Biblia i mensaẑen di Deus pa nos

Jeova danu Biblia, i un prenda bonitu dimas ku tene 66 livrusiñus. Ma talves bu pudi punta: ‘Kuma ku Biblia yanda i ten? Kin ki si dunu?’ Pa ruspundi es purguntas, no na bai jubi kuma ku no yanda no tene mensaẑen di Deus ku sta na Biblia.

1. Si omis ku skirbi Biblia, kuma ku Deus bin sedu si Dunu?

Biblia skirbidu pa serka di 40 omis, na un piriudu di serka di 1.600 anus, apartir di 1513 AEK te serka di 98 EK. Si skirbiduris i di diferentis formason. Ma mesmu asin, tudu partis di Biblia tene armonia. Kuma ku es pudi sedu? I pabia Deus ki Dunu di Biblia. (Lei 1 Tesalonisensis 2:13.) Kilis ku skirbil ka skirbi se propi pensamentu. Ma “Spiritu Santu ku leba omis pa e fala palabras ku bin di Deus.”a (2 Pedru 1:21) Deus usa si spiritu santu pa nspira o pui omis skirbi si pensamentus. — 2 Timótiu 3:16.

2. Sera ki tudu jinti pudi benefisia di Biblia?

“Tudu nason ku rasa ku lingua ku pobu” pudi benefisia di bon noba ku sta na Biblia. (Lei Apokalipsi 14:6.) Deus sertifika pa Biblia sta dispunivel, na mas linguas di ki kualker utru livru ku ciga ja di ten. Kuas tudu jintis tene Biblia. I ka mporta elis i di kal tera, o kal lingua ke ta papia.

3. Kuma ku Jeova proteẑi Biblia?

Biblia skirbidu ku material ku ka ta tarda. Ma omis ku ama Biblia fasi kopia del ku kuidadu. Apesar di kuma jintis ku teneba puder tenta kaba ku Biblia, utrus staba dispostu pa pui se vida na pirigu pa pudi proteẑil. Jeova ka pirmiti pa kualker algin o kualker kusa tujil kumunika ku nos atraves di Biblia. Biblia fala: “Palabra di no Deus ta manti pa sempri.” — Isaias 40:8.

APRINDI MAS

4. Biblia konta kin ki si Dunu

Mostra VIDEO. Dipus Lei 2 Timótiu 3:16, i bo kombersa aserka des purguntas:

VIDEO: Kin ki Dunu di Biblia? — So un parti (2:48)

• Si omis ku skirbi Biblia, pabia ki comadu Palabra di Deus?

• Bu pensa kuma i normal fia di kuma Deus pudi transmiti si pensamentus pa pekaduris skirbi?

5. Biblia ka disparsi apesar di jintis tenta kaba kel

VIDEO: E Valoriza Biblia — So un parti (William Tyndale) (6:17)

• Sera ki sibi di sforsu ku fasidu pa proteẑi Biblia, ka ta dau vontadi di lei? Pabia?

Lei Salmu 119:97, dipus bo kombersa aserka des purgunta:

• Ke ku leba manga di jintis pui se vida na pirigu pa traduzi Biblia, i fasi pa jintis tenel?

6. Un livru pa tudu jinti

Na storia, Biblia i livru ku mas traduzidu i ku jintis mas tene. Lei Atus 10:34, 35, dipus bo kombersa aserka des purguntas:

• Pabia ku Deus misti pa si Palabra traduzidu na manga di lingua, i pa manga di jintis tenel?

• Kal kusa aserka di Biblia ku mas ta adimirau?

RUSUMU

Biblia i Palabra di Deus e ku manda Deus sertifika pa i sta dispunivel pa tudu jinti na mundu.

Rekapitulason

• I faladu kuma Deus nspira omis pa e skirbi Biblia, ke ku kila signifika?

• Ke ku adimirau manera ku Biblia ka kabadu kel, manera ki traduzidu i manera ki sta dispunivel?

• Kuma ku bu ta sinti di sibi kuma Deus fasi tudu es sforsu pa pudi kumunika ku bo?

No kaba es lison na dia:

Tenta fasi es

Kumsa bu leitura di Biblia kada dia atraves des tabela “Kumsa lei Biblia kada dia.”

Utru kusa ku bu pudi fasi:

Utru kusa ku bu pudi fasi

TENE MAS INFORMASON

Diskubri kuma ku Biblia kapli di tris ameasa garandi.

“Biblia — Un Storia ku Bali Pena Kunsi” (Sintinela N.° 4 2016)

Jubi kuma ku alguns jintis pui se vida na pirigu pa pudi traduzi Biblia.

E Valoriza Biblia (14:26)

Biblia kopiadu i traduzidu manga di bias. Kuma ku bu pudi tene serteza kuma si mensaẑen ka muda?

“Sera ki ke ku Sta na Biblia Mudadu?” (Artigu na internet)