PARTI 8
Ora ku mal akontisi
“Es i un rason pa bo sinti garandi alegria, kontudu i pudi pirsisadu pa bo fika tristi pa un tempu pabia di manga di koldadi probason ku pudi bin.” — 1 Pedru 1:6
Mesmu ku bu fasi bu minjor pa tene un kasamenti ku un vida di familia filis, i pudi akontisi kusas ku bu ka spera, i ku pudi dana bu alegria. (Eklesiastis 9:11) Di manera amorosu, Deus danu konsijus na Biblia pa judanu ora ku no na pasa purblemas. Si bu aplika konsijus di Biblia ku sta bas, abo ku bu familia bo na konsigi lida te mesmu ku pior situasons.
1 KONFIA NA JEOVA
ES KI BIBLIA FALA: “Bo pui tudu bo kudadi riba del, pabia i ta toma konta di bos.” (1 Pedru 5:7) Lembra sempri kuma Deus i ka kulpadu pa bu purblemas. (Tiagu 1:13) Si bu pertusi del, i na dau minjor ajuda. (Isaias 41:10) “Bo kontal tudu ku sta na bo korson.” — Salmu 62:8.
Bu na sedu tambi konsoladu ora ku bu na lei Biblia i studal kada dia. Suma rusultadu, bu na bin oja kuma ku Jeova “ta animanu na tudu kasabi”. (2 Koríntius 1:3, 4; Romanus 15:4) I purmiti dau “pas di Deus ku pasa tudu ntindimentu”. — Filipensis 4:6, 7, 13.
KE KU BU PUDI FASI:
Fasi orason pa pidi ajuda di Jeova pa bu pudi manti kalmu i pensa diritu.
Pensa na kusas ku bu pudi fasi i disidi fasi kil ki minjor.
2 KUIDA DI BU KABESA I DI BU FAMILIA
ES KI BIBLIA FALA: “Korson di ntindidu ta ngaña kunsimentu; oreja di jiru i ta buskal pa sibi.” (Ditus 18:15) Buska tene tudu informasons. Buska sibi ke ku kada membru di bu familia pirsisa del. Papia ku elis. Sukuta elis. — Ditus 20:5.
Ke di fasi si kontra un membru di familia muri? Ka bu burguñu cora. Lembra kuma te mesmu “Jesus cora.” (Jon 11:35; Eklesiastis 3:4) Tambi i importanti diskansa i durmi diritu. (Markus 6:31) Kila na judau lida ku kasabi.
KE KU BU PUDI FASI:
Tene kustumi di papia ku bu familia, asin, ora ku mal akontisi, e na sinti avontadi di papia ku bo.
Papia ku utrus ku talves pasa mesmu situason.
3 SETA AJUDA KU BU NA DADU
ES KI BIBLIA FALA: “Amigu ta ama sempri. Na tempu di foronta algin ta ngaña ermon.” (Ditus 17:17) Bu amigus misti judau, ma talves e pudi ka sibi kuma di judau. Ka bu burguñu konta elis ke ku na bardadi bu pirsisa. (Ditus 12:25) Tambi seta ajuda spiritual di kilis ku kunsi Biblia. Orientason ke na dau basiadu na Biblia na judau. — Tiagu 5:14.
Bu na oja apoiu ku bu pirsisa del, si bu ta junta ku jintis ku tene fe na Deus i ku fia na si promesas. Tambi bu na sedu konsoladu ora ku bu na juda utrus ku pirsisa di nkoraẑamentu. Papia ku elis aserka di fe ku bu tene na Jeova i na si promesas. Kontinua na juda utrus ku pirsisa di ajuda, i ka bu izola di kilis ku amau i ku ta preokupa ku bo. — Ditus 18:1; 1 Koríntius 15:58.
KE KU BU PUDI FASI:
Papia ku bu amigu intimu, i disal pa i judau.
Sedu klaru na ajuda ku bu na pirsisa del.