Kuma ku no pudi ngaña luta kontra diseẑus ku ka bali

1. Ke ku ta kontisi ku tudu umanus imperfeitu?

SERA ki bu ciga ja di tene diseẑu di fasi algun kusa ku Jeova ka gosta del? Si resposta i sin, ka bu disanima. Biblia fala sin: “Tudu koldadi tentason ku bin pa bos i suma di tudu jinti.” (1 Kor 10:13) Es signifika di kuma, kualker diseẑu mau ku bu tene, utrus tenel tambi. Abo i ka uniku, ma ku ajuda di Jeova, bu pudi ngaña luta kontra diseẑus ku ka bali.

2. Kal tipu di tentasons ku alguns ermons ku irmas ku studantis di Biblia ta luta ku el? (Jubi tambi fotos.)

² Biblia fala tambi asin: “Kada un i tentadu ora ku si propi diseẑu mau na jundal, i na ngodal.” (Tiagu 1:14) Es versikulu ta judanu ntindi di kuma diferentis jintis pudi tentadu pa diferenti kusas. Pur isemplu, un ermon o irma pudi tentadu pa fasi pekadu seksual ku algin di utru seksu o ku algin di mesmu seksu. Kilis ku paraba jubi pornografia pudi tentadu pa torna jubi mas pornografia. Manga di kilis ku paraba usa droga o cami pudi torna tene mas diseẑu di fasil. Es i alguns diseẑus ku alguns ermons ku irmas ku studantis di Biblia ta luta ku el. Na algun mumentu di no vida, anos tudu no sinti suma apostolu Paulu ku fala sin: “Nin ku N misti fasi ben, mal sta na mi.” — Rom 7:21.

3. Ke ku un algin pudi kumsa ku pensa, si tarda ja na luta kontra un diseẑu ku ka bali?

³ Si bu tarda ja na luta kontra un diseẑu ku ka bali, bu pudi pensa di kuma bu ka na tene forsa pa fasi ke ki sertu. Bu pudi sinti tambi di kuma bu sta sin speransa, suma si Jeova ka na pirmitiu tene vida ku ka ta kaba pabia di bu mau diseẑu. Tene sertesa di kuma nin un des maneras di pensa i ka bardadi! Es studu na judanu sibi pabia ku es ideias i ka bardadi. I na ruspundi es dus purguntas: (1) Kin ku misti pa no tene es pensamentu? (2) Kuma ku bu pudi ngaña luta kontra diseẑus ku ka bali?

KAL SENTIMENTUS KU SATANAS MISTI PA NO TENE

4. (a) Pabia ku Satanas misti pa no pensa di kuma no ka pudi luta kontra diseẑus ku ka bali? (b) Pabia ku no pudi tene sertesa di kuma no pudi luta kontra diseẑus ku ka bali?

⁴ Satanas misti pa no pensa di kuma no ka pudi luta kontra diseẑus ku ka bali, ora ku no tentadu. Oca Jesus na nsina si sigiduris ora, i rikuñisi di kuma Satanas na tentanu. I fala elis pa e ora asin: ‘Ka bu lebanu pa probason, ma libranu di ki algin malvadu.’ (Mat 6:13) Satanas fala di kuma pekaduris ka na obdisi Jeova ora ke tentadu. (Jo 2:​4, 5) Pabia ku Satanas pensa des manera? Satanas seduba purmeru algin ku lebadu pa si propi diseẑu, i ka mistiba kontinua fiel pa Jeova. Talves i pensa di kuma no sedu suma el, no na bandona Jeova ora ku no tentadu. Te mesmu Satanas pensa di kuma, Fiju perfeitu di Deus pudi kai na tentason! (Mat 4:​8, 9) Ma pensa nes: Sera ki na bardadi no ka tene forsa di luta kontra diseẑus ku ka bali? Klaru ki no tene! No sta di akordu ku apostolu Paulu ku fala: “Deus ku ta tarbaja na bos pa da bos diseẑu ku puder pa kumpri si bon vontadi.” — Fil 2:13.

5. Kuma ku no sibi kuma Jeova tene konfiansa di kuma no pudi ngaña luta kontra diseẑus ku ka bali?

⁵ Diferenti di Satanas, Jeova sibi di kuma no pudi luta kontra diseẑus ku ka bali. Kuma ku no sibi kila? Pabia Jeova fala di kuma un garandi multidon di jintis ku kontinua fiel pa rel, na salva na garandi tribulason. Pensa na ke ku es signifika. Jeova, Deus ku ka ta konta mintida, fala kuma un multidon di jintis na yentra na Paraísu, e na “bisti ropa kumpridu branku”, es signifika di kuma Jeova oja elis suma jintis limpu. (Apok 7:​9, 13, 14) Sin duvida, Jeova sibi di kuma no pudi luta kontra diseẑus ku ka bali.

6-7. Pabia ku Satanas misti pa no pensa di kuma no ka pudi luta kontra diseẑus ku ka bali?

⁶ Satanas misti pa no pensa di kuma suma no tene diseẑus ku ka bali, Jeova ka na pirmitinu tene vida ku ka ta kaba. Pabia ku Satanas pensa des manera? I Satanas propi ku ka na tene vida ku ka ta kaba, pabia Jeova na bin kaba ku el. (Kum 3:15; Apok 20:10) Satanas nveẑanu, pabia no tene speransa ku el i ka tene. Pa kila, i ta fasi tudu ki pudi pa lebanu fia di kuma, no ka tene speransa pa futuru. Ma, es i ka bardadi. Biblia danu garantia di kuma, Jeova misti judanu, i ka misti kondenanu. I “ka misti pa ningin pirdi, ma pa tudu pudi ripindi.” — 2 Ped 3:9.

⁷ Si na bardadi, no pensa di kuma no ka tene forsa pa luta kontra diseẑus ku ka bali o no ka tene speransa, no sta na pensa di manera ku Satanas misti pa no pensa. Ntindi ben es bardadi, pudi judanu sta firmi kontra Satanas. — 1 Ped 5:​8, 9.

KAL PENSAMENTU KU NO PUDI TENE PABIA DI NO IMPERFEISON

8. Alen di fasi kusas mau, kal utru kusa ku fasi parti di pekadu? (Salmu 51:5) (Jubi tambi “Palabra ku Splikadu.”)

⁸ Alen di Satanas, i ten utru kusa ku pudi fasinu sinti di kuma, no ka tene forsa ku speransa pa luta kontra diseẑus ku ka bali. Es i kal kusa? I pekadu ku no yarda di Adon ku Eva.a — Jo 14:4; lei Salmu 51:5.

9-10. (a) Kuma ku Adon ku Eva sinti dipus ke fasi pekadu? (Jubi tambi diseñu.) (b) Kuma ku pekadu ta afetanu?

⁹ Pensa na kuma ku Adon ku Eva sinti dipus ke fasi pekadu. Dipus ke disobdisi Jeova, e bai sukundi i e tenta kubri se kurpu. Aserka des, livru Estudo Perspicaz das Escrituras fala sin: “Pekadu fasi elis sinti kulpadu, preokupadu dimas i ku borgoña.” I sta suma si Adon ku Eva staba ficadu dentru di un kasa ku tene so es tris kuartu. E pudiba sai di un kuartu e yentra na utru, ma e ka pudiba sai fora di kasa. E ka pudiba kapli di pekadu.

¹⁰ Na bardadi, no ka sta na mesmu situason ku Adon ku Eva. Pabia resgati ka ta aplika pa relis. Ma resgati ta judanu tene purdon di no pekadus i tene amisadi intimu ku Deus. (1 Kor 6:11) Mesmu asin, no yarda pekadu ku imperfeison. Kila ku pui no ta sinti tambi kulpadu, preokupadu dimas i ku borgoña. Biblia fala di kuma, pekadu tene influensia garandi na pekaduris. Pekadu influensia te mesmu “kilis ku ka peka suma Adon ku kebra ordi di Deus.” (Rom 5:14) Ma es ka dibi di fasinu pensa di kuma, suma no yarda pekadu, nunka no ka na konsigi fasi ke ki sertu, o tene speransa pa futuru. No dibi di luta kontra es pensamentus negativu. Kuma ku no pudi fasil?

11. Ke ku no dibi di fasi si no sinti di kuma no ka tene forsa pa luta kontra diseẑus ku ka bali, i pabia di ke? (Romanus 6:12)

¹¹ No pudi sinti di kuma no ka tene forsa pa luta kontra diseẑus ku ka bali. Ora ku es kontisi i suma si kontra pekadu sta na “papia,” ma no ka dibi di sukutal. Pabia ku no ka dibi di sukutal? Pabia Biblia fala no ka dibi di disa pa pekadu kontinua “manda” riba di nos. (Lei Romanus 6:12.) Es signifika di kuma no pudi toma disison di ka sigi diseẑus ku ka bali. (Gal 5:16) Jeova tene konfiansa di kuma no pudi luta kontra tentason, si no ka pudiba, i ka na falanu pa no fasil. (Lei 30:​11-14; Rom 6:6; 1 Tes 4:3) Na bardadi, no pudi luta kontra diseẑus ku ka bali.

12. Ke ku no dibi di fasi si no sinti di kuma no ka tene speransa, i pabia di ke?

¹² Di mesmu manera, no pudi sinti di kuma no ka tene speransa, i no pensa di kuma Jeova na kulpanu so papia di kuma no tene diseẑus ku ka bali. Ora ku es kontisi i suma si kontra pekadu sta na “papia,” ma no ka dibi di sukutal. Pabia ku no ka dibi di sukutal? Pabia Biblia fala di kuma, Jeova sibi kuma no padidu ku pekadu. (Sal 103:​13, 14) I “sibi tudu kusa” aserka di nos, nkluindu kuma ku pekadu ku no yarda ta influensia kada un di nos. (1 Jon 3:​19, 20) Si no luta kontra diseẑus ku ka bali, Jeova na ojanu suma jintis limpu si dianti. Pabia ku no pudi tene sertesa des?

13-14. Sera ki tene diseẑus ku ka bali signifika di kuma no ka pudi kontenta Jeova? Bu pudi splika.

¹³ Biblia mostra di kuma i ten diferensa entri kustuma fasi ke ku ka bali (kusa ku no pudi kontrola) ku tene diseẑu di fasi ke ku ka bali (kusa ku no ka pudi kontrola). Pur isemplu, alguns kristons na Korintu ta pratikaba omoseksualismu. Paulu fala sin: ‘Utrus na bo metadi seduba asin.’ Sera ki es signifika di kuma e ka bin tene mas diseẑu di pratika omoseksualismu? I pudi sedu di kuma e tene, pabia manga di bias i ta sedu difisil kaba ku es tipu di diseẑu. Ma Jeova kontenti ku kristons ku kontrola se kabesa i ku ka fasi kusas ke teneba diseẑu di fasi. I oja elis suma jintis ku “labadu”. (1 Kor 6:​9-11) Mesmu kusa pudi kontisi ku bo tambi.

¹⁴ I ka mporta kal diseẑu mau ku bu sta na luta kontra el, bu pudi sai ben. Mesmu si bu ka konsigi kaba ku es diseẑus, bu pudi kontrola bu kabesa i ivita ‘yanda konformi bu naturesa umanu o fasi kualker kusa ku bin na bu sintidu’. (Ef 2:3) Ma ke ku pudi judau ngaña luta kontra diseẑus ku ka bali?

KE KU PUDI JUDAU NGAÑA LUTA KONTRA DISEẐUS KU KA BALI

15. Pabia ku no pirsisa di sedu onestu ku no kabesa, ora ku no sta na luta kontra diseẑus ku ka bali?

¹⁵ Pa ngaña luta kontra diseẑus ku ka bali, bu pirsisa di sedu onestu ku bu kabesa i rikuñisi bu frakesas. Toma kuidadu pa bu ka ngana bu kabesa. (Tiagu 1:22) Pur isemplu, algin ku ta bibi ciu, pudi tenta tira diskulpa i fala: ‘Utrus ta bibi mas di ki mi’. O algin ku tene purblema di jubi pornografia pudi tenta kulpa utrus i fala: ‘Si ña minjer ta danba mas kariñu, N ka na cigaba di tene es diseẑu’. Si bu ciga ja di tene es tipu di pensamentu i na sedu mas fasil pa bu kai na tentason. Ka bu tenta tira diskulpa pa kusas mau ku bu sta na fasi. Abo i resposanvel pa ke ku bu ta fasi. — Gal 6:7.

16. Ke ku pudi fortalisi bu disison di fasi ke ki sertu?

¹⁶ Alen di sedu onestu ku bu kabesa i rikuñisi bu frakesas, bu pirsisa tambi di fortalisi bu disison di fasi ke ki sertu. (1 Kor 9:​26, 27; 1 Tes 4:4; 1 Ped 1:​15, 16) Pensa na kal kusa ku mas ta tentau, i na kal mumentu ki mas ta tentau. I pudi sedu un sertu tipu di tentason o na un sertu ora ku bu mas ta tene ki tentason. Pur isemplu, sera ki ta sedu mas difisil pa bu risisti tentason ora ku bu sta kansadu o altas ora? Purpara pa ki tentason, i pensa na ke ku bu na fasi ora ku bu tentadu. Minjor mumentu ku bu pudi fasil i antis di tentason. — Dit 22:3.

17. Ke ku no pudi aprindi di isemplu di José? (Kumsada 39:​7-9) (Jubi tambi diseñu ku foto.)

¹⁷ Pensa na ke ku José fasi oca ku minjer di Potifar provokal. José ka pensa dus bias, i nega logu ki tentason di manera firmi. (Lei Kumsada 39:​7-9.) Ke ku no pudi aprindi des? José staba ja disididu pa fasi ke ki sertu antis di minjer di Potifar provokal. Di mesmu manera, bu dibi di sta disididu pa fasi ke ki sertu antis di bu tentadu. Si bu fasi asin, i na sedu mas fasil pa bu fasi ke ki sertu, pabia bu disidiba ja ke ku bu na fasi.

KONTINUA BA TA ‘JUBI BU KABESA’

18. Ke mas ku bu pudi fasi pa ngaña luta kontra diseẑus ku ka bali? (2 Koríntius 13:5)

¹⁸ Pa pudi ngaña luta kontra diseẑus ku ka bali, bu pirsisa di kontinua ba ta ‘jubi bu kabesa’, ku sedu, ba ta analisa sempri bu kabesa pa sibi kuma ku bu sta. (Lei 2 Koríntius 13:5.) Di un tempu pa utru, analisa bu pensamentu ku bu asons i fasi mudansas nunde ki pirsis. Pur isemplu, si bu konsigi risisti un tentason, punta bu kabesa: ‘Kantu tempu ku N toma, pa fala nau?’ Si bu nota di kuma bu tarda pa ruspundi, ka bu fika mal ku bu kabesa. Ma pensa na ke ku bu pudi fasi pa minjoria utru bias. Fasi bu kabesa es purguntas: ‘Ora ku N tene pensamentu ku ka bali, kuma ku N pudi para pensa nel mas rapidu? Sera ki kusas ku N ta jubi, ku N ta lei o ku N ta obi, ta pui pa i sedu mas difisil pa N risisti tentason? Sera ki N ta vira rostu rapidu ora ku N oja un imaẑen ku ka bali? Sera ki N ntindi pabia ku normas di Jeova sempri i bon, mesmu si N pirsisa di kontrola ña kabesa pa pudi obdisi elis?’ — Sal 101:3.

19. Kuma ku toma mau disisons na asuntus ku pudi parsi sedu pikininu, pudi pui pa i sedu difisil luta kontra diseẑus ku ka bali?

¹⁹ Ora ku bu na analisa bu kabesa toma kuidadu pa ka kumsa ku tira diskulpas pa fasi ke ku ka bali. Biblia fala: “Korson ta ngana mas di ki tudu kusa, i kuruptu tok i ka ten kura”. (Jer 17:9) Jesus fala “pensamentus mau” ta bin di korson. (Mat 15:19) Pur isemplu, un algin ku para jubi pornografia, dipus di un tempu i pudi pensa di kuma i ka pirigosu jubi fotos ku ta lantanda diseẑus seksual, pabia i ka sta na mostra jintis nun. I pudi pensa: ‘I ka ten nada di mal na imaẑina kusas ku ka bali, basta so N ka fasil.’ Si algin pensa des manera i sta na ‘alimenta mau diseẑu di si naturesa.’ (Rom 13:14) Kuma ku bu pudi di ivita di fasi es? Toma kuidadu i ivita toma mau disisons na kusas pikininu ku pudi bin lebau na toma mau disisons na kusas garandi, suma pur isemplu, kai na pekadu.b Nega tambi kualker “pensamentus mau” ku pudi lebau na tira diskulpa pa fasi kusa ku ka bali.

20. Kal speransa ku no tene pa futuru, i kal ajuda ku no tene desdi gosi?

²⁰ Suma ku no aprindi, Jeova ta danu forsa pa risisti tentason. Tambi pabia di si miserikordia, no tene speransa di tene vida ku ka ta kaba na nobu mundu. No na bin kontenti dimas di sirbi Jeova sin luta kontra diseẑus ku ka bali! Nkuantu ki tempu ka ciga inda, no pudi tene sertesa di kuma no tene forsa pa luta kontra diseẑus ku ka bali, tambi no tene speransa. Ku benson di Jeova no pudi ngaña luta kontra diseẑus ku ka bali!