Kantigas ku Ta Pertusinu Mas di Deus

Musika i un prenda bonitu ku bin di Jeova. I pudi afeta no pensamentu, muda no disposison i motivanu. I kila ku ta notadu ku no klips di musika. Na bardadi, e kantigas pudi fasi mas: E pudi pertusinu mas di Jeova.

Desdi 2014, i fasidu mas di 70 klips di musika, i gosi, pelu menus, un des musika sta dipunivel na mas di 500 lingua! Ma talves bu pudi punta: ‘Ba-kin ku ta fasi es musikas, i kuma ke ta fasil?’

Aprindi kuma ku no ermons ta fasi musika

Klips di musika ta fasidu pa ekipa di ermons ku irmas ku ta tarbaja na musika na Sirvisu di Audio/Video. E ta tarbaja bas di orientason di Kumison di Nsinu di Korpu Guvernanti. Ekipa di musika formadu pa 13 ermons ku irmas, ku ta juda na fasi notas, utrus i injiñerus di musika, utrus ta fasi programa ku utrus tarbaju ki pirsis. Tambi, Kumison di Nsinu seta pa kilis ku ta tarbaja fora di Betel na mundu ntidu, juda nes tarbaju, entri elis i sta kilis ku ta fasi nota, musikus ku kilis ku ta kanta. Es ermons ku irmas ku umildadi ta usa se abilidadis sin coma atenson pa se kabesa.

Kuma ku klips di musika ta fasidu? Purmeru, Kumison di Nsinu ta disidi na kal testu di Biblia ku ki kantiga na basia nel, i kuma ki na fasi kilis ku na sukutal sinti. Ekipa di musika ta fasi notas di musika i e skirbil. I ta purparadu un isemplu di gravason. Kumison di Nsinu ta obi ki isemplu di gravason, i e ta da mas orientason. Dipus, ekipa di musika ta fasi mudansa na musika i e ta fasi gravason final. E kantigas ta gravadu na diferentis kau, suma na filialis ku kasa ku tene ekipamentus di gravason.

Pa fasi nota i grava klips di musika, no ermons ta usa diferentis tipu di programas di komputador. Pa fasi es tarbaju, i pirsis tambi ekipamentus suma instrumentus di musika, mesas di mistura, amplifikaduris, kulunas ku mikrofonis. Kada mikrofoni ta kusta entri 100 dolar amerikanu pa mas di 1.000 dolar amerikanu (mas o menus entri 56.200 FCFA pa mas di 562.000 FCFA). Na 2020, no gasta 116.000 dolar amerikanu (mas o menus 65.192.000 FCFA) na ekipamentus di gravason di musika.

Kal sforsu ku fasidu pa popa ofertas ku ta dadu? En ves di ten manga di ekipa di musika na Betel, i ta usadu manga di vuluntarius fora di Betel. Tambi, en ves di junta manga di musikus pa kada kin bin grava, manga di bias, no ermons ta usa programas di komputador, ku ta kria son di manga di instrumentus.

“Es kantigas ta torna ña fe forti”

Ermons ku irmas gosta di obi klips di musika. Tara, ku mora na Almaña fala: “Es kantigas ta judan sinti ben ora ku N sta ku kudadi. Sukuta elis na lingua ku N mama ta sta suma si Jeova barsan.” Un ermon di Kasakiston comadu Dmitry fala sin: “N gosta di obi es kantigas, pabia N ka pirsisa di preokupa si e sta di akordu ku prinsipius ku sta na Biblia. Alen di kila, es kantigas ta judan konsentra na kusas spiritual.”

Delia, di Afrika di Sul konta kuma ki ta sinti aserka di klips di musika: “Es kantigas ta torna ña fe forti. Ora ku N sta tristi o N sta na pasa un situason difisil, sempri i ta ten un kantiga ku ta judan na ki situason. Manga di bias, so son di kantiga, i sufisienti pa muda ña sentimentu!”

I ten klips di musika ku jintis mas gosta del. Lerato, tambi di Afrika di Sul fala sin: “Kantiga ‘Estava Aqui Tão Perto’ ku ‘No Mundo Que Aí Vem’ ta judan imaẑina tempu ku N na risibi ña mame ku N ama ciu. Kada ora ku N obi e musikas N ta ojal i na kuri pa bin ku brasus abertu.”

Un di klips di musika sedu di ajuda garandi pa un joven na Sri Lanka. I fala: “Ña pursor di siensia papia mal ku mi dianti di utrus na turma, pabia ami i Tustumuña di Jeova. N mediba, i N ka sibi ke ku N na fala. Oca ku N ciga kasa, ña mame nkoraẑan pa N sukuta es kantiga ‘O estudo me faz bem.’ Es kantiga judan oja di kuma, N pirsisa di fasi piskisa i purpara un resposta. Mansin di ki dia, N papia ku ña pursor. I sukutan, i fala kuma gosi i ntindi minjor ke ku Tustumuñas di Jeova ta fia nel. N na gardisi organizason di Jeova ku danu es kantigas ku ta nkoraẑa.”

Nunde ku no ta oca diñeru pa fasi es kantigas? Atraves di ofertas ku ta fasidu pa obra mundial, manga des ofertas ta fasidu atraves di metudus ku no pudi oja na donate.jw.org. Obrigadu pa ofertas ku bu fasi di tudu korson.