Jeova pudi judau ora ku bu sta disanimadu

1-2. Kuma ku apostolu Paulu ta dati i sinti, i na kal sintidu ku no sedu suma el? (Romanus 7:​21-24)

KE KU bu ta pensa nel ora ku bu obi faladu di apostolu Paulu? Bu ta pensa na un misionariu koraẑosu, un algin ku ta nsina diritu o un algin ku skirbi manga di livrus di Biblia? Es i bardadi. Ma Paulu utrora ta sintiba tristi, disanimadu o ku manga di kudadi. Anos tambi aos, no pudi tene mesmu sentimentu suma Paulu.

² Lei Romanus 7:​21-24. Na karta ku Paulu skirbi pa Romanus, i fala di alguns di si sentimentus. Anos tambi no pudi tene mesmu sentimentu suma Paulu. Paulu seduba un kriston fiel, i mistiba obdisi Jeova, ma pabia di si erus, i ta seduba difisil pa i fasi sempri ke ku Deus misti. Tambi ora ku Paulu pensa na ke ki fasiba antis di sedu kriston, i ta sintiba kulpadu. Utrora i ta sintiba tristi pabia di purblemas ki teneba.

3. Ke ku no na bin fala del nes studu? (Jubi tambi nota bas di paẑina.)

³ Mesmu si utrora Paulu ta sinti tristia, i ta sforsa ciu pa ka pensa na kusas ku ta pul i sta tristi. Nes studu, no na ruspundi es purguntas: Ke ku pui Paulu fala di kuma el i algin “disgrasadu”? Ke ku juda Paulu pa i ka pensa ciu na kusas ku ta pul i sta tristi? I ke ku no pudi fasi ora ku no sta tristi?

KE KU PUI PAULU TA STABA TRISTI

4. Ke ku pui Paulu ta staba tristi?

⁴ Paulu lembra di mau kusas ki fasiba antis di torna kriston. Antis di sedu kriston, Paulu ku kunsiduba ku nomi di Saulu, fasi kusas ku mas tardi i bin ripindi. Pur isemplu, i oja nunde ku Stevon na matadu, i kontentiba ku kila. (At 7:58; 8:1) Tambi Saulu pirsigi manga di kristons, i trata elis mal. — At 8:3; 26:​9-11.

5. Kuma ku Paulu sintiba ku kusas ki fasi antis di sedu kriston?

⁵ Dipus ki sedu kriston, Paulu sintiba tristi dimas pa kusas ki fasi. Konformi tempu na bai, i ta sintiba mal pa mau kusas ki fasiba kontra kristons. Pur isemplu, oca ki skirbi si purmeru karta pa Korintius, serka di 55 EK, i fala sin: “N ka mersi pa N comadu asin, pabia N pirsigi igreẑa di Deus.” (1 Kor 15:9) Serka di sinku anu dipus, oca ki skirbi karta pa Efésius i fala sin: “Ami ki menus di tudu pobu di Deus”. (Ef 3:8) Dipus oca ki skirbi pa Timótiu, Paulu fala di kuma ‘i fala mal kontra Deus, i pirsigil, i njurial.’ (1 Tim 1:13) Ora ku Paulu bai kongregasons pa nkoraẑa ermons ku irmas, i dibi di sedu difisil kontra ku ermons ku irmas ki pirsigiba o kontra ku se familias.

6. Kal utru kusa ku ta puiba Paulu tene manga di kudadi? (Jubi tambi nota bas di paẑina.)

⁶ Paulu teneba purblema ku ta pul sufri ciu. Paulu kompara es purblema suma un ‘fidida na si kurpu’. (2 Kor 12:7) I ka fala di manera klaru ke ku ta pul sufri ciu. I pudi sedu un duensa o utru purblema ku ta pul teneba manga di kudadi.b

7. Ke ku manda i seduba difisil pa Paulu fasi sempri ke ki sertu? (Romanus 7:​18, 19)

⁷ Paulu ta fasiba erus. Paulu ta sforsaba ciu pa minjoria si manera di sedu. (Lei Romanus 7:​18, 19.) Ma i fala di kuma un ora i ka ta fasiba bon kusa ki misti fasi, i utrora i ta fasiba mau kusa ki ka dibi di fasi. I tambi fala di kuma, i ta sforsa ciu pa fasi ke ki bon, en ves di fasi kusas konformi si mau diseẑu. (1 Kor 9:27) Ma i ta fasiba erus. Bu pudi imaẑina kuma ki ta sintiba disanimadu, ora ki fala o fasi kusas ki ta sforsaba ciu pa ka fasi!

KE KU PAULU FASI OCA I STABA DISANIMADU?

8. Kal kusas ku Paulu fasi ku judal minjoria si manera di sedu?

⁸ Suma ki mostra na si kartas, Paulu pensa fundu na kuma ku spiritu di Deus pudi juda kristons, para pensa na mau diseẑus i minjoria se manera di sedu. (Rom 8:13; Gal 5:​16, 17) Paulu mostra di manera klaru, kal diseẑus ku komportamentu ku kristons dibi di ivita pa kontenta Jeova. (Gal 5:​19-21, 26) Es ta mostra di kuma, Paulu ta pensa na ke ki pirsisaba di fasi pa minjoria si manera di sedu. I dibi di studa Palabra di Deus pa buska konsiju, pa sibi kal mudansas ki pirsisa di fasi i kuma ki na fasil. No pudi tene sertesa di kuma i aplika konsijus ki da utrus.

9. Ke ku juda Paulu oca ki staba disanimadu?

⁹ Mesmu manera ku Paulu utrora ta sinti disanimadu, i tenba manga di kusas ku judal tene filisidadi. Pur isemplu, i ta kontentiba ora ki obi bon kusas di kongregasons ku sta lunju. (2 Kor 7:​6, 7) Tambi si amisadi ku si ermons ku irmas ta fasil sinti filis. (2 Tim 1:4) Tambi i sibiba di kuma i tene fabur di Jeova. Paulu seduba filis, pabia i pudi sirbi Jeova “ku bon konsiensia”. (2 Tim 1:3) Mesmu oca ki prindidu na Roma, i fala si ermons na fe, pa e “kontenti sempri na Siñor.” (Fil 4:4) Ora ku no lei es palabras di Paulu, no pudi ntindi di kuma, i ka tudu ora ki ta pensaba na si purblemas ku si erus. Ora ki kumsa ku pensa na kusas ku na disanimal, i ta kumsa ku pensa logu na kusas ku ta fasil sinti filis.

10. Kal utru kusa ku juda Paulu oca ki staba disanimadu? (Efésius 1:7) (Jubi tambi diseñus.)

¹⁰ Utru kusa ku juda Paulu kontinua tene kontentamentu i sakrifisiu di Jesus. I lembra di kuma Jeova amal, i da vida di si Fiju pa rel. (Gal 2:20; lei Efésius 1:7.) Pa kila, i teneba sertesa di kuma, pabia di sakrifisiu di Jesus, Jeova purda si pekadu, tambi i na kontinua purdal. (Rom 7:​24, 25) Es tudu juda Paulu pa i kontinua “sirbi” Jeova ku kontentamentu. — Eb 9:​12-14.

11. Pabia ku isemplu di Paulu ta nkoraẑanu?

¹¹ Suma Paulu, no pudi sinti di kuma no ten sempri ku sforsa ciu pa ka pensa, papia o fasi algun kusa ku ka na kontenta Jeova. Anos tambi no pudi fala suma Paulu ku fala: ‘Disgrasadu algin ku N sedu!’ Un irma comadu Elizac di 26 anu splika kuma ki ta sinti. I fala sin: “N ta sinti nkoraẑadu ora ku N pensa na situason di Paulu. N kontenti sibi di kuma Paulu tenba ku fasi mudansas suma mi. Es ta lembrantan di kuma Jeova sibi kal purblema ku si servus ta pasa.” Suma Paulu, ke ku no pudi fasi pa kontenta Jeova i sedu filis mesmu si utrora no ta sta disanimadu?

KE KU NO PUDI FASI ORA KU NO STA DISANIMADU

12. Ke ku no dibi di ba ta fasi sempri pa sta mas animadu?

¹² No dibi di kontinua fasi kusas ku na pertusinu mas di Jeova. Pensa nes: No ta sinti minjor ora ku no ta kume bon kumida, fasi sempri izersisiu i durmi diritu. Di mesmu manera no ta sinti nkoraẑadu, ora ku no ta lei Biblia kada dia, prega, purpara i mati runions i da kumentarius. No na sedu mas filis si no kontinua fasi es kusas. Fasi es, na judanu pensa na bon kusas, en ves di pensa na kusas ku na disanimanu. — Rom 12:​11, 12.

13-14. Kuma ku alguns ermons ku irmas sinti oca ke kontinua fasi kusas ku ta judanu pertusi di Jeova?

¹³ No jubi isemplu di John ku sibi di kuma i tene kankru ku 39 anu. Na kumsada i staba ku medu i ku manga di kudadi. I punta si kabesa: ‘Kuma ku N pudi sta duenti nes idadi?’ Ki tempu si fiju teneba so 3 anu. Ke ku juda John pa ka sinti tristi tudu tempu? I fala sin: “Mesmu si N kansa mal, N ta fasi pa ña familia bai tudu runions, bai pregason i no ta fasi adorason na familia kada semana. No ta fasi es kusas mesmu si difisil dimas.” John fala mas: “Ora ku no sta na pasa situason difisil, na kumsada no ta sta tristi dimas, ma dipus, no ta nota di kuma Jeova danu forsa ku no pirsisa del, tambi no ta nota di kuma i amanu. Jeova na judau suma ki judan.”

¹⁴ Eliza ku faladuba del fala sin: “Kada bias ku N bai runion, N fasi studu pesual, N ta lembra di kuma Jeova ta obin i na bardadi i aman, kila ta pun pa N sinti filis.” Nolan un superintendenti di sirkuitu na Afrika, fala sin aserka del ku si minjer Diane: “No kontinua ora, studa Biblia, bai runions i prega, mesmu si no sta disanimadu. Jeova sempri ta judanu pa no sedu filis. Ora ku no sta disanimadu, no ta tenta lembra di kuma Jeova na judanu i bensuanu. No ka sibi kuma ki na fasil, ma no sibi kuma i na fasil.”

15. Kal utru kusa ku no pudi fasi ora ku no sta disanimadu? Bu pudi da un isemplu.

¹⁵ Si no kontinua sta disanimadu, i ten utru kusa ku no pirsisa di fasi. Pur isemplu, imaẑina di kuma bu tene dur di kosta. Pa pudi sinti ben, talves bu na pirsisa di fasi mas di ki so pidi un algin na familia pa i fergau kosta. Bu pirsisa di sibi ke ku ta pui pa bu tene dur di kosta. Pa kaba ku dur di kosta talves bu na pirsisa di diskubri ke ku ta pui bu tene dur, i bu pudi te mesmu papia ku un mediku. Di mesmu manera, no pirsisa di fasi piskisa na Palabra di Deus, na no publikasons i te mesmu papia ku un kriston maduru, pa sibi kuma ku no pudi lida ku disanimu. I ten mas utru kusa ku pudi judanu.

16. Ke ku pudi judanu ntindi pabia ku no ta tene kudadi? (Salmu 139:​1-4, 23, 24)

¹⁶ No pidi Jeova na orason pa i judanu ntindi ke ku ta punu tene kudadi. Rei Davi sibi di kuma Jeova kunsil diritu. Pa kila, i pidi Jeova pa i judal ntindi pabia ki teneba kudadi. (Lei Salmu 139:​1-4, 23, 24.) Anos tambi no pudi pidi Jeova pa i judanu ntindi, pabia ku no tene kudadi i kuma ku no pudi sinti kalmu. No pudi tambi fasi no kabesa es purguntas: ‘Ke na bardadi ku ta pun kudadi? Sera ki i ten un kusa ku ta pui sempri N tene kudadi? Ora ku N kumsa pensa na kusas ku ta fasin sinti tristi, sera ki N ta sforsa pa pensa na utru kusa ku ta fasin sinti filis?

17. Kal asuntus ku no pudi studa ku na judanu pensa na kusas nkoraẑanti? (Jubi tambi foto.)

¹⁷ No pudi studa asuntus ku na da ku no situason. Utrora i bon studa un di maneras di sedu di Jeova, ku na nkoraẑanu. Pur isemplu, apostolu Paulu benefisia ciu, oca ki pensa na sakrifisiu di Jesus ku purdon di Jeova. Anos tambi no pudi sigi isemplu di Paulu i studa ke ku no pirsisa del. No pudi studa artigus na no publikasons ku na fala di maneras di sedu di Deus, suma miserikordia, purdon ku amor fiel. No pudi fasi lista di artigus ku judanu. Dipus no pudi pul na un kau ku no pudi ojal, i no pudi studa kil artigus mas, ora ku no sta disanimadu. Ora ku no lei versikulus ku faladu del na ki artigus, no pudi pensa fundu na kuma ku no pudi kopia Jeova, i kuma ku kusas ku faladu la, pudi judanu sta animadu. — Fil 4:8.

18. Kal asuntus ku alguns ermons ku irmas studa?

¹⁸ Eliza ku faladuba del, fasi piskisa aserka di Jo. I fala sin: “N pasa pa manga di purblemas na mesmu tempu. Pa kila, N studa isemplu di Jo. I teneba manga di purblemas, i staba disanimadu dimas. Ma mesmu manera ki ka sibi pabia ki staba na sufri, i kontinua konfia na ajuda di Jeova.” (Jo 42:​1-6) Diane ku faladuba del, fala sin: “Ami ku ña omi no ta studa livru Achegue-se a Jeová. No gardisi ciu Jeova manera ki sta na judanu pa no parsil kada bias mas. Ora ku no sta disanimadu pabia di no erus, no ta lembra di kuma Jeova ta nsinanu i judanu minjoria no maneras di sedu. Es pui pa no amisadi ku el torna mas forti.” — Isa 64:8.

NO PUDI TENE SERTESA DI KUMA JEOVA NA JUDANU I BENSUANU

19. Kuma ku no pudi sinti utrora, ma kal sertesa ku no pudi tene?

¹⁹ Mesmu si no aplika tudu konsijus ku fala del nes studu, utrora no pudi sinti tristi o tene kudadi. I pudi ten dia ku no na sta mas disanimadu! Ma ku ajuda di Jeova, no pudi para pensa na kusas ku ta disanimanu i sinti kalmu. No pudi tene sertesa di kuma, dias ku no na sinti filis na sedu mas ciu, pabia no tene bon amisadi ku Jeova i no sibi di kuma i ta kontenti ku ke ku no ta fasi pa rel.

20. Ke ku bu sta disididu pa fasi?

²⁰ No kontinua fasi no minjor pa ka disa no purblemas, kusas ku kontisi na pasadu o no erus, pui pa no para tene kontentamentu na vida. Jeova pudi judanu pa no para tene manga di kudadi. (Sal 143:10) No pudi spera vivi na nobu mundu, nunde ku tudu kusas ku no na pensa na fasinu sedu filis. Na ki tempu no ka na tene nin un tipu di kudadi. Kada dia ku no lanta, no na kontenti di sirbi Jeova, no Deus di amor!