Jovens — bo kontinua fasi progresu dipus di batismu

1. Kal bon kusas ku manga di jovens fasi ja?

KADA anu, manga di jovens kriston ta batisa. Sera ki bu batisa ja? Si bu batisa ja, bu ermons ku irmas na kongregason kontenti ku bo i Jeova kontenti tambi! (Dit 27:11) Pensa un bokadu na manga di bon kusas ku bu fasi ja. Pur isemplu, talves pa manga di anu bu pega tesu na studa Biblia. Studu ku bu fasi di Biblia konvensiu di kuma i Palabra di Deus. Alen di kila, bu pasa na kunsi i ama Dunu di Biblia. Bu amor pa Jeova torna forti, i bu disidi dedika bu vida pa rel i batisa. Es i un bon disison ku bu toma!

2. Ke ku no na fala del ne studu?

² Antis di bu batisa, bu pasa manga di purblemas ku pui pa i sedu difisil manti fiel pa Jeova. Ma, nkuantu bu na kirsi, bu na pasa utru difikuldadis ku na testa bu fe. Satanas na tenta pui ba bu amor pa Jeova torna fraku i pa bu para sirbil. (Ef 4:14) Bu ka dibi di pirmiti pa kila kontisi. Ke ku pudi judau manti fiel pa Jeova i kumpri purmesa ku bu fasi di sirbil? Bu dibi di kontinua fasi progresu pa “bai dianti” i torna un kriston maduru. (Eb 6:1) Kuma ku bu pudi fasil?

KE KU BU PUDI FASI PA SEDU UN KRISTON MADURU?

3. Ke ku tudu kristons dibi di fasi dipus di batismu?

³ Dipus di batismu, anos tudu no pirsisa di sigi konsiju ku apostulu Paulu da pa kristons di Éfesu. I nsentiva elis pa sedu kristons “maduru”. (Ef 4:13) I misti fala elis di kuma, e dibi di ‘kontinua fasi progresu.’ Paulu kompara no progresu spiritual suma ora ku un mininu sta na kirsi. Ora ku un mininu kumsa padidu, papes ta kontenti i e ta sinti amor pa rel. Ma i ka na kontinua sedu mininu pa sempri. Ku tempu, i dibi di kaba ku “kusas di mininesa.” (1 Kor 13:11) I mesmu kusa ku ta kontisi ku un kriston. Dipus di batismu, no dibi di kontinua fasi progresu. No na jubi alguns suẑestons ku pudi judanu fasi kila.

4. Kal kualidadi ku pudi judau fasi progresu spiritual? Bu pudi splika. (Filipensis 1:9)

⁴ Fasi pa amor ku bu tene pa Jeova kirsi. Bu mostra ja di kuma bu ama Jeova ciu dimas. Ma bu amor pa rel pudi torna inda mas forti. Kuma ku bu pudi fasi kila? Apostolu Paulu konta un manera ku bu pudi fasi kila suma ki sta na Filipensis 1:9. (Lei.) Paulu ora pa amor di kristons di Filipus “buri kada bias mas”. Es ta mostra di kuma no pudi fasi pa amor ku no tene pa Jeova kirsi. No pudi fasi kila ora ku no buska tene “kunsimentu, tambi ku tudu ntindimentu”. Mas no kunsi Jeova, mas no na amal i da balur pa si manera di sedu ku si manera di fasi kusas. No diseẑu di kontental ta torna mas forti, i nunka no ka na misti fasi kualker kusa ku na pui i fika tristi. No ta fasi no minjor pa ntindi ke ki misti pa no fasi i kuma ku no pudi fasil.

5-6. Kuma ku no pudi fasi pa amor ku no tene pa Jeova kirsi? Bu pudi splika.

⁵ No pudi fasi pa amor ku no tene pa Jeova kirsi ora ku no kopia Jesus, i kopia diritu manera di sedu di si Pape. (Eb 1:3) Minjor manera di kunsi Jesus i studa kuatru Ivanjeliu. Si bu ka kustuma lei Biblia kada dia, pabia ku bu ka na kumsa lei storia aserka di vida di Jesus? Ora ku bu na lei storia aserka di vida di Jesus, konsentra na si manera di sedu. Jintis gosta di sta ku el i papia ku el; i gosta tambi di pertusi di mininus i lambu elis. (Mar 10:13-16) I ta pui si disipulus sta avontadi, e ka ta medi kontal ke ke na pensa i kuma ke na sinti. (Mat 16:22) Asin, Jesus kopia si Pape ku sta na seu. Di mesmu manera, jintis gosta tambi di pertusi di Jeova. No pudi fasi kila atraves di orason. No pudi kontal kualker kusa ku no na pensa o sinti. No tene sertesa di kuma i ka na kondenanu. I amanu; i ta toma konta di nos. — 1 Ped 5:7.

⁶ Jesus ta sinti pena di jintis. Apostolu Mateus fala sin: “I oja manga di jinti, i sinti garandi pena delis, pabia e na yandaba disorientadu, pirdidu, suma karnel ku ka tene bakiadur.” (Mat 9:36) I kuma ku Jeova ta sinti? Jesus fala: “Bo Pape ku sta na seu i ka misti pa un de pikininus pirdi.” (Mat 18:14) Es palabras ta punu fika kontenti, pabia i ta mostra di kuma Jeova amanu ciu. Mas no kunsi Jesus diritu, mas no amor pa Jeova na aumenta.

7. Si bu tira tempu pa sta juntu ku kristons maduru, kuma ku kila pudi judau?

⁷ Bu pudi tambi mostra mas amor pa Jeova i fasi progresu suma kriston, si bu tira tempu pa sta juntu ku ermons ku irmas di bu kongregason. Fasi elis alguns purguntas aserka di spiriensias ke tene na sirvisu di Jeova. Nota kontentamentu ke tene. E ka ripindi di disison ke toma di sirbi Jeova. Ora ku bu tene un disison importanti pa toma pidi elis konsiju. Lembra kuma, “na manga di konsijadur i ta ten suguransa.” — Dit 11:14.

8. Ke ku bu dibi di fasi si kontra bu tene duvidas aserka di ke ku Biblia fala?

⁸ Tira duvidas ku bu tene. Suma ki faladu na paragrafu 2, Satanas na tenta tujiu tene fe forti i pertusi mas di Jeova. Un di manera ki ta fasi kila, i di pui pa bu tene duvidas aserka di alguns kusas ku Biblia ta nsina. Pur isemplu, talves alguns jintis na tenta konvensiu di kuma Deus ka kumpunu ma no evului nan. Ocauba mas pikininu, talves bu ka ta pensaba nes, ma gosi bu sta na nsinadu el na skola. Ke ku bu pursoris ta fala pa apoia evuluson pudi parsi sedu bardadi. Ma talves nunka e tenta buska sibi si i ten un algin ku kumpu tudu kusas. Lembra di prinsipiu ku sta na Ditus 18:17: “Kil ku pursenta si kasu purmeru, i ta parsi kuma i ten roson, tok utru bin i fasil purguntas.” Te pa bu fia na tudu ke ku bu aprindi na skola, bu dibi di studa diritu ke ku Palabra di Deus fala. Fasi piskisa na no publikasons. Papia ku ermons ku irmas ku fiaba na evoluson. Punta elis ke ku konvensiba elis di kuma i ten un Kriadur ku amanu. Es kombersas pudi judau diskubri provas di kuma i ten un algin ku kumpu tudu kusas.

9. Ke ku bu aprindi di spiriensia di Melissa?

⁹ Un irma comadu Melissa studa asuntu aserka di kriason, i kila judal tira si duvidas.b I fala sin: “Na skola, pursoris ta splika evoluson di un manera ku ta pui jintis fia di kuma i bardadi. Na kumsada, N ka mistiba fasi piskisa, pabia N mediba di kuma N na bin diskubri kuma evoluson i bardadi. Ma N oja di kuma, Jeova misti pa no tene provas di kusas ku no fia nel. Pa kila, N kumsa fasi piskisa. N lei livru Existe um Criador Que Se Importa com Você? ku broŝuras Será Que a Vida Teve Um Criador?, A Origem da Vida – Cinco Perguntas Que Merecem Resposta. I es propi ku N pirsisaba del. Si N sibiba N na fasilba disna.”

10-11. Ke ku pudi judau kontinua risisti tentason? (1  Tesalonisensis 4:3, 4)

¹⁰ Ivita mau komportamentu. Na adolesensia, diseẑu di fasi seksu pudi sedu forti dimas, utrora utrus pudi tenta konvensiu fasi pekadu seksual. Satanas misti pa bu sigi bu diseẑus. Ke ku pudi judau kontinua risisti tentason? (Lei 1 Tesalonisensis 4:3, 4.) Na bu orasons, konta Jeova ke ku sta na bu korson. Splikal kuma ku bu sta na sinti, i pidil pa i dau forsa. (Mat 6:13) Lembra kuma Jeova misti judau i ka pa julgau. (Sal 103:13, 14) Palabra di Deus pudi judau tambi. Melissa, ku faladuba del, fasiba sforsu pa risisti kontra pensamentus ku ka bali. I fala sin: “Lei Biblia kada dia judan luta kontra diseẑus ku ka bali. I ta lembrantan di kuma, N ntrega ña vida pa Jeova i N misti sirbil.” — Sal 119:9.

¹¹ Ka bu tenta risolvi bu purblemas abo son. Papia ku bu papes aserka di bu purblemas. I ka fasil papia di bu purblemas, ma na bardadi i bon pa bu fasil. Melissa fala sin: “N ora pa pidi koraẑen, dipus N papia ku ña pape aserka di ña purblema. Oca ku N fasil, N sinti ben. N sibi kuma Jeova kontenti ku mi.”

12. Kuma ku bu pudi toma bon disisons?

¹² Disa pa prinsipius di Biblia orientau. Nkuantu bu na kirsi, bu papes na disau pa bu toma bu propi disisons. Ma i ten inda manga di kusas ku bu ka sibi. Kuma ku bu pudi ivita fasi erus ku pudi dana bu amisadi ku Jeova? (Dit 22:3) Un irma comadu Kari splika ke ku judal toma bon disisons. I ntindi di kuma, si bu sedu kriston maduru bu ka pirsisa di regras pa tudu kusas na bu vida. I fala sin: “N pirsisa di ntindi kuma ku Jeova ta oja kusas, i ka so sigi regras.” Ora ku bu na lei Biblia, punta bu kabesa: ‘Ke kes pasaẑen ta nsinan aserka di kuma ku Jeova ta pensa? Sera ki i tene prinsipius ku pudi judan fasi ke ki bon? Si N fasi ke ku Biblia nsinan, ke ku N na ngaña?’ (Sal 19:7; Isa 48:17, 18) Si bu ta lei Biblia i pensa fundu na ke ku bu ta lei, bu na oja di kuma i mas fasil toma disisons ku na kontenta Jeova. Ora ku bu kontinua fasi progresu, bu na ntindi ke ku Jeova ta pensa aserka di kada asuntu. Bu na nota di kuma, bu ka pirsisa di regra pa kada situason.

13. Kuma ku bon amigus pudi judau? (Ditus 13:20)

¹³ Kuji amigus ku ama Jeova. Suma ku no ojaba ja na paragrafu 7, amigus ku bu kuji pudi judau sedu un kriston maduru. (Lei Ditus 13:20.) Un irma comadu Sara staba na pirdi si alegria. Ma, i ten un kusa ku kontisi ku judal tene mas alegria. Sara fala sin: “N oja bon amigas na mumentu sertu. Kada semana, ami ku un joven irma no ta purpara Sintinela di studu juntu. Utru irma judan pa N kumsa da kumentariu na runions. Pabia di ajuda di ña amigas, N kumsa ku fasi studu pesual ku orason di un manera mas seriu. N kumsa ku disenvolvi un amisadi mas forti ku Jeova i N kumsa ku tene mas alegria.”

14. Kuma ku Jon kuji bon amigus?

¹⁴ Kuma ku bu pudi fasi amisadi ku jintis ku na tene bon nfluensia na bo? Jon, ku sta na sirbi suma ansion, fala sin: “Ocanba mas joven, N konsigi tene bon amigus oca ku N sai pregason ku elis. Es amigus gostaba ciu di pregason, e judan oja kuma ku pregason ta da kontentamentu. N kumsa ku tene objetivu di yentra na sirvisu di tempu kompletu. N da tambi konta di kuma, ke ku pui N ka teneba manga di bon amigus i pabia N staba na buska fasi amisadi so ku kilis di ña idadi. Mas tardi, N konsigi tambi tene bon amigus na BeteI. Se isemplu judan pa N sibi kuji diritu kusas ku N ta divirti ku el, i kila pertusin mas di Jeova.”

15. Kal avisu aserka di kumpañerasku ku Paulu da Timótiu? (2 Timótiu 2:20-22)

¹⁵ Ke ku bu dibi di fasi si bu nota di kuma, un algin na kongregason ka sedu un bon kumpañerasku? Paulu sibiba di kuma alguns jintis na kongregason ka ta pensa i aẑi suma kristons, pa kila, i fala Timótiu pa i lunjusi delis. (Lei 2 Timótiu 2:20-22.) No amisadi ku Jeova tene balur. No ka dibi di disa pa ningin dana amisadi ku no sforsa ciu pa tene ku no Pape ku sta na seu. — Sal 26:4.

KUMA KU TENE OBJETIVUS PUDI JUDAU FASI PROGRESU SPIRITUAL?

16. Kal objetivus ku bu dibi di kuji?

¹⁶ Kuji objetivus ku na judau. Kuji objetivus ku na fortalisi bu fe i judau sedu un kriston mas maduru. (Ef 3:16) Pur isemplu, bu pudi disidi minjoria bu studu pesual ku leitura di Biblia. (Sal 1:2, 3) O bu pudi tenta ora manga di bias i fasil di tudu bu korson. Talves bu dibi di toma mas kuidadu ku kusas ku bu ta divirti ku el o na manera ku bu ta usa bu tempu. (Ef 5:15, 16) Ora ku Jeova ojau na sforsa ciu pa fasi mas progresu, i ta kontenti.

17. Kal benefisiu ku bu na tene si bu ta juda utrus?

¹⁷ Bu ta torna un kriston mas maduru ora ku bu na juda utru jintis. Jesus fala: “I mas minjor da di ki bo risibi.” (Atus 20:35) Bu na kontenti dimas si bu ta usa bu tempu ku enerẑia pa juda utrus. Pur isemplu, bu pudi fiksa objetivu pa juda kilis di idadi ku kilis ku sta duenti na bu kongregason. Talves bu pudi bai fasi kompra pa relis o juda elis na manera di usa aparelius eletroniku. Si bu sedu ermon, fiksa objetivu di sedu servu ministerial, asin bu na pudi juda bu ermons ku irmas. (Fil 2:4) Bu pudi tambi mostra amor pa kilis ku ka fasi parti di kongregason ora ku bu na konta elis bon noba di Renu. (Mat 9:36, 37) Si i pusivel, fiksa objetivu di sirbi Jeova pa tempu kompletu.

18. Kuma ku sirvisu di tempu kompletu pudi judau pertusi mas di Jeova?

¹⁸ Sirvisu di tempu kompletu pudi dau manga di oportunidadi di pertusi mas di Jeova. Si bu sedu pioneru bu pudi mati Skola pa Ivanjilizaduris di Renu. Bu pudi sirbi na Betel o na projetus di konstruson teokratiku. Un joven irma pionera comadu Kaitlyn fala sin: “Prega juntu ku ermons ku irmas ku tene spiriensia judan pertusi mas di Jeova dipus di ña batismu. Se isemplu motivan aumenta ña kunsimentu di Biblia i minjoria ña manera di nsina.”

19. Kal bensons ku bu na tene si bu kontinua fasi progresu spiritual?

¹⁹ Si bu kontinua fasi progresu spiritual bu na tene manga di bensons. Bu ka na usa bu enerẑia pa fasi kusas ku ka tene balur. (1 Jon 2:17) Bu na ivita dur ku algin ta tene ora ki toma mau disisons. En ves di kila, kusas na kuriu diritu i bu na tene filisidadi di bardadi. (Dit 16:3) Bu bon isemplu na nkoraẑa tudu bu ermons ku irmas na fe. (1 Tim 4:12) Mas importanti, bu na tene pas ku kontentamentu, pabia bu sibi kuma bu sta na kontenta Jeova i bu tene un bon amisadi ku el. — Dit 23:15, 16.