Bu pudi yangasa bu objetivus spiritual

1. Kal difikuldadi ku manga delis entri nos tene ja?

BU CIGA ja di fiksa un objetivu spiritual i bu tene difikuldadi di yangasal?b Si ciga ja di kontisi ku bo, abo i ka uniku algin. Pur isemplu, Philip mistiba minjoria kualidadi di si orason, i ora manga di bias kada dia, ma i ta difisil tene tempu pa ora. Erika teneba objetivu di ba ta ciga sedu na nkontru di pregason, ma kuas na tudu saida i ta ciga sempri atrasadu. Tomáš tenta lei Biblia ntidu manga di bias. I fala sin: “N ka sibi son, ma N ka gosta di lei Biblia. N tenta tris bias, ma kada bias N ta kaba so na livru di Sirmonias.”

2. Pabia ku no ka dibi di disanima si no ka yangasa un objetivu spiritual?

² Si bu tene un objetivu spiritual ku bu ka yangasa inda, di fabur ka bu disanima. Mesmu un simplis objetivu ta iziẑi tempu ku sforsu garandi. Manera ku bu misti inda yangasa bu objetivu spiritual, ta mostra di kuma bu da balur pa bu amisadi ku Jeova i bu misti dal bu minjor. Jeova da balur pa sforsus ku bu ta fasi. I ka ta spera pa bu fasi mas di ki kil ku bu pudi fasi. (Sal 103:14; Mik 6:8) Pa kila, ora ku bu na kuji un objetivu kuji kil ku bu na pudi yangasa. Si asin, ke ku bu pudi fasi pa yangasal? No papia di alguns suẑestons.

DISENVOLVI UN DISEẐU FORTI DI YANGASA BU OBJETIVU

3. Pabia ki importanti disenvolvi un diseẑu forti di yangasa bu objetivu?

³ I importanti dimas pa tene un diseẑu forti di yangasa bu objetivu. Ora ku bu tene un diseẑu forti pa yangasa bu objetivu, bu ta fasi sforsu garandi pa yangasal. Diseẑu forti di yangasa no objetivu pudi komparadu ku korenti di yagu na un riu ku ta pinca un kanua pa i bai nunde ki dibi di bai. Ora ku korenti di yagu kontinua ten, algin ku sta na kanua na ciga nunde ki dibi di bai. Si korenti di yagu sedu forti, i na ciga mas sedu. Di mesmu manera, mas no tene diseẑu, mas no na misti yangasa no objetivus. Un ermon di El Salvador comadu David fala sin: “Ora ku bu tene un diseẑu forti, bu ta sforsa ciu, bu ka ta disa nada tujiu yangasa bu objetivu. Pa kila, ke ku bu pudi fasi pa tene mas diseẑu di yangasa bu objetivu?

4. Ke ku no pudi ora pa rel? (Filipensis 2:13) (Jubi tambi diseñu.)

⁴ Ora pa tene mas diseẑu. Atraves di si spiritu, Jeova pudi dau diseẑu di yangasa bu objetivu. (Lei Filipensis 2:13.) Utrora no ta fiksa un objetivu pabia no sibi di kuma no dibi di fasil, i es i un bon kusa. Ma i pudi sedu kuma no ka tene diseẑu di yangasal. I es ku kontisi ku un irma na Uganda comadu Norina. I teneba objetivu di diriẑi un studu di Biblia, ma si diseẑu pa yangasa es objetivu ka seduba forti dimas, pabia i pensa di kuma i ka pudi nsina Biblia diritu. Ke ku judal? I fala sin: “N kumsa ku pidi Jeova kada dia pa i aumenta ña diseẑu di diriẑi un studu di Biblia. N aẑi di akordu ku ña orasons, N sforsa pa minjoria ña kapasidadi di nsina Biblia. Dipus di puku misis, N nota di kuma ña diseẑu di diriẑi studu di Biblia aumenta. Na ki mesmu anu, N kumsa dus studu di Biblia.”

5. Ke ku no pudi pensa fundu nel, ku na judanu aumenta no diseẑu di yangasa no objetivu?

⁵ Pensa fundu na ke ku Jeova fasi pa bo. (Sal 143:5) Apostolu Paulu pensa fundu na bondadi ki ka mersi ku Jeova mostra pa rel, i kila dal diseẑu forti di tarbaja risu pa Jeova. (1 Kor 15:9, 10; 1 Tim 1:12-14) Di mesmu manera, si bu kontinua na pensa na ke ku Jeova fasi pa bo, bu na tene mas diseẑu di yangasa bu objetivu. (Sal 116:12) Jubi ke ku juda un irma na Onduras, yangasa objetivu di sedu pioneru regular. I fala sin: “N pensa ciu na kuma ku Jeova mostra amor pa mi. I tisin pa si organizason. Tambi i ta kuida di mi i proteẑin. Pensa fundu des manera aumenta ña amor pa rel, tambi i aumenta ña diseẑu di yangasa ña objetivus.”

6. Ke mas ku pudi judanu aumenta no diseẑu di yangasa no objetivus?

⁶ Konsentra na bensons di yangasa bu objetivu. Nota ke ku juda Erika, ku faladuba del na kumsada, ku objetivu ki tene di ciga na ora. I fala sin: “N nota di kuma N staba na pirdi ciu manera ku N ta ciga atrasadu na pregason. Ma ora ku N ciga sedu, N ta konsigi fala ermons ku irmas manteña i pasa tempu ku elis. Tambi N ta konsigi oja suẑestons pratiku ku na judan tene kontentamentu i minjoria ña pregason.” Erika konsentra na benefisius di ciga sedu, asin, i konsigi yangasa si objetivu. Kal bensons ku bu pudi konsentra nel? Si bu objetivu i di lei Biblia o minjoria bu orasons, pensa na kuma ku kila na torna bu amisadi ku Jeova mas forti. (Sal 145:18, 19) Si bu objetivu i di tene un manera di sedu kriston, konsentra na kuma ku kila na minjoria bu amisadi ku utrus. (Kol 3:14) Pabia ku bu ka na fasi un lista ku tene tudu motivus ku pui bu misti yangasa bu objetivu? Ba ta jubi ki lista sempri. Tomáš, ku faladuba del na kumsada fala sin: “Ora ku N tene manga di motivus pa yangasa un objetivu, N mas ta fasi sforsu pa yangasal.”

7. Ke ku juda Julio ku si minjer yangasa se objetivu?

⁷ Pasa tempu ku kilis ku na judau yangasa bu objetivu. (Dit 13:20) Nota ke ku juda Julio ku si minjer yangasa se objetivu di munda pa nunde ki ten mas nesesidadi. I fala sin: “No kuji amigus ku ta nkoraẑanu yangasa no objetivu, i no ta papia ku elis aserka di no objetivu. Manga delis yangasa ja es mesmu objetivu. Pa kila, e pudi danu ideias ku na judanu. Tambi no amigus ta puntanu kuma ku no planus sta na bai, e ta nkoraẑanu ora ku no pirsisa di nkoraẑamentu.”

ORA KU NO KA TENE DISEẐU DI YANGASA UN OBJETIVU

8. Ke ku pudi kontisi si no sta na sforsa pa yangasa un objetivu so ora ku no tene diseẑu forti di yangasal? (Jubi tambi diseñu.)

⁸ Na bardadi, i ta ten dias nunde ku anos tudu no ka ta tene vontadi di yangasa un objetivu. Sera ki es signifika di kuma bu ka pudi yangasa bu objetivu? Nau. Jubi un isemplu: Korenti di yagu pudi sedu un forsa garandi ku ta pinca un kanua pa nunde ki dibi di bai. Ma utrora, korenti di yagu pudi ka sedu forti, i ta ten dias ki ta sta suma si yagu ka sta na kuri. Sera ki es signifika di kuma, kanua ka pudi kontinua bai dianti? Nau. Algin ku sta na kanua pudi rema, asin i pudi kontinua bai nunde ki dibi di bai. No diseẑus i suma korenti di yagu, i ta ten dias ki ta sedu mas forti di ki utrus dias. I ta ten dias ku no ka ta tene diseẑu di yangasa no objetivu. Pa kila, si no sta na fasi sforsu pa yangasa un objetivu, so ora ku no tene diseẑu forti, no pudi nunka ka yangasa ki objetivu. Ma suma kin ku sta na kanua ta buska utrus manera di ciga nunde ki dibi di bai, anos tambi no dibi di sforsa pa yangasa no objetivu, mesmu si utrora no ka tene diseẑu di fasil. Na bardadi, i ka fasil fasi es. Ma bu na sta kontenti ora ku bu yangasa bu objetivu. Antis di no fala di ke ku no pudi fasi, no na fala di un purgunta ku algin pudi fasi.

9. Sera ki i mal pa no sforsa pa yangasa un objetivu mesmu si no ka tene diseẑu forti di fasil? Bu pudi splika.

⁹ Jeova misti pa no sirbil ku kontentamentu i di livri vontadi. (Sal 100:2; 2 Kor 9:7) Pa kila, sera ki no dibi di kontinua sforsa pa yangasa un objetivu spiritual si no ka tene diseẑu di fasil. Jubi isemplu di apostolu Paulu. I fala sin: “N ta kastiga ña kurpu, N ta pul bas di ña ordi”. (1 Kor 9:25-27, nota di studu na versikulu 27) Mesmu oca Paulu ka teneba diseẑu di fasi ke ku Jeova misti pa i fasi, i forsija si kabesa pa fasil. Sera ki Jeova staba kontenti ku ke ku Paulu fasi pa rel? Sin! Jeova bensua si sforsu. — 2 Tim 4:7, 8.

10. Kal ki benefisiu di sforsa pa yangasa un objetivu mesmu si no ka tene diseẑu forti di fasil?

¹⁰ Di mesmu manera, Jeova ta kontenti di ojanu fasi sforsu pa yangasa no objetivu, mesmu si no ka tene diseẑu di fasil. I ta kontenti pabia i sibi di kuma mesmu si no ka gosta di fasi ke ku no sta na fasi, no ta fasil pabia no amal. Suma ku Jeova bensua Paulu, i na bensuanu tambi pa sforsu ku no fasi. (Sal 126:5) Ora ku no nota bensons di Jeova, no pudi te mesmu kumsa ku tene diseẑu di yangasa no objetivu. Un irma di Polonia comadu Lucyna fala sin: “Utrora N ka ta misti bai pregason, prinsipalmenti ora ku N kansa. Nin ku sin, N ta tene kontentamentu garandi dipus di bai pregason.” Pa kila, no jubi ke ku no pudi fasi, ora ku no ka tene diseẑu di yangasa un objetivu.

11. Kuma ku Jeova ta judanu pa no sibi kontrola no kabesa?

¹¹ Ora pa pudi kontrola bu kabesa. Kontrola no kabesa i kapasidadi di kontrola no sentimentus ku no asons. Manga di bias kontrola no kabesa ta da ideia di tuji no kabesa di fasi ke ki mau. Ma, no pirsisa tambi di kontrola no kabesa pa pudi fasi ke ki bon, prinsipalmenti si i difisil fasil o si no ka tene diseẑu forti di fasil. Lembra di kuma sibi kontrola no kabesa fasi parti di frutu di spiritu. Pa kila, pidi Jeova spiritu santu pa i judau sibi kontrola inda mas bu kabesa. Es i un manera di sedu ku tene balur. (Luk 11:13; Gal 5:22, 23) David, ku no falaba del na kumsada, splika kuma ku orason judal. I mistiba ba ta fasi sempri si studu pesual. I fala sin: “N pidi Jeova pa i judan sibi kontrola ña kabesa. Ku si ajuda N konsigi kumsa un bon programa di studu, i studa sempri.”

12. Kuma ku Eklesiastis 11:4 pudi judanu yangasa no objetivus spiritual?

¹² Ka bu pera pa i ten bon kondisons. Nes mundu, talves no ka na ciga nunka di tene bon kondisons. Si no pera pa tene es kondisons, talves nunka no ka na ciga di yangasa no objetivu. (Lei Eklesiastis 11:4.) Un ermon comadu Dayniel fala sin: “I ka ten bon kondisons. Pa kila no ka dibi di pera, no dibi di so kumsa.” Un ermon na Uganda comadu Paul fala di utru motivu ku pui no ka dibi di adia kusas. I fala sin: “Ora ku no kumsa, mesmu si difisil, Jeova pudi judanu.” — Mal 3:10.

13. Pabia ki bon kumsa ku objetivus pikininu?

¹³ Kumsa ku objetivus pikininu. No pudi ka tene diseẑu pabia no objetivu pudi parsi difisil dimas pa yangasa. Si es i bu situason, pabia ku bu ka na dividil na objetivus mas pikininu? Si bu objetivu i di tene es manera di sedu, pabia ku bu ka na sforsa na mostral un bokadu un bokadu? Si bu objetivu i di lei Biblia ntidu, sera ki bu pudi kumsa na programa tempu di leitura mas kurtu? Tomáš, ku faladuba del na kumsada, fasi sforsu pa yangasa si objetivu di lei Biblia na un anu. I fala sin: “N nota di kuma N ta lei Biblia di un manera ku seduba rapidu pa mi. Pa kila, N disidi tenta mas utru bias, ma es bias N ta lei alguns versikulus kada dia i pensa fundu nelis. Pabia di kila, N kumsa ku gosta di ña leitura di Biblia.” Suma Tomáš gosta mas di lei Biblia, i kumsa ku pasa mas tempu na leil. I bin konsigi lei Biblia ntidu.c

KA BU DISANIMA ORA KU UN KUSA PUI PA I DIFISIL PA BU YANGASA BU OBJETIVU

14. Kal kusas ku pudi pui pa i difisil pa no yangasa no objetivus?

¹⁴ Infilismenti, mesmu si no tene diseẑu forti o no fasi manga di sforsu, i pudi sedu difisil pa no yangasa no objetivu. Pur isemplu, “kusas ku ka speradu” pudi toma tempu ku no pirsisaba di usa pa pudi yangasa no objetivu. (Ekl 9:11, Tradução do Novo Mundo) No pudi pasa un situason difisil ku disanimanu i pui pa no pirdi forsa. (Dit 24:10) Suma no sedu imperfeitu no pudi fasi erus ku pudi pui pa i mas difisil pa no yangasa no objetivu. (Rom 7:23) O talves no sta kansadu. (Mat 26:43) Ke ku pudi judanu vensi kusas ku pudi tujinu yangasa no objetivu?

15. Pabia ku bu ka dibi di disisti si un kusa kontisi ku pui pa i difisil pa yangasa bu objetivu? Bu pudi splika. (Salmu 145:14)

¹⁵ Lembra di kuma si un kusa kontisi ku tujiu yangasa bu objetivu i ka signifika di kuma bu dibi di disisti. Biblia fala di kuma no pudi pasa pa purblemas manga di bias. Ma i fala tambi di manera klaru di kuma, no pudi tenta mas yangasa no objetivu, prinsipalmenti ku ajuda di Jeova. (Lei Salmu 145:14.) Un ermon comadu Philip ku faladuba del na kumsada, fala sin: “N ka ta konsentra na tempu ku N ka konsigi yangasa ña objetivu. En ves di kila, N ta konsentra na tempu ku N kumsa sforsa mas pa yangasa ki objetivu.” David ku faladuba del na kumsada fala sin: “N ta tenta oja kusas ku kontisi ku tujin yangasa ña objetivu, i ka suma purblema, ma suma oportunidadi di mostra Jeova te kal puntu ku N amal.” Ora ku bu kontinua tenta yangasa bu objetivu mesmu si difisil, bu na mostra Jeova di kuma bu misti kontental. Jeova na kontenti ora ki ojau bu kontinua na sforsa pa yangasa bu objetivu!

16. Ke ku bu pudi aprindi si kontisi un kusa ku tujiu yangasa bu objetivu?

¹⁶ Aprindi di tempu oca ku un kusa kontisi ku tujiu yangasa bu objetivu suma ku bu mistiba. Pensa na ke ku kontisi, i punta bu kabesa: ‘Ke ku N pudi fasi pa es kusa ka kontisi mas?’ (Dit 27:12) Ma utrora si bu objetivu sedu difisil dimas pa yangasa, i pudi mostra di kuma i ka pusivel pa bu yangasal. Si bu pensa kuma es pudi kontisi ku bo, jubi mas bu objetivu si kontra bu na pudi yangasal.d Jeova ka na pensa di kuma bu ka bali nada, si bu ka konsigi yangasa bu objetivu. — 2 Kor 8:12.

17. Ke ku manda no dibi di lembra di kusas ku no fasiba ja?

¹⁷ Lembra di kusas ku bu fasiba ja. Biblia fala di kuma “Deus i ka injustu pa diskisi di bo tarbaju”. (Eb 6:10) Pa kila, bu ka dibi di diskisi tambi di ke ku bu fasi. Pensa na objetivus ku bu yangasaba ja. I pudi sedu tene un amisadi ku Jeova, papia ku utrus aserka del o batisa. Suma ku bu sforsa i bu yangasa objetivus spiritual na pasadu, bu pudi kontinua sforsa pa yangasa objetivu ku bu tene gosi. — Fil 3:16.

18. Ke ku no dibi di lembra del, ora ku no sta na sforsa pa yangasa no objetivu? (Jubi tambi diseñu.)

¹⁸ Ku ajuda di Jeova, bu pudi yangasa bu objetivu, suma ku mariñeru ta kontenti di ciga nunde ki dibi di bai. Ma, lembra di kuma manga di mariñerus tambi ta kontenti ora ke na fasi se bias. Di mesmu manera, sempri jubi kuma ku Jeova sta na judau, i kila na pui pa bu sedu filis nkuantu bu sta na sforsa pa yangasa bu objetivus. (2 Kor 4:7) Si bu ka disisti, bu na risibi bensons garandi. — Gal 6:9.