Sera ki bu pudi rapara bardadi?

1. Kuma ku bu ta oja bardadi?

POVU di Jeova ama bardadi ku sta na Palabra di Deus. No fe basia nel. (Rom 10:17) No fia di kuma Jeova pui kongregason kriston suma “kuluna ku firkija di bardadi.” (1 Tim 3:15) I no ta kontenti di sta bas di ‘no pastoris’ ku ta splikanu bardadis ku sta na Biblia i ku ta danu orientason ku sta di akordu ku vontadi di Deus. — Eb 13:17.

2. Di akordu ku Tiagu 5:​19, kal pirigu ku no pudi pasa dipus di kunsi bardadi?

² No pudi disviadu, mesmu dipus di no kunsi bardadi i no seta di kuma no pirsisa di sigi orientason di organizason di Deus. (Lei Tiagu 5:19.) Ke ku Satanas mas misti, i fasinu pirdi konfiansa na Biblia i na orientason ku no ta risibi di organizason di Deus. — Ef 4:14.

3. Pabia ku no pirsisa di pega bardadi? (Efésius 6:​13, 14)

³ Lei Efésius 6:​13, 14. I ka na tarda, Satanas na usa mintida garandi pa konvensi tudu nasons pa e lanta kontra Jeova. (Apok 16:​13, 14) No pudi spera tambi di kuma, Satanas na aumenta si sforsu pa ngana povu di Jeova. (Apok 12:9) Pa kila, i importanti pa no sibi diferensia bardadi ku mintida, i pa no obdisi bardadi. (Rom 6:17; 1 Ped 1:22) No pirsisa di fasi es, pa pudi salba na garandi tribulason!

4. Ke ku no na bin fala del nes studu?

⁴ Nes studu, no na bin fala di dus maneras di sedu ku pudi judanu rapara bardadi ku sta na Biblia i seta orientason ku ta bin di organizason di Deus. Dipus, no na fala di tris kusas ku pudi judanu kontinua pega na bardadi.

MANERAS DI SEDU KU NO PIRSISA DEL PA RAPARA BARDADI

5. Kuma ku rispitu pa Jeova pudi judanu rapara bardadi?

⁵ Rispitu pa Jeova. Ora ku no tene rispitu pa Jeova, no ta tene un amor garandi pa rel, ku na tujinu fasi kualker kusa ku ka na kontental. No tene vontadi garandi di sibi diferensa entri ben ku mal, i entri bardadi ku mintida, pa pudi kontenta Jeova. (Dit 2:​3-6; Eb 5:14) Nunka no ka dibi di disa pa medu di omi sedu mas garandi di ki no amor pa Jeova, pabia manga di bias, ke ku ta kontenta pekaduris ka ta kontenta Jeova.

6. Kuma ku medu di omi leba 10 ŝefis israelita na tursi bardadi?

⁶ Si medu ku no tene pa omi mas garandi di ki pa Deus, kila pudi bin lunjusinu di bardadi. No jubi isemplu di 12 ŝefis israelita ku bai spiona tera ku Jeova purmitiba da israelitas. Pa 10 di ki spions, medu ke teneba di kananeus i mas garandi di ki amor ke tene pa Jeova. E fala se kumpañeris israelita: “No ka pudi bai kontra ki pobu, pabia elis e mas ten forsa di ki nos.” (Num 13:​27-31) Na manera di oja di pekaduris, kananeus mas tene forsa di ki israelitas, es i un parti di bardadi. Ma kualker algin ku fala di kuma israelitas ka na pudi ngaña se inimigus, si dunu ka konfiaba na Jeova. Es 10 spions dibi di konsentra na ke ku Jeova misti pa israelitas fasi. Tambi e dibi di pensaba fundu na kusas ku Jeova fasiba pa relis nin i ka tarda. Asin e na nota di kuma puder di kananeus i ka nada, si komparadu ku puder mas garandi di Jeova. Diferenti di ki spions ku ka seduba fiel, Josué ku Kalebi mistiba kontenta Jeova. E fala povu asin: “Si SIÑOR sta kontenti ku nos i na lebanu pa ki tera riku ku ta pruduzi ciu, i na danu el.” — Num 14:​6-9.

7. Kuma ku no pudi aumenta no rispitu pa Jeova? (Jubi tambi diseñu.)

⁷ Pa pudi aumenta no rispitu pa Jeova, no pirsisa di pensa na ke ku na kontental, kada bias ku no na toma un disison. (Sal 16:8) Ora ku bu na lei un storia di Biblia, punta bu kabesa: ‘Si N staba na ki situason, kal disison ku N na tomaba?’ Pur isemplu, imaẑina kuma bu sta na obi 10 ŝefis di Israel ku na fala di kuma israelitas ka na konsigi ngaña kananeus. Sera ki bu na fia na ke ke fala i medi omi, o bu amor pa Jeova ku bu diseẑu di kontental na sedu mas forti di ki medu di omi? Tudu israelitas ka fiaba di kuma ke ku Josué ku Kalebi na falaba i bardadi. Pa kila, e pirdi oportunidadi di yentra na Tera di Purmesa. — Num 14:​10, 22, 23.

8. Kal maneras di sedu ku no dibi di sforsa ciu pa tene, i pabia di ke?

⁸ Umildadi. Jeova ta konta bardadi pa jintis umildi. (Mat 11:25) Ku umildadi, no seta ajuda pa aprindi bardadi. (At 8:​30, 31) Ma, no dibi di toma kuidadu pa ka sedu orgulyosu. Si no sedu orgulyosu, no pudi kumsa ku pensa di kuma, no propi opinions sta sertu, suma ku prinsipius di Biblia ku orientasons di organizason di Jeova ta sta sertu.

9. Kuma ku no pudi kontinua sedu umildi?

⁹ Pa kontinua sedu umildi, no pirsisa di lembra kuma ku no sedu pikininu si no komparadu ku Jeova. (Sal 8:​3, 4) No pudi tambi pidi Jeova pa i judanu sedu mas umildi i fasil di sedu nsinadu. No ta aprindi manera di pensa di Jeova na si Palabra ku si organizason. Jeova na judanu pui si manera di pensa riba di no manera di pensa. Na bu leitura di Biblia, jubi kusas ku ta mostra di kuma, Jeova gosta di umildadi i odia orgulyu ku yalsa kabesa. Tambi si bu risibi responsabilidadi ku na dau sertu otridadi o pui pa bu ojadu, toma manga di kuidadu pa kontinua sedu umildadi.

KUMA KU NO PUDI KONTINUA PEGA BARDADI

10. Ba kin ku Jeova usa pa da instruson ku orientason pa si povu?

¹⁰ Kontinua konfia na orientason ku organizason di Jeova ta da. Na antigu Israel, Jeova usa Moisés dipus i usa Josué pa e da instrusons pa si povu. (Jos 1:​16, 17) Israelitas ta bensuaduba ora ke oja es omis suma representantis di Jeova Deus. Oca kongregason kriston formadu pa purmeru bias, 12 apostolus ta daba orientasons. (At 8:​14, 15) Dipus, i buridu nes grupu utrus ansions na Jerusalen. Oca kongregasons sigi orientasons ke risibi des omis fiel, “igreẑas fika e na bida mas forti na fe; kada dia e na aumenta na numeru.” (At 16:​4, 5) Na no tempu, no ta bensuadu ora ku no sigi orientasons di organizason di Jeova. Ma kuma ku Jeova na sinti si no nega rikuñisi kilis ki kuji pa toma diantera? No pudi ruspundi es purgunta, ora ku no jubi ke ku kontisi oca israelitas staba kuas pa yentra na Tera di Purmesa.

11. Ke ku kontisi ku israelitas ku rebela kontra Moisés, algin ku Jeova kuji pa toma diantera? (Jubi tambi diseñu.)

¹¹ Oca israelitas na bai pa Tera di Purmesa, omis ku rispitadu lanta kontra Moisés i e ka kontentiba ku funson ku Jeova dalba. E fala asin: “Tudu e pobu [i ka so Moisés] i sagradu, kada un delis! SIÑOR sta na se metadi.” (Num 16:​1-3) I bardadi di kuma na ujus di Deus “tudu e pobu” i sagradu, ma Jeova kujiba Moisés pa i toma diantera na metadi di si povu. (Num 16:28) Manera ke kritikaba Moisés, na bardadi es rebeldis staba na kritikaba Jeova. E ka konsentraba na ke ku Jeova misti, ma e konsentraba na ke ke misti, ku sedu, e mistiba mas puder ku nomi. Deus mata ŝefis di rebelion juntu ku manga di kilis ku apoia elis. (Num 16:​30-35, 41, 49) Aos tambi, no pudi tene sertesa di kuma Jeova ka ta kontenti ku kilis ku ka ta rispita orientasons ku si organizason ta da.

12. Pabia ku no pudi kontinua konfia na organizason di Jeova?

¹² No pudi kontinua konfia na organizason di Jeova. Ora ki torna klaru di kuma, un mudansa pirsisa di fasidu na no ntindimentu di un bardadi di Biblia, o na manera ku no tarbaju di Renu ta organizadu, Korpu Guvernanti ka ta medi fasi mudansas ki pirsis. (Dit 4:18) E ta fasi es, pabia ke ku mas importanti pa relis i kontenta Jeova. Tambi e ta fasi se minjor pa basia se disisons na Palabra di Deus, ku sedu un isemplu ku tudu servus di Jeova dibi di sigi.

13. Ke ki isemplu di “palabra di bardadi” i ke ku no dibi di fasi ku el?

¹³ “Pega tesu na palabra di bardadi ku N nsinau, pabia i isemplu pa bo.” (2 Tim 1:13) Isemplu di “palabra di bardadi” na rifiri nsinus kriston ku sta na Biblia. (Jon 17:17) Es nsinus i basi di tudu ke ku no fia nel. Organizason di Jeova nsinanu pa no tene sertesa di kuma ke ku no fia nel, basia nes isemplu di “palabra di bardadi”. Si no fasil, no na sedu proteẑidu na sintidu spiritual.

14. Kuma ku alguns kristons para pega isemplu di “palabra di bardadi”?

¹⁴ Ke ku na kontisi si no para pega isemplu di “palabra di bardadi”? Jubi un isemplu. Na purmeru sekulu, alguns kristons staba na spalia storias falsu di kuma, dia di Jeova ciga ja. Talves i ten un karta ku jintis pensa di kuma, i skirbidu pa apostolu Paulu ku fala des. Alguns kristons na Tesalónika fia nes storias falsu, i te mesmu e kumsa ku spalia es storias, sin toma tempu pa jubi provas. E ka na nganaduba si e lembra di ke ku Paulu nsinaba oca i staba ku elis. (2 Tes 2:​1-5) Paulu konsija si ermons pa ka e fia na tudu ke ke obi. Tambi pa bin juda elis mas tardi, Paulu kabanta si sugundu karta pa Tesalonisensis ku es palabras: “N skirbi es ku ña mon propi: Manteña di Paulu. Es i manera ku N ta sina tudu karta. I asin ku N ta skirbi.” — 2 Tes 3:17.

15. Kuma ku no pudi proteẑi no kabesa kontra mintidas ku parsi sedu bardadi? Bu pudi da un isemplu. (Jubi tambi fotos.)

¹⁵ Ke ku no pudi aprindi di palabras di Paulu pa kristons di Tesalónika? Ora ku no obi un kusa ku ka sta di akordu ku ke ku no aprindi na Biblia, o obi un storia interesanti dimas, no pirsisa di mostra jiresa. Na antigu Union Sovietiku, jintis di guvernu da ermons un karta ku parsi di kuma i bin di sedi mundial. Karta nkoraẑa ermons pa e forma un grupu separadu ku ka na dipindi di organizason. Karta parsi seduba di bardadi. Ma ermons fiel ka nganadu. E notaba di kuma ke ku sta na ki karta i ka mesmu ku ke ke aprindiba. Aos tambi, inimigus di bardadi ta usa internet ku redi sosial pa punu duvida i dividinu. En ves di “bulbuli dipresa na [no] pensamentu”, no pudi proteẑi no kabesa, ora ku no na jubi diritu si kontra ke ku no obi o lei, sta di akordu ku bardadis ku no aprindiba ja. — 2 Tes 2:2; 1 Jon 4:1.

16. Di akordu ku Romanus 16:​17, 18, ke ku no dibi di fasi si alguns disvia di bardadi?

¹⁶ Kontinua sedu unidu ku kilis ku sedu fiel pa Jeova. Deus misti pa no adoral di manera unidu. No na sedu unidu ora ku no kontinua pega bardadi. Kualker algin ku spalia informason ku sta kontra bardadi ta tisi divison dentru di kongregason, pa kila, Deus avinu pa no “lunjusi delis”. Si no ka fasil, no pudi disvia di bardadi. — Lei Romanus 16:​17, 18.

17. Kal benefisius ku no na tene si no rapara bardadi i no pegal risu?

¹⁷ Ora ku no rapara bardadi i no pegal risu, no na kontinua sedu amigu di Jeova i tene fe forti. (Ef 4:​15, 16) No ka na nganadu pa nsinus ku storias falsu di Satanas, i no na kontinua sta suguru na mon di Jeova na garandi tribulason. Bo kontinua pega risu na bardadi i “Deus ku ta da pas ta sta ku bos.” — Fil 4:​8, 9.