Un livru di studu di Biblia ku diferenti ciu di utrus

Na Janeru di 2021, Korpu Guvernanti anunsia lansamentu di un nobu livru di studu di Biblia: Bu Pudi Tene un Vida Filis pa Sempri!a Kuma ku bu sinti oca ku bu obi es anunsiu? Matthew, di Kanada fala sin: “N staba kontenti dimas! Ña kontentamentu aumenta oca ku N staba na obi diskursus i jubi videos ku na splika ke ku manda es livru fasidu i kuma ki testadu. N staba ku presa di tenel i kumsa usal.”

No kumsa un nobu manera di studa Biblia ku jintis ku livru Bu Pudi Tene un Vida Filis pa Sempri! Ma, es i ka uniku diferensa ku ten entri es nobu livru ku utrus livrus di studu ku no ta usaba. Si bu usa livru mprimidu di Bu Pudi Tene un Vida Filis pa Sempri! bu pudi sinti tambi utru diferensa. Pa ntindi ke ku manda es faladu, no na oja kuma kes livru fasidu.

Un nobu livru ku sedu diferenti

Ke ku manda i pirsis foja mas pisadu? Livru Bu Pudi Tene un Vida Filis pa Sempri! tene mas di 600 diseñus ku fotos koloridu, kuas des bias mas di ki livru O Que Nos Ensina a Bíblia? Nobu livru tene tambi mas spasu branku, ku sedu, partis ku ka skirbidu o ku ka tene fotos o diseñus. Es dus kusas ta tisi un purblema: Ora ku foja finu, bu pudi oja fotos ku diseñus na utru ladu di paẑina. Pa ivita es purblema, ermons na Dipartamentu Internasional di Mpreson (DIM), na Wallkill, Nova York, Stadus Unidu, testa kuatru tipu di fojas ku sta na usadu na no kaus di mpreson. Kumison di Redason di Korpu Guvernanti jubi kada foja di amostra dipus e kuji kil ku menus transparenti. I bardadi kuma es foja i serka di 16% mas karu di ki foja di maioria di no utrus publikasons. Ma, i ta pirmiti pa studantis di Biblia lei kada paẑina di livru Bu Pudi Tene un Vida Filis pa Sempri! sin distrai pa fotos ku diseñus ku sta na utru ladu di foja.

Kapa tene un plastiku finu i diferenti. Kapa di nobu livru i diferenti di kapas di utrus livrus ku no tene, pabia i fasidu ku un plastiku finu i diferenti. En ves di tene kapa ku ta brilia ku no kustuma usa, nobu livru tene un akabamentu ku ka ta brilia, kila ta pui pa diseñu ojadu mas minjor. Es kapa ta proteẑi tambi livru kontra sinalis ku ta ojadu ora ki usadu manga di bias. Ma, kapa ku ka ta brilia pudi sedu sinku bias mas karu di ki kapa ku ta brilia. Pa kila, manga di filialis tarbaja juntu pa oca akabamentu ku ka ta brilia, ma mas baratu.

Ke ku manda i kujidu materialis mas karu? Un ermon ku ta tarbaja ku Dipartamentu Internasional di Mpreson fala sin: “No sibi kuma es livru na usadu ciu, pa kila no misti pa i kontinua sta diritu mesmu si algin usal manga di bias.” Eduardo, ku ta tarbaja na Skritoriu di Mpreson di filial di Brasil fala sin: “No sta kontenti dimas di oja kuma ku organizason di Jeova usa materialis di kualidadi pa fasi es livru bonitu, ku ka na lestu di dana i ki fasil di usa, tambi e ta usa diritu ofertas ku ta dadu.”

Mpreson na tempu di COVID-19

No kumsa mprimi livru Bu Pudi Tene un Vida Filis pa Sempri! na Marsu di 2021. Es seduba na tempu di COVID-19, kusa ku tisi difikuldadis. Pabia di konfinamentu na Betel, no kaus di mpreson ka pudiba risibi ajuda di kilis ku ta bin juda na Betel, nin kumbida nobu ermons pa sirbi suma betelitas. Pabia di kila, alguns kaus di mprimi ka tene jintis sufisienti pa tarbaja, i utrus kaus ficadu pa algun tempu pabia di leis ku guvernu pui.

Kuma ku no konsigi vensi es difikuldadis? Oca ku kaus di mprimi kumsa ku funsiona, ermons ku irmas di utrus dipartamentus di Betel disignadu pa algun tempu pa juda na mpreson. Joel ku ta tarbaja na Dipartamentu Internasional di Mpreson fala sin: “Se spiritu di sakrifisiu ku vontadi ke tene di aprindi nobu disignason, judanu pa no fasi tarbaju ki pirsis.”

Apesar di difikuldadis, no mprimi ja milyons di livru Bu Pudi Tene un Vida Filis pa Sempri! Pa fasi elis, no pirsisa di diferenti tipus di meterialis, suma ŝapas di mpreson, kapa di proteson, foja, tinta ku kola. So na purmeru sinku mis di mpreson, no gasta mas di 2,3 milyons di dolar amerikanu (mas di 1 bilyon i sentu i oitenta dus milyons di FCFA) so na kumpra materialis. Pa popa diñeru, no ta mprimi so kuantidadi di livrus ku kongregasons pirsisa del.

“I un tarbaju bonitu”

Kuma ku instrutoris di Biblia ku se studantis sinti aserka des nobu livru di studu di Biblia? Paul, un ermon na Australia, fala sin: “I nteresanti dimas usa livru Bu Pudi Tene un Vida Filis pa Sempri! N ta kontenti ora ku N na diriẑi studus di Biblia. Livru fasidu di un manera nteresanti ku ta pui pa instrutor ku studanti kombersa. I fasidu un bon kombinason entri informason klaru, purguntas ku ta toka korson, videos, diseñus, fotos, tabelas, kuadrus ku ke ku studanti pudi fasi. I un tarbaju bonitu ku ta motivan minjoria ña manera di nsina.”

Un studanti di Biblia na Stadus Unidu fala sin: “N gosta ciu di nobu livru. Fotos ku diseñus ta judan ntindi pontus prinsipal. Videos ta toka ña korson i motivan aẑi.” Es studanti di Biblia ta studa dus bias kada semana, i ta mati sempri runions di kongregason.

Milyons di livru Bu Pudi Tene un Vida Filis pa Sempri! na bin mprimidu na manga di linguas. Na bardadi, te gosi, Korpu Guvernanti aprova pa es livru fasidu na 710 lingua. Es mas livru O Que Nos Ensina a Bíblia? ku 340 lingua.

Kuma ku no konsigi paga es mpreson? I ku ofertas ku ta dadu pa obra mundial, i manga delis fasidu atraves di donate.jw.org. No na gardisiu pa ofertas ku bu fasi di tudu korson. I judanu fasi es livru di studu di Biblia pa kilis ku misti aprindi aserka di Jeova i ‘vivi pa sempri.’ — Salmu 22:26.