Juda logu kilis ku misti aprindi aserka di Deus

1. Kuma ki jintis pudi reaẑi ora ke obi bon noba? (Atus 13:​47, 48; 16:​14, 15)

NA PURMERU sekulu, manga di jintis kontentiba oca e obi mensaẑen aserka di Jesus, i e misti logu torna kristons. (Lei Atus 13:​47, 48a; 16:​14, 15.) Di mesmu manera aos, alguns jintis ta kontenti ora ke obi bon noba pa purmeru bias. Mesmu kilis ku na kumsada ka mostra interesi na mensaẑen di Renu, talves mas tardi e pudi seta. Ke ku no pudi fasi ora ku no oja ‘kilis ku na bardadi sta dispostu’ na no tiritoriu?

2. Di kal manera ku no tarbaju di fasi disipulus parsi ku tarbaju di un labradur?

² Pensa nes isemplu. No tarbaju di fasi disipulus pudi komparadu ku tarbaju di un labradur. Alguns frutas pudi maduru i sta pruntu pa tiradu antis di utrus. Labradur pirsisa di tira ki frutas logu, ma i na kontinua regua i kuida di kilis ku ka maduru inda. Di mesmu manera, ora ku no oja un algin ku seta no mensaẑen, no na judal pa i sedu logu disipulu di Kristu. Na mesmu tempu, no ta kontinua juda kilis ku pirsisa di mas tempu pa oja balur di mensaẑen ke obi. (Jon 4:​35, 36) Ora ku no sibi ba kin ku sta pruntu o nau, no na sibi kal ki minjor manera di juda elis. Nes studu, no na oja ke ku no pudi fasi na purmeru kombersa pa juda kilis ku sta pruntu. No na oja tambi kuma ku no pudi kontinua juda elis sedu amigu di Jeova i sedu si servus.

KUMA KU NO PUDI JUDA KILIS KU MISTI APRINDI ASERKA DI DEUS KU BIBLIA

3. Ke ku no pudi fasi si no kontra ku un algin ku sta interesadu na pregason? (1 Koríntius 9:26)

³ Ora ku no oja jintis ku sta interesadu na pregason, no ta misti juda elis aprindi aserka di Jeova i pertusi mas del. Si i sedu asin, no dibi di kumbida elis studa Biblia i pa e mati runions na purmeru kombersa. — Lei 1 Koríntius 9:26.

4. Konta spiriensia di un algin ku seta logu un studu di Biblia.

⁴ Kumbida algin pa studa Biblia. Alguns ku no ta papia ku el, ta sta logu pruntu pa un studu di Biblia. Pur isemplu, na un kinta-fera, un bajuda na Kanada pertusi di un mostruariu i toma broŝura, Bu Pudi Tene un Vida Filis pa Sempri!. Irma splikal di kuma es broŝura ta usadu pa studu di Biblia sin paga nada. Bajuda sta interesadu i e troka kontaktu ku n̈utru. Mas tardi na ki dia, bajuda manda mensaẑen pa irma i puntal kal dia ke pudi studa. Oca ku irma fala i na bai la na fin di semana, bajuda puntal: “Si bu bin gora amaña? N sta livri.” E studa na sesta. Bajuda mati si purmeru runion na ki fin di semana, i kumsa logu tene amisadi ku Jeova.

5. Ke ku no pudi fasi pa juda un algin ku ka misti inda studa Biblia? (Jubi tambi fotos.)

⁵ Na bardadi, i ka tudu jintis ku na misti studa Biblia logu, suma es bajuda. I ten kilis ku talves na pirsisa di mas tempu. Talves no na pirsisa di purmeru kumsa papia di un asuntu ku na interesa ki algin. Ma si no ka pirdi speransa na ki algin i kontinua mostra interesi pesual nel, na puku tempu, no pudi kumsa studu di Biblia ku el. Ke ku no pudi fala pa kumsa studu di Biblia? Es purgunta fasidu pa manga di ermons ku irmas ku sai ben na kumsa studus di Biblia.

6. Ke ku no pudi fala pa juda un algin oja di kuma studa Biblia na sedu bon pa rel?

⁶ Publikaduris ku pionerus ku puntaduba aserka di kumsa studus, splika di kuma i minjor ivita palabras suma, “studa,” “studu di Biblia,” o “nsinau” ora bu na fala di studu di Biblia. E nota di kuma i mas minjor usa palabras suma “kombersa,” “papia” i “kunsi Biblia.” Pa pui pa un algin misti papia ku bo utru bias, bu pudi falal asin: “Bu na fika dimiradu di sibi di kuma, Biblia tene respostas pa purguntas importanti aserka di vida”, o “Biblia i ka so un livru riliẑiosu; i ta danu ajuda ku no pirsisa del.” Dipus di fala un des palabras, bu pudi falal asin: “Serka di 10 o 15 minutu, bu pudi aprindi un kusa ku na judau na bu vida.” Bu ka pirsisa di usa palabras “na ta bin sempri” o “kada semana,” pabia ki algin pudi sinti obrigadu pa perau.

7. Na kal mumentu ku alguns ta nota pa purmeru bias di kuma, e sta na aprindi bardadi aserka di Biblia? (1 Koríntius 14:​23-25)

⁷ Kumbida elis pa runion. Talves na tempu di apostolu Paulu, alguns nota di kuma e staba na aprindi bardadi oca ke mati runion pa purmeru bias. (Lei 1 Koríntius 14:​23-25.) Mesmu kusa ta kontisi tambi aos. Manga di jintis ta tene amisadi ku Jeova mas rapidu, ora ke kumsa mati runions. Kal tempu ku bu dibi di kumbida elis? Lison 10 di livru Bu Pudi Tene un Vida Filis pa Sempri! tene un konviti pa mati no runions. Ma no ka pirsisa di pera te ora ku no ciga la, pa kumsa kumbida un algin pa runion. Desdi kumsada di purmeru kombersa, bu pudi kumbida ki algin pa runion di fin di semana. Talves bu pudi kontal tema di diskursu publiku, o un pontu di studu di Sintinela.

8. Ke ku no pudi konta un algin, ora ku no na kumbidal pa no runions? (Isaias 54:13)

⁸ Ora ku bu na kumbida un algin interesadu, bu pudi splikal kuma ku no runions sedu diferenti ku manera ke ta fasi na si riliẑion. Oca ku un studanti di Biblia mati studu di Sintinela pa purmeru bias, i punta kin ku ta studa Biblia ku el: “Sera ki diriẑenti kunsi nomi di tudu jintis?” Irma splikal di kuma, no ta sforsa pa kunsi nomi di kilis ku sta na no kongregason, suma manera ku no ta kunsi nomi di membrus di no familia. Studanti fala di kuma, na se igreẑa manga di jintis ka kunsi nomi di n̈utru. No pudi tambi splika ki algin utru kusa ku ta pui no runions sedu diferenti. (Lei Isaias 54:13.) No ta bai runion pa adora Jeova, pa aprindi aserka del i pa nkoraẑa n̈utru. (Eb 2:12; 10:​24, 25) E ku manda no runions ta organizadu pa judanu aprindi, i no ka ta sigi tradisons. (1 Kor 14:40) No kaus di runions i simplis, tambi e fasidu pa torna mas fasil aprindi. Suma no sedu neutru, no ka ta miti boka na pulitika. Tambi no ka ta yentra na diskutisons aserka di asuntus pesual. I pudi sedu di ajuda mostra no studanti video Ke ku Ta Akontisi Na Salon di Renu?, antis di i mati runion. Asin i na sibi ke ki i na bin oja.

9-10. Ora ku no kumbida un algin pa runion, ke ku no pudi kontal pa i ka medi mati? (Jubi tambi foto.)

⁹ Alguns ka ta misti mati runion, pabia e ta medi torna Tustumuña di Jeova. Pa kila, pui pa ki algin sibi di kuma no gosta di risibi visitantis. I pudi so bin i sukuta no runions sin ten ku fala o fasi algun kusa. No gosta di risibi familias, nkluindu kilis ku tene mininus pikininu. Na no runions, mininus ka ta separadu di se papes pa nsinadu. En ves di kila, papes ku se fijus ta sinta juntu i aprindi juntu. Des manera, papes ta sibi nunde ku se fijus sta i ke ke sta na nsinadu. (Lei 31:12) No ka ta pasa sestu o invelopi pa pidi diñeru. En ves di kila, no ta sigi konsiju di Jesus: “Di grasa ku bo risibi; di grasa ku bo na da.” (Mat 10:8) Tambi bu pudi konta ki algin di kuma, i ka pirsisa di bisti ropa karu pa mati runion. Deus ta jubi pa korson, i ka ta jubi kuma ku algin sedu pa fora. — 1 Sam 16:7.

¹⁰ Si un algin mati runion, fasi tudu ku bu pudi pa fasil sinti avontadi. Apresental pa ansions ku utrus ermons ku irmas. Si i sinti di kuma i risibidu diritu, talves i na misti riba mas. Na runion, si i ka tene Biblia, bu pudi mostral versikulus ku sta na leidu, pa i pudi kumpaña diskursu ku sta na fasidu i mostral kuma ku no ta studa juntu.

KE KU BU PUDI FASI ORA KU BU KUMSA UN STUDU DI BIBLIA

11. Kuma ku bu pudi rispita tempu di algin ku bu na studa ku el?

¹¹ Ke ku no dibi di lembra del ora ku no na studa ku un algin? Mostra kuma bu sibi di kuma algin ku bu na studa ku el sta okupadu, tambi i ka tene manga di tempu. Pur isemplu, si bo kombina ora ku bo na studa, bu dibi di sta la na ki ora, mesmu si jintis na bu zona ka ta rispita ora. Alguns ermons ku irmas ku ta studa Biblia ku manga di jintis fala di kuma, i bon kaba studu na ora markadu, mesmu si studanti misti kontinua studa. I importanti tambi pa bu ka papia ciu. Da bu studanti tempu pa i konta ke ki i sta na sinti i ke ki i pensa. — Dit 10:19.

12. Kal ki dibi di sedu no objetivu desdi kumsada di studu di Biblia?

¹² Ora ku no kumsa studa Biblia ku un algin, no misti judal disna di purmeru dia di studu pa i kunsi Jeova ku Jesus i ama elis. Pa fasil, no pirsisa sempri di mostra elis ke ku Biblia fala, en ves di konta elis ke ku no pensa. (At 10:​25, 26) Apostolu Paulu disa un bon isemplu. Ora ki na nsina jintis, i ta konsentraba na Jesus, algin ku Jeova manda pa judanu kunsil i amal. (1 Kor 2:​1, 2) Paulu tambi splika di kuma i importanti juda studantis tene bon maneras di sedu ku komparadu ku uru, prata ku pedras di balur. (1 Kor 3:​11-15) Es maneras di sedu nklui fe, jiresa, ntindimentu ku rispitu pa Jeova. (Sal 19:​9, 10; Dit 3:​13-15; 1 Ped 1: 7) Juda bu studantis di Biblia pa e tene fe forti i tene amisadi forti ku se Pape ku sta na seu i ku ama elis. Asin, bu na kopia manera di nsina di Paulu. — 2 Kor 1:24.

13. Kuma ku no pudi mostra pasensa ku ntindimentu ora ku no na juda un studanti? (2 Koríntius 10:​4, 5) (Jubi tambi foto.)

¹³ Kopia manera ku Jesus ta nsina, ora ku bu na mostra pasensa ku ntindimentu. Ivita fasi purguntas ku na pui studanti pa i ka sta avontadi. Si i ten un asuntu difisil pa studanti ntindi, ka bu kontinua papia del. Ma, kontinua studu i riba pa ki asuntu mas tardi. En ves di tenta forsija un studanti pa i seta un nsinu, dal tempu pa i pensa na ki nsinu i muda si manera di pensa. (Jon 16:12; Kol 2:​6, 7) Biblia kompara nsinus falsu ku no sta na tenta kaba ku el, ku kebra muras forti. (Lei 2 Koríntius 10:​4, 5; jubi nota di studu “demolir fortalezas.”) I pudi sedu difisil pa un studanti di Biblia para fia na un kusa ki fia nel pa manga di tempu. Pa kila, no pirsisa di judal purmeru pa i kumpu nobu mura ku sedu, judal konfia na Jeova. Dipus i na sedu mas fasil pa i kaba ku nsinus forti ki gostaba ciu del. — Sal 91:9.

KUMA KU NO PUDI JUDA UN ALGIN KU BIN MATI RUNIONS

14. Kuma ku no dibi di trata kilis ku bin mati no runions?

¹⁴ Jeova misti pa no trata tudu jintis ku amor i ka mporta kal ki se kultura, si e tene diñeru o nau. (Tiagu 2:​1-4, 9) Kuma ku no pudi mostra amor pa kilis ku bin mati no runions?

15-16. Kuma ku no pudi juda kilis ku bin mati no runions pa e sta avontadi?

¹⁵ Alguns ta mati no runions pabia e misti sibi kuma ku no runions ta fasidu. O e pudi bin pabia un amigu, o un familia ku sedu Tustumuña di Jeova o ku sta na studa Biblia na utru zona, kumbida elis pa e bai runion. Pa kila, ora ku no oja un algin bin mati runion pa purmeru bias, no papia ku el. Risibi elis diritu, ma ka bu fasi kusas ku na pui pa e ka sta avontadi. Kumbida elis pa e sinta pertu di bo. Mostra elis Biblia ku publikasons ku sta na studadu, o da elis el. Tambi pensa na utru kusa ku bu pudi fasi pa e sta avontadi. Un omi ku visitaba Salon di Renu fala un ermon di kuma i burguñu pabia i ka bistiba diritu. Ermon fasil pa i sta avontadi, i splikal di kuma Tustumuñas di Jeova i jintis normal. Ki omi bin batisa mas tardi, ma nunka i diskisi kuma ku ki ermon fasil sinti avontadi. Ma, ora ku no na mostra interesi pesual pa kilis ku bin mati runion, no dibi di kuida pa ka fasi purguntas ku na pudi pui pa e ka sta avontadi, o fasi purguntas pesual dimas. — 1 Ped 4:15.

¹⁶ No pudi pui tambi pa kilis ku bin mati no runions pa e sta avontadi di utru manera. Pur isemplu, no misti mostra rispitu na no kombersas, komentarius ku partis di runion ku na fala di kilis ku ka sedu Tustumuñas di Jeova, o aserka di ke ke fia nel. Ivita usa palabras ku na pui pa e fika mal o ku na pui pa e ka misti riba mas. (Titu 2:8; 3:2) Pur isemplu, no ka dibi di papia ku falta di rispitu di kusas ke fia nel. (2 Kor 6:3) Ermons ku ta fasi diskursus publiku pirsisa di toma manga di kuidadu nes asuntu. E ta mostra tambi di kuma e sta na pensa na kilis ku ka sedu Tustumuñas di Jeova, ora ke ta splika palabras ku ki jintis ka na ntindi.

17. Kal ki no objetivu na pregason, ora ku no oja kilis ku ‘sta dispostu’?

¹⁷ No tarbaju di fasi disipulus sta na torna mas urẑenti kada dia ku na pasa. Tambi no na kontinua buska kilis ku sta “dispostu pa tene vida ku ka ta kaba.” (At 13:48) Ora ku no na fasil, no ka dibi di tene duvida pa kumsa studa ku elis o kumbida elis pa runions. Si no fasil, no pudi juda elis kumsa yanda na kamiñu “ku ta bai pa vida.” — Mat 7:14.