Kontinua aprindi di nsinus basiku di Biblia

1. Kuma ku nsinus di Biblia afetau oca ku bu kumsa kunsi bardadi?

NSINUS basiku di Biblia muda no vida. Pur isemplu, oca ku no aprindi di kuma nomi di Deus i Jeova, no kumsa ku sedu si amigu. (Isa 42:8) Oca ku no aprindi ke na bardadi ku ta kontisi ku kilis ku muri, no para preokupa si kontra jintis ku no ama ku muri sta na sufri. (Ekl 9:10) Oca ku no aprindi di kuma Deus purmiti Paraísu li na Tera, no para tene medu di ke ku na bin kontisi na futuru. No tene konfiansa di kuma no ka na vivi so pa puku tempu, 70 o 80 anu, ma no na vivi pa sempri. — Sal 37:29; 90:10.

2. Kuma 2 Pedru 1:​12, 13 mostra di kuma te mesmu kristons maduru benefisia di nsinus basiku di Biblia?

² Nunka no ka dibi di diskisi di importansia ku nsinus basiku di Biblia tene. Na si sugundu karta, apostolu Pedru skirbi pa kristons ku staba ‘firmi na bardadi.’ (Lei 2 Pedru 1:​12, 13.) Ma na ki tempu, i tenba mau jintis na kongregason ku mistiba disvia ermons di bardadi. (2 Ped 2:​1-3) Pedru mistiba fortalisi si ermons ku irmas pa e pudi risisti es ameasa ku tenba. Pa fasi kila, i lembranta elis alguns nsinus ke aprindiba ja. Es nsinus na judaba elis kontinua fiel te na fin.

3. Pabia ku tudu kristons dibi di kontinua pensa fundu na nsinus basiku di Biblia? Bu pudi da un isemplu.

³ Mesmu si no fasija manga di anus na bardadi, no pudi aprindi lisons di nsinus basiku di Biblia. Pensa nes isemplu: Un mame ku sibi kusiña, el ku si fiju e pudi usa mesmu ingridientis pa kusiña sopa di ligumis. Ma suma es mame tene spiriensia i aprindi usa es mesmu ingridientis pa kusiña utru tipu di kumida sabi. Di mesmu manera, kin ku sirbi Jeova pa manga di tempu ku kin ku kumsa na studa Biblia pudi oja nsinus basiku di Biblia di diferenti manera. Desdi tempu ku no batisa te gosi, i pudi sedu ki no situason o privileẑiu na sirvisu di Jeova muda. Ora ku no pensa na nsinus di Biblia ku no aprindi na pasadu, kila pudi judanu oja utru manera di aplikal na no vida. No jubi ke ku un kriston maduru pudi aprindi di 3 nsinus basiku di Biblia.

JEOVA KU KUMPU TUDU KUSA

4. Kuma ku sibi di kuma Jeova ku kumpu tudu kusa ta afetanu?

⁴ “Kin ku kumpu tudu kusa i Deus.” (Eb 3:4) No sibi di kuma Tera ku tudu kusa ku tene vida, kumpudu pa un algin jiru dimas i ku ten tudu puder. Suma i El ku kumpunu, i kunsinu diritu. Alen di kila, i ta preokupa ku nos. I sibi ke ki minjor pa nos. Sibi des bardadi simplis, di kuma Jeova ku kumpu tudu kusa muda no vida di manga di manera, tambi i pui no vida tene sintidu.

5. Kal bardadi ku pudi judanu sedu umildi? (Isaias 45:​9-12)

⁵ Sibi di kuma Jeova ku kumpu tudu kusa pudi nsinanu sedu umildi. Oca Jo konsentra na si kabesa i na utrus jintis, Jeova lembrantal di kuma El ku kumpu tudu kusa i El tambi ku ten tudu puder. (Jo 38:​1-4) Es juda Jo oja di kuma, kamiñu di Jeova i mas altu di ki di pekaduris. Di mesmu manera, profeta Isaias skirbi asin: “Nta lama na bin punta si kumpudur: ‘Ke ku bu na kumpu?’” — Lei Isaias 45:​9-12.

6. Na kal mumentu ku no pudi pensa na pusison garandi ku Jeova tene suma kil ku kumpu tudu kusa? (Jubi tambi fotos.)

⁶ Un algin ku sirbi Jeova pa manga di anus pudi kumsa ku konfia ciu na si manera di pensa, en ves di konfia na Jeova i sigi orientason ku sta na si Palabra. (Jo 37:​23, 24) Pa kila, ke ku pudi juda ki algin pensa na jiresa ku puder garandi ku Jeova tene di kumpu tudu kusa? (Isa 40:22; 55:​8, 9) Es bardadi basiku, na judal kontinua sedu umildi i kuriẑi si manera di pensa.

7. Ke ku Rahela fasi pa seta mudansa na organizason?

⁷ Rahela ku mora na Slovenia oja di kuma, pensa fundu na kin ku Kumpul, judal seta mudansa na organizason di Jeova. I fala sin: “Utrora i ka ta sedu fasil pa N seta disisons di kilis ku ta toma diantera. Pur isemplu, mesmu dipus ku N jubi Atualizason ku Fasidu pa Korpu Guvernanti na 2023 — N.° 8, N fika mal dimas oca ku N oja pa purmeru bias, un ermon na fasi diskursu ku kabelu di barba. Pa kila, N ora Jeova pa i judan seta es mudansa.” Rahela rikuñisi di kuma Jeova kil ku kumpu seu ku Tera, sibi diritu kuma ki na gia si organizason na bon kamiñu. Si sedu difisil pa bu seta un nobu ntindimentu o un nobu orientason, ku umildadi pensa fundu na jiresa garandi ku puder ku kin ku kumpunu tene. — Rom 11:​33-36.

PABIA KU DEUS PIRMITI SUFRIMENTU

8. Kal benefisiu ku no tene di sibi pabia ku Deus pirmiti sufrimentu?

⁸ Pabia ku Deus pirmiti sufrimentu? Kilis ku ka konsigi oja resposta des purgunta paña raiba di Deus, i e ciga konkluson di kuma Deus ka ten! (Dit 19:3) Ma pa kontrariu, bu aprindi di kuma pekadu ku imperfeison ku no yarda ku ta punu sufri, i ka Jeova. No aprindi tambi di kuma pasensa di Jeova pa pekaduris, pirmiti pa milyons di pekaduris kunsil i pa elis propi e oja kuma ku Jeova na bin kaba ku sufrimentu di un bias pa sempri. (2 Ped 3:​9, 15) Es bardadis ta konsolanu, tambi i ta pertusinu del.

9. Na kal situasons ku no mas na pirsisa di lembra di motivus ku pui Deus pirmiti sufrimentu?

⁹ Nkuantu no na pera pa Jeova kaba ku sufrimentu no pirsisa di sedu pasienti. Ma ora ku anos o kilis ku no ama sta na pasa un situason difisil, un injustisa, o mortu di algin ku no ama, no pudi pensa di kuma Jeova sta na tarda pa kaba ku sufrimentu. (Aba 1:​2, 3) Ora ku no sinti des manera, i na sedu bon pa no pensa na motivus ku pui Jeova pirmiti sufrimentu.a (Sal 34:19) No pudi tambi pensa na intenson di Deus di bin kaba ku sufrimentu di un bias pa sempri.

10. Ke ku konsola Anne dipus di mortu di si mame?

¹⁰ Sibi pabia ku Deus pirmiti sufrimentu ta judanu nguenta situasons difisil. Anne ku mora na ilia di Mayoti, na Osianu Indiku, fala sin: “Oca ku ña mame muri alguns anus atras, N fika tristi dimas. Ma sempri N ta lembranta ña kabesa di kuma, i ka Jeova ku punu na sufrimentu. I tene vontadi garandi di kaba ku tudu no sufrimentu i lantanda kilis ku no ama ku muri. Pensa fundu nes bardadis ta konsolan di un manera ku N ka pudi imaẑina.”

11. Kuma ku sibi motivu ku pui Jeova pirmiti sufrimentu pudi judanu kontinua prega?

¹¹ Sibi bardadi aserka di pabia ku Jeova pirmiti sufrimentu pudi judanu kontinua prega. Dipus ku Pedru splika di kuma pasensa di Jeova signifika salvason pa kilis ku ripindi, i fala sin: “Kal koldadi jinti ku bo dibi di sedu? Bo dibi di tene vida limpu, son pa Deus”. (2 Ped 3:11) No tarbaju di pregason i un di maneras ku no pudi mostra di kuma no tene un “vida limpu, son pa Deus”. Suma no Pape, no tene amor pa jintis. No misti pa e vivi na nobu mundu di Deus. Jeova i pasienti, i da jintis di no tiritoriu oportunidadi di adoral. Es i un oportunidadi garandi ku bu tene di tarbaja juntu ku Deus, i juda manga di jintis kunsil antis di fin ciga! — 1 Kor 3:9.

NO STA NA VIVI NA TEMPU DI FIN

12. Kal benefisiu ku no tene di sibi di kuma no sta na vivi na tempu di fin?

¹² Biblia konta di manera izatu kuma ku jintis na sedu na tempu di fin. (2 Tim 3:​1-5) Basta so no jubi nunde ku no sta, no na oja klaru di kuma es profesia sta na kumpri. Ora ku no oja kuma ku komportamentu di jintis sta na piora, kila mas ta konvensidu di kuma Palabra di Deus i di konfiansa. — 2 Tim 3:​13-15.

13. Kuma ku komparason di Jesus ku sta na Lukas 12:​15-21 pudi judanu?

¹³ Sibi di kuma no sta na vivi na tempu di fin, ta judanu usa no tempu ku jiresa. No pudi aprindi pabia ku es i importanti atraves di komparason di Jesus ku sta na Lukas 12:​15-21. (Lei.) Pabia ku omi riku comadu di “tulu“? I ka pabia di kuma omi seduba riku, ma i pabia di kuma i ka daba prioridadi pa kusa mas importanti. I junta “rikesa pa si kabesa, ma i ka riku dianti di Deus.” Omi fasi un eru garandi manera ki ka usa si tempu ku jiresa, i gosi i ka tene ciu tempu pa vivi. Deus falal: “E di noti li bu ten ku ntrega bu vida.” Suma es mundu mau pertu kaba, no pudi punta no kabesa: ‘Sera ki objetivus ku N tene ta mostra di kuma N sta na usa ña tempu ku jiresa? Kal tipu di objetivus ku N sta na juda ña fijus tene? Sera ki N ta usa ña forsa, ña tempu ku ña diñeru pa junta rikesa pa ña kabesa o pa junta rikesa na seu?’

14. Suma ku no oja na spiriensia di Miki, pabia ki importanti lembra di kuma no sta na vivi na tempu di fin?

¹⁴ Ora ku no lembra di kuma, na bardadi no sta na vivi na tempu di fin kila pudi judanu usa no vida di minjor manera. I kila propi ku kontisi ku un irma comadu Miki. I fala sin: “Oca ku N kaba liseu, N staba na pensa fasi formason pa studa limarias. Tambi N teneba objetivu di sedu pioneru regular i sirbi nunde ki tenba mas nesesidadi. Ermons ku irmas maduru falan pa N pensa diritu, si kontra N na pudi fasi ki formason ku N misti i na mesmu tempu sedu pioneru i sirbi nunde ki ten mas nesesidadi. E lembrantan di kuma es mundu pertu kaba. Pa utru ladu, na nobu mundu, N na bin tene tempu ku N pirsisa del pa studa limarias. Asin, N disidi kuji utru formason pratiku ku ka na leban manga di tempu. Es pirmitin oca un tarbaju ku judan sustenta ña kabesa na sirvisu di pioneru, i mas tardi N bai pa Ekuador, nunde ki ten mas nesesidadi.” Gosi, Miki ku si omi sta na sirbi na sirkuitu na Ekuador.

15. Kuma ku isemplu di Tiagu ta judanu oja pabia ku no ka dibi di disisti di jintis ku ka mostra inda interesi pa bon noba? (Jubi tambi fotos.)

¹⁵ No ka dibi di disanima si na kumsada jintis ka mostra interesi na bon noba. Jintis pudi muda. Jubi isemplu di Tiagu ermonsiñu di Jesus. I oja si ermon garandi kirsi, i torna Mesias i nsina utrus di un manera ku nin un pekadur ka ciga di nsina. Ma pa manga di anus, Tiagu ka seduba inda sigidur di Jesus. So dipus ku Jesus lantandadu di mortu, ku Tiagu torna un disipulu zelosu di Jesus!b (Jon 7:5; Gal 2:9) I bon pa ka no disisti di no familias ku ka mostra inda interesi pa bardadi, o disisti di fasi rivisita di kilis ku ka seta obi mensaẑen di Renu. Lembra di kuma no sta na vivi na tempu di fin, pa kila i importanti dimas kontinua prega. Mas tardi, jintis pudi bin pensa na ke ku no fala elis, i aẑi di akordu ku kila, mesmu dipus ku garandi tribulason kumsa.c

KONTINUA DA BALUR PA LEMBRETIS DI JEOVA

16. Kuma ku lembretis di Jeova benefisiau? (Jubi tambi kuadru “Usa bardadis di Biblia pa juda utrus.”)

¹⁶ Alguns informasons basiadu na Biblia ku no organizason ta pruduzi, ta fasidu pa juda jintis ku ka muitu kunsi Biblia. Pur isemplu, no diskursus publiku, alguns artigus ku videos na jw.org ku no rivistas pa publiku fasidu spesialmenti pa juda kilis ki ka Tustumuñas di Jeova. Mesmu asin, no ta benefisia des lembretis. E ta aumenta no amor pa Jeova, e ta fortalisi no fe na si Palabra, i e ta judanu minjoria no manera di nsina jintis bardadis basiku di Biblia. — Sal 19:7.

17. Na kal situasons ki bon pa bu pensa na nsinus basiku di Biblia?

¹⁷ Suma Tustumuñas di Jeova, no ta kontenti dimas ora ku no risibi un nobu ntindimentu di un bardadi di Biblia. Ma no kontenti tambi, pa bardadis importanti di Biblia ku no aprindiba i ku judanu pertusi di Deus. Suma ku no ojaba, es bardadis pudi inda judanu. Ora ku no risibi un orientason di organizason, i no pensa di kuma no opinion o no manera di fasi i minjor, umildadi na judanu lembra di kuma Jeova ku sta na gia si organizason. El i un Deus jiru, ku kumpu tudu kusa i ku ten tudu puder. Ora ku anos o algin ku no ama sta na pasa algun difikuldadi, no pudi sedu pasienti i pensa na motivu ku pui Jeova pirmiti sufrimentu. I ora ku no na disidi kuma ku no na usa no tempu ku no diñeru, no pudi lembra di kuma no sta na vivi na tempu di fin i ka na tarda fin na ciga. Pa lembretis di Jeova kontinua judanu sedu jiru i sirbil ku fidelidadi.