¿Guañushcacunaca causaringachu?

BIBLIACA CAITAMI YACHACHIN

Guañushcacunataca ‘Taita Diosca causachinga.’ (Hechos 24:15, Traducción del Nuevo Mundo.)

CAITA YACHANACA ¿IMASHINATI AYUDAN?

Ñucunchi familia guañucpica mana demos llaquirishun (2 Corintios 1:3, 4).

Guañunataca mana achcata manchashun (Hebreos 2:15).

Guañushcacuna causarigrishcata tuqui shunguguan crishun (Juan 5:28, 29).

¿IMAMUNDATI BIBLIA NISHCATA CRINA CANCHI?

Cai yuyicunata rricushun:

• Taita Diosmundami tuquicunaca causita charinchi. Bibliapica Diostaca, “causita cuc yacu pugyu cuenta cangui” nin (Salmo 36:9; Hechos 17:24, 25). ¿Imamundati shina nin? Taita Dios tuqui gentecunamu, animolcunamu causita cushcamundami shina nin. Shinaiti paica guañushcacunata causachingapuca achca podertami charin.

• Ñaupa funllacunapica guañushcacunataca ñami causachirca. Bibliaca, cai allpapi 8 gentecunata causachirca nin. Paicunaca diferente edadta charic jaricuna, guarmicunami carca. Guaquincunaca rrecienlla guañushcami carca. Pero shuc vueltaca chuscu funlla guañushca jarishi causarirca (Juan 11:39-44).

• Taita Diosca guañushcacunata causachisha nin. Gentecuna guañucpica Taita Diosca achcatami llaquirin (Ezequiel 18:32). Chimundami paipu yuyipi charishca gentecuna cai allpapi causesha catichun munan (Job 14:14, 15).