Fasi pa “fugu forti di SIÑOR” kontinua sindi

1. Kuma ku Biblia kompara amor di bardadi?

AMOR “ta yardi suma brasas di fugu, suma fugu forti di SIÑOR. Manga di yagu ka pudi paga amor, nin rius ka pudi lebal.”b (Kan 8:6, 7) Es i un komparason bonitu di amor di bardadi! Es palabras tene un bardadi nkoraẑanti pa kasadus: Bo pudi tene un amor ku ka ta kaba pa n̈utru.

2. Ke ku un kasal pudi fasi pa ka se amor fria?

² I pirsis sforsu pa un kasal kontinua ama n̈utru pa tudu tempu di se vida. Pur isemplu, fugu pudi kontinua sindi so si un algin kontinua buri leña. Si ningin ka fasi nada fugu na bin kaba pa paga. Di mesmu manera, amor di un omi ku un minjer pudi torna tambi forti si e torna se amisadi forti. Utrora, un kasal pudi sinti kuma se amor sta na fria, prinsipalmenti ora ke na nfrenta purblema finanseru, purblema di saudi o preson di kria se fijus. Si abo i kasadu, kuma ku bu pudi pui pa “fugu forti di SIÑOR” kontinua sindi na bu kasamenti? Nes studu no na fala di tris manera ku bo pudi torna bo amisadi forti i tene un kasamenti filis.c

MANTI BU AMISADI KU JEOVA FORTI

3. Kuma ku un amisadi forti ku Jeova ta juda un kasal manti se amor? (Eklesiastis 4:12) (Jubi tambi foto ku diseñu.)

³ Pa “fugu forti di SIÑOR” kontinua sindi, omi ku minjer dibi di sforsa pa tene un amisadi forti ku Jeova. Kuma ku es amisadi forti ku Jeova pudi juda na se kasamenti? Ora ku un kasal da balur pa amisadi ke tene ku se Pape ku sta na seu, e ta sta pruntu pa aplika si konsiju, es ta juda elis ivita i vensi purblemas ku pudi pui pa amor ke tene pa n̈utru fria. (Lei Eklesiastis 4:12.) Jintis ku tene un amisadi forti ku Jeova, ta fasi tambi se minjor pa sedu suma el, i kopia maneras di sedu di Jeova, suma bondadi, pasensa ku purdon. (Ef 4:32–5:1) Ora ku un kasal mostra es maneras di sedu i ta sedu mas fasil pa se amor kirsi. Un irma comadu Lena, ku fasi ja mas di 25 anu di kasamenti, fala sin: “I fasil ama i rispita un algin spiritual.”

4. Pabia ku Jeova kuji José ku Maria pa e sedu papes di futuru Mesias?

⁴ No jubi un isemplu ku Biblia fala del. Oca Jeova tenba di kuji papes pa futuru Mesias, i kuji José ku Maria, na metadi di manga di jintis di jorson di Davi. Pabia di ke? Kada un delis teneba si propi amisadi ku Jeova, i Jeova sibiba kuma e na pul na purmeru lugar na se kasamenti. Kasadus, ke ku bo pudi aprindi di isemplu di José ku Maria?

5. Ke ku omis pudi aprindi di José?

⁵ José aplika rapidu orientason ku Jeova dal, i kila fasil pa i sedu un bon omi. Pelu menus tris bias, i risibi orientason di Deus pa si familia. Na kada bias, i obdisi logu, mesmu oca ki tenba di fasi mudansa garandi. (Mat 1:20, 24; 2:13-15, 19-21) Suma i sigi orientason di Deus, José proteẑi Maria, i apoial, tambi i kuida del. Pensa na kuma ku kusas ku José fasi pui pa Maria aumenta amor ku rispitu ki tene pa rel! Omis, bo pudi kopia isemplu di José, ora ku bo na buska konsijus basiadu na Biblia na manera di kuida di bo familia.d Ora ku bo sigi es konsijus, mesmu si pirsis fasi mudansas, bo ta mostra kuma bo ama bo minjer, i bo ta torna bo kasamenti mas forti. Un irma na un tera comadu Vanuatu, ku fasi ja mas di 20 anu di kasamenti, fala sin: “Ora ku ña omi buska orientason di Jeova i aplikal, N mas ta rispital. N ta sinti suguru, tambi N ta tene konfiansa na si disisons.”

6. Ke ku minjeris pudi aprindi di isemplu di Maria?

⁶ Maria teneba si propi amisadi ku Jeova; si fe ka dipindiba di ke ku José fasi. I kunsiba Skrituras diritu. (Jubi nota di studu na Lukas 1:46.) I tomaba tambi tempu pa pensa fundu na ke ki aprindi. (Luk 2:19, 51) Sin duvida, amisadi ku Maria tene ku Jeova, pui pa i sedu un bon minjer. Aos tambi, manga di minjeris ta sforsa pa sedu suma Maria. Pur isemplu, un irma comadu Emiko fala sin: “Ocanba solteru N teneba ña propi programa spiritual. Ma dipus di N kasa, ña omi ta fasi orason i ta toma diantera na Adorason na Familia, e ku manda N nota di kuma N kumsa ku dipindi del pa fasi es kusas. N bin nota di kuma N pirsisa di karga ña propi kargu, ku sedu, manti ña amisadi ku Jeova forti. E ku manda gosi N ta ranja tempu pa ami propi N ora Jeova, N lei Biblia i pensa fundu na si Palabra.” (Gal 6:5) Minjeris, si bo kontinua torna bo amisadi ku Jeova forti, te mesmu bo omis na tene mas motivu di ama i ngaba bos. — Dit 31:30.

7. Ke ku kasadus pudi aprindi di José ku Maria aserka di adora Jeova juntu?

⁷ José ku Maria tarbaja tambi juntu pa manti se amisadi ku Jeova forti. E ntindi importansia di adora Jeova juntu suma familia. (Luk 2:22-24, 41; 4:16) I pudi sedu difisil pa e fasil, spesialmenti oca ke tene mas fijus, ma e konsigi fasil. Es i un bon isemplu pa kasadus aos! Si bu tene fijus suma José ku Maria, i pudi sedu difisil mati runions o ranja tempu pa Adorason na Familia. Te mesmu i pudi sedu difisil tene tempu pa studa o ora juntu suma kasal. Ma lembra di kuma ora ku bo na adora Jeova juntu, bo ta pertusi mas del i pertusi di n̈utru. Pa kila, bo fasi di adorason pa Jeova kusa mas importanti.

8. Ke ku un kasal ku tene purblema na kasamenti pudi fasi, pa benefisia mas di se adorason na familia?

⁸ Ke ku bu pudi fasi si bu sta na pasa purblemas na bu kasamenti? Ideia di sta juntu pa Adorason na Familia pudi ka sedu interesanti. Si sedu asin, bo kumsa ku un asuntu kurtu i interesanti, un kusa ku abos tudu dus bo konkorda pa papia del. Es pudi juda bos torna bo amisadi mas forti, i misti adora Jeova juntu.

BO PASA TEMPU JUNTU

9. Pabia ku omi ku minjer dibi di pasa tempu juntu?

⁹ Kasadus, bo pudi pui pa fugu di bo amor kontinua sindi, si kontra bo ta pasa tempu juntu. Si bo fasi es, i na juda kada un di bos sibi ke ku si kumpañer ta pensa i sinti. (Kum 2:24) Nota ke ku Lilia ku Ruslan diskubri puku dipus ke kasa 15 anus atras. Lilia fala sin: “No nota di kuma no ka na tene ciu tempu di pasa juntu suma ku no pensaba. No ta pasa no dias na tarbaju, na tarbajus di kasa, i mas tardi na kuida di no fijus. No diskubri kuma si no ka ta ranja tempu pa sta juntu suma kasal kila pudi lunjusinu di n̈utru.”

10. Kuma ku kasadus pudi aplika prinsipiu ku sta na Efésius 5:15, 16?

¹⁰ Ke ku kasadus pudi fasi pa pudi pasa tempu juntu? Bo pudi fasi un programa di tempu ku bo na pasa juntu. (Lei Efésius 5:15, 16.) Un ermon na Nijeria comadu Uzondu fala sin: “Ora ku N na programa ña atividadis, N ta programa tempu ku N na pasa juntu ku ña minjer, i N ta da ki tempu prioridadi.” (Fil 1:10) Jubi kuma ku Anastasia, minjer di superintendenti di sirkuitu na Moldavia, ta usa diritu si tempu. I fala sin: “N ta fasi ña atividadis pesual ora ku ña omi sta okupadu ku si responsabilidadis. Asin ora ki kaba, no ta pudi pasa tempu juntu.” Ma ke gora, si bo programa ta pui pa i difisil pa bo pasa tempu juntu?

11. Kal atividadis ku Ákila ku Prisila ta fasi juntu?

¹¹ Kasadus pudi aprindi ciu di isemplu di Ákila ku Prisila, un kasal ku rispitaduba ciu pa manga di kristons di purmeru sekulu. (Rom 16:3, 4) Apesar di kuma Biblia ka danu manga di informason aserka di se kasamenti, i kontanu di kuma e tarbaja juntu, e prega juntu i e juda utrus juntu. (At 18:2, 3, 24-26) Na bardadi, tudu ora ku Biblia na papia di Ákila ku Prisila, i ta papia delis dus.

12. Ke ku omi ku minjer pudi fasi pa pasa mas tempu juntu? (Jubi tambi foto ku diseñu.)

¹² Kuma ku kasadu pudi kopia isemplu di Ákila ku Prisila? Pensa na manga di kusas ku abo ku bu parseru bo pirsisa di fasi. Sera ki bo pudi fasi alguns des kusas juntu, en ves di kada kin fasi di sel? Pur isemplu, Ákila ku Prisila ta pregaba juntu. Sera ki bo ta fasi sempri planu pa fasi mesmu kusa? Tambi Ákila ku Prisila ta tarbajaba juntu. Talves abo ku bu parseru bo ka tene mesmu tarbaju, ma sera ki bo ka pudi fasi tarbajus di kasa juntu? (Ekl 4:9) Ora ku bo juda n̈utru na fasi un tarbaju, bo ta sinti suma un ekipa i bo ta tene oportunidadi di kombersa. Robert ku Linda fasi ja mas di 50 anu ke kasa. Robert fala sin: “Na bardadi, no ka ta pasa ciu tempu na divirtimentu. Ma ora ku N na ferga pratu, ña minjer ta sta na limpal o ora ku N na kuida di plantas i ta bin judan, N ta kontenti. Fasi es kusas juntu ta pertusinu di n̈utru. No amor kontinua aumenta.”

13. Pa tene union di bardadi, ke ku omi ku minjer dibi di fasi?

¹³ Ma lembra di kuma, sta juntu pudi ka signifika kuma, bo sta unidu. Un minjer na Brazil fala sin: “Aos, i ten manga di kusas ku pudi distrainu, i lebanu pensa di kuma no sta na pasa tempu juntu, so pabia di kuma no sta na un kasa. N aprindi di kuma no pirsisa di fasi mas di ki so sta juntu. N pirsisa tambi di da ña omi atenson ki mersi.” Nota ke ku Bruno ku si minjer Tays, ta fasi pa da n̈utru atenson. I fala sin: “Ora ku no na pasa tempu juntu, kada kin ta finka si telefoni, i asin no ta apruveita ben di ki tempu.”

14. Si un kasal ka gosta di pasa tempu juntu, ke ke pudi fasi?

¹⁴ Ma ke gora si abo ku bu parseru, bo ka gosta di pasa tempu juntu? Talves bo ka gosta di mesmu kusas o talves bo ta pui n̈utru paña raiba. Ke ku bo pudi fasi? Pensa na isemplu di fugu ku no falaba ja del. Ora ki kumsa sindidu i ka ta yardi janan ku forsa. I pirsis ba ta buri padas di leña garandi. Di mesmu manera, pabia ku bo ka na kumsa ku pasa nin si so un bokadiñu di tempu kada dia? Bo fasi un kusa ku abos dus bo gosta del, pa i ka sedu un kusa ku pudi pui pa un di bos paña raiba. (Tiagu 3:18) Si bo kumsa ku pasa un bokadu di tempu, bo amor na torna aumenta.

BO TRATA N̈UTRU KU RISPITU

15. Pa amor di kasadus kontinua sindi, pabia ku rispitu i importanti?

¹⁵ Rispitu i importanti na un kasamenti. I suma oksiẑeniu ku ta pirmiti fugu kontinua yardi. Sin oksiẑeniu, fugu na lestu ku paga. Di mesmu manera, sin rispitu, un kasal pudi nota di kuma se amor na fria rapidu. Pa utru ladu, un omi ku minjer ku ta sforsa pa mostra rispitu pa n̈utru, ta sta na tarbaja pa manti fugu di se amor. Ma lembra di kuma kiston i es: Ka bu pensa kuma bu rispita bu parseru, ma i si kontra bu parseru ta sinti di kuma bu rispital. Penny ku Aret fasi ja mas di 25 anu ke kasa. Penny fala sin: “Rispitu ku no tene pa n̈utru ta kria un bon ambienti na kasa. No ta sta avontadi pa papia, pabia no sibi di kuma, kada kin rispita opinion di si kumpañer.” Nton, ke ku bu pudi fasi pa juda bu omi o minjer sinti di kuma na bardadi bu rispital? Jubi isemplu di Abraon ku Sara.

16. Ke ku omis pudi aprindi di isemplu di Abraon? (1 Pedru 3:7) (Jubi tambi foto ku diseñu.)

¹⁶ Abraon trata Sara ku rispitu. I ta obi si opinions tambi i rispita si sentimentus. Un bias, Sara paña raiba, i konta Abraon si sentimentus, te mesmu i kulpal pa purblema. Sera ki Abraon paña raiba i ruspundil mal? Nau. I sibiba kuma Sara i un minjer ku ta baŝa si dianti, tambi i ta apoial. Abraon sukuta Sara i tenta risolvi purblema. (Kum 16:5, 6) Ke ku es ta nsinanu? Omis, bo tene otridadi di toma disisons pa bo familia. (1 Kor 11:3) Ma, minjor kusa di fasi i pensa na opinion di bu minjer antis di disidi, spesialmenti si sedu un disison ku na afetal. (1 Kor 13:4, 5) Utrora minjer pudi sta preokupadu, talves i na gostaba di konta ke ki na sinti. Sera ki bu ta sukutal diritu, i mostra kuma bu rispita si sentimentus? (Lei 1 Pedru 3:7.) Angela ku Dmitry fasi ja kuas 30 anu ke kasa. Angela fala aserka di kuma ku si omi ta fasil sinti di kuma i rispital. I fala sin: “Dmitry ta sta sempri pruntu pa sukutan, ora ku N paña raiba, o ora ku N misti so papia. I ta sukutan ku pasensa, mesmu ora ku N paña raiba.”

17. Ke ku minjeris pudi aprindi di isemplu di Sara? (1 Pedru 3:5, 6)

¹⁷ Sara rispita Abraon manera ki ta apoia si disisons. (Kum 12:5) Un bias, Abraon disidi risibi ospris ku ciga di repenti. I fala Sara pa i para ke ki staba na fasi, i purparal un kuantidadi garandi di pon. (Kum 18:6) Sara aẑi rapidu i fasi ke ku Abraon falal. Minjeris, bo pudi kopia isemplu di Sara, ora ku bo na apoia disison di bo omis. Si bo fasi kila, bo na torna bo kasamenti mas forti. (Lei 1 Pedru 3:5, 6.) Dmitry, ku faladuba del na paragrafu ku pasa, splika kuma ku si minjer ta fasil sinti kuma i rispital. I fala sin: “N ta kontenti ciu ku sforsu ku Angela ta fasi pa apoia ña disisons, mesmu ora ku no ka tene mesmu opinion. I si kusas ka sai ben, i ka ta kritikan.” I fasil ama algin ku rispitau!

18. Kal benefisiu ku kasadus pudi tene si e manti fugu di se amor?

¹⁸ Aos, Satanas misti paga fugu di amor ku ten na kasamentis kriston. I sibi kuma si un kasal pirdi amor ke tene pa n̈utru, e pudi kumsa ku lunjusi di Jeova. Ma, amor di bardadi ka pudi pagadu! Pa amor ku ten na bo kasamenti sedu suma kil ku faladu del na Kantiga di Salomon. Sta disididu pa pui Jeova na purmeru lugar na bo kasamenti, bo ranja tempu pa n̈utru, bo rispita sentimentus ku opinions di n̈utru. Si bo fasi kila, bo kasamenti na ngaba Jeova, Dunu di amor di bardadi, i suma fugu ku ta buridu leña, bo amor na kontinua sindi pa sempri.