pruntu pa batisa.

21. Kuma ku no pudi juda un studanti pa i misti sirbi Jeova?

²¹ Mesmu manera ki i Jeova “ku ta da kirsimentu”, no pudi juda un studanti di Biblia pa i aplika ke ki i sta na aprindi. (1 Kor 3:7) No ta fasi mas di ki so nsinal ke ku Deus misti pa i fasi. No ta judal pa i tene amor forti pa Jeova. No ta nkoraẑal tambi pa i mostra si amor pa Jeova, ora ki pul na purmeru lugar na si vida. Tambi no pudi nsinal di kuma, i pudi tene sertesa di kuma Jeova na judal, ora ku utrus sta kontra el. Ora ku no mostra no studanti di Biblia di kuma, no fia di kuma i misti kontenta Jeova, no ta judal pa i tene koraẑen di disidi sirbi Jeova.