Kuma ku bu pudi da balur pa sakrifisiu di Jesus?

1-2. Ke ku sakrifisiu di Jesus dibi di pincanu fasi, i pabia di ke? (2 Koríntius 5:​14, 15) (Jubi tambi diseñu.)

SI BU sta bas di prediu ku kai, i un algin bin judau, i tirau di la. Ke ku bu na sinti pa kil algin? Bu na kontenti dimas i bu na fasi tudu pa konta ki algin kuma, bu kontenti, i nunka bu ka na diskisi di ke ki fasi pa bo.

² Suma ki splikadu na studu ku pasa, no pirsisa pa un algin libertanu di pekadu ku mortu. I es ku Jeova fasi, i da si Fiju pa nos (1) pa i pudi purda no pekadus, (2) pa danu speransa pa no pudi tene vida perfeitu na futuru, i (3) pa i pudi tene amisadi intimu ku nos. Pabia di sakrifisiu di Jesus, no pudi tene speransa di vivi pa sempri na nobu mundu ku Jeova na tisi. Jesus mostra amor garandi pa pekaduris, oca i da si vida pa nos. Tambi i tene amor pa pekaduris mesmu antis di bin pa tera. (Dit 8:​30, 31) Apostolu Paulu fala di kuma ‘amor di Kristu ta pincanu.’ (Lei 2 Koríntius 5:​14, 15.) Es signifika di kuma, no dibi di da balur pa amor di Jesus, i nunka diskisi di ke ki fasi pa nos.

3. Pabia ku manera ku bu na mostra bu gardisimentu pa sakrifisiu di Jesus, pudi sedu diferenti ku kuma ku utrus ta mostral?

³ Di kal manera ku sakrifisiu di Jesus ta pincau? Bu resposta pudi diferenti ku resposta di utru algin. No pudi kompara pabia ki pudi sedu diferenti: Imaẑina di kuma tris jintis na bai pa un kau, ma kada kin kumsa bias na un sidadi diferenti. Kamiñu ke na toma i na sedu diferenti. Di mesmu manera, “kamiñu” ku bu toma pa yangasa bu objetivu, ku sedu, pa gardisi pa sakrifisiu di Jesus, dipindi di kuma ku bu amisadi ku Jeova sta gosi. Pa kila, es studu na fala di tris grupu di jintis: (1) Studantis di Biblia, (2) kilis ku batisa, i (3) kilis ku afasta di kongregason.

STUDANTIS DI BIBLIA

4. Kuma ku Jeova ta oja studantis di Biblia?

⁴ Si bu sedu studanti di Biblia, pensa nes: Bu misti aprindi aserka di Jeova ku nsinus di Biblia. Es ta mostra di kuma Jeova misti pa bu sedu si amigu, i sta na judau pa bu fasil. (Jon 6:44; At 13:48) Jeova “ta proba korsons.” Es signifika di kuma i ta kontenti ku sforsu ku bu ta fasi pa aprindi aserka del. Tambi i ta kontenti di oja kuma bu sta na fasi mudansas na vida pa pudi kontental. (Dit 17:3; 27:11) Sakrifisiu di Jesus ku pui pa bu pudi tene amisadi intimu ku Jeova. (Rom 5:​10, 11) Nunka ka bu diskisi des.

5. Kuma ku studantis di Biblia pudi aplika konsiju ku sta na Filipensis 3:16?

⁵ Si bu sedu studanti di Biblia kuma ku bu pudi mostra di kuma bu da balur pa sakrifisiu di Jesus? Un di maneras di fasi kila, i sigi konsiju ku Paulu da pa Filipensis: “Konformi lugar ku no yangasa na vida spiritual, no bai pa dianti.” (Fil 3:16) Pa kila, ka bu disa nada o ningin tujiu kontinua yanda na kamiñu pa vida. — Mat 7:14; Luk 9:62.

6. Ke ku studantis di Biblia pudi fasi si kontra i difisil pa fasi mudansas? (Ripitison di Lei 30:​11-14) (Jubi tambi foto.)

⁶ Ma ke gora si difisil di seta un nsinu di Biblia ku bu aprindi? Studa mas aserka di ki nsinu, i ora Jeova pa i judau ntindil minjor. (Sal 86:11) Si i kontinua sedu difisil pa bu ntindi un nsinu, para pensa inda nel pa un tempu, i kontinua studa Biblia. Talves bu pudi bin ntindi ki nsinu mas minjor. Ke gora si i difisil para fasi ke ku Biblia kondena? Lembra di kuma Jeova nunka ka ta pidi pekaduris pa e fasi ke ki difisil pa relis. Bu pudi fasi ke ku na kontental. (Lei Ripitison di Lei 30:​11-14.) Tambi Jeova purmiti judau. (Isa 41:​10, 13; 1 Kor 10:13) Pa kila, ka bu disisti. Ka bu pensa ciu na ke ki difisil pa bu fasi, ma pensa na tudu bon kusas ku Jeova fasi pa bo, prinsipalmenti pa manera ki manda si Fiju pa i muri pa bo. Konformi bu amor pa Jeova na kirsi, bu na nota di kuma “si mandamentus gora, nin e ka kansadu”. — 1 Jon 5:3.a

7. Ke ku jovens ku kirsi na familia Tustumuñas di Jeova dibi di pensa nel?

⁷ Ke gora si bo sedu jovens ku kirsi na un familia Tustumuñas di Jeova. Abos tambi i studantis di Biblia. Na bardadi, abos i studantis di Biblia mas importanti di bo pape ku mame. Biblia fala sin: “Bo ciga pertu di Deus; i ta ciga pa bos.” (Tiagu 4:8; 1 Kron 28:9) Ora ku bu fasi sforsu pa pertusi di Jeova, Jeova tambi na pertusi di bo. I ka pabia di kuma bu kirsi na un familia di Tustumuñas di Jeova ku ta pui Jeova nota di bo, ma i ta nota di bo pabia i misti pa bu sedu si amigu intimu. Ke ku pui pa bu pudi sedu amigu intimu di Jeova? I pabia di sakrifisiu di Jesus. Nunka ka bu disa di da balur pa ke ku Jeova fasi pa bo. (Rom 5:​1, 2) Pa kila, antis di mati Memorial des anu, pabia ku bu ka na pensa fundu na ke ku mortu di Jesus signifika pa bo? Pensa na kuma ku bu misti leba bu vida, ku objetivus ku bu pudi fiksa, pa mostra Jeova di kuma bu da balur pa ke ki fasi pa bo.b

KILIS KU BATISA

8. Kuma ku kilis ku batisa mostraba ja fe na sakrifisiu di Jesus?

⁸ Si bu batisa, bu mostraba ja fe na sakrifisiu di Jesus di manga di maneras. Pur isemplu, bu muda bu vida pa pudi kontenta Jeova, i sedu si amigu intimu. Bu obdisi mandamentu di Jesus di prega bon noba i nsina utrus aserka di Jeova ku Jesus. Bu dedika bu vida pa Jeova i bu batisa. Sera ki utrus sta kontra bo, pabia bu sta na sirbi Jeova? (2 Tim 3:12) Manera ku bu kontinua sirbi Jeova ku fidelidadi, es mostra di kuma bu ama Jeova i bu da balur pa sakrifisiu di Jesus. — Eb 12:​2, 3.

9. Kal pirigu ku kilis ku batisa dibi di sta atentu ku el?

⁹ Si bu batisa pa un tempu bu pirsisa di sta atentu ku un pirigu. No pudi kumsa ka da balur pa sakrifisiu di Jesus. Kuma ku es pudi kontisi? Pensa na ke ku kontisi ku kristons na Éfesu. Jesus ngaba elis pa manera ke kontinua firmi. Ma i fala elis asin: “N tene un kusa kontra bo: bu ka aman gosi suma ku bu amanba na kumsada.” (Apok 2:​3, 4) Suma ku Jesus fala, un kriston pudi kumsa ku fasi kusas pa Deus, ma i ka di tudu korson. Es algin pudi ba ta ora, bai runions i prega so pabia di kuma i kustuma fasil. I ka ta fasil mas pabia di amor. Ke ku bu pudi fasi si bu nota di kuma bu amor pa Jeova ka sedu forti suma ki seduba?

10. Kuma ku bu pudi “pui sintidu” i “pega tesu” na bu atividadis spiritual? (1 Timótiu 4:​13, 15)

¹⁰ Apostolu Paulu fala Timótiu pa i “pui sintidu” i “pega tesu” na si atividadis spiritual. (Lei 1 Timótiu 4:​13, 15.) Abo tambi bu pudi pensa na ke ku bu pudi fasi pa kontinua tene animu na adorason di Jeova, asin bu na kontinua sedu “kinti na spiritu”. (Rom 12:11; jubi nota di studu “Sejam fervorosos no espírito.”) Pur isemplu, talves bu pudi toma mas tempu pa purpara pa runions, i kila na judau presta atenson ora ku bu sta na runions. O ora ku bu na studa Biblia, talves bu pudi bai na un kau kalmu nunde ki na sedu mas fasil pa bu pensa na ke ku bu sta na aprindi. Des manera bu na apruveita mas di studu pesual. Suma ku bu pirsisa di buri leña pa fugu kontinua sindi, bu pirsisa tambi di fasi es kusas pa pudi kontinua da balur pa sakrifisiu di Jesus ku tudu utrus kusas ku Jeova dau. Tambi, pabia ku bu ka na usa semanas antis di Memorial pa pensa fundu na bon kusas ku bu tene na vida pabia bu sedu Tustumuña di Jeova? Es na judau da mas balur pa sakrifisiu di Jesus. Es sakrifisiu ku pui pa bu tene amisadi intimu ku Jeova.

11-12. Si pa un tempu bu sinti di kuma bu ka tene mesmu animu suma antis, sera ki i signifika di kuma Jeova para dau si spiritu santu? Bu pudi splika. (Jubi tambi foto.)

¹¹ Si pa un tempu bu ka tene mesmu animu na sirbi Jeova suma antis, es ka signifika di kuma Jeova para dau si spiritu santu. Lembra di kuma apostolu Paulu fala kristons di Korintu di kuma, mesmu el, utrora i ta pregaba kontra si vontadi. Ma i kontinua fasil, pabia i sibi di kuma i si responsabilidadi. (1 Kor 9:17) Ke ku no pudi aprindi di Paulu?

¹² Utrora Paulu ka ta teneba vontadi pa prega. Ma, i staba disididu pa kontinua prega, mesmu si utrora i ka ta teneba vontadi pa fasil. Bu pudi fasi mesmu kusa. Sta disididu pa fasi bon kusas, mesmu si utrora bu ka ta tene vontadi di fasil. Pa kila, ora Deus pa i dau “diseẑu ku puder pa kumpri si bon vontadi.” (Fil 2:13) Kontinua fasi kusas ku na judau pertusi mas di Jeova. Bu pudi tene sertesa di kuma, dipus di algun tempu bu amor pa Jeova na torna mas forti i bu animu na riba mas.

13. Kuma ku no pudi jubi no kabesa, pa sibi si kontra no sta “na vivi na fe inda”?

¹³ Di un tempu pa utru, i bon pa no jubi no kabesa, pa sibi si kontra no sta na vivi, suma ku Paulu fala na 2 Koríntius 13:5: “Bo jubi bo kabesa, bo julga si bo na vivi na fe inda.” Pur isemplu, bu pudi punta no kabesa: ‘Ora ku N pensa na kuma ku N sta na leba ña vida, sera ki i ta fika klaru di kuma ña sirvisu pa Jeova i kusa mas importanti pa mi?’ (Mat 6:33) ‘Sera ki ña manera di kuji kusas ku N na divirti kel, ta mostra di kuma N nuju mal?’ (Sal 97:10) ‘Sera ki N ta sforsa pa papia i fasi kusas ku na juda pa i ten pas ku union na kongregason?’ (Ef 4:​2, 3) Semanas antis di Memorial ta danu oportunidadi pa pensa na sakrifisiu di Jesus ku Jeova da. I ta danu oportunidadi tambi pa no jubi no kabesa i tene sertesa di kuma no sta na vivi pa Kristu, i ka pa no kabesa, suma ku apostolu Paulu fala.c

KILIS KU AFASTA DI KONGREGASON

14. Pabia ku alguns ermons ku irmas ta para mati runions?

¹⁴ Alguns ermons ku irmas para mati runions, dipus ke sirbi Jeova di manera fiel pa manga di misis o te mesmu pa manga di anus. Pabia di ke? Alguns ta sta kansadu pabia di “kudadi de mundu”. (Luk 21:34) Utrus fika mal papia di ke ku un algin na kongregason fala o fasi. (Tiagu 3:2) Inda utrus, fasi pekadu gravi i e burguñu pidi ajuda. I ka mporta kal ku sedu motivu, ke ku bu pudi fasi si bu para mati runions? Ke ku sakrifisiu di Jesus, ku amor di Jeova ku Jesus mostra pa bo, na lebau fasi?

15. Kuma ku Jeova mostra di kuma i ta preokupa ku kilis ku afasta di kongregason? (Ezekiel 34:​11, 12, 16)

¹⁵ Pensa na kuma ku Jeova ta sinti pa kilis ku afasta di kongregason. I ka ta paña raiba delis, i nin i ka diskisi delis. En ves di kila, i ta buska kilis ku afasta di kongregason. Ora ki oja elis i ta juda elis riba pa rel, tambi i ta da elis di kume na sintidu spiritual. (Lei Ezekiel 34:​11, 12, 16.) Sera ki Jeova ka na fasi mesmu kusa pa bo? I na fasil! Suma bu sta na studa es Sintinela, es ta mostra di kuma bu misti kontenta Jeova. Jeova oja bon kusas na bo oca ki judau kunsil i judau fasi parti di si povu. Sera ki i ka na misti pa bu riba pa kongregason?

16. Ke ku pudi juda kilis ku afasta di kongregason pa e riba pa Jeova? (Jubi tambi foto.)

¹⁶ Broŝura Volte para Jeová tene es palabras nkoraẑanti ku fala sin: “Bu pudi tene sertesa di kuma, Jeova na judau na tudu ke ku bu ta fasi pa riba pa rel. I na dau forsa ku bu pirsisa del pa lida ku preokupasons di vida di kada dia. I na judau pa bu ka fika mal, pabia di ke ku un algin na kongregason fasiu, tambi i na purdau i judau tene konsiensia limpu. Es tudu na pui pa i sedu mas fasil pa bu torna sirbi Jeova juntu ku bu ermons ku irmas.” Lembra tambi di kuma, ansions tene vontadi pa judau. E pudi sedu “abrigu kontra bentu, ku kau di sukundi kontra turbada”. (Isa 32:2) No sibi di kuma bu da balur pa sakrifisiu di Jesus, i bu misti mostral pa Jeova. Pa kila, punta bu kabesa: ‘Ke gosi ku N pudi fasi pa riba pa Jeova?’ (Isa 1:18; 1 Ped 2:25) Pur isemplu, sera ki bu pudi mati un runion na Salon di Renu? Sera ki bu pudi papia ku un di ansions, i fasil sibi di kuma bu misti ajuda pa riba pa Jeova? I pudi fasi aranẑu pa algin studa Biblia ku bo pa un tempu. Bu pudi tene sertesa di kuma, Jeova na bensua sforsu garandi ku bu fasi pa riba pa rel, i pa manera ku bu mostra di kuma bu da balur pa sakrifisiu di Jesus.

KE KU BU NA FASI?

17-18. Kuma ku no pudi usa ben no tempu antis di Memorial des anu?

¹⁷ Jesus fala di kuma Jeova mandal pa i da si vida pa ‘tudu kil ku setal ka ta pirdi, ma i ta tene vida ku ka ta kaba.’ (Jon 3:16) Suma Jesus muri pa nos, Jeova pudi libertanu di pekadu ku mortu. No ka dibi di para da balur pa sakrifisiu di Jesus. (Rom 3:​23, 24; 2 Kor 6:1) No toma tempu antis di Memorial pa pensa na amor ku Jeova ku Jesus mostra pa nos, i es na pui pa no da balur pa se amor.

¹⁸ Kuma ku bu na mostra di kuma bu da balur pa sakrifisiu di Jesus? Bu resposta pudi sedu diferenti ku utrus. Ma bu pudi tene sertesa di kuma Jeova na bensua bu sforsu, ku sforsu di manga di ermons ku irmas na mundu ntidu ku “ka vivi mas pa se kabesa, ma pa kil ku muri pa elis”. — 2 Kor 5:15.