Ke ku manda bu dibi di kontinua?

1. Kuma ku bu pudi benefisia di kontinua studa Biblia?

Sin duvida, e rusumu di nsinus basiku di Biblia omenta bu amor pa Jeova. No dibi di kontinua sforsa pa pudi torna es amor mas forti. (1 Pedru 2:2) Bu speransa di vida ku ka ta kaba dipindi di bu kontinua pertusi di Deus atraves di studu di si Palabra. — Lei Jon 17:3; Judas 21.

Nkuantu bu sta na omenta na kuñisimentu di Deus, bu fe na torna mas forti. Fe na judau kontenta Deus. (Ebreus 11:1, 6) I na lebau na ripindi i fasi mudansas na bu manera di vivi, kusa ki na benefisiau. — Lei Atus 3:19.

2. Kuma ku bu kuñisimentu di Deus pudi benefisia utrus?

Na bardadi bu na misti konta utrus ke ki bu aprindi — anos tudu no gosta di konta bon noba. Nkuantu bu kontinua na studa Biblia, bu na aprindi manera di usa Biblia pa splika bu fe na Jeova i splika bon noba. — Lei Romanus 10:13-15.

Maioria di jintis ta kumsa konta bon noba pa se amigus o se familia. Toma kuidadu pa ka magua utrus. En ves di fala elis kuma se riliẑion sta eradu, fala elis aserka di promesas di Deus. Tambi, lembra kuma manga di bias, jintis mas ta fika admiradu ku bu bon komportamentu di ki bu palabras. — Lei 2 Timótiu 2:24, 25.

3. Kal relasionamentu ku bu pudi tene ku Deus?

Studa Palabra di Deus na judau fortalesi bu relasionamentu ku Deus. Bu pudi tene un relasionamentu muitu spesial ku Jeova. Na bardadi bu pudi sedu un membru di si familia. — Lei 2 Koríntius 6:18.

4. Kuma ku bu pudi kontinua fasi progresu?

Bu pudi aprindi kuma ku bu pudi aplika bardadis di Biblia ora ku bu kontinua studa Palabra di Deus. (Ebreus 5:13, 14) Pidi pa un Tustumuña di Jeova studa Biblia ku bo atraves di livru Ke ki Biblia Na Bardadi ta Sina? Mas ku bu aprindi di Palabra di Deus, mas susesu bu na tene na bu vida. — Lei Salmu 1:1-3; 73:27, 28.

Biblia tene “bon noba gloriosu di Deus filis.” (1 Timótiu 1:11, NM) Bu pudi mas pertusi di Deus si bu pertusi mas di si povu. (Ebreus 10:24, 25) Si bu kontinua sforsa na kontenta Jeova, bu na yangasa vida di bardadi — vida ku ka ta kaba. Na bardadi pertusi di Deus i minjor kusa ku bu pudi fasi. — Lei 1 Timótiu 6:19.